လုကာ 5
5
ပထမဦးဆုံးသောတပည့်တော်များ
1တစ်နေ့၌ ယေရှုသည် ဂင်နေသရက်အိုင်နားတွင် ရပ်တော်မူစဉ် လူထုပရိသတ်သည် ဘုရားသခင်၏နှုတ်ကပတ်တရားတော်ကို ကြားနာရန် ကိုယ်တော်ထံသို့ တိုးဝှေ့လာကြ၏။ 2ကိုယ်တော်သည် ကမ်းစပ်၌ ဆိုက်ထားသောလှေနှစ်စင်းကို မြင်တော်မူ၏။ တံငါသည်တို့သည် ထိုလှေများပေါ်မှ ဆင်းပြီး မိမိတို့၏ပိုက်ကွန်များကို ဆေးကြောနေကြ၏။ 3ကိုယ်တော်သည် ထိုလှေနှစ်စင်းထဲမှ ရှိမုန်၏လှေပေါ်သို့ တက်၍ ရှိမုန်အား လှေကို ကမ်းနှင့် အနည်းငယ်ခွာပေးရန် မိန့်တော်မူ၏။ ထို့နောက် လှေထဲတွင် ထိုင်လျက် လူထုပရိသတ်တို့ကို ဟောပြောသွန်သင်တော်မူ၏။
4တရားဟောပြီးသောအခါ ရှိမုန်အား “ရေနက်သည့် နေရာသို့ ရွှေ့လော့။ သင်တို့၏ပိုက်ကွန်များကို ချ၍ ငါးဖမ်းကြလော့” ဟု မိန့်တော်မူ၏။
5ရှိမုန်ကလည်း “ဆရာ… ကျွန်ုပ်တို့သည် တစ်ညတာလုံး ကြိုးစားဖမ်းကြသော်လည်း ငါးတစ်ကောင်ကိုမျှ မမိပါ။ သို့သော်လည်း ဆရာခိုင်းသောကြောင့် ကျွန်ုပ် ပိုက်ကွန်များကို ချပါမည်” ဟု လျှောက်လေ၏။ 6သူတို့သည် ပိုက်ကွန်များကို ချပြီးသောအခါ ငါးများစွာကို ဖမ်းမိသဖြင့် ပိုက်ကွန်များပင် စုတ်ပြဲစပြုလာ၏။ 7ထို့ကြောင့် သူတို့သည် အခြားလှေမှ အဖော်တံငါသည်များကို အချက်ပြ၍ အကူအညီတောင်းကြ၏။ ထိုသူတို့သည်လာ၍ လှေနှစ်စင်းလုံးတွင် ငါးများပြည့်အောင်ထည့်ကြသဖြင့် လှေတို့သည် နစ်မြုပ်လုမတတ် ဖြစ်၏။
8ထိုအဖြစ်အပျက်ကို မြင်သောအခါ ရှိမုန်ပေတရုသည် ယေရှု၏ခြေတော်ရင်း၌ ဒူးထောက်ပြီးလျှင် “သခင်… အကျွန်ုပ်သည် အပြစ်များသောသူဖြစ်သောကြောင့် အကျွန်ုပ်ထံမှ ထွက်ခွာသွားတော်မူပါ” ဟု လျှောက်လေ၏။ 9ဤသို့လျှောက်ရသည်မှာ ဖမ်းမိသောငါးများသည် အလွန်များပြား၍ ရှိမုန်နှင့် အခြားတံငါသည်များအားလုံးက အံဩကြသောကြောင့် ဖြစ်၏။
10ရှိမုန်နှင့်လုပ်ဖော်ကိုင်ဖက်ဖြစ်သည့် ဇေဗေဒဲ၏သားနှစ်ဦး ယာကုပ်နှင့် ယောဟန်တို့သည်လည်း အံ့ဩကြ၏။ ယေရှုက “မကြောက်နှင့်။ ယခုမှစ၍ သင်သည် လူများကိုဖမ်းသောတံငါ ဖြစ်လိမ့်မည်” ဟု ရှိမုန်အား မိန့်တော်မူ၏။ 11ထိုအခါ သူတို့သည် လှေများကို ကမ်းခြေတွင် ဆိုက်ကပ်ပြီးလျှင် ရှိသမျှကို ထားခဲ့၍ ယေရှုနောက်သို့ လိုက်ကြ၏။
