Mak 8
8
Yesus kar ngangon ke osep 4,000
(Matyu 15.32-39)
1Alo ari osep pula time tiduni pulu kap Yesus e inarak ngangon dong kovok. Deka iye gi ila disaipel time e iye wai ke isak langane. 2“Aitno lungong kro ke osep pula pula ane kesua tidong kap ngong iding ke oklou eklu kodong e inarak ngangon dong kovok. 3Langka sapanga due isak e ngapagei isak kla ke urok ninu deka alo ka isak dau tididi ekreng ma tarna lisak anamanam. Kesua osep leklou tididi ekreng ka mawa e time ane.” 4Deka ila disaipel tikoli tiwai ke iye langane. “Ai itodong ke omur ane ka dong adai vala. Ma imousine deka imakar ngangon ke osep ane?” 5Deka Yesus pmi isak langane. “Upu bret sesue tidong?” Deka tikoli tiwai langane. “Ipem bret lumorwo tidong.” 6Deka Yesus kar pelengon ke osep ma tiduru tidong ke taklak. Deka iye due bret lumorwo e wai tenkyu ke Ida Tapolngon ine. Iye wai yagos deka tuktuk bret tonari e kare ke ila disaipel ma titongo ine karanga ke osep pula. Deka ila disaipel titongo bret ke osep. 7E lodu awal boto ka daudeng boto tidong blang. Deka Yesus wai tenkyu ke Ida Tapolngon ine. Deka iye wai ke ila disaipel ma titongo lodu ke osep blang. 8Deka osep keniye tingen ngangon ma tigot. Deka Yesus ila disaipel titagom ngangon tonari emkil sep ke kerka ma kerka lumorwo bon ine. 9Alo ari osep pula tidong e inarak sasa langka 4,000. 10Osep tonari tingen inarak ngangon yagos deka Yesus pagei isak kla blang. Deka lokono Yesus gosok ila disaipel tisep ke bot gesa e tisongon omur are e isak kla ke omur Dalmanuta.
Osep Farisi ina tiwaiki tivati Yesus due elio arit ina gesa
(Matyu 16.1-4)
11Deka ari osep Farisi ina time tipolou ke Yesus e tipara pulu pelengon ke iye deka titok iye e tiwai langane. “Omdue elio arit ina gesa ma imavati kesua imawaiki ma imeile omur langka Ida Tapolngon pagei wom omo koke aurou?” 12Tiwai langane deka Yesus songsong netir e wai ke isak langane. “Ina lange umu ka umodong ke taklak ke oku ane umawaiki umavati nisngen gesa langka elio arit ina? Ngawai ke umu ke pelengon ane ka lokono lokono. Ma umavati elio arit ina ka nisngen gesa kovok.” 13Yesus wai ke osep Farisi ina tonari langane deka iye songon isak e la. Deka iye gosok ila disaipel tisep ke bot e isak kla tibru aki tonari.
Yesus wai pelengon ano ke ila disaipel
(Matyu 16.5-12)
14Yesus gosok ila disaipel isak kla ke bot tonari e ila disaipel amtarsak uli e tipaur inarak bret kovok. E bret kene vala dong ke isak. 15Deka Yesus palongo urok langane. “Umeile umu itau ke osep Farisi ina e gute Herot urok yis e aitno lumu mter itau ine.” 16Yesus wai ke osep Farisi ina e gute Herot urok elio soulu. Deka ila disaipel timter pelengon pulu ke ila pelengon e tiwai pulu langane. “Yesus wai langane kesua batne ida bret dong kovok.” 17Deka ari Yesus ile aitno lisak e iye pmi isak ine langane. “Ina lange umemter pelengon pulu ke elio ka upu bret dong kovok? Umu dau umeile omur ine kovok? Umu dau umeile malak ine kovok? Bara lumu dau pono e aitno lumu kaka ine e umeile omur ine kovok? 18Omtomu dong e umavati malak ine kovok? E talapmu dong e umoklingen malak ine kovok? Omtomu uli ke elio ka oglou ngadue i? 19Oglou alo ka ngatuk bret elme karanga ke osep 5,000 ari umatagom bret emkil e lodu emkil tisep ke kerka sesue deka isak bon?” Deka Yesus ila disaipel tikoli tiwai langane. “Imatagom bret e lodu emkil deka kerka songotno orwo bon ine.” 20Deka Yesus pmi ila disaipel blang langane. “Alo ka ngatuk bret lumorwo karanga osep 4,000 deka umatagom bret emkil e lodu emkil tisep ke kerka sesue deka isak bon?” Deka ila disaipel tikoli tiwai langane. “Imatagom bret e lodu emkil deka kerka lumorwo bon ine.” 21Deka Yesus wai ke isak langane. “Umavati elio tonari e dau umeile omur ine kovok i?”
