LUKAHU 11
11
Na lii pa-ajaru-na i Miri Yehu rukuna na hamayangu
(Mat. 6:9-13, 7:7-11)
1La hau na lodu i Yehu hamayangu-nanya la hau pa-ngiangu. Nahàla pa-hamayangu, na haàtu welingu la makiku-nya napanii dànya, “Màla làti Miri kau ajaru-kama pa-hamayangu hama tuna i Yuhani ba na-ajaru-ha da makiku-nya,” wàna.
2Ka panii-nanjaka paraïna i Yehu, “Ka ma-hamayangu jàka wàmi, màta kai wunda timi yia,
‘Ama,
Nyumu Ala Ma-kamehangu-kau.
Mili àru Nyumu ka maraku-nggau dàngu ka tembikau.
3Wua-nggama hau lodu - hau lodu
ràka pangangu pangunu-ma.#ràka pangangu pangunu-ma: jàka ndia: pangangu pa-ngunungu nduma haromu.
4Jàmanja da njalama,
hamana nyumai duma ba majàma-nya na tau
na matuu manjala lai nyuma.
Àmbu pahia àru-nggama la pa-yàmihu na wai-manggau jàka ningu ma-pakamangu,’ ” wàmi.
5I Yehu napanii-nja da makiku-nya, “Era ningu haàtu welingu lai nyimi malua la uma anguna la padua-ka rudungu, ka napanii, ‘Ai, wuanda màla àru làti angu lu wua kàdinda roti tailu mbua, 6ba ninya na angunggu na ma-talànga laku rudungu, bidi li-ma-ana la umanggu, tàka nyungga nda ningu pangangu pawua-nggunya!’ ka wàna. 7Era hemana nuna na tau ngia pamaimu, ‘Àmbu paharui-ka na! Na pindu pakuhi-yaka tàka nyungga dàngu da ananggu mahuru-manyaka. Nda peku hadangu-nggu la pawua-nggau nyumu ngga - nggàra,’ ” wànaka.
8“Ka màla nggiki-naka?” wàna i Yehu ba na-pangala-nya. “Ka kupeka-nggai! Jiapa ka angu-nanggau nyumu, nda jia hadangu-ana la pawua-nggau ngga - nggàra. Na nyuna ba ngahamu panda makia la pa-karai pa-nutakungu lai nyuna, napa ka lupa na-hadangu-maka duna la pawua-nggaunya na pa-kalana-mu. 9Jia ba tuna, ka kupeka-nggai: Karaiwa, napa nyimi pa-wuangu-kai; himbuwa, napa nyimi mi-ngalangu; tundunguwa pindu, napa pa-bunggahungu-makai pindu. 10Nadu na tau na makarai napa nakei; na tau na mahimbu napa na-ngalangu, dàngu na tau na ma-tundungu pindu napa pa-bunggahu-nya pindu. 11Màla la hongami nyimi ningu nu ama mawua-nya ularu na anana, jàka nakarai-ya iyangu? 12Jàka ndia na mawua-nya tamihiku, jàka nakarai-ya tilu manu? 13Nyimi kaluka tau akatu-kai mipingu-ma pa-wuangu mahàmu la anami. Ka narihi-aipa duna na Ama la awangu! Nyuna napa na-wuangu-ya na Ngahuna lai nyimi na makarai-ya Nyuna!” wànanja.
I Miri Yehu dàngu i Mbeluhembulu
(Mat. 12:22-30; Mrk. 3:20-27)
14La hau na lodu i Yehu nawàngga-ya na wàndi akatu welingu la haàtu tau kambiu. Ba naluhu-ka nuna na wàndi akatu, ka kareuku-nanyaka nuna na tau. Dangu na tau na ma-hangàtaru, 15tàka ninya hawiangu na mapanii, “Nyuna hi peku wànggana wàndi akatu ba wàngu-nanya kuaha-na i Mbeluhembulu, na kapala wàndi akatu-du,” wàna.
16Nimbunjai hawiangu da tau ma-patikingu pakahili-ya i Yehu, hi dakarai-ya patuu hau pa-hangàtarungu ka nanjadi tanda ba ma-pawelingu lai Alaya Nyuna. 17Tàka i Yehu napi-manya na pawuku-da. Hi napanii-nja nyuda, “Na hau nanggara jàka nambera, na-pabiwangu la ba - banjaru da ma-maràngga pa-muhungu, nda na-torungu-a nuna na nanggara. Dàngu na hau na kuru uma na ma-paihangu, hi da-pamuhungu dàngga anguda, làjaru-nanyaka duna. 18Tuna numbu na pa-hanganji-na i Kambàliku; jàka na hau kalibaru na-palumungu dàngu na hau kalibaru, tanyànggaru-nanyaka duna na pa-hanganji. Na paniimi nyimi, wàngu-nanya kuaha-na i Mbeluhembulu duna hi nawàngga wàndi akatu, wàmingga. 19Jàka tuna nu, nggamu kuaha-daka da makiku-nggai nyimi ba dawàngga wàndi akatu? Da makiku-nggai nyimi wikima-a da ma-pakaràngi-ya ba njala-minya nyimi! 20Nyungga duku ba kuwàngga wàndi akatu wànggunya na kuaha-na i Ala, tàka nuna tandana i Ala ba pakiringu-nanyaka pa-pareta la hongami nyimi.
