Saŋ 19
19
1Afúrumi na, Pilat ayéj ñammi básedeŋo anlah Yensa k’andooh ñanhonjo ammalam. Angu andék ankaan maŋ nim. 2Aŋŋayam bukaano iniman úmár umaasa ba buyeefihinem. K'angu andooh jakanku jálindo anyab akaan ininkaman bompenku umaasa. Bambollay, anhooburindem a bigofo. Angáágárám tabén takeen iniman ni ñammaasaŋo angáágáhne tabéno takeeno. 3Bangáágárem tabéno támár, moŋon moŋon atéejaham k’ayeefihem ayéjehem:
- Umaasahu Ñanyahudo, Díin akaan usimaya!
Aŋŋoolinteh anlehlehinkem.
4Afúrumi na, gúfenááro Pilat afúror k'alób ingi jamaŋo ayéjeeniŋ:
- Inini, túyoreŋ k'ífunndutoonuŋ Yensa ki nim úfegeŋ maro me fégiri kayúulenkinem.
5Angu, Yensa afúror ingi jakanku jálindo j’anhoobárindemne a bigofo ingi tabéno takeeno t’angááguremne. Bafúti na angu Pilat ayéj barumuno:
- Iyoo! Angu údiigeeno umomiye!
6Angu, ñanlaameku alimaamaŋo ingi ñammarahu Jaameŋo Adénno banfégem anlób kabaŋ k'anyéjeh:
- Iyoo! Faaŋuntemeŋ a dinlihano! Faaŋuntemeŋ a dinlihano!
F'anlóbne nim Pilat ayéjeeniŋ:
- Ninkinan, faaŋuntemeŋ a dinlihano, kanda me mungu fégiri kayúulenkinem k’ólobhoŋne.
7K'anyéjem:
- Ingah! Ummu, ii, ayikyik luwahint n'ajégum. N'ayéjne úmár Úbáku Díino, úmár añantay aniiro.
8Angu Pilat bayennehini hómár afaŋunum n’abenuh 9k'afak aŋŋoolin aŋŋan a paleŋo ingi Yensa. Baŋŋani, amiihem ayéjem:
- Inini, fi, údin beeraŋ?
Fo Pilat amiihemne nim Yensa fankánam akota. 10Pilat ayéjem:
- Inini, fi, inini dujahárinem? Karo pájiiro maro me iyikyik sembe ba bupahálinken, me iyikyik sembe no bufaaŋunkan a dinlihano?
11F’alóbne nim Yensa ayéjem:
- Ingah! Sembeŋo n’olahne ba bubujhum, maŋ Díino anéerenne. Kanda aji Díino nédoyer, duyiker sembeŋo nómár ba bubujhum. Angu gúmár gíyejenne maro wúuro m'adékiteemne a binankan, úmár afaŋumne n’ayik kayúuleno.
12Gúfenááro Pilat bayennehini hómár, aŋay bútibhu bufeere ba bupahunku Yensa. Kanda ñanlaameku Ñanyahudo immereŋ lókiireŋeŋ ki Yensa apahunaa. Anyéjem:
- Ingah! Aji upahuni údiigeeno ummu, jamaŋo anfékineh mara fi búuñaaro umaasaŋo údenno Sesar. Ingah! Ugurumaareŋ úyejne «Me umaasa!» uguyhuneh m’ahacay ingi Sesar.
13Nim ñanlaameku Ñanyahudo anyéjne Pilat. Angu Pilat bayennehini hómár, afak afúnnor Yensa a bílido. Angu bafúndurem a bílido mees, úmár Pilat adék anooh. A bunoohunku ukitumo ganoone. Agida bunoohumo búmár, aninkaanink a kantígo k'aretuhne «Pereŋo no Paafeŋo». «Gabata» ganyéjehne ingi gúlokinin guhebároŋo. Na Pilat anoone. 14Agida waato ámár, anaman ni bísibaŋo abáári ki gucunkunom agune Gújunku Guwusunaamo. Angu na Pilat alóbne Ñanyahudo ayéjeeniŋ:
- Ingah! Umaasahánan ummooŋe!
15Fo Pilat alóbne nim jamaŋo ankomb balóbo kabaŋ anyéjeh:
- Ingah! Abujaa! Faaŋuntemeŋ a dinlihano! Faaŋuntemeŋ a dinlihano!
F'anlóbne nim, Pilat ayéjeeniŋ:
- Hom! Ingah! Kanda ummu umaasahánan de! Inini, úsiibaáheŋsiib ki umaasahánan abujaa a dinlihano?
F'alóbne nim, ñanlaameku alimaamaŋo anyéjem:
- Ingah! Ummu guyroŋ umaasahint. Mint yikirimiŋ umaasa úduk, fo umaasaŋo údenno Sesar ba bareŋ. Ummu agune umaasahint.
16F'anlóbne nim, Pilat abéndureeniŋ Yensa ki ñammi básedo andoohom andék ba bufaaŋunkánam a dinlihano.
