Lir. 24
24
Isaaka areera omukhasi
1Nono Aburahamu aaba akofuule lukali, ne Wele Omunyali Owa Bioosi aaba amubiita chikhabi mu biindu bioosi. 2Mala Aburahamu aboolela omukholi wewe, omukhulu khu bakholi be nju yewe, owemeelelanga buli siindu nisio aaba nasio, ali, “Ra kumukhono kwowo akari we kamaraango kaase. 3Yichuba mwisina lia Wele Omunyali Owa Bioosi, Wele we likulu ne liloba, oli se olibukulila omwana wase, omukhasi khukhwama mu bakhaana be Bakanaani nibo namenyamo bano tawe. 4Ne kakhali, olicha mu sibala siase, mu balebe base mala obukulileyo omwana wase Isaaka omukhasi.”
5Omukholi areeba Aburahamu ali, “Wakana omukhaana se anyala afukiilila khukhwicha ne nase mu sibala sino tawe. Aba nisieyo omusoleeli wowo mu sibala nisio waamamo?”
6Aburahamu amukobosia ali, “Okhakhola orio wakobosiayo omwana wase tawe! 7Wele Omunyali Owa Bioosi owe mwikulu, owandusia munju eya paapa wase, ne mu sibala siase nisio nasaalwamo, lundi owandomela ne echuba ali, ‘Ndiia lisaaye liowo sibala sino,’ alaruma malaika wewe ebweeni wowo, mala olabukulila omwana wase omukhasi khukhwama ebweeneyo. 8Ne omukhaana oyo aba nakhafukiilila khukhwicha ne nawe tawe, aba oli omulekhuule khukhwama mu liechuba liase. Ne kakhali okhesiayo omwana wase tawe.” 9Nio omukholi ara kumukhono kwewe akari we kamaraango ka Aburahamu, omwami wewe, mala amwichubila khuloondekhana ne likhuwa lino.
10Omukholi chana abukula chingamia ekhumi cho omwami wewe, biaanwa lukano na lukano nibio arobora khukhwama mu miaandu kio mwami wewe, mala enyokha, arekukha acha mu sibala sia Mesopotamia mu lukoba lwa Naori. 11Nga ola, asikamia chingamia enje we lukoba, a sebele mu siise sie ekolooba, nisio bakhasi bachilangamo khutaa kameechi. 12Asaba ali, “Ee, Wele Omunyali Owa Bioosi, Wele owo mwami wase Aburahamu, khusaba umbe bukhili luno, mala wekesie busiime bwowo buchiililila khu mwami wase Aburahamu. 13Lola, nemile a sebele, ne bakhaana be babaandu be mu lukoba balikho barura becha khutaa kameechi. 14Lekha omukhaana niye kane ndome ndi, ‘Nosiima ruura enyuungu mala umbe kameechi nywe,’ ne okane angobosie ali, ‘Khonywe, ne ese ndanyweesia aakhaba ne chingamia chowo,’ abe niye ewe oroboreere Isaaka omukholi wowo. Khulwa kano ndamanya ndi ewe wekeesie busiime bwowo bukhawa tawe khu mwami wase.”
15Oli asisaba, Rabeka, omukhaana owa Betueli, omwana owa Milika ne Naori, wandaaye owa Aburahamu, echa asutile esoongo yewe khwibeka. 16Aaba omukhaana owe lukoondo lulayi lundi owe yabwana, okhakonakho no museecha tawe. Ekha mu sebele echusia esoongo mala aniina. 17Omukholi oyo atima acha amwakaanila, mala amuboolela ali, “Nosiima, mbeekho kameechi matiiti kari khukhwama mu soongo mwowo nywe.”
18Omukhaana amukobosia ali, “omwami khonywe.” Mala omukhaana aruura esoongo khangu khukhwama khwibeka khwewe akitililila mala amunywesia. 19Oli amunywesia amala amuboolela ali, “Ndatayila aakhaba chingamia chowo chosi, nabwila nga choosi ne chimala khunywa.” 20Nio omukhaana oyo achukha khangu kameechi ke mu soongo mwewe khu lwelo nilwo bibiaayo binywelangakho mala atima mu sebele asombelela kameechi kamakali khukhwola nga chingamia chanywa choosi. 21Omukholi owa Aburahamu oyo amulolelela ne asilile busa, mu khweyika amanye Wele Omunyali Owa Bioosi ne akholile lukeendo lwewe khuba ne bukhili namwe tawe.
