متا 20
20
دیلسوجٚ اربأب
1«آسمأنٚ ملکوتَ شأ ایتأ صأب بأغٚ مأجیرأ مأنستَن شٚبأهت دئن کی صُبٚ دٚمٚ رِه بوشؤ بیرون کی خو باغٚ رِه چنتأ کأرگر بیگیرٚه. 2اون کأرٚگٚرأنٚ اَمرأ قرأر بٚنأ کی هرتأیَ، ایتأ کأمیلٚ روجٚ موزدَ فأدٚه؛ بأزین همٚتأنَ اوسه کوده خوشأنٚ کأرٚ سٚر.
3«چن سأعت بعد، ایوأردِه بوشؤ بیرون و چنتأ کأرٚگرَ بیدِه کی میدأنی دورون بیکأر ایسأده. 4پس، اوشأنَ اوسه کوده خو بأغ و بوگفته غروب دٚمٚ رِه هرچی اوشأنٚ حق بٚبه فأدٚم. 5بأزین اوشأنم کأر کودنٚ جَا موشغولَ بوستٚد. بأزم ظهرٚ دٚم، زوأله سأعت سه‌یم بوشؤ بیرون و هه کأرَ بوکوده.
6«بعدٚ ظهر سأعت پِنج، ایوأردِه بوشؤ چن نفر دِه بیأفت کی بیکأر ایسأبود و وأوٚرسِه:
«چٚره تومأمٚ روج اَیَه بیکأر بئیسأییدی؟
7«جوأب بٚدأده: هیشکی اَمٚرَه کأر فأندأ.
«اَشأنَ بوگفته: بیشید می بأغ و کأر بوکونید.
8-«او روج غروب دٚم، صأب بأغ خو موبأشیرَ بوگفته کی کأرٚگٚرأنَ دؤخأنه و جٚه آخری تأ اوّلی نفر، اوشأنٚ موزدَ فأدَه. 9اوشأنی کی سأعت پِنج کأرٚ سٚر بوشؤ بود، ایتأ کأمیلٚ روجَ موزدٚ فأدأ. 10آخرپٚسی، او کأرٚگرأنٚ نوبت بوبو کی جٚه همه کس اوّل کأرٚ رِه موشغولَ بوسته بود؛ اَشأن، رأفأ ایسأبود او البأقیأنٚ جَا ویشتر موزد فأگیرٚد. ولی اوشأنم هوندٚر فأدأ بوبو. 11وختی اوشأن خوشأنی موزدَ فأگیفتد صأب بأغَ شیکأیت بوکودٚد، بوگفتٚده: 12"اَشأن کی فقد ای سأعت کأر بوکودٚد، اَمی اَندر فأدأئید کی تومأم روجٚ رِه اَ آفتأبٚ زألٚ جیر جأن بٚدأییم؟"
13-«صأب بأغ وأگردسته ایتأ جٚه اوشأنَ، بوگفته: اَی ریفِق، من کی تٚرَه ظولمی نوکودم. مگه تو قوبیل نوکودی کی ایتأ روجٚ موزدٚ اَمرأ کأر بوکونی 14پس تی موزدَ فأگیر و بوشؤ. می دیل خأیه اَ آخری‌یَ هوندٚر موزد فأدٚم کی تٚرَه فأدأم. 15آیا من حق نأرٚم هر جور کی می دیل خأیٚه می پولَ خرجَ کونم؟ ینی اَن دوروسته کی تو می دٚس و دیلوأزی جَا دیلخورَ بی؟
16«پس اوشأنی کی اَسه آخرٚده، اوّل بٚده و اوشأنی کی اوّلٚده، آخر.»
عیسا اورشلیمٚ آخری سٚفر
17اورشلیم رأ دورون، عیسا خو دوأزده‌تأ شأگردٚ فأکشه ایتأ گوشٚه و اوشأنَ بوگفته: 18«اَسه شیمی اورشلیم، و اویَه اینسأنٚ پٚسرَ ایسپأرٚده، پیله کأهینأن و دین عألیمأن دٚس. اوشأن اونَ محکوم کونٚده کی وأ بیمیره. 19و رومیأنٚ دٚس فأدٚد کی اونَ رخشنَ گیرٚد و شلأق بٚزٚنٚد و صلیب سٚر فأکٚشٚد. ولی سیومی روج اون زٚنده بِه.»