အနာကြီးရောဂါသည်တစ်ဦးအား ကျန်းမာစေတော်မူခြင်း
12ယေရှုသည် မြို့တစ်မြို့၌ ရှိနေတော်မူ၏။ ထိုမြို့၌ တစ်ကိုယ်လုံး အနာကြီးရောဂါပြင်းထန်စွာ ခံစားနေရသောသူတစ်ဦးရှိ၏။ သူသည် ယေရှုကိုမြင်သောအခါ ဝပ်တွားခယလျက် “သခင်… သခင်အလိုတော်ရှိလျှင် အကျွန်ုပ်ကိုစင်ကြယ်စေနိုင်ပါသည်” ဟု လျှောက်လေ၏။
13ယေရှုသည် လက်ကို ဆန့်၍ ထိုသူကို တို့ပြီးလျှင် “ငါအလိုရှိ၏။ စင်ကြယ်စေ” ဟု မိန့်တော်မူ၏။ ထိုခဏအတွင်း၌ ထိုသူ၏ရောဂါသည်လည်း ပျောက်ကင်းလေ၏။ 14ထို့နောက် ဤအကြောင်းကို မည်သူ့ကိုမျှ မပြောရန် ထိုသူအား တားမြစ်တော်မူလျက် “ယဇ်ပုရောဟိတ်ထံသို့ သွား၍ ကြည့်ရှုစစ်ဆေးစေလော့။ သင့်ရောဂါ ပျောက်ကင်းစင်ကြယ်ကြောင်း လူတို့ရှေ့၌ သက်သေပြရန် မောရှေ၏ပညတ်ကျမ်းအတိုင်း ပူဇော်စရာများကို ဆက်သလော့” ဟု မိန့်တော်မူ၏။ 15သို့သော်လည်း ကိုယ်တော်၏သတင်းတော်သည် ပို၍ပျံ့နှံ့သွားသဖြင့် လူအုပ်ကြီးသည် ကိုယ်တော်၏တရားတော်ကို ကြားနာရန်နှင့် မိမိတို့၏အနာရောဂါများကို ကုသခံရန် စုဝေးလာကြ၏။ 16ယေရှုသည် တောကန္တာရသို့ သွား၍ ဆုတောင်းတော်မူလေ့ရှိ၏။
လေဖြတ်သူတစ်ဦးအား ကျန်းမာစေတော်မူခြင်း
17တစ်နေ့၌ ယေရှုသည်ဟောပြောသွန်သင်လျက်ရှိနေစဉ် ဂါလိလဲပြည်နှင့် ယုဒပြည်ရှိ ကျေးရွာအသီးသီးမှလည်းကောင်း၊ ဂျေရုဆလင်မြို့မှလည်းကောင်း ရောက်လာကြသောဖာရိရှဲများ#5:17 ဂျူးဓလေ့ထုံးတမ်းနှင့် ဥပဒေစည်းကမ်းကို တင်းကျပ်စွာ လိုက်နာသည့် ဂျူးဘာသာရေးခေါင်းဆောင်များ။နှင့် ကျမ်းတတ်ဆရာများတို့သည် ထိုင်နေကြ၏။ အနာရောဂါပျောက်ကင်းစေနိုင်သော ဘုရားသခင်၏တန်ခိုးသည်လည်း ယေရှု၌ ရှိနေ၏။
18ထိုအခါ လူတချို့သည် လေဖြတ်သူတစ်ဦးကို ထမ်းစင်ဖြင့် ထမ်း၍ ခေါ်ဆောင်လာကြ၏။ သူတို့သည် ထိုသူကို အထဲသို့ သယ်ဆောင်၍ ကိုယ်တော့်ရှေ့၌ ချထားရန် ကြိုးစားကြ၏။ 19သို့သော်လည်း လူထုပရိသတ်ရှိနေသဖြင့် အထဲသို့ သယ်ဆောင်မည့်လမ်းကို မတွေ့ကြပေ။ ထို့ကြောင့် အိမ်အမိုးပေါ်သို့တက်ပြီးလျှင် အုတ်ကြွပ်များကိုခွာ၍ လူနာကို ထမ်းစင်နှင့်တကွ လူထုပရိသတ်အလယ် ယေရှုရှေ့တော်သို့ ကြိုးဖြင့် လျှောချကြ၏။ 20ယေရှုသည် ထိုသူတို့၏ယုံကြည်ခြင်းကို မြင်သောအခါ လေဖြတ်သူအား “မိတ်ဆွေ#5:20 မူရင်းဂရိကျမ်းတွင် “အချင်းလူ” ဟု ပါရှိသည်။… သင်၏အပြစ်များကို ခွင့်လွှတ်ပြီ” ဟု မိန့်တော်မူ၏။