22Oli chingamia chamala khunywa, omundu oyo abukula embete eye sahabu eye bukusi bukali ne chipangili chimboofu chibili che sahabu achira khu makhono ko mukhaana. 23Mala amureeba ali, “Mboolele ewe oli omukhaana owa naanu. Bubweyaangu bulikho munju mwa paapa wowo niio efwe khunyala khwakona?”
24Omukhaana amukobosia ali, “Ese ndi omukhaana owa Betueli, omusoleeli owa Milika, niye Milika asaalila Naori.” 25Atasakho ali, “Ewefwe khuli ne chikhanja ne biakhulia bikali bie bibiaayo ne lusiro nilwo bakeni banyala bakonamo.”
26Omukholi oyo asikama asi mala esaaya Wele Omunyali Owa Bioosi, 27Aloma ali, “Afume Wele Omunyali Owa Bioosi, Wele owo Mwami wase Aburahamu. Wele okhalekhile busiime bwewe buchiililila lundi bubweikinwa khu mwami wase tawe. Wele Omunyali Owa Bioosi andangiriire khukhwola khunju eye balebe bo mwami wase.”
28Nio Omukhaana atima acha aboolela be munju eya maayi wewe bibiindu bino bioosi. 29Rabeka aaba ne wandaaye niye batiuukha bali Labani, Labani arura atima acha niio omundu oyo aaba, a sebele. 30Labani aboona embete ne chipangili khu makhono ko mukooko wewe lundi aulila kamakhuwa niko omundu chana aboolela Rabeka. Acha niio omukholi owa Aburahamu aaba ne emile siimbi ne chingamia a sebele. 31Amuboolela ali, “yiicha, mungo, omubiite owa Wele Omunyali Owa Bioosi, siina sikila ne wima enje? Nakhung'ooneele lusiro ne abuundu e chingamia.”
32Omundu oyo engila munju. Labani akangulula bibiaba khu ngamia mala achielesia chikhanja ne biakhulia bie bibiaayo, lundi aelesia omundu oyo ne babaandu nibo aba nabo kameechi basaabe bikele. 33Nga siakhulia ne siareerwa ebweeni wewe aloma ali, “Se ndalia nekhaboola sisindeerire tawe.”
Labani amuboolela ali, “Loma.”
34Aloma ali, “Ese ndi omukholi owa Aburahamu. 35Wele Omunyali Owa Bioosi abiita omwami wase chikhabi chingali, mala abeele omukali lukali, amua kamatuuli ne kiminyele, efwesa ne esahabu, banasioobi be siseecha nende be siikhasi, chingamia ne chipunda. 36Ne Sara, mukho omwami wase, aamusaalila omwana mu buloosi bwewe. Ne omwami wase aelesia omusoleeli oyo buli siindu nisio ali nasio. 37Omwami wase anjechubia ne aloma ali, ‘Yichuba oli se olibukulila omwana wase omukhasi khukhwama mu bakhaana be Bakanaani nibo namenyamo tawe. 38Ne kakhali olicha munju eya paapa, mu balebe base, mala obukulileyo omwana wase omukhasi.’ 39Nakobosia omwami wase ndi, ‘Wakana omukhaana se akhafukiilile khukhwicha nase tawe!’ 40Omwami angobosia ali, ‘Wele Omunyali Owa Bioosi niye naria, akharume malaika wewe ache ne nawe mala akhole lukeendo lwowo lube ne bukhili, mala olibukulila omwana wase omukhasi khukhwama mu balebe base lundi munju eya paapa. 41Ne olaba omulekhuule khukhwama mu khwichubia khwase, waaba ne woola khu balebe base mala baloba khukhua omukhaana.’
