Mark 15
15
Iesu, Pilate, Rome Gavana haela, oropa ve
1La vevelare oharo haela i haela hoaha i hohoa haelula haela i council haela oaria ila oharo hukavape. Ere Iesu hahai Pilate oropa ve lai aupe. 2Pilate arero velavela leipe, A va Jew haela ve Amua ha? Iesu kai kavale maeape, Kaire, a lailave. 3Oharo haela areve rare naoae naoae opore oharo oaria ape. 4Pilate arero velavela leipe maria, A va kavale oharo e va ka ha? A iapai — ere va aro hahaki oharo oaria laila. 5Aka Iesu kavale oharo au maeaila, laelave Pilate va ikihorahora leipe.
6Iapai — La hurai hoa areve mai maria — uvi muru aeaki haela aea helaukakive, ereve ikivere haela va haroapo. 7Leia haela haroapo rare Barabbas, are i hareho hahari avahaeape haela oaria ila hareho uvi muru apearoape: hahari hoa haeape haela kara. 8Kai haela oaria Pilate ve leia pekahavi arero hilahila leikive, areve la hurai mai kai leikive. 9Aka Pilate erero kavale mari maeaeape, Eve iki lehae ha? Ara va Jew haela ve Amua ma e ve helauka avarakive, heroe ha? 10Ehovea areva ore oharo haela arero hihiri leivahaeape. 11Aka oharo haela haela oaria hakileavahaeape Pilate Barabbas helaukakive velavela leikive. 12Pilate kai erero kavale maeaeape, E va ikivere ara Jew haela ve Amua rare ape la haela leari leikive ha? 13Ere kai hivavara ape maria, Arero satauro ve harive. 14Pilate erero velavela leivahaeape, Lehae? Areve haeae le ha? Ere kai hivavara eapapo ape maria, Arero satauro ve harive. 15Laelave Pilate, ehovea haela oaria iki lei veveke leikive, Barabbas helauka erero avarape, kai Iesu haru ha satauro ve harive paraeape.
Hevehe haela Iesus heheo ila morapaeape
16Maora hevehe haela arero lalava eapapo rare Praetorium kai lai aupe. Ere maora hevehe haela oaria leia korukaiavahaeape. 17Ere va areve maea pura ovoka hahape, kai kora mamareke korona hai areve haro koepape. 18Ere arero heheo morapaeape maria, Eavaila — Jew haela ve Amua. 19Ere va areve haro hirivo koape kai areve maea apea koai ekaopi arero morapaeape. 20Ereve heheo kari lei areve pura ovoka ere oavi are havahu ve pura kai orape kai arero satauro ve harive la lai aupe.
Iesu satauro akea ve hape hari
21Ere va kihoahuka Cyrene haela ra eavape rare Simon, Alexander i Rufus ila ve oa: ere la haela satauro oraiavakive ahilape. 22Ere va ita rare Golgotha arero lai aupe (La rare ve iele, Haelaharo ita). 23Ere arero wine i myrrh ila larive avarape, aka are haure leipe. 24Ere va arero satauro ve hape kai aireaki ere va koae koa areve pura hamuri elarelare aeape. 25Hare vevelare hoa 9 o'clock ere arero satauro le hape. 26Kai areve haro akea arero lai hape ve la iele mari haeape, Jew haela ve Amua ma. 27Ere va are i hareho haeape korea haela orahokaila — haroapo areve mai ore ukai ve, haroapo areve mai keva ukai ve. 28Overa hape oharo iele le horerape maria, Ere haeae haela are i hareho kaoape. 29Leia auvahaeape haela oaria haro koukou avahaeai arero heaha maeape maria, A va Hehe Uvi ra haipararapai hare irehoila hoa kukive ape haela. 30A havahu elare lei makuri — satauro ikupa ve hoa kihoau. 31Laria kara oharo haela i hohoa haealula haela elare heheo mariape, Are haela oaria lai makukuripe la, are elare lei ovokake lei va ka. 32Keriso Israel ve Amua — Satauro ikupa ve kihoauki ela ovohae eavi iele le iapakilai. Are i hareho satauro haeape haela kara arero o heaha maeape.
Iesu ve apape hoa
33Hare hihi hoa, mea muru le leipe, aiai hailaea hoa 3 o'clock. 34Kai 3 o'clock Iesu ara hai itavape mari, Eloi, Eloi, lama sabachthani? La oharo ve iele, Arave Aualari, arave Aualari, ipileve A va araro harepai ha? 35Leia apeapea haela uku la oharo iapai mari maeaeape, Iapai — Are Elias ra itavave. 36Haela ae vivila latite vinegar hivi hirivo kao ve avikape kai arero au larive avarape, kai mariape, Kahara, ela va eavakilai, Elias arero helaukakive kihoaukilai la? 37Iesu ara eapapo hai, ove le avarape. 38Hehe Uvi ve harihu‐urape au kovaelai hoai ipi ve le paraeape. 39Arero maeamaea epavape la centurion areve ara iapape kai arero Ove lari parae ra eavi mariape, O iele havahu, maia va Aualari ve Akore havahu.
40Uavila uku kara arai ve ovohae kiva leivahaeape. Ere va uku haela mae: Mary Magdalene, kai Mary James Hekai i Joses ila ve lou, kai Salome. 41Ere va areve Galilee hoa arero airekai auvahaeape uavila mae — kai are i hareho Jerusalem pekahavape uavila oaria kara.
Iesu ve karu ihape hoa
42Aka hailaea hoa, ehovea sabati ve ipopeavaki hoa, opoa va sabati hare: 43Arimathaea haela rare Joseph, mai ehoe counsellor haela, Aualari ve basileia ekekive karipe haela iki hihika havahu Pilate ve leia Iesu ve maea hilahila leipe. 44Pilate va ikihorahora Iesu overa api la, kai centurion itavi velavela leipe are va overa api huru havahu la. 45Are centurion ve oharo ra iapai Iesu ve maea Joseph le avarape. 46Areva pura hauhuka veveke kaivi areve maea kaivi kohahape, kai have ve ihape karu ita are le aipepe — kai have kapu ita ve okiape hovea avarura kokaukape. 47Mary Magdalene i Mary Joses ve lou ila arero aipepe la ita ovohae eavape.
လက်ရှိရွေးချယ်ထားမှု
Mark 15: ORO
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Published by the British and Foreign Bible Society 1963-1972