GENESIS 19
19
Oukolokoshi wOvasodom
1Ndele ovaengeli venya vavali ove uya kuSodom onguloshi, fimbo Lot a li omutumba poshivelo shaSodom. Ndele Lot eshi e va mona, okwa fikama ndele te ke va shakeneka ndele te lifidimike pedu, 2ndele ta ti: “Oovene vange, ileni meumbo lomupiya weni, mu nangale mo nye mu koshe eemhadi deni, opo mu shiive okumeneka tamu twikile ondjila yeni.” Ndele vo ova nyamukula: “Ahowe, fye ohatu ka nangala pondje.” 3Ndele ye okwe va indila nokwiindililila; opo nee ve uya kuye ndele tave uya meumbo laye. Ndele ye okwe va telekela ouvalelo ndele te va lungile omingome inadi ya onhafi, ndele vo ova lya. 4Fimbo inava ka nangala, ovalumenhu vomoshilando, ovalumenhu Ovasodom ovanyasha novakulunhu, aveshe kumwe ava va li moshilando, ove uya ndele tava dingilile ongulu yaLot. 5Ndele vo ova ifana Lot ndele tava ti kuye: “Ovalumenhu ava ve uya nena kwoove ove li peni? Va eta pondje kufye opo tu nangale navo.”
6Opo nee Lot okwa pita mo nokwa ya kuvo komesho yoshivelo ndele ta idile oshivelo konima yaye, 7ndele ta ti: “Vakwetu, inamu ninga owii u fike opo. 8Taleni, ame ondi na ovana vavali voukadona, inava kumafana novalumenhu natango. Ame ohandi va eta pondje kunye, ndele tamu va ningi ngaashi tashi mu wapalele. Ndelenee ovalumenhu ava, nye inamu va ningila sha, osheshi vo ve uya momudile wonduda yange.” 9Opo nee vo ova nyamukula: “Dja po!” Ndele tava ti: “Oye tuu ou e uya po a kale ngaashi omunailongo apa, ndele alushe ye okwa hala oku tu pangela. Paife eshi ohatu ku monifa oixuna i dule yaava.” Ndele vo ova nhukila neenghono omulumenhu ou Lot ndele tava ehene va ka teye po omuvelo. 10Ndele ovalumenhu venya va twala omake avo pondje ndele tava shilile Lot meumbo, ndele tava idile omuvelo. 11Ndele ovalumenhu ava va li pondje pomuvelo wongulu, ounona novakulunhu, ove va twikifa omesho, ndele tava nyengwa okumona omuvelo.
Okuxupifwa kwaLot
12Ndele ovaenda ava ova pula Lot tava ti: “Ou na mo oolyelye natango? Oshitenya, novana voye ovamati noukadona, naaveshe ava u na moshilando, va pitifa mo monhele ei, 13osheshi fye hatu ka hanauna po onhele ei, osheshi onghuwo molwovanhu ava oya ninga inene koshipala shOmwene, nOmwene okwe tu tuma tu shi hanaune po.” 14Opo nee Lot okwa ya a ka popye noitenya yaye, ovalumenhu ava va li ve na okuhombola ovana vaye oukadona, ndele ta ti: “Fikameni, djeni mo monhele ei, osheshi Omwene ota ka hanauna po oshilando.” Ndele vo ove mu tala, ta popi omashendjo.