42“Nga ne nolile asebele luno, sabile ndi, ‘Ee, Wele Omunyali Owa Bioosi, Wele owo mwami wase Aburahamu, mbe bukhili mu niko endikho ekhola. 43Lola nemile asebele, ne omukhaana olarura eche khutaa kameechi ndamusaba ambeekho kameechi ke khunywa. 44Ne olamba lundi anywesie chingamia chase choosi lekha abe omukhasi niye Wele Omunyali Owa Bioosi aroboreere omwana owo mwami wase.’ 45Ne khamala lisaba liase mu mwoyo tawe, Rabeka echa ne soongo yewe khu mabeka, mala ekha mu sebele ataa kameechi. Namusaba ndi, ‘Nosiima mbeekho kameechi nywe.’ 46Aruura esoongo khangu khukhwama khwibeka mala aloma ali, ‘Khonywe, mala nase ndanyweesia aakhaba ne chingamia chowo choosi.’ Nio ese nanywa mala aanyweesia ne chingamia choosi. 47Nio namureeba ndi, ‘Ewe omukhaana owa naanu?’ Aloma ali, ‘Ese omukhaana owa Betueli, omwana owa Milika ne Naori.’ Nio namura embete khu lioolu ne chipangili khu makhono kewe. 48Mala nasikama asi, nesaaya Wele Omunyali Owa Bioosi. Nafumia Wele Omunyali Owa Bioosi owo Mwami wase Aburahamu, oundangiriire mbukule omukhaana owe balebe bo mwami wase, abe omukhasi owo mwana wewe. 49Nono luno, mwaba ne mulakholela omwami wase bubweikinwa ne bung'ali, mumboolele, ne kakhali kario tawe, mboolele, nio manye nilio nyala nakhola.”
50Nio Labani ne Betueli bakobosia bali, “Likhuwa lino liamile khu Wele Omunyali Owa Bioosi, se khunyala khwalomaloma khwiwe liosi liosi tawe. 51Rabeka ali ebweeni wowo, mubukule oche, mala abe omukhasi owo mwana owo mwami wowo, nga Wele Omunyali Owa Bioosi omwene ne alomile.”
52Nga omukholi owa Aburahamu ne aulila niko baloma enama asi ebweeni wa Wele Omunyali Owa Bioosi. 53Arusia bibiindu bie efwesa, esahabu ne chingubo mala abiia Rabeka. Lundi aelesia wandaaye owa Rabeka ne maawe, bibiindu bie bukusi bukali.
54Nio niye ne babaandu nibo aaba nabo balia ne khunywa mala bakonayo siilo esio. Nga bwasia benyokha, omukholi aloma ali, “Ndekhuule ngobole wo mwami wase.”
55Mala wandaaye owa Rabeka ne maawe baloma bali, “Lekha omukhaana amenyekho nafwe khu siise, chindaalo ekhumi, nechiwele anyala arekukha.”
56Omukholi abakobosia ali, “Mukhanjikhasia tawe, Wele Omunyali Owa Bioosi akholile lukeendo lwase lwabeele ne bukhili. Khemundekhuule ngobole wo mwami wase.”
57Bakobosia bali, “Lekha khulaange omukhaana omwene mala khumureebe.” 58Balaanga Rabeka mala bamureeba bali, “Wenya oche ne omundu yuno?”
Abakobosia ali, “Yee, ndacha ne naye.”
59Nio balekhuula Rabeka ne omukeesia wewe, ne omukholi owa Aburahamu ne babaandu bewe. 60Mala babiita Rabeka chikhabi ne baloma bali,
“Mukooko wefwe, obe maayi owe chielefu,
owe chielefu kamakhumi.
Lisaaye liowo liule chingoba che basiku balio!”
61Nio Rabeka ne bakholi bewe benyokha mala baniina khu ngamia, bacha ne omukholi owa Aburahamu.
62Isaaka aaba echile mu sichiimi sisialaangwa Beeri-lahai-roi mala amenyanga siafubo owa Kanaani. 63Nono Isaaka arura acha mu lukoongo ekolooba, khukhwibaasia kakeewe. Alola, mala abona chingamia chilikho chiicha. 64Rabeka nga abona Isaaka, ekha arura khu ngamia, 65mala areeba omukholi owa Aburahamu ali, “Naanu olikho okeenda mu lukoongo ne eecha oyo?” Omukholi amukobosia ali, “Omwami wase niye.” Nio Rabeka abukula eneti mala efuuma mumoni.
66Nio omukholi oyo aboolela Isaaka bibiindu bioosi nibio aaba ne akholile. 67Nio, Isaaka engisia Rabeka mu liiema nimwo Sara, maayi wewe amenyanga, amubukula aaba omukhasi wewe mala amusiima. Nio Isaaka aolelesibwa enyuma we lifwa lia maawe.
Nu geselecteerd:
Lir. 24: LUBUKUSU
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
©Bible Society of Kenya, 2019