လုကာ 9
9
တပည့်တော်ဆယ့်နှစ်ပါးကို စေလွှတ်တော်မူခြင်း
1တစ်နေ့၌ ယေရှုသည် တပည့်တော်ဆယ့်နှစ်ပါးတို့ကို ခေါ်တော်မူပြီးလျှင် နတ်ဆိုးများကို နှင်ထုတ်နိုင်သောအခွင့်အာဏာနှင့် အနာရောဂါတို့ကို ပျောက်ကင်းစေနိုင်သောတန်ခိုးကို ပေးတော်မူ၏။ 2ထို့နောက် ဘုရားသခင်၏နိုင်ငံတော်အကြောင်းကို ဟောပြောစေရန်နှင့် ဖျားနာသောသူများအား ကျန်းမာစေရန် တပည့်တော်တို့ကို စေလွှတ်တော်မူ၏။ 3ကိုယ်တော်က “ခရီးသွားစဉ် တောင်ဝှေး၊ ခရီးဆောင်အိတ်၊ အစားအစာ၊ ငွေနှင့် အင်္ကျီအပိုစသည်တို့ကို ယူမသွားကြနှင့်။ 4အိမ်တစ်အိမ်သို့ ဝင်သောအခါ ထိုအရပ်မှ မထွက်ခွာသည်တိုင်အောင် ထိုအိမ်၌သာ တည်းခိုကြလော့။ 5မည်သူမျှ သင်တို့ကို လက်မခံလျှင် ထိုမြို့မှ ထွက်ခွာသောအခါ သူတို့တစ်ဖက်၌ ဆန့်ကျင်သည့် သက်သေအဖြစ် သင်တို့၏ခြေဖဝါးမှ ဖုန်မှုန့်ကို ခါချလော့” ဟူ၍ ညွှန်ကြားတော်မူ၏။
6တပည့်တော်တို့သည် ထွက်ခွာပြီးလျှင် ကျေးလက်ဒေသများသို့ လှည့်လည်၍ နေရာအနှံ့သတင်းကောင်းကို ဟောပြောကာ ဖျားနာသောသူများကို ကျန်းမာစေကြ၏။
ဟေရုဒ်စိတ်ရှုပ်ထွေးရခြင်း
7နယ်စားအန္တိပဟေရုဒ်#9:7 နယ်စားအန္တိပဟေရုဒ်သည် ဟေရုဒ်မင်း၏သားဖြစ်ပြီး ဂါလိလဲပြည်ကို အုပ်ချုပ်သူဖြစ်သည်။သည် ယေရှုပြုတော်မူသော အခြင်းအရာအားလုံးကို ကြားသိ၍ စိတ်ရှုပ်ထွေးလျက်နေ၏။ အဘယ်ကြောင့်ဆိုသော် လူတချို့က နှစ်ခြင်းဆရာယောဟန် သေရာမှ ပြန်ရှင်သည်ဟူ၍ လည်းကောင်း၊ 8တချို့က ဧလိယပေါ်ထွန်းလေပြီဟူ၍ လည်းကောင်း၊ တချို့က ရှေးပရောဖက်တစ်ပါးပါး သေရာမှ ပြန်ရှင်လာသည်ဟူ၍ လည်းကောင်း ထင်မြင်ပြောဆိုကြသောကြောင့်ဖြစ်၏။
9ဟေရုဒ်က “ငါသည် ယောဟန်၏ဦးခေါင်းကို ဖြတ်ခဲ့ပြီ။ ဤမျှလောက် ငါသတင်းကြားရသော ဤသူသည် မည်သူဖြစ်သနည်း” ဟု ပြောဆိုလျက် ကိုယ်တော်အား တွေ့နိုင်ရန် ရှာကြံလေ၏။
လူငါးထောင်ကို ကျွေးမွေးတော်မူခြင်း
10တမန်တော်တို့သည် ပြန်လာ၍ မိမိတို့လုပ်ဆောင်ခဲ့သမျှကို ပြန်၍ လျှောက်ကြ၏။ ထို့နောက် ယေရှုသည် သူတို့ကို ခေါ်၍ ဗက်ဇဲဒမြို့သို့ တိတ်တဆိတ် ကြွတော်မူ၏။ 11ကိုယ်တော်ကြွတော်မူကြောင်းကို လူထုပရိသတ်တို့သည် ကြားသိသဖြင့် နောက်တော်သို့ လိုက်ကြ၏။ ယေရှုသည် ထိုသူတို့အား ကြိုဆို၍ ဘုရားသခင်၏နိုင်ငံတော်အကြောင်းကို ဟောပြောသွန်သင်တော်မူ၏။ ဖျားနာသောသူများကိုလည်း ကျန်းမာစေတော်မူ၏။