21Na haàtu tau kapàru, ka màtu madàka-mana ba namangga-nya na uma wikina, damara ndàbama napa da manguna. 22Tàka jàka ningu tau marihi kapàru na mahada lumbatu-nya ka natalu-ya, na tau na marihi kapàru nuna ramba-nanjaka duna mbuu ndàbada da ma-dàkana da pamonu-na làti na mangu umangu, hàla paberi hàla-danjaka da malanja-na.
23Na tau na manda wai angungga, langatàka ndubaku-nangga Nyungga, dàngu na tau na manda pambapa dàngga Nyungga, langatàka paruha-nanya na paràma-nggu!” wàna.
Nanjànga belina na wàndi akatu
(Mat. 12:43-45)
24“Era dunjaku-nanya wàndi akatu na haàtu na tau, wenangu-nanyaka la hau pangia - hau pangia nuna na wàndi ba nahimbu mamàdu ngia pa-hangahu-na, tàka nda na-hunggungu. Jia ba tuna, panii-nanyaka, ‘Napa ka kubeli la uma memangu na pa-dunjaku-nggu!’ wànaka. 25Ba natàka-ka lai nu, ita-nanyaka na uma ba nabulu dàngu ba na-àhalu. 26Hàla lua-nanyaka pawànda mapihu anguna pawàndi marihi akatu welingu lai nyuna. Tunaka nu tama-danyaka la tau nuna hi da-engangu lai nu. La malamiri na ngerana na tau nuna rihi iraku-naka welingu la wungana!” wàna.
Na pa-ohangu na ma-langatàka
27Ba nahàla-ka papanii tuna nu i Yehu, na haàtu na kawini la honga tau dangu napanii lai Yehu, “Oha langatàka-na na kawini na ma-paana-nggau Nyumu dàngu na ma-pahuhu-kau!” wànanya.
28Tàka nahema i Yehu, “Rihi oha-napa na tau na marongu-ya na puluna i Ala dàngu ba nawa-manya!” wàna.
Nakarai-ya tau i Miri Yehu ka na-patumbu pa-hangàtarungu
(Mat. 12:38-42)
29Ba talànga langgungguru-nanyaka tau i Yehu, pangala-nanyaka na kareuku-na, “Ma-akatu langatàka-ya na tau la rehi nàhu. Nyuda karai-danya hau pa-hangàtarungu ka peku wai-dangga Nyungga, tàka nyuda nda pa-wuangu-aha ana haumbu pahangàtarungu, mbulungu-ana na pa-hangàtarungu rukuna i Wunangu Yunuhu. 30Hama tuna i Wunangu Yunuhu ba pa-hangàtaru wàdanya da tau la paraingu Naniwa, tumbuna na Ana Tau napa ba pa-hangàtaru wànanya na tau la rehi nàhu. 31La lodu njàpu awangu tana, napa na Maràmba kawini welingu la tana mbara luru nahada pa-kariangu da tau la rehi nàhu, hi na-panjala-ha nyuda. Nadu keha ka kurongu-ha da pa-ajaru-na i Halomu na ma-manggàna ba wàna, nahadangu palaku-nya na ngarangia na mambana marauna welingu la hupu tana. Tàka nàhu lai yiahu ninya na haàtu na marihi bokulu welingu lai Halomu! 32La lodu njàpu awangu tana, na tau na ma-mandapu-nya la Naniwa napa hada pa-kariangu-danyaka da tau la rehi nàhu, hi da-panjala-ha nyuda, nadu na tau Naniwa duna ba da-pambelingu welingu la njalada ba jiaya na pa-bobarungu-na i Yunuhu lai nyuda. Tàka nàhu lai yiahu ninya na marihi bokulu welingu lai Yunuhu!” wàna.
Na harii dàngu na kapàtangu
(Mat. 5:15, 6:22-23)
33“Nda ningua tau ma paketingu epi palita, tàka hi nawini-nya jàka ndia hi na-panggàbi-nya mbàlu.#La lawiti ndai da manda pirada nda ningu kareuku tungu yia: jàka ndia hi na-panggàbi-nya mbàlu. Nyuna natu-maya duna nuna na palita la tandai palita, ka peku ita-nanya na hariina paraina tau na matama. 34Da wua matanda palita tau-ndanja. Jàka da-kahingiru da wua matamu, jia hi na-hambila hàla na ihi daamu. Tàka jàka da-hambala da wua matamu, jia hi na-kapàtangu hàla na taumu. 35Jia ba tuna nu, pananjarungu, na harii na maninya lai nyumu ka àmbu jia kapàtangu-na. 36Jàka naharii na ihi daamu, ka àmbu ningu ndoku hawutu ma-kapàtangu, jia hi nahabola hàla na taumu hama tuna ba na-handaraku-nya hambila palita,” wàna.
