Mak 9
9
1Deka Yesus wai ke isak langane. “Ngawai ke umu ke pelengon ane ka lokono. Osep leklou ka tivri ane ma tidong la lama tivati elio ka Ida Tapolngon plau osep ke ila arit polou deka ma timete.”
Yesus pampamu ine bublo
(Matyu 17.1-13 e Luk 9.28-36)
2Oklou epmes lumakene mela yagos deka Yesus paur Pita e Jems e Jon titito kla ke gigri ka apna dong egim e isak vala tidong ine. Deka Yesus napak vri ke osep eklu tonari amtarsak. 3E ila klos polou okou lokono deka nevlikvlik e bublo omba lokono. Langka osep tiwaiki tigrong urok klos ma tipolou okou lokono langane tikaranga ine kovok. 4Osep eklu tonari tivati elio tonari polou ke Yesus deka tivati Elaija orwo Moses tipolou ke Yesus bitna. Deka tivati isak orwo tiwai pulu kap Yesus.
5E Pita wai ke Yesus langane. “Ngau Puda aitno lungong mter are itau itodong ke omur ane. Ma imouri pengau eklu ke omur ane. Ma kene lem e silang Moses ila e silang blang Elaija ila.” 6Pita wai ulik ulik langane kesua iye gosok sisrok tilim lokono ke elio tonari. Deka iye ile itau ke pelengon ka iye wai kovok.
7Pita wai pelengon tonari yagos deka gaup polou e kading isak. Deka tiklingen kreine polou ke gaup tonari ka wai langane. “Gute ane Erigu Arang ka ngong lana ngong omba ke iye. Talapmu klingen ila pelengon.” 8Pita e Jems e Jon tiklingen pelengon tonari yagos deka lokono amtarsak lila e tivati Moses orwo Elaija tidong kap isak kovok. E tivati Yesus vala.
9Deka osep apanal tisongon gigri ka tidong ine e tididi ekreng tiduru kla. Alo ka isak dau tididi ekreng tiduru kla Yesus wai ke isak langane. “Umawai ke osep ke elio ka umavati sakam. Mase alo ka ngong ka Gute Ka Polou Langka Osep ngapoga ngatito ke ngau denga deka ari ma umapalongo osep ine.” 10Deka osep eklu tonari tididi ila pelengon e tipalongo osep leklou ke elio tonari kovok. E isak eklu timter pelengon pulu ke Yesus ila pelengon ka iye wai ma iye poga tito ke ina denga lana ine.
11Deka tipmi Yesus langane. “Ina lange osep ka tile itau ke Moses ila sogongon tiwai Elaija ma me mgo deka mase gute Krais ka Ida Tapolngon rere ma iye lua osep ma iye me?” 12Deka Yesus koli wai ke isak langane. “Osep tonari tiwai lokono. Elaija me kere wan keniye kodong deka ngame. Oglou osep tisogo Ida Tapolngon ila pelengon ka la ke Gute Ka Polou Langka Osep. Tisogo ma osep tidue agegeng ke iye e ma tipli iye. 13E ngawai ke umu langane. Gute Elaija me yagos kodong. E alo ka iye dong osep tididi aitno lisak e tidue elio bitna bitna ke iye ka aitno lisak itau ine eriar langka oglou osep leklou tisogo ine.”
Yesus sapir angelo soulu ke gute auram
(Matyu 17.14-21 e Luk 9.37-43)
14Yesus gosok Pita e Jems e Jon tiduru ke gigri kodong deka tididi ekreng la lama tipolou ke ila disaipel. Deka tivati osep pula pula tivri lelei ila disaipel. E tivati osep leklou ka tile itau ke Moses ila sogongon tipara pulu pelengon kap isak. 15Deka lokono osep tonari tivati Yesus e tidigrik ke iye. Deka tisuong tipolou ke iye e tiwai ‘oklou itau’ ke iye. 16Deka Yesus pmi isak langane. “Umapara pulu pelengon kap osep are ke elio lange?” 17Deka gute gesa ka dong kap osep tonari ka tiduni pulu koli Yesus ila pmingen e wai langane. “Gute parerengen ina ngapaur erigu arang ke wom kesua angelo soulu ka dong ke aitno due e iye karanga wai kovok. 18Alo ka angelo soulu due erigu arang deka iye uri iye duru ke taklak. E ene nekek pulu e ene buswok e pampamu ine ordong. E ngawai ke lem disaipel ma tisapir angelo soulu e tikaranga ine kovok.”