عیسا آمؤختٚن مردومٚ خیدمت کودنٚ وأسی
20بأزون یعقوب و یوحنا مأر، زبدی پٚسرأن، خو دوتأ پٚسرَ عیسا ورجأ بأوٚرده، اونٚ ور زانو بٚزِه و خأهیش بوکود کی اونی خأهیشَ انجأم بٚدأ.
21عیسا وأوٚرسِه: «چی خأیی؟»
او زنأی جوأب بٚدأ: «وختی تی ملکوتٚ دورون، سلطنتٚ تختٚ رو بینیشتی، ایجأزه بٚدٚن ایتأ جٚه می پٚسرأن تی رأستٚ ور و اویتأ تی چپٚ ور بینیشینٚد.»
22عیسا جوأب بٚدأ: «شومأن نأنیدی کی چی خأییدی! ینی تأنیدی او رنج و عذأبٚ زرخٚ پیأله جَا کی من وأستی وأخٚوٚرم، شومأنم وأخورید؟»
جوأب بٚدٚأده: «آهأن، تأنیم.»
23عیسا اوشأنَ بٚفرمأسته: «البت جٚه می پیأله وأخوریدی، ولی من ایختیأردأر نییٚم کی شٚمٚره می رأس و چپٚ ور بینیشأنٚم. اَ جأجیگأ اوشأنی شین ایسه کی می پئر اوشأنٚ رِه جٚه پیشتر اینتخأب بوکوده.»
24وختی شأگردأن البأقی بٚفأمٚستد کی یعقوب و یوحنا چی بٚخأستده، او دوتأ رِه زرخٚ بوستٚد.
25ولی عیسا، شأگردأنَ همّه دؤخأد و بوگفته: «اَ دونیأ دورون، حأکیمأن مردومٚ رو ریأسٚت کونٚد و اربأبأن خوشأنٚ خأدیمأنٚ دستور دٚهٚده. 26ولی شیمی میأن نوأستی اَطو بٚبه. بلکی برعکس، هر کی خأیه شیمی میأن پیله‌تر بٚبه، وأستی همٚتأنٚ خأدیم بٚبه، 27و هرکی خأیه شیمی میأن اوّل بٚبه، وأستی شیمی غولأم بٚبه. 28چون اینسأنٚ پٚسرم نأمؤ کی اینفر اونَ خیدمت بوکونٚه، بلکی بأمؤ کی بقیٚه‌یأنَ یاور بٚدأ و خو جأنَ دیگرأنٚ آزأدی رأ دورون فٚدأ بوکونٚه.»
عیسا دوتأ کورَ شفأ دِهه
29وختی عیسا و اونٚ شأگردأن اَریحا شهرٚ جَا بیرون بوشؤده، خٚیلیأن اونٚ دونبألسر رأ دکفتد.
30هو زمأتٚ دورون، دو تأ کور کی جأده کنأر نیشته بود، جٚه اَ خأطر کی بشتأوٚستٚد عیسا جٚه اویَه دٚوأرٚستندٚره، ایجگٚره فأکٚشِده، فریأد بٚزِئد: «اَی آقأ جأن، اَی داوودٚ پٚسرَ، اَمٚرَه رحم بوکون!»
31جِمئیت اوشأنٚ سٚر ایجگره بٚزِده: «دٚوٚدید شیمی صدایَ!» ولی اوشأن خوشأنی صدایَ بوجؤرتر ببردٚد کی: «اَی آقأ جأن، اَی داوودٚ پٚسرَ، اَمٚرَه رحم بوکون!»
32آخرپٚسی وختی عیسا اویَه فأرٚسِه، بئیسأ و اوشأنی جَا وأوٚرسِه: «چی خأیید شِمِره بوکونم؟»
33جوأب بٚدأد: «آقأ جأن، خأییم اَمی چومأن وأزَ بٚه!»
34عیسا دیل اوشأنٚ رِه بوسوخته و اوشأنٚ چومأنٚ رو دٚس بٚنأ. دفأتن بتأنستد بیدینٚد و عیسا دونبأل رأ دکفتد.
Nu geselecteerd:
متا 20: GLK_NT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 Transform Iran