Mark 14
14
Iesu ve iri haela arero harive oki haropape
1Hare orahoka kari leipe. Passover i muramura aue la pai ila ve hurai hare horerape. Oharo haela i hohoa haealula haela ila arero muruhari pae harive okiharo haropape. 2Aka ereve oharo maria, Hurai hare va arekaea, haela oaria heraho eapapo leivahaeaki ave.
Bethany uamari Iesu ve maea la‐apu ve hariripe
3Are Bethany leia Simon leper haela ve uvi ureve eapai lape la hoa uamari ae, la‐apu muo veveke kavapu avikepe, kavale eapapo iele. Are kavapu koakai muo veveke i la la‐apu areve haro ve kakaita hariripe. 4Uku haela hihiri leivahaeai elare iki ureve kelavape maria, Ipileve ma muramura naoae naoae halakaitapaila? 5Ehovea ma eharu ilaea la leilulava areve kavale 300 denarius#14:5 See Mt 18:28 hovea avakilai, kai la moni merava haela aiarakilai. Ere va arero o vere avahaeape. 6Aka Iesu maeaeape, Arero o vere va kaelue. Ipileve e va arero hararuarulava ha? Are va araro mai veveke laleila. 7Ehovea merava haela e i hareho mea oaria apealula, kai e va ikivere ra leivahaeakilava, e va erero hare oaria veveke leivahaeakilai. Aka ara mea oaria e i hareho aea va ka. 8Are laleila horova areve ikiore hovea, are va arave maea la haririla ehovea arave aireaki karu ihaki hoa ve. 9O iele ara ero maeaeaive — Oharo Veveke kopurapaki la ita oaria hareho ma uamari ve hari oharo kara kopurapakilai, ehovea areve rare haela oaria iki kelavakilai.
Judas, hihila epaki haela
10Judas Iscariot areve 12 i haela ae la — oharo haela ve leia aupe, ehovea arero hihila epakilai. 11Ere areve oharo iapai ikiveveke eapapo leivahaeape, kai arero moni aiarakive okoare ape. Are arero hihila epakive okiharo haropape.
Iesu ve hita eapai lape hoa
12Hurai ve oropa hare, ere va passover mamoe akore hape la hare, areve kilea haela arero maeape, A va ikivere elaviilave passover ita lahoa la karikikive. 13Are va kilea haela orahokaila paparaehape kai erero mari maeaeape, E va karikara hoahukaila — leia evalila ma hahu orai la veakila haela ra eavakilai — arero airekai auvahaeaki. 14Are la pekaki la uvi evalila la uvi haela mari maeaki, Haelapo ve oharo maria — Hahi haela ve lalava lahoa — are i kilea haela ila passover eapai larilai la lalava? 15Are overa veveke karikipe akea ve lalava eapapo ealilaro kileakilai: Evalila elaviilave la ita overa karikikive. 16Areve kilea haela hoahukai karikara ureve arahavape — kai are erealilara maeaeape lahovea eavape. Erealila passover eapai karikipe.
17Hailaea hoa are i haela 12 ila hareho pekahavape. 18Ere eapai lalavahaeape la hoa Iesu maeaeape, O iele ara ero maeaeaive: Ela i hareho eapai lalavila haela ae araro hihila epakilai. 19Ere oaria ikihuru leivahaeai iki arero apeape maeape, Ara la ha? Kai haela ae kara, Ka, ara ha? 20Are erero kavale maeaeape, Are va 12 haela aeva ara i eapai larikila herehere lariki la haela. 21Iele havahu, haela ve Akore hoaukilai, overa hape la oharo hovea, aka Oia, ehovea arero hihila epaki la haela. Veveke la haela va au epaila.
22Ere eapai lape la hoa Iesu pai kaivi ra morapaea la haivavaelape kai erero maeaeape, Ai, laila, arave maea va ma. 23Are hekako kaivi, thank you oharo ape, kai erero avarape — Ere oaria hareho lalavahaeape. 24Are erero maeaeape, Maia arave apu okoare are ve, arave ma apu haela oaria ve hakaitapakilai. 25O iele ara ero maeaive ara va vine apu aireaki le va ka, aiai ara va Aualari ve basileia ureve are larilai.
26Ere hivi helape, aire mea hoahuka Olivet kela ra pekahavape.
Kilea haela aireaki titavakilai
27Iesu erero mari maeaeape, E oaria ikihorahora eapapo leivahaeakilai, ehovea overa oharo maria hape, Ara mamoe kiva haela harilai, kai mamoe oaria titava harau le arilai. 28Kahara, ara va oropa api kai uroukilai, kai eve oropa Galilee aukilai. 29Peter arero maeape, La maea haela oaria ikihorahora ra leivahaeakilava, ara laria lei va ka. 30Iesu arero maeape, Ara aro iele ra maeaive, ma hare, ma oroa havahu, a hoa irehoila hoa araro oropa hehepo leikilai, kokora mea hi aire arilai. 31Aka are oharo aheke iele maeape, Ara ka a i hareho ra apakilava, ara aro haure lei va ka. Ere oaria kara laria maeape.
