ลูกา 14
14
เหย่ซู่ แหย่โอ่เหม่ แกแยชุ๊ย เตเพร
1เบ๊อะโตโพ๊เนอ แกแยยิวพู๊ ม๊อเนอโด่ เบ่ เบ๊อะเนอ, เหย่ซู่ จว๊า เด๊อ ฟาริสี กู่กล๊อ เตเพร อาหี่. เบ๊อะอา เตเร เอ่ดี เบ๊อะเนอ, แกแย เบ๊อะเนอ เต๊เห่ แม๊โห่ ลู. 2เด๊อ เหย่ซู่ อาเบ๊เงเนอ แกแย เหน่แย๊โบเถ่ โอ่ เตเพร. 3เร๊อ เหย่ซู่ แด๊เฮอ เพรอิซว๊า เตซว๊าเตแส่ อาซ๊าร๊า เต๊เห่ เร๊อ ฟาริสีพู๊ เต๊เห่ เร๊อ อา เฮ๊ เหย่ซี เน๊อ, “เด๋อ เป ลีเทส่อพ๊า เตซว๊าเตแส่ อากูเนอหม่า, แหย่โอ่เหม่ แกแย เบ๊อะแกแยยิวพู๊ อา ม๊อเนอโด่ เบ๊อะเนอ เนอหม่า อาหนิ แหน่ แอ? หม่า อาหนิ โต่ แอ?” 4หม่าแน๊เรอ เหย่ซี เฮ๊ฉื่อ ลู เตอเจ๋อ โต่. เหย่ซู่ แด่แถ่ อากู๊ขุ เด๊อ แกแย เออเตเพร อาลู เร๊อ อา แหย่โอ่เหม่ เป่แก ลู, เร๊อ อา ปลวา กาแก ลู.
5โทเร๊อ เหย่ซู่ เฮ๊ เหย่ซี เน๊อ, “เบ๊อะแกแยยิวพู๊ อา ม๊อเนอโด่ เบ่ เบ๊อะเนอ, ซี พู๊คู เตเพร เพร เก่หม่าโต่เรอ ซี ปู่ โตโดโด อา แลตา เด๊อ เทอกลื่อกู เฮ๊เนอ, ซี เก่ จว๊าพย๊าเถ่ เจ๊อ ลู โตโพ๊พย๊าแถ่ เจ๊อ ปา แอ? หม่า โต่ แอ?”#มัทธิว ๑๒:๑๑ 6หม่าแน๊เรอ เหย่ซี เฮ๊กาคยาฉื่อ ลู เตอเจ๋อ โต่.
เอ๊โมฉื่อ ซิเผระ เร๊อ เตแด่หยว่าซิปล่อ
7เบ๊อะเหย่ซู่แม๊เถอะ ซิเผระ เต๊เห่ เด๊อ ฟาริสี กู่กล๊อ เต๊เห่ เอ๊แฮเอ่ เหย่ซี ดี เบ๊อะเนอ, เหย่ซี แฮโน พย๊าโอ่แน เบ๊อะเนอ. อา แฮนว๊าพย๊า แลแค อาเหล่โอ่ เด๊อ อาแร๊. เหย่ซู่ แม๊เถอะ เหย่ซี เมฮู๊เนอเรอ อา เฮ๊โข่เร๊อ เป่ เหย่ซี เร๊อ โหง่ค๊าโข่ โต๊โต่. 8“เบ๊อะอู หม่าแฮเอ่ หม่าแฮโอ เน เด๊อ แกแย เตเพร เพร อา ป่วยพย๊าพู๊ พย๊าเม เบ๊อะเนอ, นว๊า โอ่แน พย๊า แต่ เหล่โอ่ เด๊อ อาแร๊ แต่เหม่, เมเตเฮ๊เรอ แกแย เด๊อ อา ทวา กู่กล๊อ เด๊อ อาดุเล๊อ เร๊อ เน เนอ, แตแร๋หม่า อู หม่าแฮเอ่ หม่าแฮโอ หนิ แจ่ เกอ เหย่ซี.