LUKAHU 12
12
Na lii panamu hahangu ndumada da tau ma-kaleka eti
(Mat. 10:26-27)
1Handàka, pa-ngguharungu-nanyaka na tau dangu ba nda pira rata biaya, hi lupa ningu patarohaku weli wihingu. Ba talànga langgungguru tunaka nu na tau, i Yehu napanii-nja da makiku-nya, “Ipa-nanjarungu la muru tau Parihi, na-pawuku-nggu, na kapelu-da. 2Nda ningua pa-winingu napa na manda wuwa, dàngu nda ningua pa-kàpingu napa na manda ta-lunggaru. 3Na papanii-mi la rudungu, napa parongu-ya la harii; dàngu na pa-kanguruku-mi la kahilu tau daa la kuru pa-kàpitu, napa na-hamboka la nggi - nggi,” wànanja.
Mangàdatu-nyawa i Miri
(Mat. 10:28-31)
4“Namuya, angunda! Àmbi mangàdatu-dunja nyuda da ma-pameti-ha da taumi hàla-ka nu ba nda hilu nggikina wàda-apa. 5Màta ka kupeka-nggai jàka nggamuya bàdi na ràka pa-mangàdatu-mi. Mangàdatu-nyawa i Ala! Nadu jàka nahàla pa-pameti, ba na-kuaha-mbui pawàru-nggai la naraka! Iwaiya, Nyuna-a bàdi kai mangàdatu-nya.
6Kai tàngaru-ha da manginu, ba lima ngiuda ana dàmbu ndui-a wilida. Ba tuna nda heu-a pa-maromba-na i Ala. 7Na lunggi la katiku-mbumu mbàda diha hàla-nanyaka, jia àmbi mangàdatu; nyimi marihi raumipa la pa-pawilingu welingu la manginu dangu!” wànanja.
Pekaya i Karitu la mbabu tau
(Mat. 10:32-33, 12:32, 10:19-20)
8“Namu pahàmu-nya: Na tau na mapeka la hangga mbabu tau, nyuna ba ma-kikungu lai Nyunggaya, nyuna napa napeka-mayai duna paraïna Ana Tau la hanggada da papalewa-na i Ala. 9Tàka na tau na ma-pahini-ngga la mbabu tau ba ma-kikungu lai Nyunggaya, napa nyuna na-pahini-manyai duna paraïna Ana Tau la hanggada da papalewa-na i Ala.
10Era ningu mapulu-nya na Ana Tau peku-napa la pajàma-nya; tàka era ningu malapi-ya i Ngahuna i Ala nda pa-jàmangu-ayapa.
11Jàka ningu mangàndi-kai nyimi la uma bungguru ka patanda-nggai ngera la hangga ma-pareta jàka ndia ma-kuaha, àmbi kadiku-dunya jàka nggikina wàmi bai kahiri wikimi jàka ndia jàka nggàra wàmika bàdi bai kareuku. 12Nadu jàka nggàraka bàdi papanii-mi, napa i Ngahuna i Ala duna na mapuru pekanggai la rehina,” wànanja.
Na pangerangu tau wulu na manduba
13Na haàtu na tau la honga tau dangu napanii lai Yehu, “Umbu Ngguru, kamangu làti kau paràha-nya na angunggu paluhu, ka nawua-ngga duku hawiangu banda pa-bànjalu amama,” wàna.
14Nahema i Yehu, “Angu mbuha, ka nggamuka mawotu-ka Nyungga pa-hakimu jàka ndia matanggu paberi-nggai banda kangeha nyimi tau madua?” hi wàna. 15Tunaka nu i Yehu hi napanii-nya na tau mbuu ndàbana na maninya lai nu, “Pananjarungu dàngu rimangu, ka ambi tàka la pa-manganga eti. Nadu na lurina na tau nda jiaya na pawulu wàngu pàku na pa-monungu, jiapa ka dabundu làndangu da pawulu-na.”
16Hàla i Yehu hi napeka-ya yiana na pangerangu, “Ninya na haàtu na tau wulu. Nyuna ningu tanana na madangu ihina. 17Nuna na tau wulu kanandingu-nanyaka daa la etina, ‘Nda ningupa pa-ngiangu ngia pa-bànjalu-nggunja da ihi tananggu. Nggàra ngarangia-ka bàdi pawànggu?’ wàna. 18Tunaka nu hilu kanandingu-nanyaka daa la etina: Ninguka ngarangia pawànggu; da uma uhunggu napa ku-paràhangu pa-nyànggaru-ha, ka kuhili pahadangu marihi bokulu. Lai nu napa ku-pahàmu niha da uhu nggàndumu-nggu dàngu da malanja-nggu hawiangu. 19Tunaka nu napa kupanii la eti wikinggu, ‘Wangu-manaka dumu! Mbuu ndàbana na mahàmu lai nyumu hàla-yaka, nda palu hàla-ahapa jiapa nda pira mbua ndaungu mandaina. Hangahu kàdiwa nu nàhu! Ngangu ngunungu-wa, kau pàdanya na hàmuna na lurimu, ka wànggunya na wikinggu,’ wànaka. 20Tàka i Ala napanii-nya, ‘Ha manduba! La rudungu ni-ma-aka napa bau meti, hàla nggamuka mangala-nja mbuu ndàbada da pawùlu-mu, da pambàda pauhi-mu nduma wikimu?’ wànanya.
21Tuna nuduka na hupu njàpuna na tau - tauka na ma-pamukarungu la pawùlu nduma wikina, tàka nda na-pamukarungu la pawulu la matana i Ala,” wàna.
Ipawaiwa lai Ala
(Mat. 6:25-34)
22Hàla i Yehu napanii-nja da makiku-nya, “Jia-duya hi ku-pekanggai, ‘Àmbi kadiku-dunya na lurimi, nggàra-aka panganda jàka ndia nggàra-aka papaki-nda ba wàmi.’ 23Na luri narihi-pa welingu la pangangu, dàngu na taumi narihi-pa welingu la paki. 24Tàngaru-ha da nggangga! Nyuda nda da-tondungu, nda damuti, dàngu nda ningumbu kuru pangada jàka ndia uma uhuda. Tàka i Ala rada-nanja padua! Nyimi mi-pawilingu-pa welingu la ma-hawurungu! 25Nggamu-yaka lai nyimi ba ruku kadiku-na na-ngalangu pamalai-ya na lurina ka luka ana hawutu?#pamalai-ya na lurina ka luka ana hawutu; jàka ndia: ma-bonjangu pajangga ka luka ana hawutu-ana. 26Ka jiapa na maana hakudu tungu nu ndai màkadu palaku-nya, nggikina hi mi-kadiku-nya rukuna hangia - hangia hawiangu? 27Tàngaru-ha da wàla mangàta ba datumbu; nda daràma, nda da-tinungu-mbu. Tàka jiapa i Hanganji Halomu na mambana wuluna nda jia paki-mbuna ngaü manandangu hama tuna nuda da wàla ai! 28Da rumba la maràda da matumbu la lodu nàhu tàka haromu da patunu palàpu la epi. Ba tuna i Ala nawotu-nja ngaüda da rumba ma-manandangu tungu nu. Ka rihi-aipa dimi nyimi! Tàka nyimi najapu na pawaimi! 29Jia ba tuna àmbi kadiku dàngu àmbu hondaru-du na ngerana jàka nggàra pangami dàngu pangunu-mi. 30Jiaha da matuda numaka da pakeha-na na tau na manda tandaya i Ala. Làti duna na Amami napi-manya nuda nu mbuu ndàbada ba jiaha da pa-kalana-mi. 31Tàka màtawa nu kai pa-mukarungu ka jiaya i Ala na ma-pareta-ya na lurimu, jàka jia-haka nuda hawiangu, napa nawua-manggainja duna paraïna i Ala,” wànanja.
Da banda la awangu
(Mat. 6:19-21)
32“Nyimi maana hawutu-ana na dangumi, àmbi mangàdatu! Nadu na Amami ba nahàmu-ma na etina la pawua-nggainya na kanyuru-na na pareta-na. 33Dangganja da mangumi tàka da àmahu wilida paberi-nja la mamila. Pandoi nduma wikimi halopa nda mobu, nu da banda da pa-pahàmu la awangu. Da banda nuda nda da-mbulangu-a paraï ruku ma-manganga dàngu nda ningumbu manganii ma-paruha-ha. 34Nadu nggiha da bandamu, lai nuya na etimu!” wàna.
Na ata na ma-rimangu mànu
35“Imangga rima mànungu padua pa-hanobaku-ya na lii hangia - hangia. Màta kai rimangu padua la pawotu pakimi dàngu na palita-mi ka naroka mànu, 36hama tuna da ata da ma-patia-nya-padua na mirida ba nabeli welingu la remi pamaü papa. Jàka na belika na mirida dàngu ka na-tundungu pindu, ka bunggahu parengga-mada-nyaka duna na pindu. 37Wangu langatàka-na da ata ba natàka na mirida ba dàngu rimangu-da-padua. Iwaiya: nuna na mirida napa na-hawanjiru, hi na-paràha-nja da atana pa-mandapu, hàla hi natanggu paloku-nja pangangu. 38Wangu langatàka-manaka da ata jàka natoma-nja paraïna mirida ba dàngu rimangu-da-padua panedi-nya, jiapa ka natàka wàngu mandalora jàka ndia ka na-làpahu-aipa! 39Inamu-maya yiana! Làti na mangu umangu jàka napinya njàmu pira rapa tàkana na ma-manganga, napa na-manggangu-maka duna ka àmbu peku tamana na ma-manganga la umana. 40Jia-duya nyimi màta kai mangga rimangu, nadu na Ana Tau ba jia tàkangu wàna bia la rehi panda mbutimi,” wàna.
