Joni 5
5
Jesu mbwaakaponya muntu watali kukonzya kweenda
1Musule lyakooku, kwakali pobwe limwi lya Bajuda, nkaako Jesu wakainka ku Jelusalemu. 2Lino mu Jelusalemu, kumbali aamulyango wambelele, kwakali ziba lyakali kwiitwa kuti Betesaida Mucihibulu. Kuziba eeli kwakaliyakidwe zitungu zyosanwe. 3Muzitungu oomo mwakali kulala balwazi banji-banji, mbuli boofu, balema, bantu bapuutide maboko amaulu, [bakali kulindila kuvundaulwa kwamaanzi aamuziba. 4Nkaambo kwakali ziindi zimwi mungelo wa Leza naakali kuboola kunjila muziba akuvundaula maanzi. Nkabela kufumbwa mulwazi wakasaanguna kuliwaala muziba ciindi maanzi naakavundaulwa wakapona kubulwazi bwakwe nibuba buti.] 5Lino mucitungu cimwi kwakali muntu umwi wakali kuciswa kwamyaka iili makumi otatwe amyaka iili lusele. 6Jesu naakamubona wakaziba kuti wakali kuciswa kwaciindi cilamfu. Wakati kulinguwe, “Sena ulayanda kuponyezegwa?” 7Mulwazi wakaingula kuti, “O Mwami, nsijisi uundigwasya kundiwaala muziba ciindi maanzi naacivundaukide. Inga ndatitinjile, ndajana umwi wandiindila kale.” 8Mpoonya Jesu wakati kulinguwe, “Nyamuka, bweza macila aako weende.” 9Mpoonya-mpoonya muntu ooyo wakapona, wakabweza macila aakwe wainka. Oobu bwakali Buzuba bwa kulyookezya butegwa Sabata. 10Lino bapati ba Bajuda bakati kumuntu ooyo wakaponyezegwa, “Sunu Mbuzuba bwa Sabata. Toelede kunyamuna macila pe.” 11Walo wakaingula kuti, “Ooyo wandiponya wandaambila kuti, ‘Bweza macila aako, weende!’” 12Bakamubuzya kuti, “Ino nguni muntu ooyo wakwaambila kuti, ‘Bweza macila aako, weende?’” 13Wakaponyezegwa taakazi kuti naa muntu ooyo nguni, nkaambo Jesu wakanjila mubantu, kwakali bantu banji mubusena oobo. 14Kucimana buyo kaindi, Jesu wakamujana muntu ooyo muŋanda ya Leza, eelyo wakati kulinguwe, “Mbuli mboopona oobu, ncibotu utabisyi kutegwa kutakakusikili mapenzi aambi mabi aaindilila.” 15Mpoonya muntu ooyo wakainka akuyooambila bapati ba Bajuda kuti ngu Jesu wakamuponya. 16Nkaambo cakacitika mu Buzuba bwa Sabata, ncibakamupenzya Jesu Bajuda. 17Walo wakabaambila kuti, “Taata ulabeleka ciindi coonse, aboobo ambebo ndileelede kubeleka mbubonya mbuli nguwe.” 18Mpoonya Bajuda bakasola kujana nzila yakujaya Jesu. Bakati watyola mulawo wa Buzuba bwa Sabata, akulyaamba kuti Leza ngu Wisi. Caamba kuti ulibika muciimo comwe a Leza.
Jesu ngo Mwanaa Leza
19Jesu wakati ku bapati ba Bajuda, “Ncobeni ndamwaambila kasimpe, Mwana takonzyi kulicitila cintu mwini alikke pe. Ukonzya buyo kucita milimo njabona kuli Wisi, nkaambo milimo yoonse iicita Wisi awalo Mwana ulacita njiyonya eeyo. 20Wisi ulayandisisya Mwana, ulamutondezya zintu zyoonse nzyacita walo mwini. Alimwi uciyoomutondezya aimbi milimo mipati kwiindilila, kutegwa mukagambwe. 21Nkaambo mbubonya Wisi mbwabusya bafu akubapa buumi, mbubonya oobo Mwana awalo ulapa buumi kufumbwa kumuntu ngwayanda. 22Wisi tabeteki muntu pe, wakabikka Mwana kuti abeteke boonse. 23Kutegwa bantu boonse balemeke Mwana mbubonya mbuli mbobalemeka Wisi. Muntu woonse uutalemeki Mwana talemeki naba Wisi wakamutuma.