#เพรลีแมโหง่ ๒๕:๖-๗ 9อู เก่ หม่าแฮ เต่อเกออา เร๊อ เน เฮ๊เรอ, หี่แบ่เจ่ เก่ เฮ๊ เน เน๊อ, ‘เด๊อะโอ่แนโอ่ เหร่อเป่ เน เหล่โอ่ เออเนอ เร๊อ อาเออ นี๋,’ เร๊อ เบ๊อะเนอเค ปา, เน เบ่ จว๊าโอ่แนแก เด๊อ เหล่โอ่ แลหยื่อเล๊อ โต๊โผ่ ปา เร๊อ เน เก่ ซิเตเรแก ปา. 10อาแร๊เล๊อหม่า, เก่ อู หม่าแฮ เน เฮ๊เรอ จว๊าโอ่แน เด๊อ เหล่โอ่ แลหยื่อเล๊อ เนอโต๊โผะ. เน เก่ เมฮู๊เนอ เฮ๊เรอ, หี่แบ่เจ่ อา แฮ เฮ๊ เน เน๊อ, ‘โคแบ๊ซว๊า, แถ่โอ่แนโอ่ เด๊อ อาขุ เนอโต๊โผะ,’ เร๊อ เบ๊อะเนอเคปา, เน อา เป๊เส่โอ่ เด๊อ อู ปว๋าเตเพร อาเป๊เส่เง ปา. 11เมเตเฮ๊เรอ แกแย เตเพร เพร เด๊อ อา แด่ดุ อาเหน่เนอ, อู เก่ แฉ่ตา อา ปา, เร๊อ แกแย เตเพร เพร เด๊อ อา แด่หยว่า อาซิปล่อ เนอ, อู เก่ แด่แถ่โล อา ปา.”#มัทธิว ๑๓:๑๒, ลูกา ๑๘:๑๔
12โทเร๊อ เหย่ซู่ เฮ๊ เกอลาติ หี่แบ่เจ่ เน๊อ, “เบ๊อะเน เซเร เหมาะโถ่ เหล่เอ่เหล่โอ เบ๊อะเนอ เบ่เบ่, เก่หม่าโต่เรอ เหมาะเฮ๊ เหล่เอ่เหล่โอ เบ๊อะเนอ เบ่เบ่, เน โคแบ๊ซว๊า เต๊เห่ เบ่เบ่, เนโป่เนแหม่ เต๊เห่ เบ่เบ่, เนกลุยแล เต๊เห่ เบ่เบ่, เนหี่ หี่แพหี่ช๊า เด๊อ อา ดุแหย่แถ่เซ เต๊เห่เนอ เบ่เบ่, เอ๊ แต่ เหย่ซี แต่เหม่. เน เก่ เอ๊เอ่ เหย่ซี ฮู๊เนอ เฮ๊เรอ เหย่ซี อา เอ๊เอ่ กาคยาฉื่อ ลาติ เน ปา. เร๊อ ซี เมเลอเมเก่ เร๊อ แพ๊ ลู แพ๊. 13หม่าแน๊เรอเบ๊อะเน เมป่วย เบ๊อะเนอ, เซเร เหล่เอ่เหล่โอ เร๊อ เอ๊ เป่ แกแย เด๊อ อา โซพ๊าโซแร เนอเต๊เห่, แกแยด๊าโอ่ตือรือ เนอเต๊เห่, แกแย กู๊โด่ด๊า เนอเต๊เห่ เด๊อ แกแย เป๊เส่คี๊ เนอเต๊เห่ นี๋. 14เร๊อ เน เก่ เอ๊เอ่ แกแย ฮู๊เออ เต๊เห่ เฮ๊เนอ, เน เก่ พย๊าหนิ เตเด๊อะบุ๊ยเด๊อะเตอเรอปา, เมเตเฮ๊เรอ เหย่ซี เอ๊เอ่ กาคยาฉื่อเบ๊ เกอ เน เตอเจ๋อ โต่. เบ๊อะแกแยจ๊อเต เต๊เห่ ก๊อถ่อเซอเพร กาคยา เด๊อ เตเซอ เบ๊อะเนอ ปาเนอ, จอแปแหร่ เก่ เด๊อะคยา เน เตบุ๊ยเตเตอเรอ ปา.”
