Luc 7
7
1Gè té tokou nè neo ta pa tar toï nare dooudjé ke wo tar la, nè nao Capernaüm té.
2Doou ke ndjè ngem ndjè pouroudjé éh ke bere kada ke nè ndikè nya. Bere nèn to ke rò too, ke nè ndé ngosiba ta kwoei.
3Tokou ndjè ngem ndjè pouroudjé wo tar lo Jésus, nè noula tokou dooudjé lo Juifdjé rò Jésus té. Nè ndoudjè ta dé kòrou rò too lo bere la.
4Tokou dèdè ndé rò Jésus té, dèdè ndoudjè nya, mpana, Nè nto madji ase ta kare i da né nèn mbata la.
5Mbata nè ndiki gel dooudjé lodjè, ke nè ndja da kei Allah lodjè.
6Jésus ao kedè. Tokou nè ndé ngosiba giri kei té, ndjè ngem ndjè pouroudjé oula mare ndjè bokoradjé rè té, mpa narè, Mbaibé Seigneur, edé ang, mbata ma masang ta kare i dé mè kei té lom.
7Mbata tar nèn, ma mo madji ta kao ròi té ang, epa tar ndja ta kare ngonlokisi lom dé madji.
8Mbata mam nto doou ke wo tar tò, ke mam nto ndjè ngem ndjè pouroudjé. Ma mpa ke mare kada, Ao, a nè nao, ma mpa mare marè kada, Edé, a nè ndé, ma mpa mare bere lom, Eda né ke nèn, a nè nda.
9Tokou Jésus wo tar nèn mèa edji tar la nya, nè ntourou rè, nè mpa nare dooudjé ke baya ke ao gè té, Ma mpa maresè, ke Israël té ka ma mo ko mè té tokou ban ang.
10Tokou dèdè ke ndjè ngem ndjè pouroudjé ouladè ntél mè kei té, dèdè do bere to madji.
11Gè té ndò kada, Jésus ao béh kada ria na Naïn, ndjè kao gè tédjé ke mare dooudjé baya baya dao sa.
12Tokou nè ndé ngosiba ke ta béh té, wo, dèdè doto nin doou kada. Nè nto ngon ke to ngon kada ke këndjè to dènè ndouba. Dooudjé baya baya ke béh té éh sa.
13Tokou Mbaibé Seigneur woè, nè nda mè madji sa, nè mpa narè, Enò ang.
14Nè ndé, nè nòrou twa ke nin doou to kendé, dèdè ke dotè darr loou kada. Nè mpana, Basä, ma mpa mari, ï tarr.
15Doou ke woei mba ï isi do gòlè té, nao mpa tar. Jésus are basä nèn këndjè.
16Bel dadè toï, dèdè dòsou gadji Allah, mpana, Tòkou prophète téh horodjè té mba, ke Allah dé wo dooudjé la mbä.
17Tar la nèn bar dò nange té ke Judée toï, ke nange ke mbòrè té toï to.
18Ndjè kao go Jean té pa tar nèn toï are Jean.
19Jean bar ndjè kao gè tédjé djo, nouladè rò Mbaibé Seigneur té, mpana, I to nè ke nata dé, aséh djase ngebe mare doou ke dang wa?
20Tokou dooudjé nèn dé rò Jésus té, dèdè mpana, Jean ndjè da baptême ouladjè ròi té ta doudji, i to nè ke nata dé, aséh djase ngebe mare doou ke dang wa?
21Lé tén ndja, Jésus òrou rò too ke dang dang rò dooudjé té ke baya, nè ntouba ndildjé ke madjang lo dooudjé ke baya, ke maredjé ke baya ke nto ndjè kem to, nè naredè do loou.
22Jésus tél pa are dooudjé ke Jean ouladè, Abidjé, epaidjé are Jean né ke sésè woidjé ke mbisè ke kemsè. Ndjè kem tòdjé wo loou, ndjè ke oso mete ndja, rò ndjè bandjidjé dé madji, ndjè ke mbidè outou wo tar, dèdè ke doei mba dï tarr, ke dangetédjé wo tar ke madji.
23Madji éh ke nè ke mam nto né ke a kare mèa tooè ang.
24Tokou dooudjé ke Jean ouladè dao mba, Jésus ounkotè ta pa tar lo Jean kare dooudjé ke baya baya ke mbona, mpana, Sésè abidjé mè kòr té ta ko di wa? Kòbou ke lél yèè wa?