24“Ncobeni, ooyo uumvwa majwi aangu akusyoma yooyo wakandituma, ulijisi buumi butamani. Aboobo takooyoopegwa mulandu walufu, nkaambo wayokolwa mulufu, wanjizigwa mubuumi. 25Ndamwaambila kasimpe, ciindi cilasika, kwalo casika kale, bafwide nibayoomvwa majwi aa Mwanaa Leza, nkabela aabo bayoomvwa bayooba aabuumi. 26Nkaambo mbubonya mbuli Wisi mbwali aabuumi, awalo Mwana wakamucita kuti abe aabuumi. 27Wakamupa nguzu zyakubeteka, walo mbwali Mwanaa Muntu. 28Mutagambwi aceeci, nkaambo ciyoosika ciindi boonse bali muzyuumbwe nibayoomvwa majwi aakwe, 29eelyo bayoovukkuka kuzwa muli nzinzyo. Lino aabo bakacita kabotu bayoobukila buumi butamani, abalo bakacita zibi bayoobukila cisubulo.
Bumboni bulungulula Jesu
30“Taakwe ncenga ndakonzya kucita munguzu zyangu ndemwini, ndabeteka mbuli Taata mbwaakandaambila, nkaako lubeta lwangu luliluzi. Nsiyandauli kucita luyando lwangu ndemwini, pele eezyo ziyanda yooyo wakandituma.
31“Kuti naa ndatalika kulilungulula lwangu ndemwini, bumboni bwangu tabuli bwakasimpe. 32Mpali umwi uundilungulula, nkabela ndizi kuti bumboni mbwandilunguluzya mbwakasimpe. 33Mwakatuma batumwa kuli Joni, nkabela wakapa bumboni bwakusinizya. 34Nsyaambi kuti njanda bumboni buzwa kubantu pe, pele makani aaya ndaaamba kutegwa mufutulwe. 35Joni wakali mbuli lambe liyaka akumweka, eelyo nywebo mwakabotelwa kukkala mumumuni wakwe kwakaindi kaniini. 36Pele bumboni mbwejisi mbupati kwiinda boobo mbwaakandilunguluzya Joni. Amubone milimo eeyi njecita njiyeeyo njaakandipa Taata kuti ncite. Njenjiyo iindilungulula akupa bumboni bwakuti Taata nguwakandituma. 37Nkabela Taata wakandituma wakapa bumboni bwakundilungulula. Taakwe nimwakamvwa Ijwi lyakwe niciba ciindi comwe pe, acalo ciimo cakwe tamunacibwene. 38Aalo majwi aa Taata taakkalilide mulindinywe, kuti kamutasyomi yooyo ngwaakatuma. 39Mulabalisya Malembe nkaambo muyeeya kuti mulingawo momujisi buumi butamani. Tee kayi ngangawo aandilungulula. 40Mwamana mulakaka kuboola kulindime kutegwa mujane buumi butamani. 41Mebo nsitambuli bulemu buzwa kubantu. 42Pele ndilizi kuti nywebo tamumuyandi Leza pe. 43Mebo ndakasika muzina lya Taata, nikuba boobo tamunditambuli. Pele kuti umwi waboola muzina lyakwe mwini, mulamutambula. 44Mulatambula bulemu buzwa kubeenzinyoko, pele tamutambuli bulemu buzwa kuli Leza. Ani inga mwasyoma buti? 45Mutayeeyi kuti mebo ndime entikamupe mulandu kuli Taata. Mozesi wanu ooyo ngomusyoma nguutikamupe mulandu. 46Kuti nimwakamusyoma Mozesi ambebo nimwandisyoma, nkaambo Mozesi wakandilungulula mumalembe aakwe. 47Pele kuti kamutaazumini malembe aa Mozesi ino inga mwakonzya buti kuzumina majwi aangu?”
Nu geselecteerd:
Joni 5: Tonga96
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Tonga Bible © United Bible Societies, 1994.