19Yesus klingen gute tonari ila pelengon deka iye koli wai ke osep tonari langane. “Umu osua ka aitno lumu ila dagar la dagar lokono ke Ida Tapolngon kovok. Ma ngadong kap umu tauni e dau aitno lumu dagar ke ngong kovok i? Ma aitno lungong kro ke umu aling pula e dau aitno lumu dagar ke ngong kovok i? Umodue mimi me ke ngong.” 20Iye wai langane deka tipaur mimi tonari me polou ke Yesus bitna. Deka alo ka angelo soulu ka dong ke mimi vati Yesus lokono iye due mimi nakarkar pula e iye gene duru ke taklak. Deka iye tabulbul ke taklak e ene buswok buswok.
21Deka Yesus pmi mimi timla langane. “Lesen elio ane polou e dong ke etim arang? Deka mimi tonari timla koli wai langane. “Alo ka iye dau daudeng boto elio ane polou e dong ke iye. 22Aling pula angelo soulu ka dong ke iye waiki paiavu iye deka uri iye la sep ke eiou koke uri iye la sep ke aki. E langka amkaranga omlua imi ngawaiki aitno lugom due imi e ma omlua imi.” 23Deka Yesus koli wai langane. “Ina lange amwai langka ngakaranga ngalua umu deka amwaiki ma ngalua umu? Emile langane kovok i? Ida Tapolngon karanga lua osep keniye ka aitno lisak dagar ke iye ma tikaranga tidue elio keniye.” 24Yesus wai langane deka lokono mimi tonari timla wai omba langane. “Aitno lungong dagar ke wom e aitno lungong ila dagar dau dagar lokono ke wom kovok. Omlua ngong ma aitno lungong ila dagar polou dagar lokono ke wom vala.” 25Mimi tonari timla wai langane deka Yesus vati osep pula pula tisuong tipolou ke iye. Deka iye wai dagar ke angelo soulu langane. “Wom angelo soulu ka omdue mimi ane ma iye wai kovok e klingen pelengon kovok ngawai ke wom langane. Ompolou ke mimi ane e amkaranga ambauluk omdong ke iye blang kovok.”
26Angelo soulu klingen Yesus ila pelengon deka iye daiku e due mimi nakarkar omba deka iye songon iye e la. Deka mimi pam-pamu ine munu langka gute ka mete kodong. Deka osep tonari tiwai iye mete kodong. 27Tiwai langane e Yesus due mimi limla deka kakai iye. E mimi tonari tito vri.
28Deka Yesus kap ila disaipel isak kla ke ninu gesa e tidong ke ninu aitno. E ila disaipel tipmi iye langane. “Imawaiki imasapir angelo soulu tonari e imobure vala batne lange?” 29Deka Yesus koli wai ke isak langane. “Langka umawai itau ke Ida Tapolngon kovok ma angelo soulu bitna langka angelo soulu ka due mimi tonari ma polou e la kovok. E langka umodong umawai itau ke Ida Tapolngon ine deka ma angelo soulu ka langane tipolou kla.”
Yesus wai mase ma iye mete
(Matyu 17.22-23 e Luk 9.43-45)
30Yesus gosok ila disaipel tisongon omur tonari e isak kla ke omur Galili deka tilila ine. Tilila ine e Yesus waiki ma osep tile ine kovok. 31Kesua alo ari iye parere ila disaipel e wai ke isak langane. “Ma osep tikar ngong ka Gute Ka Polou Langka Osep ke osep leklou limsak deka ma tidue burwa ke ngong ma ngamete. Ma ngamete e ngadong ke ngau denga la lama oklou eklu mela yagos deka ma ngapoga ngatito ke ngau denga.” 32Yesus wai langane e ila disaipel tile omur ke ila pelengon lana ine kovok. E tipmi iye ine kovok kesua tiulou tarna lisak ke iye.
Yesus ila disaipel timter pelengon pulu ma sei mgo ke isak
(Matyu 18.1-5 e Luk 9.46-47)
33Yesus gosok ila disaipel isak kla la lama tipolou ke Kaperneam deka tisep ke ninu gesa e tidong ine. Deka Yesus pmi ila disaipel langane. “Alo ka itedidi ekreng umemter pelengon pulu ke elio lange?” 34Yesus pmi isak langane e tikoli ila pelengon kovok e tidong vala. Kesua alo ka isak dau tididi ekreng timter pelengon pulu ke sei ma mgo ke isak.
