GENESIS 18
18
Omwene te uya oweenda kuAbraham
1Ndele Omwene okwe lihololela Abraham poshuundungila shaMamre fimbo ye a li omutumba poshivelo shetwali moshanga shomutenya. 2Ye eshi a yelula omesho, okwa mona ovalumenhu vatatu ve li ofika komesho yaye. Ndele ye eshi e va mona okwa dja po poshivelo shetwali ta endelele e ke va shakeneke ndele te linyongamene poshi, 3ndele ta ti: “Omwene wange, ngeenge onda mona onghenda koshipala shoye, ino koya po omupiya woye. 4Etelweni omeva manini mu koshe eemhadi deni ndele nangaleni mu tulumukwe momudile womuti. 5Ndele ohandi mu etele oshipambu shomungome opo eemwenyo deni di mone eenghono, nye mu shiive okutwikila, osheshi omwe uya pomupiya weni.” Ndele vo ova nyamukula tava ti: “Ninga ngaashi wa popya.” 6Opo Abraham okwa endelela okuya ketwali kuSara, ndele ta ti: “Ninga divadiva, lunga oufila weembekele nhatu, oufila womudiva ndele ninga omingome.” 7Opo Abraham okwa endelela okuya koshuunda, nokwa kwata onhana omhunya iwa, ndele okwe i yandja komupiya, ou e i pyakuduka diva. 8Ndele ye okwa kufa omaadi nomashini, nonhana ei ya pyakudukwa ndele te i tula puvo, fimbo ye mwene e li ofika momudile womuti. Ndele vo ova lya.
9Ndele ova tya kuye: “Omwalikadi woye Sara oku li peni?” Ndele ye ta nyamukula: “Oku li metwali.” 10Ndele Ye ta ti: “Ame ohandi ke uya vali kwoove moudwaali, nohandi ka hanga Sara, omwalikadi woye, e na okaana okamati.” Ndele Sara okwa li ta pwilikine poshivelo shetwali konima yaye. 11Ndelenee Abraham naSara ova li va kulupa, nomafiku avo omahapu. Sara kakwa li vali ha i poshi panghedi yovakainhu. 12Ndele Sara okwe liyola mwene nokwa diladila: “Ame ohandi udu tuu vali ounyenye wohole, eshi nda kulupa ngaha, nomulumenhu wange okwa kulupa?” 13Ndele Omwene okwa lombwela Abraham ta ti: “Omolwashike Sara a yola nokudiladila: ‘Ame ohandi ka dala tuu vali, eshi nda kulupa ngaha?’ 14Ope na tuu sha tashi nyenge Kalunga? Pefimbo tuu eli momudo tau uya, Ame ohandi ka aluka, ndele ohandi hange Sara e na okaana okamati.” 15Ndelenee Sara okwe likala ndele ta ti: “Ame inandi yola,” osheshi ye okwa tila. Ndele ye okwa tya: “Ahowe, ove wa yola.”
Exulilo laSodom tali shiivifilwa Abraham
16Opo ovalumenhu va fikama ndele tava tale langhele kuSodom. Ndele Abraham okwa ya pamwe navo e va findikile. 17Opo nee Omwene ta ti: “Ohandi dulu tuu okuholeka Abraham eshi handi ka ninga? 18MuAbraham omo tamu ka dja shili oshiwana shinene shi na eenghono noiwana aishe kombada yedu otai ka nangekwa noupuna muye. 19Osheshi Ame onde mu hoolola, opo a lombwele ovana vaye neumbo laye nokutya, nava diinine ondjila yOmwene, va shiive okulonga ouyuki noshili, opo Omwene a wanifile Abraham eshi Ye e mu udanekela.” 20Omwene okwa tya natango: “Onghuwo molwaSodom naGomorra oya ninga inene shili, noulunde wavo wa ninga mudjuu unene shili. 21Ame onda hala okukolokela poshi nokutala ngeenge ova ninga tuu shili ngaashi onghuwo yavo ya fika kwaame, ile hasho. Onda hala oku shi shiiva.”
Abraham ta ilikanene Sodom
22Opo nee ovalumenhu va dja po va ya kuSodom, ndelenee Abraham okwa kala ofika natango koshipala shOmwene. 23Ndele Abraham okwa ehena ndele ta ti: “Ove oto ka nyonauna po ovayuki pamwe novahenakalunga? 24Pamwe moshilando omu omu na ovayuki omilongo nhano. Oto ke va nyonauna po, ndele ito file onghenda onhele oyo molwovayuki omilongo nhano ava ve li mo? 25Nashi kale kokule naave oku shi ninga: u nyonaune ovayuki pamwe novahenakalunga, opo ovayuki va tokolelwe ngaashi ovahenakalunga. Nashi kale kokule naave: Omutokoli wedu alishe ita tokola pauyuki?” 26Opo nee Omwene ta ti: “Ame ngeenge onda hange ovayuki omilongo nhano moshilando shaSodom, ohandi ka fila onghenda onhele aishe molwavo.” 27Ndele Abraham okwa nyamukula ndele ta ti: “Tala, ame ondi na ouladi okupopya nOmwene, nande ame ondwi nomute. 28Pamwe oto hange mo ovayuki omilongo nhee navatano ponhele yomilongo nhano? Oto ka hanauna po oshilando ashishe, ngeenge ovayuki inava hanga pomilongo nhano?” Ndele Ye okwa nyamukula ta ti: “Ame itandi ke shi hanauna po, ngeenge nda mono mo omilongo nhee navatano.” 29Ndele ye okwa popya naye natango ndele ta ti: “Ngeenge pamwe omu na ovayuki omilongo nhee.” Ndele Ye okwa nyamukula ta ti: “Ame itandi shi ningi omolwomilongo nhee.” 30Natango ye ta ti: “Omwene, ino handuka, ngeenge handi popi natango. Ngeenge pamwe omu na omilongo nhatu?” Ndele Ye ta nyamukula: “Ame itandi ke shi ninga, ngeenge handi mono mo omilongo nhatu.” 31Opo nee ye ta ti: “Tala, ame ondi na ouladi okupopya nOmwene. Ngeenge pamwe omu na omilongo mbali?” Ndele Ye ta nyamukula: “Ame itandi ke shi hanauna po omolwomilongo mbali.” 32Opo ye ta ti: “Omwene, ino handuka, nandi popye ashike lumwe aluke. Kashiimba pamwe otamu monika omulongo.” Ndele Ye ta nyamukula: “Ame itandi ke shi hanauna po omolwomulongo.” 33Ndele Omwene okwa dja po eshi a mana okupopya naAbraham. NaAbraham okwa shuna konhele yokukala kwaye.
अहिले सेलेक्ट गरिएको:
GENESIS 18: OKYB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Oshikwanyama Bible Revised © Bible Society of Namibia, 2008, 2012.