Iesu Gethsemane leia
32Ere va ita rare Gethsemane pekahavape — Are areve kilea haela maeaeape, E va maia availa — ara va ivaiva arive hoauve. 33Are Peter i James i John ila kari ai are i hareho hoahukape. Are iki ihai ikihorahora leipe. 34Are erero maeaeape, Ara va ikihuru eapapo iele, apaki maeamaea — E maia avai kiva leikive. 35Are perehekai ai mea ve ekaopape kai ivaiva leipe — ehovea oki hovea la leikilava, areve kakare hoa hareavakive. 36Are mariape, Aba, Oa e, eharu oaria a va aupovearai. Ma hekako arave oropa ve hareavaki, aka arave iki va ka, a lahua ve iki. 37Are iki erero avuku eapealula eavape. Are kai Peter maeape, Simon, a avuku ha? A hoa perehekai kiva lei va haveva ha? 38Kiva lei, ivaiva leiki — ero amuraeharae lei hihilauki ave — Ove iele ikivere, aka aivau ka luluauka. 39Are va hoai la oharo haroapo kai ivaiva leipe. 40Are ekepe erero avuku eapealula kai eavavahaeape, ehovea ereve ovohae maho iele. Ere va arero kavale oharo maeakive iki horahora. 41Are kai hoa irehoila ereve leia ekepe, kai erero maeaeape, E va ma hoa avuku kai iki paparaehaki — kahara, hoveahovea iele, hoa iele ma, iapaila, haela ve Akore ere va haela heahaha ve mai ve hihila le epai. 42Urahukai, elaviila aukilai — eavaila, araro hihila lepaila la haela le ekeve.
Ere Iesu mai paeape
43Are oharo ape la hoa havahu Judas, 12 haela ila ve haela ae, ekepe. Are i hareho ekevahaeape haela oaria, poke i haru ila. Ere va oharo haela i hohoa haealula haela i haela hoaha ila ve leia ve ekevahaeape. 44Arero hihila epape la haela erero ihova maeaeape maria, Ara ape la popoaki la haela are va la. Arero mai pae, auhohi lai aukive. 45Are iki areve leia ehoe pekai mari maeape, Rabbi e, kai arero ape popoape. 46Ere arero mai pai lai aupe. 47Arero maeamaea epavape haela ae poke hareavi akea oharo haela ve horova haela ve avako kohareavape. 48Iesu erero kavale maeaeape, E va araro korea haela hovea arive leikila ha, poke i haru ila va ai leikila mai paeakive ha? 49Ara hare oaria Hehe Uvi leia oharo kileavahaeape — e va leia araro au paeaila. Aka ma horova iele laleila ehovea overa hape buka oharo iele leikilai. 50Ere oaria arero harepai oaoka lei hukaupe.
51Haela ae are areve maea avuku pura naoae hahai arero airekai aupe. 52Ere va la haela mai paeape, aka are la pura aukapai maheare vivilape.
Iesu Akea Oharo Haela oropa ve
53Ere Iesu akea oharo haela ve oropa lai aupe. Oharo haela oaria i hoaha haela, i hohoa haealula haela ila hareho leia korukaiavahaeape. 54Peter arai ve erero airekai aupe — Akea oharo haela ve ara ureve kara: Are leia kiva haela ila hareho avape, areve maea a koape. 55Oharo haela, Counsellor haela oaria ila Iesu ve rare ve hahaki hukavaki haela haropape, aka ere va au koaraila. 56Aka opopoe hukavi arero hahakive leipe haela oaria hareho ekevahaeape, aka ereve oharo oaria elarelare hiki, hoveahovea au leila. 57Uku haela urahukai areve rare ve opopoe hukavape maria, Ela iapape are mariape, 58Mai kupe ma Hehe Uvi ara va kopararapakilai, kai hare irehoila are kai urapakilai, mai horova lei va ka. 59Leia kara ere va iki heaha leipe hiki, kai ereve oharo hovea hovea au leila. 60Akea oharo haela aru hihi ve urai Iesu mari velavela leipe, Ave kavale oharo karia ha? Ere va aro hahaki la oharo iele lehae ha? 61Are kai muruha hiki epavape, kai kavale oharo au maeaila. Akea oharo haela arero kai velavela leipe maria, A va Keriso ha, Hehe haela ve Akore ha? 62Iesu maeape, Ara va lae. E va Haela ve Akore Aheke ve mai ore ukai ve mavaila kai kaia ve meuru ureve meikila eavakilai. 63Akea oharo haela elare pura haipararapai maria, Ela va kepea oharo hukavaki haela haropava ka. E va areve oharo heaha overa iapai. 64Eve iki leari kelavaro ha? Ere oaria arero hahai avikakive kelavape, are apakive i. 65Uku areve maea apea koape, uku areve oropape ra kokauka arero naoae naoae koape kai mari maeape, Peroveta oharo arive. — Horova haela kara arero mai koavape.
Peter ve hehepo
66Peter ara ureve ipi ve avape la hoa akea oharo haela ve horova mari ae ekepe: 67Are Peter maea ra a koavila eavape kai arero auhohi eavi mari maeape, A kara Iesu la Nazareth haela koarai aeape. 68Aka are areve oropa hehepo lei mari maeape, Ara ave la oharo horahora leive — kai ave la oharo ara iapa va ka. Are kai okiape mahokaea ve hoaupe — kai kokora mea hi le ape. 69Horova mari ae arero kai eavape kai maeamaea epavape haela oaria maeaeape, Areve haela aeka ma. 70Are kai hehepo leipe. Haiapo ka, maeamaea epavavahaeape haela uku Peter maeape, Iele havahu a kara areve haela ae, ehovea a va Galilee haela, kai ave ape Galilee haela ve ape hovea. 71Aka are ikiheaha lei erero oropai maeaeape, E arura ma haela ara ka haveva. 72La hoa havahu kokora mea hoa orahokaila hi ape. Peter Iesu arero maeape la oharo iki le kekelape, ehovea Iesu arero mari maeaeape, A va araro hoa ilehoila overa hehepo leikilai, kokora mea hoa orahokaila hi aire arilai. Are va la oharo kekela ikihuru eapapo lei hi eapapo ape.
လက်ရှိရွေးချယ်ထားမှု
Mark 14: ORO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Published by the British and Foreign Bible Society 1963-1972