เตโด่แน ค๊าโข่ เร๊อ ป่วยเอ่โอดุ
(มัทธิว ๒๒:๑-๑๐)
15แกแย โอ่แนโอ่ เกอ เร๊อ เหย่ซู่ เบ๊อะเหล่เอ่ ดีเหร่อาช๊า เนอเต๊เห่ อาเกล เตเพรเนอ, อา หนิโฮ เตเฮ๊เบ่เออ เร๊อ อา เฮ๊ เหย่ซู่ เน๊อ, “แกแย เด๊อ อา โอ่แน เอ่โอน๊อ เด๊อ จอแปแหร่ อาเทออาเก่กู ปา เต๊เห่เนอ, อา เก่ พย๊าหนิ หม่าแหน่ เจ๊อ เตเด๊อะบุ๊ยเด๊อะเตอเรอปา เจ๊อ!”
16เร๊อ เหย่ซู่ เฮ๊ อา เน๊อ, “เบ๊อะเตอโพ๊, แกแย เตเพร เมป่วยดุ เร๊อ อา เด๊อะเอ่เด๊อะโอ อู, เร๊อ หม่า แฮเอ่ หม่าแฮโอ โหร่เอ๊ แหน่เจ๊อ แกแย เจ๊อ. 17เบ๊อะป่วยเอ่โอ ม๊อเนอม๊อเซ แฮโต่เฮ๊อ เบ๊อะเนอ, อา นอจว๊าแด๊โฉ่ อาหลู่เล๊ เตเพร เร๊อ แกแย เด๊อ อา หม่าแฮเอ่ หม่าแฮโอ โทเฮ๊อ ลู เนอเต๊เห่, เร๊อ อา หลู่เล๊เออ จว๊า เฮ๊ เน๊อ, ‘แฮเอ่แฮโอ แลแค เมอ เฮ๊เน๋อ, อู เซเร หนื่ออื่อ ลอปลี เฮ๊อ.’
18“หม่าแน๊เรอ เตเพร เต๊อเจ่อเจ๋อ อา เกโทเกแล เกอเร๊อ ลอปลี เร๊อ อาโอ่โก โต่. อาเหร่อเล๊อ เตเพร เร๊อ อา เฮ๊ หลู่เล๊ เออเนอ เน๊อ, ‘แว พรี แหล่ เต๊เหล่ เร๊อ แว โตเบ่ จว๊าแม๊ เกอเร๊อ อา. เร๊อ แด่ทูซิปล่อ เหร่อแวนี๋.’
19“อาโร เตเพร ลาติ เรอ อา เฮ๊ เน๊อ, ‘แว ฟรี ปู่ แงเชอ เร๊อ แว โตเบ่ จว๊า เหว่แม๊ เกอเร๊อ อา กู๊แหน่. เร๊อ แด่ทูซิปล่อ เหร่อแว นี๋.’
20“เด๊อ อาโรเตเพร เรอ อา เฮ๊เกอติ เรอ, ‘แว ตื๊อกาพย๊าเซปาแวเมแพ๊ เร๊อ แว แฮเบ๊ โต่.’