K’anfaaŋunne Yensa a dinlihano
Afúrumi na, ñammi básedo andooh Yensa 17andoohálindem dinlihano. Bandoohálindem, andék anfúr a saariŋo. Banfúri a saariŋo, andékirem ba a kantígo k'aretuhne «Jahunku bigofo.» Ingi gúlokunin guhebároŋo «Golgota» ganyéjehne. 18Bampút na a kantígo, andooh Yensa k'anfaaŋánam a dinlihano d'ankilenne. Bambollay, anwonnálin dinlihano. Anfak anfaaŋun na índiigeen inak, ummu a jiyakánam, ummu a jigondinkinem, Yensa a jégeneŋo.
19Agida Pilat n'ayéjeeniŋ aññaañ tamaseer k'ankoten a dinlihano. Ayéjeeniŋ aññaañ na: «Yensa mu Nasaret, Umaasahu Ñanyahudo.» Angu ankaan maŋ nim k'andooh tamaseero k'ankoten na. 20Agida kantígo k'anfaaŋunne Yensa ŋantinayireŋeŋ ingi saariŋo. Angu gúmár akanne barumunku Ñanyahudo m'aŋŋane guwusunaŋo, ankoroskoros h'aññaañne a tamaseero. Agida, tamaseero nómár ingi guhebároŋo ingi gulateŋo ingi gugáreko gaññaañne. 21Angu ñanlaameku alimaamaŋo banfégi n'aññaañne tamaseero, andék ba imbi Pilat. Bampút anyéjem:
- Ingah! A tamaseero aññañaañ: «Yensa, umaasahu Ñanyahudo.» Nim gaññaañne na. Kanda ñantaaraŋaŋ aññaañer nim. Aññantañanta aññaañ na anyéj: «Údiigeeno ummu ayéjyej úmár agune umaasahu Ñanyahudo». Nim gaññantaherne aññaañ. Inini kuku úyejeeniŋ anfúnn tamaseero nómár k'aññaañ maŋ ni íyejominne, ankoten na. 22Pilat bayennehini hómár jahárindeeniŋ k’aŋoyindeeniŋ ayéjeeniŋ:
-Ingah! H'éyejeeniŋne aññaañ, aññañaañ mees.
23Angu ñammi básedo banfaaŋuni Yensa mees, andooh bayakánam b'anwuraŋamerne k’ankibay, moŋon moŋon adooh úngonduk, immereŋ ireneko. Angu afalla gusolo gúdenno. Kanda n’ayabumaane ingi simmoto ínsenduko f'adék adét 24anyéj:
- Inini, ungu, dahi infacoonuŋ! Indoohoonuŋ ñolihano ki wúuro mu harjehinem agune na adooh.
Angu ankaan maŋ nim. Angu f’ankanne nim, hómár apútulinne h’aññaañne fam a Hañaañeno. Aññañaañ anyéj:
Ankibaykibay bayakum
ki gusolhum gúdenno, gúmár gandoone ñolihano ki wúuro mu harjehinem agune na adooh. # 19.24 Bákimo 22.18
Maŋ ni aññaañne a Hañaañeno, maŋ nim ñammi básedo ankanne dam.
25F'anfaaŋunne Yensa a dinlihano, ayikyik indikaam m'andéker andék anwonn antéeja na. Immereŋ ingine nunku Yensa ingi asonku Yensa daŋat ingi Mariyama udikanku Kálopas ingi Mariyama ummu saariŋo n'aretuhne Magdala. Indikaamo immereŋ anwonnáne na dam. 26Agida ayikyik na utaalibeŋo mu Yensa aninkne a hafithinem. Angu Yensa bafégi utaalibeŋo m'aninkne a hafithinem n'awonnáne na a gúbidhu nunom, ayéj nunom:
- Ingah! Lahar ummu ininkaman n’ulahne úbákán.
27Aŋoolin ayéj utaalibeŋo úmár:
- Ingah! Lahar ummu ininkaman n'ulahne nunkon.
Angu afúrumi a waato ámár, utaalibeŋo úmár adooh nunku Yensa akaanam nunom k’adoohom ba a díkinem.
Biniirohu Yensa
28Angu Yensa n'afeeremne maro dohohunom adédet ayéj:
- Naham baaru k'iruuh!
Kanda aji úfegi ayéji nim, ki nim apútulin Hañaañeno h’aññaañne fam a gubaarhu biniirohánom.
29Agida ayikyik na guno g’ayik bineegaro. Angu fo Yensa ayéjne: «Naham baaru k'iruuh,» údiigeen úduk m'awonnáne na adék adooh jalihanku tiwugo k’adooh kopoculenku eponso anum a bineegaro. Banumi a bineegaro, ajohund Yensa a buruhunom k'asoos. 30Yensa baruuhi mees ayéj:
- Iyoo! H’eñantane ikaan nip ikankaan mees. Adédet!
Balóbi nim mees ajíigun k'aniiro.