15Ndele eluwa eshi la hovela okutenda, ovaengeli ova ulumika Lot ndele tava ti: “Fikama, kufa omwalikadi woye novana voye oukadona vavali, ava ve li pwoove, opo muha nyonaunwe po molwoukolokoshi woshilando.” 16Ndele ye okwa li ta ongaonga natango. Opo nee ovalumenhu ve mu kwata momaoko, nomwalikadi waye novana vaye oukadona vavali, osheshi Omwene okwa li a hala oku mu fila onghenda. Ndele vo ove va pitifa mo ndele ve va twala pondje yoshilando. 17Ndele eshi ve va twala pondje, ova tya: “Xupifeni eemwenyo deni! Inamu tala monima noinamu kanghama mefilu eli laJordan. Djei po; indeni onhapo keemhunda muha nyonaunwe po.” 18Opo nee Lot okwe va nyamukula: “Akutu Omwene wange! 19Tala, ame omupiya woye, nda filwa onghenda koshipala shoye, ndele Ove owa monifa nge efilonghenda loye linene, eshi wa xupifa omwenyo wange. Ndelenee ame itandi dulu okuya onhapo keemhunda, onda tila oshiponga shi hange nge ndele handi fi. 20Tala, oshilando osho shi li popepi, ndi shiive okufika mo. Pe nge ndi ye mo, sho oshinini noshongaho, omwenyo wange u xupifwe.” 21Ndele Ye okwe mu lombwela: “Tala, moshinima eshi namo ohandi ku itavelele, ndiha hanaune po oshilando, osho wa popya. 22Inda onhapo divadiva, osheshi Ame itandi dulu okuninga sha fimbo ino fika ko. Onghee hano va luka oshilando osho Soar.” 23Lot eshi a fika muSoar, lo etango ola pita.
Sodom naGomorra tai hanaunwa po
24Ndele Omwene okwa lokifila Sodom naGomorra osulfuri nomundilo wa dja kuye meulu, 25ndele Ye okwa hanauna po oilando ei nefilu alishe laJordan, nosho yo oonakukalamo aveshe voilando naashishe sha mena mo. 26Ndele omwalikadi waLot, ou a li te mu shikula, okwa keuka monima ndele ye okwa shituka oshivanda shomongwa.
27Ndele Abraham okwa penduka ongula inene ndele ta i konhele ei a li a kala ofika koshipala shOmwene. 28Ye eshi a tala langhele kuSodom naGomorra nokefilu alishe laJordan, okwa mona omwifi tau di medu ndele tau lundumuka ngaashi omwifi womediko loivela.
29Ndele eshi Kalunga a hanauna po oilando yomefilu laJordan, okwa dimbulukwa Abraham, ndele a pitifa mo Lot mehanauno, eshi Ye a hanauna po oilando omo mwa li Lot.
Okunyona kwovana oukadona vaLot
30Ndele Lot okwa dja muSoar pamwe novana vaye oukadona vavali, ndele okwa ka tula keemhunda, shaashi okwa tila okukala muSoar. Onghee hano ye okwa kala pamwe novana vaye vavali oukadona mekololo lomomhunda. 31Ndele ou woshiveli okwa lombwela ondenge yaye: “Tate okwa kula, nomoshilongo kamu na omulumenhu, ou ta dulu okuuya kufye panghedi younyuni aushe. 32Ila, tu pe tate omaviinyu a nwe, ndele hatu nangala naye, opo tu limonene oludalo mutate.” 33Oufiku ou vo ova pa xe omaviinyu a nwe ndele ou woshiveli okwe uya a nangale naxe. Ye ina shiiva kutya onaini e uya okunangala nonaini a penduka. 34Mefiku la shikula oshiveli sha lombwela ondenge: “Tala, oufiku ou wa pita, ame nda nangala natate. Natu mu pe vali nena omaviinyu a nwe. Inda nee kuye u ka nangale naye, fye tu limonene oludalo mutate.” 35Oufiku ou vo ova pa vali xe omaviinyu a nwe, ndele ondenge oya penduka, ndele tai nangala naye. Ye ina shiiva kutya onaini e uya okunangala nonaini a penduka. 36Osho ngaha ovana oukadona vavali vaLot va pewa oufimba kuxe, 37Ou woshiveli okwa dala okaana okamati, ndele e ka luka Moab. Oye xe yOvamoab fiyo onena. 38Ndele ondenge nayo oya dala okaana okamati ndele ye ka luka Ben-Ammi. Oye xe yOvaammoni fiyo onena.
अहिले सेलेक्ट गरिएको:
GENESIS 19: OKYB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Oshikwanyama Bible Revised © Bible Society of Namibia, 2008, 2012.