21“หลู่ เออเตเพร กาคยา คยาแซ๊ เร๊อ อา กาแด๊โฉ่ เป่ อาแบ่เจ่ เร๊อ ล๊อ เตหรี่เตแก เออเต๊เห่. เร๊อ หี่แบ่เจ่ เออเตเพร ซิปล่อดุ เร๊อ อา เฮ๊ อาหลู่ เน๊อ, ‘เถ่จว๊า แพรแพร เจ๊อ เด๊อ แกล๊ดุกู เนอ เร๊อ เด๊อ แกล๊ฮู๊ เนอเต๊เห่ กู, เร๊อ เอ๊กา แลแค แกแย โซพ๊าโซแรพู๊, แกแยด๊าโอ่ตือรือ, แกแย เป๊เส่คี๊, เร๊อ แกแย กู๊โด่ด๊า เนอเต๊เห่ นี๋.’
22“อา หลู่ กาโตคยา เร๊อ อา เฮ๊ อาแบ่เจ่ เน๊อ, ‘แบ่เจ๋ แว จว๊าเมโท ลอเฮ๊อ ฮู๊ เน เฮ๊ตาโหง่ เนอเต๊เห่ เฮ๊อ, หม่าแน๊เรอ เหล่โอ่ โอ่กอคูปา เต๊เห่.’
23“ฮู๊เนอ อาขว่าอาคยา แบ่เจ่เฮ๊ อาหลู่เล๊ เน๊อ, ‘จว๊า เกอลาติ เด๊อ ดอพู๊โฉ่พู๊ เนอเต๊เห่ อากู เร๊อ นอแฮ โอ่บา ลอ เด๊อ แว หี่กูเออ. 24แว เฮ๊ ซี, แกแย เด๊อ แว หม่าแฮ อา เต๊เห่เนอ, แฮ เอ่น๊อ เกอ แว ป่วยเอ่โอดุเออ เตเพร่ว โต่!’”
ทวาแถ่ อาโคฮู๊เจ่ เตเพร อาคว๊าอาเก่
(มัทธิว ๑๐:๓๗-๓๘)
25เตอเนอ เบ๊อะเค, แกแย ครวา จว๊าโหร่เอ๊ เกอลา เหย่ซู่ เร๊อ อา ตีรี๊ แม๊กาคยา เหย่ซี เร๊อ อา เฮ๊ เนอ, 26“แกแย เด๊อ อา ซิหยื่อ ทวา แว โคเจ่ เตเพร เพรเนอ, อาโหมะอาเพ เบ่เบ่, อาพู๊อาเม เบ่เบ่, อาโป่อาแหม่, เร๊อ อาเหน่แบ่เจ่ เร๊อดื่อ เจ๊อ เบ่เบ่, อา เก่ โม เล๊อเล๊อ เจ๊อ เร๊อ อา โมแว เฮ๊เนอหม่า อา ทวาแถ่ แจ่ แว โคเจ่ โต่.#มัทธิว ๑๐:๓๘ 27แกแย เตเพร เพร เด๊อ อา แย๊ เกอเร๊อดื่อ อาอี๊ถื่อดีเต่ โต่โต่, เร๊อ อา ครวา เกอ แวคยา โต่โต่ เตเพรเนอ, อา ทวาแถ่ แจ่ แว โคเจ่ โต่.#มัทธิว ๑๐:๓๘, ๑๖:๒๔, มาระโก ๘:๓๔, ลูกา ๙:๒๓
28“เฮ๊โก๊เหร่อ, เด๊อ ซีเกล เตเพร เพร เนอ, อา เก่ เตเนหนื่ออื่อเฮ๊อ เน๊อ อา เก่ แบ๊แถ่ หี่แถ่โล เตเม เก่เฮ๊เรอ, อา เก่ ลอ บ๋า เต ปา เนอ อา เบ่ โอ่แน แด๊แม๊ เหร่อ. โต่เด๊อ อา เมโทเมปลื๊อ ลอ หี่ เออเตเม เนอหม่า, อารือ อา โป่ ปา แอ หม่า อา โป่โต่ แอ เร๊อ อา เบ่ ซิเง เหร่อ. 29อา เก่ เมเหร่อ ฮู๊เนอโต่, เรอ อา เก่ แบ๊แถ่เหร่อ อาหี่ กู่ปย๊า, เร๊อ อา เก่ เมแถ่ โทปลื๊อเบ๊ อาหี่ เออเนอ โต่ เฮ๊เนอ, ล๋อ แกแย เด๊อ อา แม๊เถอะ อา เมเตเร๊แถ่ โอ่แก อาหี่ เออเต๊เห่เนอ, อู เก่ งยาโคร ลอ ลู ปา. 30เหย่ซี เก่ เฮ๊ แลแค เน๊อ, ‘แกแย เออเตเพร ช๊อแถ่ เกอเร๊อ อาหี่ เร๊อ อา เมปลื๊อเมโทเบ๊ เกอเร๊อ โต่ วา.’