21ထိုအခါ ဖာရိရှဲများနှင့် ကျမ်းတတ်ဆရာများက “ဘုရားသခင်ကို စော်ကားပြောဆိုသော ဤသူသည် မည်သူနည်း။ ဘုရားသခင်မှလွဲ၍ မည်သူသည် အပြစ်ကို ခွင့်လွှတ်နိုင်ပါမည်နည်း” ဟု စိတ်ထဲ၌ တွေးတောနေကြ၏။
22ယေရှုသည် ထိုသူတို့ မည်သို့တွေးတောနေကြသည်ကို သိတော်မူသဖြင့် “သင်တို့စိတ်ထဲ၌ အဘယ်ကြောင့် ဤသို့တွေးတောနေကြသနည်း။ 23‘သင်၏အပြစ်များကို ခွင့်လွှတ်ပြီ’ ဟု ပြောရန် ပို၍ လွယ်ကူသလော။ သို့မဟုတ် ‘ထ၍ လမ်းလျှောက်လော့’ ဟု ပြောရန် ပို၍ လွယ်ကူသလော။ 24သို့သော် လူသား#5:24 “လူသား” သည် ယေရှုက မိမိကိုယ်တိုင်အတွက် သုံးသော ဂုဏ်ပုဒ်ဖြစ်သည်။သည် ဤလောကတွင် အပြစ်လွှတ်ပိုင်သောအခွင့်အာဏာရှိသည်ကို သင်တို့အား ငါသက်သေပြမည်” ဟု ဆိုကာ လေဖြတ်သူအား “သင့်အား ငါဆို၏။ ထလော့။ သင့်ထမ်းစင်ကိုယူ၍ အိမ်သို့ ပြန်လော့” ဟု မိန့်တော်မူ၏။
25ထိုအခါ ထိုသူသည် လူအများရှေ့တွင် ချက်ချင်းထပြီးမှ ထမ်းစင်ကို ယူ၍ ဘုရားသခင်ကိုချီးမွမ်းလျက် အိမ်သို့ ပြန်လေ၏။ 26လူထုပရိသတ်တို့သည် အလွန်အံ့သြ ကြောက်ရွံ့၍ ဘုရားသခင်၏ဂုဏ်တော်ကိုချီးမွမ်းလျက် “ငါတို့သည် ယနေ့ထူးဆန်းအံ့ဖွယ်သောအရာများကို မြင်ခဲ့ကြပြီ” ဟု ပြောဆိုကြ၏။
လေဝိကို ခေါ်ယူတော်မူခြင်း
27ထို့နောက် ယေရှုသည် ထိုအရပ်မှ ထွက်ကြွသောအခါ လေဝိအမည်ရှိ အခွန်ကောက်သူတစ်ဦးသည် အကောက်ခွန်ရုံးတွင် ထိုင်နေသည်ကို တွေ့မြင်တော်မူ၍ “ငါ့နောက်သို့ လိုက်၍ ငါ့တပည့်အဖြစ်ခံယူလော့” ဟု မိန့်တော်မူ၏။ 28လေဝိသည် ရှိသမျှကိုထားခဲ့ပြီးလျှင် ထ၍ ယေရှုနောက်တော်သို့ လိုက်လေ၏။
29ထို့နောက် လေဝိသည် မိမိ၏အိမ်၌ ယေရှုအတွက်ဧည့်ခံပွဲကြီးတစ်ခု ကျင်းပပေးလေ၏။ သူ၏အပေါင်းအသင်းများဖြစ်သော အခွန်ကောက်သူများစွာနှင့် အခြားသူများလည်း အတူထိုင်၍ စားသောက်ကြ၏။#5:29 မူရင်းဂရိကျမ်းတွင် “လျောင်းတော်မူစဉ်” ဟူ၍ တွေ့ရှိရသည်။ ပထမရာစုအရှေ့အလယ်ပိုင်း၌ အစာစားသုံးရာတွင် စားပွဲရှေ့၌ထိုင်၍ စားသုံးလေ့မရှိပါ။ တစ်စုံတစ်ခုအပေါ် သို့မဟုတ် အခြားတစ်ဦးအပေါ် မှီလျောင်း၍ စားပွဲကိုဦးတည်ကာ စားသောက်လေ့ရှိသည်။ 30သို့သော် ဖာရိရှဲများနှင့် သူတို့ထဲမှ ကျမ်းတတ်ဆရာများက “သင်တို့သည် အဘယ်ကြောင့် အခွန်ကောက်သူများ၊ အပြစ်သားများနှင့်အတူ စားသောက်ကြသနည်း” ဟု တပည့်တော်တို့အား ဝေဖန်ပြစ်တင်ကြ၏။
31ယေရှုက “ကျန်းမာသောသူတို့သည် ဆရာဝန်ကိုမလိုအပ်ပါ။ ဖျားနာသောသူတို့သာလျှင် လိုအပ်ကြ၏။ 32ငါသည် ဖြောင့်မတ်သောသူတို့ကို နောင်တရစေရန်အတွက် လာ၍ ခေါ်သည်မဟုတ်။ အပြစ်သားများကို နောင်တရစေရန်အတွက် လာ၍ ခေါ်သည်” ဟု မိန့်တော်မူ၏။
အစာရှောင်ခြင်းအကြောင်း ဆွေးနွေးခြင်း
33လူတချို့က “နှစ်ခြင်းဆရာယောဟန်၏တပည့်များနှင့် ဖာရိရှဲတို့၏တပည့်များသည် မကြာခဏ အစာရှောင်ခြင်းနှင့် ဆုတောင်းခြင်းတို့ကို ပြုလေ့ရှိ၏။ သို့ရာတွင် ဆရာတော်၏တပည့်များမှာ စားသောက်လျက်သာ နေကြသည်” ဟူ၍ လျှောက်ကြ၏။
34ထိုအခါ ယေရှုက “သတို့သား၏မိတ်ဆွေအပေါင်းအသင်းများကို ထိုသတို့သားနှင့်အတူရှိနေစဉ် အစာရှောင်စေနိုင်မည်လော။ 35သို့သော်လည်း သတို့သားကို သူတို့ထံမှ ခေါ်ယူသွားမည့်အချိန် ရောက်လာလိမ့်မည်။ ထိုအခါ ထိုသူတို့သည် အစာရှောင်ကြလိမ့်မည်” ဟု မိန့်တော်မူ၏။
36ထို့နောက် ယေရှုသည် သာဓကတစ်ခုကို သုံး၍ မိန့်တော်မူသည်မှာ “မည်သူမျှ အထည်သစ်မှ ပိတ်စကိုဆုတ်ဖြဲ၍ ပိတ်ထည်ဟောင်းကို ဖာလေ့မရှိ။ ထိုသို့ပြုလျှင် အထည်သစ်သည် ပျက်စီး၍ ထိုဖာထေးရာတွင် သုံးသည့်ပိတ်စသစ်သည်လည်း အထည်ဟောင်းနှင့် လိုက်ဖက်မည်မဟုတ်။
37ထို့အတူ မည်သူမျှ စပျစ်ဝိုင်အသစ်ကို သားရေဘူးအဟောင်းထဲသို့ ထည့်လေ့မရှိကြ။ ထိုသို့ထည့်လျှင် စပျစ်ဝိုင်အသစ်သည် သားရေဘူးအဟောင်းကို ပေါက်ပြဲစေသဖြင့် စပျစ်ဝိုင်ယိုထွက်၍ သားရေဘူးလည်း ပျက်စီးလိမ့်မည်။ 38စပျစ်ဝိုင်အသစ်ကို သားရေဘူးအသစ်တွင်သာ ထည့်ရ၏။ 39စပျစ်ဝိုင်အဟောင်းကို သောက်ပြီးသောသူသည်လည်း စပျစ်ဝိုင်အသစ်ကို မသောက်လိုဘဲ ‘စပျစ်ဝိုင်အဟောင်းသည် ပို၍ကောင်း၏’ ဟု ပြောလိမ့်မည်” ဟူ၍ ဖြစ်၏။
လက်ရှိရွေးချယ်ထားမှု
လုကာ 5: BCB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.