Mark 13
13
Hehe Uvi ve karia leiki oharo. Mea aeaki oharo kara
1Are Hehe Uvi mahokaea ve hoaupe la hoa areve kilea haela ae arero maeape, Haelapo, ma uvi ve have, aheke, ehoaha, a hoai eava, ma uvi oaria mekaka hiki. 2Iesu arero kavale maeape, A va ma uvi eharu ehoaha va eavaki — aireaki hoa have oaria akea ve apea va ka — ere oaria hukila la paparaehakilai.
3Are Olivet kela, Hehe Uvi oropa ve, avape. Peter i James i John i Andrew ila leia arero muruhari velavela leipe. 4Elaro kimaea — ma eharu leahau kihorerakilai, ae va ma eharu hoveahovea ra leikilava, ihova le la eavakilai? 5Iesu erero kavale mari maeape, Kiva auhohi leila, haela ero amuraeaki ave. 6Ehovea haela oaria arave rare ve iki mari arilai, ‘Ara va Keriso!’ kai haela oaria amuraeakilai. 7Eva mare ve oharo ra iapakilava e va iki va kaihaharue: ehovea la eharu oaria iele horerakilai, aka karia leiki hoa havahu aireaki. 8Ehovea vila‐ipi ae urai vila‐ipi hahari arilai, kai basileia ae urai basileia ae haeakilai. Ita ita oaria mea puipui hareavakilai: mea hohera leikilai, haela oaria va heraho eapapo, ikihuru ve avare koare ikihuru leiki hoa va lae.
9Aka e va elare kiva auhohi leivahaeaila: ehovea ere ero council ve oropa kari aukilai — kai ere va ero synagogue ureve huhari haeakilai, ere va ero gavana haela i amua ila ve oropa kari aukilai, ehovea arave harihari, ehovea ere va iele havahu rare arive. 10Oharo Veveke vila‐ipipi oaria ve oropa kopurapakilai. 11Ere va ero kari ai ra paparaehakilava, e va oropa eve aire arive oharo ikihorahora kalaivahaelue, aeva oropa iki kaheheavarue. Aka e va la hoa iki ureve oharo ra iapakilava, la oharo la ari — ehovea leia e havahu ve oharo va ka, aka Ove Veveke ve Oharo. 12La hoa akoreapo akoreheari la hihila epakilai, oa kara areve akore, akoremari kara urahuka ereve oa i lou ila hihila epakilai, ehovea haeakive. 13Haela oaria arave harihari ve ero ikiheaha leivahaeakilai, aka aheke auhohi leiki la haela aiai karia leiki hoa, are va ovokake avakilai.
14Aka eva kaiamuru heaha iele, Daniel peroveta haela maeape la kaiamuru, hehe ita epavila ra eavakilava, ma oharo mureaki haela auhohi kekela, Judea apealula haela oaria la hoa kela ve oaoka lei hukaukive heroe. 15Uvi akea ve aeaki la haela are va uvi ureve kahoaulue, kai uvi karaealue, ehovea eharu aeakive. 16Kaipure aeaki la haela are va pura kaivakive kakekelarue. 17Aka ikihuru eapapo la hoa ve ero‐ila la uavila, kai mahumu uavila kara. 18E va ivaiva leila, eve hukauki hoa mea vevehere hoa va arekaea. 19Ehovea la hoa heraho eapapo havahu kihorerakilai, lahovea heaha Aualari meahaiapo avare koai kariki ipopeavape hoa ikiki ma hoa kara haela haveva, aireaki kara ore lei va ka. 20Aka Amua la hoa ka hekai la leikiaue ra leikilava, aivau eharu oaria titava hiki, aka ehovea hehe haela ve harihari, are havuri hauavape la haela, are va la hoa ka‐hekai leipe. 21La hoa haela ero mari ra maeaeakilava, Eavaila — Keriso ma, aka Keriso la, e va areve oharo kaiaparue. 22Ehovea opore Keriso kai opore peroveta haela urahuka ihova i horova lahua lahua oaria ra amoeakilai, ehovea hehe haela havahu kara amuraeakive. 23E kiva auhohi leila. Iapai, ara va eharu oaria ero overa lamaeaila.
24Aka la hoa, heraho hoa oropa, aireaki hare muru leikilai, papare kara ovava heaoapa va ka. 25Kaia ve kou oaria hohoakilai, kaia ve aheke oaria kara paialapaiala arilai. 26Ere va haela ve Akore meuru ureve aheke i ovava i vavarai ve maiki la eavakilai. 27Are va la hoa areve angel paparaehakilai ehovea areve ita oaria ve hehe haela korukaiakive, meahaiapo ve ukai ukai aiai kaia va ukai ukai kara.
Kiva auhohi leivahaeaki
28E va suke kora ve parable ore leikive. Areve rorore are horeraki la hoa, e va ore hitolo hoa maeamaea. 29E ka laria: e va la eharu ma horerai la eavakilava, e va ore leikilai, hoa maea iele, okiape maea vea. 30O iele ara ero maeaive, ma vilakao karia lei va ka aiai ma eharu oaria hihi horera ka leikilai. 31Kaia meahaipo ila kari leikilai, aka arave oharo kari lei va ka.
32Aka la hare kai la hoa hovea, haela ae va ore va ka, kaia ve angel kara haveva, Akore kara haveva, Oa hiki ore. 33Oharo auhohi iapaila, kiva auhohi lei ivaiva leiki, ehovea e va la hoa ore va ka. 34Ehovea haela ve Akore maria: Haela ae elare uvi harepai hahi aupe. Are va areve horova haela aheke avarape, kai haela oaria elare horova kileavahaeape — kai okiape kiva haela kiva auhohi leikive maeape. 35Kiva auhohi leila, ehovea e va ore va ka uvi ve haelapo havahu ekeki la hoa ve — hailaea la aka oroa a hihi, mea opaki la, aka vevelare la. 36Are elavelave ra ekekilava, ero avuku ve eavaki ave. 37Ara ero maeaeaki oharo ara haela oaria kara maeaeaive, E va kiva auhohi leila.
လက်ရှိရွေးချယ်ထားမှု
Mark 13: ORO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Published by the British and Foreign Bible Society 1963-1972