Da ata da ma-tuturu dàngu da manda tuturu
(Mat. 24:45-51)
41“Miri, nu na lii papekangu-mu, jia-kama nyumaka palamu, jàka ndia hi lamunya na tau mbuu ndàbana?” wàna i Peturu.
42Nahema i Yehu, “Nggamuya na ata na ma-tuturu dàngu na ma-manggàna hi lupa nawotu-ya paraï na mirina la pa-kapala-nja da anguna paata hi peku paberi-nanja pangangu jàka jiaya na rehina? 43Oha pàku-anaka na ata nuna, era belina na mirina ba natoma-nya ba dàngu paloku-nanya-padua na wai ngerana! 44Iwaiya: Na maràmba nuna napa na-pahangga hàla-manja duna da bandana la atana nuna na ma-tuturu. 45Tàka na ata nuna jàka na-kanandingu la etina, ‘Na mandai-mapa duna hi namangu pabeli i miri,’ jàka wànaka, hi napalu hàlaha da anguna paata, dàngu hi nangangu ngunungu hi lupa na-maüku, 46kau napa tàka-nanyaka na mirina la lodu dàngu la njàmu panda mbutina. Ka pàjara halawàla-duna-nyaka#pàjaru ... -nyaka; jàka ndia wànggaya la hambeli. paraï na mirina, hi na-pahama ngeranya la tau na manda manundu lai Ala.
47Na ata na mapinya na pambuha-na na mirina, tàka hi nda na-hawanjiru dàngu hi nda na-paloku-yai na pawuku-na na mirina, napa na-pawàhiku pa-langatàka-manyaka duna. 48Tàka na ata na manda pinya na pambuha-na na mirina, hàla hi natuu hau manjala, na ràka pa-pawàhiku wànguya, napa ràka-anaka ba pa-wàhiku-nya. Nadu na tau na pawua padangu, nadangu-maka duna na pa-karuhi lai nyuna. Dàngu na tau na pamonu padangu, nadangu-maka duna na pa-karuhi lai nyuna,” wàna.
Nda papeku-ya tàka pa-papangu-ya
(Mat. 10:34-36)
49“Na mainggu, jiaya la pa-patumbu-ya na pa-mutungu wàna na pinu tana yiana. Hàmu-maka làti jàka jia mbàda roka-naka na epi! 50Ni-manyapa na mayila bokulu ba lupa ku-hambeta-maya bàdi. Jia hi nda nangudu na etinggu ba ndedi ku-palundu-nya nuna. 51Màla bai kakaya na mainggu nu ngàndi-nanya papeku wàngu la pinu tana wàmingga? Ndia-a, nda papeku-aya, tàka pa-papangu-ya. 52Piti welingu nàhu, na kuru uma na matau malima-na pa-papangu-danyaka, da madua haàtu-da dapapa-nja da tau madua, jàka ndia da madua dapapa-nja da tau madua haàtu-da. 53Na ama napa napapa-nya na anana mini, na anana mini napa napapa-nya na amana. Na ina napa napapa-nya na anana kawini, na anana kawini napa napapa-nya na inana. Na ina yenu napa napapa-nya na rii anana, tàka na rii anana napapa-nya na ina yenuna,” wàna.
Tandaya na tanda rehi
(Mat. 16:2-3)
54I Yehu napanii-mbunya na tau dangu, “Jàkai itaya na karumangu na mahei la patama lodu, ‘Nàmunya na urangu,’ wàmi-madua-ka. Na urangu langatàka-ma. 55Jàka mipàda-nya na ngilu na ma-maruru weli lurungu, ‘Pa-mbanahungu wànaka,’ wàmi-madua-ka. Na-pambanahungu langatàka-ma. 56Nyimi makàli kapilandu! Mipingu pa-pakaka-nya na awangu bai itaya na hadana na awangu dàngu na pinu tana. Nggikina da tanda rehi nàhu hi ndai pingui pa-pakaka-nja?” wàna.
Papeku-wa dàngu muhu
(Mat. 5:25-26)
57“Nggikina nyimi hi ndai bota wikiya jàka nggàraya na ma-deningu? 58Jàka ningu tau makàla-kai la ma-timbangu palakara, pamukarungu bàdi ka lupa mi-panjàpu-ya na palakara nuna dàngu na ma-pakàla nàhu ba la ànda-kaipa. Jàka ndia, napa nayila-makaika duna la hangga hakimu, tàka na hakimu hi na-pakata-nggai la palihi, tàka na palihi hi napuhi-kai la uma kapàtangu. 59Iwaiya! Napa ndai luhu-mapa duna welingu la uma kapàtangu, jàka ndedi dalundungu da ndàndami,” wàna.
လက်ရှိရွေးချယ်ထားမှု
LUKAHU 12: KAM
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@LAI 1995 Indonesian Bible Society (Lembaga Alkitab Indonesia)