31Angu Yensa, bísibahu arjumo ganiirone. Gucunkunom agune bísibaŋo bi guyohálaŋo. Agida n’agune Gújunku Guwusunaamo, bísibaŋo bi guyohálaŋo bímár, bísiba bíde. Angu ñanlaameku Ñanyahudo lókiireŋeŋ ki bísibaŋo bímár alahun agááráŋo a dinlihano. Gúmár akanne andék ammiih Pilat úgufenááro anyéjem:
- Úgufánáár! Inini, ísiibáámiŋsiib ki soldaareŋo ammuñmuñin hádihenku índiigeeno m’anfaaŋunaane a dinlihano, ki nim anniiro waas. Nim ungu ganniirohi, ampiren anhájul agááráŋo k'andék ansutura. Hómár gísiibaminne.
Angu Pilat alóki k’abúuñam ba imbi ñammi básedo m'aŋŋane gumarahu m'anfaaŋunaane a dinlihano. 32Angu ñammi básedo banyennehini, andék ammuñmuñin hádiku úmánduk. Bammuñmuñini hámár anfaalen k’andék ba imbi úduko m'afaaŋunaane ingi Yensa, andék ammuñmuñin hananam mees. 33Angu f'andékne imbi Yensa, anlahunam n'aniiro, k'angu muñmuñindeŋeŋ hananam. 34Kanda usoldaaro úduko adooh kilibithinem k'acuk Yensa a gusaal. Bacukem, muheeno m'alahunne ingi baaruŋo afúror#19.34 Banfégi muheeno ingi baaruŋo, ampájul mara muheeno alahunlahun. Gúmár ingine Yensa aniironiiro pak. . 35Ingah! Wúuro m'aŋane búseediyahánan, ígihinem aféfeg hómár arenn. Arennunemrennun maro hómár ayikyik. Aji úfegeŋ n’añaañuroonuŋne inho nip, ki ninkinan mees upireneŋ k’údomoŋ maro hómár hoyiki. 36Agida, hómár apútulinne h’aññaañne fam a Hañaañeno. Aññañaañ na anyéj: Dammuñmuñin jahunkunom, haani úngonduk.#19.36 Gúfuro 12.4,6; Batébo 9.12. Nim gaññaañne a Hañaañeno. Mara ñammi básedo muñmuñindeŋeŋ hádiku Yensa. 37Bíduko aññañaañ a Hañaañeno mees anyéj: Anninghineh wúuro m'ancukne.#19.37 Anabila Sakariya 12.10
Ka búgáku Yensa asuturahaane
38Angu, ayikyik údiigeen úduk m'aretuh Isuf. Isuf, úmár údin saariŋo n'aretuhne Arimate. Isuf atohtoh a dayrahu Yensa kanda bollendeŋ gureej maro abenuhbenuh ñanlaameku Ñanyahudo. Angu Yensa baniirohi mees, Isuf adék amiih Pilat ayéjem:
- Hóge ipirenkineh idooh búgáku Yensa k’isutura#19.38 Agida Ñanyahudo gara anwúboh agááráŋo. Bi immereŋ angune, réeŋo akikiir baw angu dampiren búwoojhu gusun. Buru k’anwúb agááráŋo k’anninkeeniŋ a bawaalo k’akanne ránkáb k’ankir anrok buruŋo. Nim gankaanahne. a búyindo?
Bamiihem nim, Pilat alóki. Angu Isuf adék adooh búgáku Yensa k’adék adooh ba gusuturaŋo a búyindo. 39Kanda ayikyik údiigeen úduk m’akááñinahinem dam. Gurethinem Nikodem. Agida Nikodem, úmár agune údiigeeno m'adék adékerne fam jaketo buwooño ingi Yensa. Angu, da Yensa aniirone, Nikodem apútor k’adoohor kárámánjo n'aññantane ankaan a búgááro.#19.39 Ñanyahudo gankaanakaan muhano a agááráŋo ki biki asul mara immereŋ gara anwúboh agááráŋo. Kárámánjo nómár andoodooh h'ayéjuhne mááro ingi h'ayéjuhne alowe k'angatahin. Nikodem anaman nómáráŋ kiloŋ buruhur ingi haala gadoorne. 40Angu índiigeeno, immereŋ inako, andék anhájul búgáku Yensa a dinlihano. Banhájulem, andooh angubahinem a kasankeŋo ingi kárámánjo, ininkaman ni Ñanyahudo ankaanahne a cosankánin. 41Agida ayikyik búkáár b'antéejay ingi kantígo k’anfaaŋunne Yensa a dinlihano. Agida búkááro búmár ayikyik ránkáb r’anjóonin ba gusuturahu agááráŋo. Kanda ránkábo rámár ni fanti bannink na bugáár. 42Angu ni gucunkunom agune bísibaŋo bi guyohálaŋo n’angu n’atéejane, andooh búgáku Yensa andék annink na.
လက်ရှိရွေးချယ်ထားမှု
Saŋ 19: GD
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Copyright Vision Intégrale, Senegal