12ညနေခင်းရောက်သောအခါ တပည့်တော်ဆယ့်နှစ်ပါးတို့သည် ယေရှုထံသို့ ချဉ်းကပ်၍ “ဤနေရာသည် လူသူကင်းဝေးသည့်နေရာဖြစ်၏။ သို့ဖြစ်၍ လူထုပရိသတ်တို့သည် ပတ်ဝန်းကျင်အနီးရှိ ကျေးလက်ဒေသများသို့ သွား၍ တည်းခိုရာနေရာနှင့် အစားအသောက် ရှာနိုင်ရန် သူတို့အား ပြန်လွှတ်တော်မူပါ” ဟု လျှောက်ကြ၏။
13သို့သော် ယေရှုက “ထိုသူတို့အတွက် စားစရာကို သင်တို့ပေးကြလော့” ဟု မိန့်တော်မူ၏။
တပည့်တော်တို့ကလည်း “အကျွန်ုပ်တို့၌ မုန့်ငါးလုံးနှင့် ငါးနှစ်ကောင်သာ ရှိပါသည်။ ဤလူအားလုံးအတွက် အစားအစာများကို သွား၍ ဝယ်ရပါမည်လော” ဟု လျှောက်ကြ၏။ 14ထိုသို့ လျှောက်ရခြင်းမှာ ပရိသတ်ငါးထောင်ခန့် ရှိသောကြောင့်ဖြစ်၏။
ယေရှုက တပည့်တော်တို့အား “သူတို့ကို တစ်ဖွဲ့လျှင် ငါးဆယ်စီ အုပ်စုဖွဲ့၍ ထိုင်စေလော့” ဟု မိန့်တော်မူ၏။ 15တပည့်တော်တို့သည် မိန့်တော်မူသည့်အတိုင်း အုပ်စုဖွဲ့၍ ထိုင်စေကြ၏။ 16ထို့နောက် ယေရှုသည် မုန့်ငါးလုံးနှင့် ငါးနှစ်ကောင်ကို ယူ၍ ကောင်းကင်သို့ မျှော်ကြည့်ကာ ကျေးဇူးတော်ကို ချီးမွမ်းတော်မူ၏။ ပြီးမှ မုန့်ကို ချိုးဖဲ့၍ လူထုပရိသတ်တို့အား ဝေရန် တပည့်တော်တို့အား ပေးတော်မူ၏။ 17ပရိသတ်အားလုံး ဝလင်စွာ စားကြပြီး တပည့်တော်တို့သည် ကြွင်းကျန်သောအကျိုးအပဲ့များကို တောင်းထဲသို့ ကောက်သိမ်းရာ ဆယ့်နှစ်တောင်းအပြည့်ရကြ၏။
ယေရှုသည် ခရစ်တော်ဖြစ်ကြောင်း ပေတရုဝန်ခံခြင်း
18တစ်နေ့၌ ယေရှုသည် တစ်ကိုယ်တည်းဆုတောင်းလျက်နေတော်မူစဉ် တပည့်တော်တို့သာလျှင် အနီးတွင် ရှိကြ၏။ ထိုအခါ ကိုယ်တော်က သူတို့အား “လူတို့သည် ငါ့ကို မည်သူဖြစ်သည်ဟူ၍ ဆိုကြသနည်း” ဟု မေးတော်မူလျှင် 19တပည့်တော်တို့က “တချို့က ကိုယ်တော်သည် နှစ်ခြင်းဆရာယောဟန်ဟု ဆိုကြ၏။ သို့သော် တချို့က ဧလိယဖြစ်သည်ဟု ဆိုကြ၍ တချို့က သေရာမှ ပြန်ရှင်လာသော ရှေးပရောဖက်တစ်ပါးပါးဖြစ်သည်ဟု ဆိုကြပါသည်” ဟု လျှောက်ကြ၏။
20ထိုအခါ ယေရှုက “သင်တို့သည်လည်း ငါ့ကို မည်သူဖြစ်သည်ဟု ဆိုကြသနည်း” ဟူ၍ မေးတော်မူလျှင် ပေတရုက “ကိုယ်တော်သည် ဘုရားသခင်၏ခရစ်တော်#9:20 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။ ဖြစ်တော်မူ၏” ဟု လျှောက်လေ၏။