25Sésè abidjé ta ko di wa? Doou kada ke oula koubou ke madji wa? Woidjé, dèdè ke doula koubou ke madji, ke déh ke né ke madji nya, dodè mè kei té lo mbaibédjé.
26Sésè abidjé ta ko di wa? Mare prophète kada wa? Aa, ma mpa maresè, nè mbo nouta prophète.
27Yèn to nè ke maketourou pa tar la,
Woidjé, ma moula ndjè koula lom dongor mari,
Nè na da deo loi dongor kari.
28Ma mpa maresè, horodè té ke dènèdjé oudjoudè, mare wota Jean goto, a nè ke nto né ke ngadji ngadji mè béh ko té lo Allah, nè nouta Jean.
29Tokou dèdè do tar nèn, dooudjé toï ke ndjè taa narè lʼimpôtdjé tò mpana, Allah to gaté gaté, dèdè ke dinga baptême lo Jean mbä.
30A Pharisiendjé ke ndjè tòdjou maketourou ndedjidjé mbeté tar ke Allah ndiki ta da mbata lodè, mbata dèdè dare Jean dadè baptême ang.
31Deo di a ma ma tòdjou tar lo gel dooudjé nèn wa, dèdè nto tokou di wa?
32Dèdè nto tokou ngandjé ke isi nata té ke mpa horodè té,
Djèdjè nkòl mboula djaresè, a sésè laaidjé ang,
Djèdjè nnò, a sésè enòidjé ke man kemsè ang.
33Mbata Jean ndjè da baptême dé kèté, nè nön mourou ang, nè naih vin ang tò, a sésè epaidjéna, ndil ke madjang to mèa té.
34Ngon lo doou dé, nè nön mourou ke nè naih, a sésè epaidjéna, Woidjé, ndjè kön mourou nya, ke ndjè kaih nya, nè nto ndjè bokora lo ndjè taa narè lʼimpôtdjé ke ndjè né da ke madjangdjé.
35A ngandjé ke ndjè kemkarè toï òsou gadjè gaté gaté.
36Mare Pharisien kada doudjou Jésus ta kon mourou sa. Nè nao sa kei la, nè nisi ta table té.
37Wo, dènè kada ke béh tén, ke to dènè ke ndjè né da ke madjang, tokou nè no Jésus isi ta table té mè kei té lo Pharisien, nè ndé ke kou albatre kada ke dousou ke yambo.
38Nè narr go gòl Jésus té, nao nnò. Nè ntoko gòl Jésus ke man kèmè, ke nè mbòrou gòl Jésus ke bi dè. Nè nto gòlè ke nè nongou yambo dò gòlè té.
39Tokou Pharisien ke bar Jésus ta kisi sa wo né nèn, nè mpa mèa té, Tokou doou nèn to prophète, nè na geré gel tar lo dènè nèn ke ao òrè, mbata nè nto dènè ke ndjè né da ke madjang.
40Jésus tél pa arè, Simon, ma méh ke tar ta pa kari. Nè mpana, To tar di wa, Ndjè tòdjou tar?
41Mare doou kada isi ke dooudjé djo ke baange la to dòdè té. Kada touna narè denier kòr mi, mare kada touna dòmi.
42Tokou dèdè dase ta kouka ang, nè nïya naredè djokem. Tokou ban yéh ke da a ndikè wota wa?
43Simon tél tar pana, Ma medji nè ke nè nïya la wota. Jésus pa arè, I gange tar gaté gaté mbä.
44Bana nè ntourou rè rò dènè té, nè mpa nare Simon, I wo dènè nèn wa? Mam ndé mè kei té loi, i arem man mbata toko né gòlem ang, a nè ntoko gòlem ke man kèmè, ke nè mbòrou gòlem ke bi dè.
45I to mbim ang, a nderèng mam ndé nèn, nè nïya ta to gòlem ang.
46I ongou oubou dòm té ang, a nè nongou yambo gòlem té.
47Tokou ban ma mpa mari, né ke madjang la ke to baya, goto nga, mbata nè ndiki nya. A doou ke dïya né ke madjang la ngadji, nè ndiki ngadji.
48Nè mpa nare dènè, Né ke madjang loi goto nga.
49Dèdè ke disi ta table té sa, dao mpa horodè té, Yèn to na ke ïya né ke madjang ban wa?
50Nè mpa nare dènè, Ko mè té loi adji mba, ao ke mè woul.
अहिले सेलेक्ट गरिएको:
Luc 7: KL1960
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 1960, 2018.
To learn more or sign up for email updates about the mission of BFBS, click here: