Juan 10
10
Ĉọjcacsity oveca
1Yi Jesús jéyacsi:
—Jeshaꞌ meꞌ buꞌyiꞌ oveca in. Yụ raꞌ jéyac, tyi chuc jam chụiꞌdyeꞌyaꞌ siti in ovecasĉan sópe, yocve siti jụijyaꞌ in, muꞌin nash shushuꞌaty in, ĉaĉaij na aꞌc̣histum dyijyedyeꞌ atsij in. 2Muꞌ na rụij chụiꞌdyeꞌyaꞌ sitity, muꞌ nash jämꞌ ĉọjcacsity oveca. 3Muꞌ ĉọjcaiꞌtyiꞌ chụiꞌdyeꞌ muꞌ vanacjeyete, muꞌ qui ĉọjcacsity oveca cäts yirisisij fayaqui oveca muꞌ, jiꞌjäcacsebi tịj mọꞌin. Mọꞌin na chị́yepte in mạꞌedyeꞌ p̂eyacdyes muꞌ judyeyaꞌ jịjcate in, muꞌ jiꞌshupcacsebanyaꞌ sópeĉan. 4Aty jorojyaꞌ in muꞌdye mọmoꞌ tashcheꞌ buꞌyi cạcsi, muꞌin na jịjcate in ĉaĉaij na chị́yepte in mạꞌedyeꞌ p̂eyacdyes muꞌ. 5Mọꞌin oveca in jam tupuj yoctyiꞌ jịjcate in, ĉaꞌjoyete mọmoꞌ in ĉaĉaij na jam chị́yepte p̂eyacdyeꞌ in —jéyacsi Jesús.
6Jesús jéyacsi ọij jịꞌĉocdyes p̂eyacdyeꞌ, muꞌin na seꞌveptety p̂eyacdyeꞌ in jam muꞌin junꞌ chiqueꞌ in jätäjyiꞌ chuc cạiꞌ mọꞌ p̂eyacdyeꞌ muꞌ.
Jesús mạꞌjitidyestumtyiꞌ ĉọjcacsity
7Jesús cuvij jéyacsi:
—Yụ raꞌ jéyac, yụ́dye nash chụiꞌdyeꞌ buꞌyi, yóyaꞌdyemꞌ sitiyaꞌ oveca o in. 8Muꞌin tashcheꞌ atsijtyiꞌ in jịꞌchiyacsity yuꞌti in, muꞌin in jam anictyity in, jeñej buꞌyi shishiꞌaty in, aꞌc̣histum dyijyedyeꞌ atsij in, mọꞌin na oveca in jam junꞌ jụjtacsi in. 9Yụ́dye nash chụiꞌdyeꞌ buꞌyi, tyi chuc yụ́yaꞌ sitity in, muꞌin raꞌ c̣hoñi in. Yụ raꞌ ĉọjcacsi jeñej buꞌyi oveca in, junꞌsiꞌ ĉụiꞌ sitiꞌ sópeĉan in judyeyaꞌ shubanꞌ in chat qui säcsebanꞌ in.
10Muꞌ na shushuꞌaty muntyiꞌ mọꞌ mọmoꞌ mạꞌjeꞌ shuꞌaij judyeyaꞌ ac̣hiꞌtacsi oveca chimeꞌ, pạrej ijacsi. Yụ na atsij tsạꞌchucsi paj qui maꞌjodyeꞌtum bäꞌyi in. 11Yụ nash jämꞌtyiꞌ ĉọjcacsity oveca, muꞌ jämꞌtyiꞌ ĉọjcacsity oveca yuꞌti muꞌ paj qui säñi ovecadyes in. 12Jeshaꞌ, muꞌ yaꞌitactyiꞌ ĉọjcacsity jam meꞌ muꞌ. Ĉọssetiꞌ jụijyaꞌ tsäquiꞌyis vajedyedyeꞌ, muꞌ yaꞌitactyiꞌ jam muꞌ junꞌ ñutsjetacsi oveca in. Ĉaꞌjoij mọmoꞌ muꞌ ĉaĉaij na yaꞌitactyiꞌ mọmoꞌ muꞌ, jam ĉụiꞌsiꞌ oveca muꞌ. Chat qui mọꞌ vajedyedyeꞌ p̂aiꞌtacsiꞌ oveca in, räj ficajteyacsiꞌ paiꞌ jịjijcayacsiꞌ. 13Muꞌ yaꞌitactyiꞌ ĉaꞌjoij mọmoꞌ ĉaĉaij na querec̣haveij mọmoꞌ muꞌ, mijam dyijtucsi oveca in.
14-15Yụ nash mạꞌjitidyestumtyiꞌ ĉọjcacsity oveca. Muꞌ Jenꞌ yụ chäyin yụ judyeyaꞌ yụ chimeꞌ chị́yaqui ĉụiꞌtyiꞌ Jenꞌ yụ, meꞌdye yụ chimeꞌ chị́yacsi oveca yụ, judyeyaꞌ muꞌin chäyin yụ in, yụ raꞌ yuꞌti paj qui säñi yụ muꞌindyes in. 16Chimeꞌdye muꞌyaꞌ yoctyiꞌ oveca buꞌyity in, yụ́tyiꞌ chimeꞌ in, jam úĉantyiꞌ in. Muꞌin raꞌ chimeꞌ fayacsi yụ, muꞌin qui raꞌ seꞌvibun p̂eyacdyeꞌ yụ in, muꞌinmun raꞌ chimeꞌ vajmuꞌyaij in, räjtumdye qui raꞌ yụ yirity mọmoꞌ ĉọjcacsity.
17Jenꞌ yụ mạꞌjin yụ ĉaĉaij na yụ ĉụiꞌ yuꞌti jiꞌsändyi paj qui yụ cuvij ĉụiꞌ vañinyeban yụ. 18Mijam tyi tupuj fercheꞌ ijan yụ in, ĉụiꞌsiꞌyaꞌ raꞌ dyijyedyeꞌ jiꞌijati yụ. Yụ nash ĉụiꞌ yuꞌti paj qui jiꞌijati yụ judyeyaꞌ chimeꞌ ĉụiꞌ yuꞌti paj qui vañinyeban yụ, meꞌdyety yuꞌtyin yụ muꞌ Jenꞌ yụ —jéyacsi Jesús.
19Muꞌin judío in aty seꞌvepte p̂eyacdyeꞌ in quivij yoc yoc dyijyi in. 20Pạrej muꞌin yi in:
—Muꞌ nash sọyoꞌtumtyiꞌ muntyiꞌ judyeyaꞌ shapuijtyiꞌ chimeꞌdye. Fibiꞌ seꞌveptinte p̂eyacdyeꞌ muꞌ —jítidyeij in.
21Pạrej na yi in:
—Sọyoꞌtumtyiꞌ jụijyaꞌ muꞌ, junꞌdyemꞌ tupuj meꞌ jiꞌshupqueꞌ p̂eyacdyeꞌ. ¿Jịꞌnaijtacsebanꞌ buty sọyoꞌ tofety muntyiꞌ in? Jam junꞌ —yi in.
Muntyiꞌ in vaꞌquecte Jesús in
22Tupudyeꞌ tsịvuꞌvudyeꞌ Jerusalénĉantyiꞌ feshtaij in, jiꞌdyijvacdyes yoquiꞌdyemꞌ jämꞌ yụꞌbanꞌyaꞌ jiquej u in Jenꞌsiꞌ acaꞌ muꞌ, mọꞌ cạiꞌ feshta. 23Jesús Jenꞌsiꞌĉan acaꞌ miꞌi, väc̣häjc̣häsve Salomónsiꞌ. 24Atsij judío in cọtoij tŝọ́tyete in jéte in:
—¿Junꞌsiꞌ bu raꞌ jítiĉaꞌ miꞌin, mi adac Jiꞌc̣honacsity Muntyiꞌ? Jeshaꞌ chap jítiĉamꞌ —jéte in.
25Vorjeyacsi Jesús:
—A nash jéyac yụ, jam qui namꞌ méquiꞌ anicjitiĉaꞌ yụ miꞌin, ĉaĉaij na yụ jịꞌcaveyeyac ferdyeꞌ soꞌminsiꞌ Jenꞌ yụ, mọꞌ jiꞌĉuyinac yụ́dye nashuꞌ. 26Meꞌ tsanꞌ meꞌ, miꞌin qui namꞌ jam anicyi miꞌin ĉaĉaij na miꞌin jam yụ́tyiꞌ oveca miꞌin. 27Ĉụiꞌtyiꞌ qui namꞌ oveca yụ seꞌvibun p̂eyacdyeꞌ yụ in, judyeyaꞌ yụ chị́yacsi chimeꞌ, meꞌdyes qui muꞌin cäc̣häꞌchun yụ in. 28Yụ raꞌ yụꞌtacsi paj qui Jenꞌyadyety in, mijam raꞌ tyi chutyin yụ in, 29ĉaĉaij na Jenꞌ yụ mujuꞌchaꞌ fer buꞌyity, muꞌ jam tyi tupuj chutyete in. 30Jenꞌ yụ judyeyaꞌ yụ yirity mọmoꞌ shupqui tsun —jéyacsi Jesús.
31Ọij p̂eyacdyeꞌ jịꞌfajqueyete judío in, muꞌyatydye tapjete mij in mạꞌjeꞌ tsanꞌ mijyaꞌ farajñete in. 32Jesús jéyacsi:
—Daiꞌ nọ́tacsi muntyiꞌ yụ, jịꞌcaveyeyac ferdyeꞌ yụ mọꞌ soꞌminsiꞌ Jenꞌ yụ. ¿Jụꞌñis caꞌ ferdyeꞌ jiꞌmeꞌtyin raꞌ yụ paj qui mijyaꞌ ijatiĉaꞌ yụ miꞌin? —jéyacsi Jesús.
33Vorjete in:
—Jam ferdyeꞌ jiꞌmeꞌtyin mi, mọꞌ p̂eyacdyeꞌ mi mọꞌ nash jiꞌmeꞌtyin, ĉaĉaij na mi muntyiꞌ mọmoꞌ, meꞌ tsanꞌ meꞌ mạꞌjeꞌ qui namꞌ Jenꞌ buꞌyi yuꞌti mi, anic därsiꞌ ñäñitidyeꞌ Jenꞌdyes meꞌ yi mi.
34Jesús vorjeyacsi:
—Mọꞌ yụꞌtacdyeꞌ cạtiñes miꞌin, yiꞌ junꞌ chuc muꞌ Jenꞌ p̂eyaqui yi: "Miꞌin jenꞌ buꞌyi", yiꞌ sánacdyeꞌ. 35Chị́jaꞌ jam méquiꞌ cäj buꞌyiꞌ Jenꞌsiꞌ sánacdyeꞌ muꞌ, yi muꞌ jiꞌjäcacsi muꞌin soꞌmactyiꞌ p̂eyacdyeꞌ muꞌ, muꞌ jéyacsi muꞌin in: "Miꞌin jenꞌ buꞌyi" jéyacsi Jenꞌ. 36Damꞌdye yụ jam ñäñitidyeꞌ buꞌyiꞌ Jenꞌdyes shupquiꞌ, meꞌ tsanꞌ yi yụ: "Yụ Jenꞌtyiꞌ Ạvaꞌ muꞌ", ĉaĉaij na Jenꞌdye tsimꞌtyin yụ judyeyaꞌ jutin yụ paj qui úcheꞌ jaccheꞌ atsij yụ. 37Jam meꞌ Jenꞌsiꞌ dyijyedyeꞌ cạpte jụijyaꞌ yụ, a vuty jam anicjitiĉaꞌ u miꞌin. 38Anicdye meꞌ, Jenꞌsiꞌ dyijyedyeꞌ cạpte yụ tupuj anicjitiĉaꞌ yụ miꞌin ĉaĉaij na cavibutiĉaꞌ ferdyeꞌ yụs miꞌin. Meꞌ tsanꞌ jam mạꞌjeꞌ anicjibutiĉaꞌ yụs p̂eyacdyeꞌ jụijyaꞌ miꞌin, tupuj cavibutiĉaꞌ ferdyeꞌ yụs miꞌin, mọꞌ jorojĉan jiꞌchäquiyinac miꞌin junꞌ chuc Jenꞌtum yụ jeñej yirity mọmoꞌ shupqui tsun —jéyacsi Jesús muꞌin judío in.
39Ọij p̂eyacdyeꞌ muꞌ jịꞌfajqueyete in, cuvij tsanꞌ mạꞌjeꞌ tapjete in muꞌ Jesús, muꞌ qui namꞌ caminyetaqui ĉaꞌjoyacsi.
40Jesús nopej Jordán jijtuban, yóyaꞌdyemꞌ chojtacsiyaꞌ jiquej u muꞌ Juan, muꞌyaꞌ bäꞌyi juñucsiꞌ mạyedyeꞌ. 41Daiꞌ muntyiꞌ atsij ĉọcte in, yi jítidyeij in:
—Meꞌ tsanꞌ Juan jam jịꞌcaveyacsi ferdyeꞌ, rụij qui namꞌ p̂iijse Jesús, tas p̂eyacdyeꞌ cạ̈tsiꞌ muꞌyaꞌ —yi muntyiꞌ in.
42Mọꞌdyes daiꞌ muꞌĉantyiꞌ in anicjete in muꞌ Jesús.
अहिले सेलेक्ट गरिएको:
Juan 10: CAS
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Copyright 2017 Nuevo Testamento en Chimane
Jen'si' P̂eyacdye'