မိမိအသေခံတော်မူမည့်အကြောင်းကို ကြိုတင်ဟောတော်မူခြင်း
21ယေရှုသည် ဤအကြောင်းကို မည်သူ့ကိုမျှ မပြောရန် တပည့်တော်တို့အား တင်းကျပ်စွာ သတိပေးတော်မူလျက် 22“လူသား#9:22 “လူသား” သည် ယေရှုက မိမိကိုယ်တိုင်အတွက် သုံးသော ဂုဏ်ပုဒ်ဖြစ်သည်။သည် ပြင်းစွာသောဒုက္ခဝေဒနာကို ခံရမည်။ အကြီးအကဲများ၊ ယဇ်ပုရောဟိတ်ခေါင်းဆောင်များ၊ ကျမ်းတတ်ဆရာများတို့၏ငြင်းပယ်ခြင်းနှင့် အသေသတ်ခြင်းကိုလည်း ခံရမည်။ သုံးရက်မြောက်နေ့တွင် သေခြင်းမှ ထမြောက်မည်” ဟု မိန့်တော်မူ၏။
23ထို့နောက် ပရိသတ်အပေါင်းတို့အား “တစ်စုံတစ်ဦးသည် ငါ့တပည့် ဖြစ်လိုပါက မိမိအတ္တကိုစွန့်၍ မိမိလက်ဝါးကပ်တိုင်ကို နေ့စဉ်ထမ်းကာ ငါ့နောက်သို့ လိုက်ရမည်။ 24မိမိအသက်ကို ကယ်တင်လိုသောသူသည် အသက်ဆုံးရှုံးလိမ့်မည်။ ငါ့အတွက် အသက်ဆုံးရှုံးသောသူသည် အသက်ကို ရလိမ့်မည်။ 25လူသည် ကမ္ဘာလောကတစ်ခုလုံးကို ပိုင်ဆိုင်ရသော်လည်း မိမိအသက်ကို ဆုံးရှုံးလျှင် မည်သည့်အကျိုး ရှိမည်နည်း။
26တစ်စုံတစ်ဦးသည် ငါနှင့် ငါ့စကားအတွက် ရှက်လျှင် လူသားသည် မိမိဘုန်းအသရေ၊ ခမည်းတော်၏ဘုန်းအသရေ၊ သန့်ရှင်းသောကောင်းကင်တမန်များ၏ဘုန်းအသရေနှင့် ကြွလာသောအခါ ထိုသူအတွက် ရှက်တော်မူမည်။ 27ငါအမှန်ဆိုရလျှင် ဤနေရာ၌ ရပ်နေကြသောသူ တချို့သည် ဘုရားသခင်၏နိုင်ငံတော်ကို မမြင်ဘဲ သေရမည်မဟုတ်” ဟု မိန့်တော်မူ၏။
အဆင်းသဏ္ဌာန်တော်ပြောင်းလဲခြင်း
28ဤသို့ မိန့်တော်မူပြီးမှ ရှစ်ရက်ကြာသောအခါ ယေရှုသည် ပေတရု၊ ယာကုပ်နှင့် ယောဟန်တို့ကို ခေါ်လျက် ဆုတောင်းရန် တောင်ပေါ်သို့ ကြွတော်မူ၏။ 29ထိုသို့ ယေရှုသည် ဆုတောင်းတော်မူစဉ် မျက်နှာတော်၏အသွင်အပြင်သည် ပြောင်းလဲ၍ အဝတ်တော်သည်လည်း ဖြူဖွေးတောက်ပလာ၏။ 30-31မောရှေနှင့်ဧလိယတို့သည် ဘုန်းရောင်ခြည်နှင့် ရုတ်တရက်ပေါ်လာ၍ ကိုယ်တော်နှင့် စကားပြောနေကြ၏။ ထို့နောက် သူတို့သည် ဂျေရုဆလင်မြို့၌ ဖြစ်လာမည့် ယေရှု၏အသေခံတော်မူခြင်းအကြောင်းကို ပြောဆိုကြ၏။