35Deka Yesus duru dong e gi osep songotno orwo ma time tipolou ke iye. Deka iye wai ke isak langane. “Langka gute gesa waiki mgo ma iye me batne lokono e ma iye polou langka gute bokongon ina.” 36Yesus wai langane deka due mimi gesa vri airavu ke isak. E Yesus due limla lelei mimi tonari e wai ke isak langane. 37“Langka gute gesa aitno itau ke mimi gesa langka mimi ane batne ke ngong deka ila elio ane eriar langka aitno itau ke ngong. Langka gute gesa aitno itau ke ngong deka ila elio ane eriar langka aitno itau ke ngong vala kovok. Aurou. Ila elio ane eriar langka aitno itau ke Ida Tapolngon ka pagei ngong ngame blang.”
Yesus wai osep ka isak ina oul kovok isak sisrok
(Luk 9.49-50)
38Jon wai ke Yesus langane. “Ipem parerengen imavati gute gesa ka sir angain wom e sapir angelo soulu ine. E imadangdang iye ke elio tonari kesua iye didi ite kovok.” 39Deka Yesus koli wai ke isak langane. “Umadangdang iye ine sakam. Kesua langka gute gesa due elio arit ina gesa batne ke ngong ma mase iye karanga wai soulu ke ngong kovok. 40Langka osep ka isak ida oul kovok io ma isak sudo. 41Ngawai ke umu ke pelengon ane ka lokono lokono. Langka aki vel umu e osep leklou tikar upu aki ke umu batne umu lou disaipel mase ma Ida Tapolngon kere isak ke ila kerengen.”
Itodue elio soulu kovok lama udo elio paiavu osep aitno lisak
(Matyu 18.6-9 e Luk 17.1-2)
42Deka Yesus wai ke ila disaipel langane. “Umodue elio soulu ka tipagolgol osep ka aitno lisak dagar ke ngong kovok. Langka mimi gesa ka aitno lisak ila dagar dau tidong dagar lokono kovok deka umapagolgol aitno lisak kovok. E langka itadangdang osep ka tiwaiki tidue elio langane e itopou opmu ombatno ke agunsak e itouri isak kla tisep ke misuon e timete are itau ke isak. Lama isak tidong tipaiavu osep tonari aitno lisak. 43-44Langka lupmu gesa due umu umodue elio epmes ina ine ma umobloue kopuk la vala. Langka umoblou lupmu kene kopuk la deka umodue elio epmes ina kovok batne iye dong kovok ane itau vala. Kesua mase ma umodong ke omur heven deka ma lumu mosongon ka itau dong vala dong. E langka lupmu orwo tidong deka umodue elio epmes ina bitna bitna ine e mase umala umokluk ke omur hel are soulu lokono. Kesua eiou ka omur hel dong vala dong e ina yagosngon kovok.”#9.43-44 — Osep leklou ka tile pelengon Grik itau aitno lisak mter langka pelengon leklou dong ke ves orwo ane blang. Pelengon are langane. “Ke omur hel mimei tidong tingen osep e eiou emsim kovok e dong vala dong.”
45-46“Langka kopmu gesa due umu umodue elio epmes ina ine ma umobloue kopuk la vala. Langka umoblou kopmu kene kopuk la deka umodue elio epmes ina kovok batne iye dong kovok are itau vala. Kesua mase ma umodong ke omur heven deka ma lumu mosongon ka itau dong vala dong. E langka kopmu orwo tidong deka umodue elio epmes ina bitna bitna ine e mase umala umokluk ke omur hel are soulu lokono.”#9.45-46 — Osep leklou ka tile pelengon Grik itau aitno lisak mter langka pelengon leklou dong ke ves orwo ane blang. Pelengon are langane. “Ke omur hel mimei tidong tingen osep e eiou emsim kovok e dong vala dong.”
47“Langka omtomu gesa due umu umodue elio epmes ina ine ma umepie la vala. Langka umepi omtomu kene la deka umodue elio epmes ina kovok batne iye dong kovok are itau. Kesua mase ma umodong ke omur ka Ida Tapolngon plaue deka ma lumu mosongon ka itau dong vala dong. E langka omtomu orwo tidong deka umodue elio epmes ina bitna bitna ine e mase umala umokluk ke omur hel are soulu lokono. 48Ke omur hel mimei tidong tingen osep e eiou emsim kovok e dong vala dong. 49Eriar langka osep tidue sol duru ke ngangon ma Ida Tapolngon due eiou ombatno ngen osep.”
50“Sol wan ka itau. E langka sol emlel ma umakaranga umodue ma polou galo blang kovok. Deka langane. Eriar langka sol ka galo lua itosep deka umodue elio itau ka tilua umu. E aitno lumu tidong epen pulu.”
လက်ရှိရွေးချယ်ထားမှု
Mak 9: ANT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
copyright 2003 New Tribes Mission, Sanford, FL 32771