Yesus lua gute ke Betsaida ka bitna evin
22Yesus gosok ila disaipel isak kla e mase tipolou ke Betsaida. Deka osep leklou tipaur gute gesa ka bitna evin polou ke iye e tikel iye ma iye kai gute tonari. 23Deka iye panene gute tonari e tisongon armok e tipolou kla. Deka iye uri omsok duru dong ke gute tonari bitna e due limla duru dong ine. Deka iye pmi gute tonari langane. “Amvati wan gesa?” 24Deka gute tonari bitna la e iye wai langane. “Ngavati osep langka isak akai ka tilila.” 25Deka Yesus limla kai gute tonari bitna blang. E gute tonari bitna nekek dagar deka bitna tipolou itau blang. Deka iye vati wan keniye itau. 26Deka Yesus pagei iye ma la ke ila ninu e wai ke iye langane. “Amla emsep ke armok are sakam.”
Pita wai Yesus iye Krais
(Matyu 16.13-20 e Luk 9.18-21)
27Deka Yesus gosok ila disaipel isak kla ke armok pula ka tidong lelei Sisaria Filipai. Alo ka isak dau tididi ekreng iye pmi ila disaipel langane. “Osep tiwai ngong sei?” 28Deka tikoli tiwai langane. “Osep leklou tiwai wom Jon ka paunim osep. E osep leklou tiwai wom Elaija ka dong oglou ari. E osep leklou blang tiwai wom gute napaprangan ina gesa ka oglou ina.” 29Deka iye pmi isak langane. “E umu umawai ngong sei?” Deka Pita koli wai langane. “Wom gute ka Ida Tapolngon rere Krais ma iye lua osep.” 30Yesus klingen Pita ila kolingen deka dangdang ila disaipel lama tipalongo osep ine.
Yesus wai mase ma iye mete
(Matyu 16.21-28 e Luk 9.22-27)
31Yesus gosok ila disaipel dau tididi ekreng deka iye nogrum parere isak langane. “Mase ma ngong ka Gute Ka Polou Langka Osep nganamani agegeng bitna bitna osep ma tidue ke ngong. Osep ngongle e osep loulou ina ka omba e osep ka tile itau ke Moses ila sogongon ma tipli ngong. Ma osep tidue burwa ke ngong ma ngamete. E mase oklou eklu mela yagos deka ma ngapoga ngatito ke ngau denga.” 32Iye wai malak ke elio soulu ma polou ke iye. Deka Pita paur iye la isuk boto e wai dagar ke iye langane. “Amwai langane kovok.” 33Yesus klingen Pita ila pelengon deka iye bauluk e bitna la ke ila disaipel. Deka iye iluk Pita langane. “Satan amla ke dogur lungong. Emdidi Ida Tapolngon aitno kovok e emdidi osep aitno lisak vala.” 34Deka Yesus gi osep pula kap ila disaipel ma time tipolou ke iye deka iye wai ke isak langane. “Langka gute gesa waiki didi ngong ma iye pli tarna e didi ngong. Iye due langane e langka osep tidue elio soulu ke iye e iye mete are wan gesa kovok. 35E gute ka waiki ila mosongon dong ke taklak ane ma iye bure e ma ila mosongon imina. E gute ka pli tarna e mete kesua batne iye didi ngong e Ida Tapolngon ila omon itau ma ila mosongon dong. 36Langka gute gesa due brokngon ka pula keniye ka tidong ke taklak ma isak keniye ila wan deka iye mete ma brokngon lua iye ke ila mosongon? Ma ila brokngon tonari karanga lua iye? Aurou. 37Langka gute gesa waiki kli mosongon ka itau ka dong vala dong ma iye uri mani ka lange ine? 38Eknikane osep ka pula keniye ka tidong ke taklak ane tidong tidar Ida Tapolngon ila pelengon dagar e tipul dogur ke iye. Langka gute gesa mnak iye ke ngong e ke lou pelengon io mase ma ngong mnak ngong ke iye. Alo ka ngong ka Gute Ka Polou Langka Osep ngabauluk ke taklak blang kap Livou ila bublongon e ila ensel ka itau ma ngong mnak ngong ke gute tonari.”
လက်ရှိရွေးချယ်ထားမှု
Mak 8: ANT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
copyright 2003 New Tribes Mission, Sanford, FL 32771