32ထိုအချိန်တွင် ပေတရုနှင့် အပေါင်းအဖော်တို့သည်လည်း ငိုက်မျဉ်း၍ အိပ်ပျော်လျက်ရှိကြ၏။ အိပ်ပျော်ရာမှ နိုးလာကြသော် သူတို့သည် ယေရှု၏ဘုန်းရောင်ခြည်ကိုလည်းကောင်း၊ ယေရှုနှင့်အတူရပ်နေကြသော လူနှစ်ဦးကိုလည်းကောင်း တွေ့မြင်ကြ၏။ 33ယေရှုထံမှ မောရှေနှင့် ဧလိယတို့ထွက်ခွာချိန်တွင် ပေတရုက “သခင်… ဤနေရာတွင် အကျွန်ုပ်တို့ရှိနေသည်မှာ ကောင်းပေ၏။ အကျွန်ုပ်တို့သည် သခင့်အတွက် တဲတစ်ဆောင်၊ မောရှေအတွက် တစ်ဆောင်၊ ဧလိယအတွက် တစ်ဆောင်၊ တဲသုံးဆောင် ဆောက်ပါရစေ” ဟု မိမိအဘယ်အရာပြောဆိုသည်ကို မသိဘဲ လျှောက်ဆိုလေ၏။ 34ထိုသို့ လျှောက်ဆိုနေစဉ် မိုးတိမ်သည် သူတို့အပေါ်တွင် လွှမ်းခြုံလေ၏။ မိုးတိမ်ထဲသို့ ဝင်သည်နှင့် တပည့်တော်တို့သည် အလွန်ကြောက်လန့်တုန်လှုပ်ကြ၏။
35ထို့နောက် မိုးတိမ်ထဲက “ဤသူသည် ငါရွေးချယ်သော ငါ၏ချစ်သားဖြစ်၏။ သူ၏စကားတော်ကို နားထောင်ကြ” ဟူသော အသံတော်ထွက်ပေါ်လာ၏။ 36ထိုအသံတော် ထွက်ပေါ်ပြီးနောက် ယေရှုကိုသာ တွေ့မြင်ကြရ၏။ တပည့်တော်တို့သည် တွေ့မြင်သမျှတို့ကို ထိုကာလပတ်လုံး မည်သူ့ကိုမျှ ပြန်မပြောဘဲ လျှို့ဝှက်ထားကြ၏။
နတ်ဆိုးပူးသော သူငယ်တစ်ဦးအား ကျန်းမာစေတော်မူခြင်း
37နောက်တစ်နေ့တွင် ယေရှုနှင့် တပည့်တော်တို့ တောင်ပေါ်မှ ဆင်းလာသောအခါ လူအုပ်ကြီးသည် ယေရှုအား ကြိုဆိုနှုတ်ဆက်ကြ၏။ 38လူထုထဲမှ အမျိုးသားတစ်ဦးက “ဆရာတော်… အကျွန်ုပ်၏သားကို ကြည့်ရှုပေးရန် တောင်းပန်ပါ၏။ သူသည် အကျွန်ုပ်၏တစ်ဦးတည်းသောသား ဖြစ်ပါ၏။ 39နတ်ဆိုးဝင်ပူးသဖြင့် သူသည် ရုတ်တရက်အော်ဟစ်တတ်ပါ၏။ သူ၏ ပါးစပ်မှ အမြှုပ်များထွက်သည်တိုင်အောင် နတ်ဆိုးသည် သူ့ကို တက်စေပါ၏။ သူ့ကို ကုတ်ဖဲ့နာကျင်စေပြီး သူ့အထဲမှ အလွန်ထွက်ခဲပါ၏။ 40အကျွန်ုပ်သည် ဆရာတော်၏တပည့်တော်များအား ထိုနတ်ဆိုးကို နှင်ထုတ်ပေးပါရန် တောင်းပန်သော်လည်း သူတို့သည် မတတ်နိုင်ကြပါ” ဟု အော်ဟစ်၍ လျှောက်လေ၏။
41ယေရှုက “အို ယုံကြည်ခြင်းမဲ့၍ ဖောက်ပြန်သောအမျိုး… ငါသည် သင်တို့နှင့် မည်မျှကြာကြာ အတူနေရမည်နည်း။ ငါသည် သင်တို့ကို မည်မျှကြာကြာ သည်းခံရမည်နည်း။ သင်၏သားကို ငါ့ထံသို့ခေါ်ဆောင်ခဲ့ကြလော့” ဟု မိန့်တော်မူ၏။