I Miri Yehu na-panjala-ha da tau Parihi dàngu da ngguru anggama
(Mat. 23:1-36; Mrk. 12:38-40)
37Ba na-panjàpu-yaka na kareuku-na i Yehu, na haàtu na tau Parihi nawànda-ya i Yehu pangangu la umana. Ka lua-nanyaka i Yehu pangangu lai nu. 38Na-hangàtaru na tau Parihi ba naita-ya i Yehu ba nda nabaha pàku limana, hama tuna na kalaratu anggama. 39Jia-duyaka i Miri hi napanii-nya, “Tubana nyimi tau Parihi bai kàli bahaha da kaba dàngu da kawinga la liuda, tàka daa la kuru wikimi mbinu wànguna padua ma-pajànggilu dàngu ma-akatu. 40Minduba nyimi! Màla i Ala ba nawulu-ya na liuna, nda nawulu mbuya na kuruna? 41Na maninya daa la kuru kaba dàngu kawinga-mu, nudaha bàdi kai wuanja da tau mila. Ba timi nu jia hi naili hàla lai nyimi.
42Ura-amika nyimi tau Parihi! Nyimi bai wotuha lai Ala da hangia la hakambulu da ihi wokami, hama tuna da kandangu, da wàla hanggi, dàngu da rungu hangia-hangia, tàka pehaku-minyai na pa-deningu dàngu na mbuhangu lai Ala. Làti nuna-yapa bàdi na pawàngu, tàka hawiangu nda pa-pehaku-mbunjai.
43Ura-amikia nyimi tau Parihi! Nyimi ma-matarungu pangia tau patembi la uma bungguru, dàngu ka natembi-ta tau ba wàmi la parànggangu. 44Ura-amika nyimi tau Parihi! Nyimi beri hama tuna na reti panda tungu tanda, na pa-kalijaku tau dàngu nda pambuti-nya,” wàna.
45Na haàtu na ngguru anggama napanii lai Yehu, “Umbu Ngguru, nudaka da papanii-mu paaka-mu-nggama nyuma-mbuduka!” wàna.
46Nahema i Yehu, “Ura-amika nyimi-mbu ngguru anggama! Nyimi mi-karuhi-ya na hangia - hangia na ma-kalutu dàngu bai wuangu-ha da kalaratu mambotu, tàka nyimi ndai pa-ndulangu-mbu ka napingu pawànja tau. 47Ura-amika nyimi! Bai pandoi-nja reti da wunangu, tàka hi jia-madu-hai da boku wikimi la mangilu da ma-pameti-ha. 48Jia ba timi nu mangaku wiki-ma-ami-nyaka bai oranya na paraï rukuda da boku la mangilumi; ka ba tuba nyudadu da ma-pameti-ha da wunangu, tàka hi nyimi ma-pandoi-nja retida. 49Jia-duyaka hi nalara liinya na manggàna-na i Ala, ‘Napa ku-paràha-nja da wunangu dàngu da papalewa-nggu; hawiangu da-pameti-ha tàka hawiangu da-pamayila-ha!’ wàna. 50Hi nalaku-nya nuna i Ala, ka peku hukunya na tau la rehi nàhu, rukuna ba pameti-ha da wunangu mbuu ndàbada piti welingu ba padika-nya na tana, 51piti welingu ba pameti-ya i Hambilu lupa tomaya ba pameti-ya i Hakaria, na matumbu la manggawa ngia pawotu maraku dàngu Umana i Miri. Iwaiya: Da tau la rehi nàhu jiangu-maka duna ba hukunya kirina nuna mbuu ndàbana.
52“Ura-amika nyimi, ngguru anggama! Na kuhi na pa-bunggahu wànya na pindu papingu wàngu ba nyimidu makata-nya, tàka nyimi wiki ndai bihu patama la pahimbu papingu wàngu. Na-panjàngangu-na nyimi wikimai mapara - ratahu-nya na tau na ma-pamukarungu patama lai nu!” wànanja.
53Ba na-dunjaku-nyaka i Yehu lai nu, da ngguru anggama dàngu da tau Parihi panjàla nda uku-danya i Yehu. Da-kamangu pairu - irunya kareuku ka màtu - màtu papanii-na ba wàda. 54Nu ba talànga tuna nu hamata-madanya ka peku yàpa-ndanya jàka ningu ma-hanjàliru papanii-na ba wàda.
လက်ရှိရွေးချယ်ထားမှု
LUKAHU 11: KAM
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@LAI 1995 Indonesian Bible Society (Lembaga Alkitab Indonesia)