31“เก่หม่าโต่เรอ, เฮ๊โก๊เหร่อ, คุ๊ยจ๊อแผ่ เตเพร เก่ เถ่จว๊า เกอเร๊อ เน๊อ อาเกลอฮู๊ อาโอ่เพร ตอซ๊อ, เร๊อ อา เตเร จว๊าช่ายฉื่อ เร๊อ คุ๊ยจ๊อแผ่ เด๊อ อาโรเตเพร เด๊อ อา โอ่ เกอเร๊อ เน๊อ อาเกลอฮู๊ อาเพร เนอซ๊อ เตเพร เออเนอ, อา เก๊ ช่ายฉื่อ เร๊อ คุ๊ยจ๊อแผ่ เออเตเพร เนอหม่า, อา เป่ ช๊าเหล่ ปา แอ, หม่า อา เป่ ช๊าเหล่ โต่ แอ เนอ, อา เบ่ โอ่แนโอ่ เตเน แม๊ โก๊เหร่อ. 32เก่ อาแร๊ เป่ โต่ เก่เฮ๊เรอ, เบ๊อะอา โอ่ยา ปา เร๊อ ลู เบ๊อะเนอ, อา เบ่ นอจว๊า เหร่อ อาแกแย เต๊เห่ เด๊อ อา เก่ จว๊า เฮ๊เปเฮ๊ดวา เหร่อ. 33ฮู๊เนอ อาขว่าอาคยา, ล๋อ เต เด๊อ อา โอ่ เร๊อ ซี ล๋อ ปลี เต๊เห่เนอ, ซี เก่ แด่แก โต่ เก่เฮ๊เรอ, ซี ทวาแถ่ แจ่ แว โคเจ่ เตเพร่ว โต่.
อี๊เส่ อาชือเฮโอ่เหม่
(มัทธิว ๕:๑๓, มาระโก ๙:๕๐)
34“อี๊เส่ เนอหม่า อาแร๊ แพ๊ ตื๊อดื่อเรอ อี๊เส่ อา เตชือเฮ เออเนอ อา เก่ โอ่เหม่แก เฮ๊เรอ, อู เมชือเฮ กาคยา แจ่ ปา อา ฮู๊เต? 35อี๊เส่ เด๊อ อาชือเฮ ปาโต่เนอ, เด๊อ เห่ขุ อาเง เบ่เบ่, เด๊อ ส่อเหมาะ เหล่หนิอ๊าหนิเหร่ อาเง เบ่เบ่, อาบุ๊ยเตอเรอ โอ่ ปา เตอเจ๋อ โต่. เร๊อ อู วีแก แก แพ๊ อา แพ๊.”
“แกแย เด๊อ อา โอ่ เร๊อ อากู๊หลิโกะ เด๊อ อา หนิโฮ แจ่ เตเต๊เห่เนอ อา โตเบ่ หนิดา แลแค นี๋.”
လက်ရှိရွေးချယ်ထားမှု
ลูกา 14: EKTNTGEN
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