42ထိုသူငယ်လာစဉ် နတ်ဆိုးသည် သူ့အား မြေပေါ်သို့ လှဲ၍ တက်စေ၏။ သို့သော်လည်း ယေရှုက ထိုနတ်ဆိုးအား ဆုံးမ၍ ထိုသူငယ်ကို ကျန်းမာစေတော်မူပြီးလျှင် ဖခင်ထံသို့ ပြန်အပ်ပေးတော်မူ၏။ 43လူအပေါင်းသည် ဘုရားသခင်၏အံ့ဖွယ်တန်ခိုးတော်ကို မြင်တွေ့ရ၍ အံ့သြချီးမွမ်းကြ၏။
အသေခံတော်မူမည့်အကြောင်းကို ထပ်မံ၍ ကြိုတင်ဟောတော်မူခြင်း
လူအပေါင်းတို့သည် ယေရှုပြုတော်မူသော အခြင်းအရာခပ်သိမ်းတို့ကို အံ့သြလျက်နေကြစဉ် ယေရှုက တပည့်တော်တို့အား 44“ငါ့စကားကို မှတ်သားကြလော့။ လူသားသည် လူတို့လက်သို့ အပ်နှံခံရလိမ့်မည်” ဟု မိန့်တော်မူ၏။ 45သို့သော် ထိုစကားတော်၏အနက်အဓိပ္ပာယ်ကို ဖုံးကွယ်ထားတော်မူသည်ဖြစ်၍ တပည့်တော်တို့သည် နားမလည်ကြပေ။ ဤစကားတော်၏ဆိုလိုရင်းကိုလည်း မမေးလျှောက်ဝံ့ကြ။
ကောင်းကင်နိုင်ငံတော်၌ အကြီးမြတ်ဆုံးသူ
46ထို့နောက် တပည့်တော်တို့သည် မိမိတို့အနက် မည်သူသည် အကြီးမြတ်ဆုံးဖြစ်သနည်းဟု အချင်းချင်းငြင်းခုံကြ၏။ 47သို့သော် ယေရှုသည် ထိုသူတို့၏တွေးတောကြံစည်မှုကို ကောင်းစွာသိတော်မူသဖြင့် ကလေးငယ်တစ်ဦးကို ခေါ်ကာ မိမိအနားတွင် ရပ်စေတော်မူ၏။ 48ထို့နောက် တပည့်တော်တို့အား “ငါ့မျက်နှာကိုထောက်၍ ဤကဲ့သို့သောကလေးငယ်ကို လက်ခံသောသူသည် ငါ့ကိုလက်ခံ၏။ ငါ့ကို လက်ခံသောသူသည် ငါ့ကို စေလွှတ်တော်မူသော ခမည်းတော်ကို လက်ခံ၏။ အဘယ်ကြောင့်ဆိုသော် သင်တို့တွင် အငယ်ဆုံးသောသူသည် အကြီးမြတ်ဆုံးသောသူ ဖြစ်လိမ့်မည်” ဟု မိန့်တော်မူ၏။
ယေရှုနာမတော်ကို အမှီပြုခြင်း
49ယောဟန်ကလည်း “သခင်… လူတစ်ဦးသည် သခင်၏အမည်နာမကို အမှီပြု၍ နတ်ဆိုးတို့ကို နှင်ထုတ်နေသည်ကို အကျွန်ုပ်တို့မြင်တွေ့ခဲ့ပါ၏။ သူသည် အကျွန်ုပ်တို့၏အဖွဲ့ဝင် မဟုတ်သောကြောင့် အကျွန်ုပ်တို့သည် သူ့ကိုတားမြစ်ကြပါသည်” ဟု လျှောက်လေ၏။
50ယေရှုက “ထိုသူကို မတားကြနှင့်။ သင်တို့ကို မဆန့်ကျင်သောသူသည် သင်တို့ဘက်၌ ရှိ၏” ဟု မိန့်တော်မူ၏။
ရှမာရိရွာမှ ငြင်းပယ်ခြင်း
51ကောင်းကင်ဘုံသို့ ဆောင်ယူခြင်းကို ခံတော်မူသောနေ့ရက် နီးတော်မူသောအခါ ယေရှုသည် ဂျေရုဆလင်မြို့သို့ ကြွတော်မူရန် စိတ်ပိုင်းဖြတ်လျက် 52တမန်တော်များကို မိမိရှေ့သို့စေလွှတ်တော်မူ၏။ သူတို့သည် ယေရှုအတွက် ပြင်ဆင်ရန် ရှမာရိရွာတစ်ရွာသို့ ဝင်ကြ၏။ 53သို့ရာတွင် ယေရှုသည် ဂျေရုဆလင်မြို့သို့ ကြွတော်မူမည်ဖြစ်သောကြောင့် ထိုရွာသားတို့က လက်မခံကြ။ 54တပည့်တော်များဖြစ်ကြသော ယာကုပ်နှင့် ယောဟန်တို့သည် ထိုအခြင်းအရာကို မြင်ကြသော် “သခင်… အကျွန်ုပ်တို့သည် ကောင်းကင်မှ မီးကျစေ၍ ထိုသူတို့ကို လောင်ကျွမ်းစေရန် အလိုရှိတော်မူသလော”#9:54 အချို့လက်ရေးမူကျမ်းများတွင် “ပရောဖက်ဧလိယ ပြုခဲ့ဖူးသကဲ့သို့ ပြုရန် တောင်းဆိုကြသည်” ဟု ဖော်ပြထားသည်။ ဟု မေးလျှောက်ကြ၏။ 55သို့သော် ယေရှုသည် လှည့်၍ သူတို့ကို ဆုံးမတော်မူ၏။#9:55 အချို့လက်ရေးမူကျမ်းများတွင် “သင်တို့၏စိတ်နှလုံး မည်သို့ဖြစ်သည်ကို သင်တို့မသိကြ။ အဘယ်ကြောင့်ဆိုသော် လူသားသည် လူ့အသက်ကို သတ်ရန် ကြွလာသည် မဟုတ်။ ကယ်တင်ရန် ကြွလာသည်” ဟု ထပ်ဖြည့်၍ အဆုံးသတ်ထားသည်ကို တွေ့ရပါသည်။ 56ထို့နောက် အခြားသော ရွာတစ်ရွာသို့ ဆက်၍ သွားကြ၏။
ယေရှုနောက်တော်သို့ လိုက်ခြင်း၏အကျိုးဆက်
57သူတို့ခရီးသွားနေကြစဉ်တွင် လူတစ်ဦးက “သခင်ကြွတော်မူမည့် မည်သည့်နေရာမဆို အကျွန်ုပ်လိုက်ပါမည်” ဟု ယေရှုအား လျှောက်လေ၏။
58သို့သော် ယေရှုက “မြေခွေးတို့၌ နေစရာ တွင်းရှိ၏။ ငှက်တို့၌ နားစရာအသိုက်ရှိ၏။ လူသား၌မူ ခေါင်းချစရာနေရာပင် မရှိ” ဟု မိန့်တော်မူ၏။
59ယေရှုသည် အခြားသောသူတစ်ဦးအား “ငါ့နောက်သို့ လိုက်လော့” ဟု မိန့်တော်မူ၏။
ထိုသူက “သခင်… အိမ်သို့ပြန်၍ အကျွန်ုပ်၏ဖခင်ကို ဦးစွာ သင်္ဂြိုဟ်ခွင့်ပြုတော်မူပါ” ဟု လျှောက်လေ၏။ 60ယေရှုက ထိုသူအား “ဝိညာဉ်ရေးရာ၌ သေဆုံးနေသောသူတို့သာ မိမိတို့၏လူသေကို သင်္ဂြိုဟ်ပါစေ။#9:60 မူရင်းဂရိကျမ်းတွင် “လူသေတို့သည် မိမိတို့လူသေကို သင်္ဂြိုဟ်ပါစေ” ဟူ၍ ပါရှိသည်။ သင်သည် ဘုရားသခင်၏နိုင်ငံတော်အကြောင်းကို ဟောပြောလော့” ဟု မိန့်တော်မူ၏။
61အခြားတစ်ဦးကလည်း “သခင်… အကျွန်ုပ်လည်း နောက်တော်သို့ လိုက်ပါရစေ။ သို့သော် အကျွန်ုပ်၏အိမ်သူအိမ်သားများကို သွား၍ နှုတ်ဆက်ပါရစေ” ဟု လျှောက်သော် 62ယေရှုက “ထွန်တုံးကို ကိုင်လျက် နောက်လှည့်ကြည့်သောသူသည် ဘုရားသခင်၏နိုင်ငံတော်နှင့် မထိုက်တန်ပါ” ဟု မိန့်တော်မူ၏။
လက်ရှိရွေးချယ်ထားမှု
လုကာ 9: BCB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.