متا 23
23
ظأهیرٚ چأکودنٚ وأسی دین دأشتٚن
1بأزین عیسا خو شأگردأن و مردومَ بوگفته: 2«دین عألیمأن و فریسیأن، موسا شریعتَ تفسیر کونٚده.#23:2 یونأنی: دین عألیمأن و فریسیأن موسا مسند (تختٚ) رو نیشتِده. 3پس اونچی کی شٚمٚره آموجٚده، انجأم بدید، ولی هیوخت اوشأنی کأرأنٚ مأنستَن انجأم ندید، چون هیوخت آموجه‌یأنی کی دٚهٚده، خودشأن انجأم ندٚد. 4اَشأن دینٚ سینگینٚ تکلیفأنَ، مردومَ بچأنَ دٚهٚده، ولی هیوخت حأضیر نییٚده اَشأنٚ یاور دئنٚ رِه، حتّا ایتأ دٚسٚ پٚنجه تکأن بٚدٚد.
5«هر تأ کأر کی بوکوند، خوشأنی ظأهیرٚ چأکودنٚ وأسی ایسه. موقدسٚ کیتأبأنٚ آیه‌یأن و دوعأیأنَ نیویسٚد و خوشأنی بألَ دٚوٚدٚد، و خوشأنٚ لیوأسأنٚ دأمأنَ درأزتر دوجٚده کی بِیتر بیدِه بٚبٚد و مردوم اوشأنَ دیندأرٚ آدم بدأنٚد. 6چنقذر دوس دأرٚده کی میهمأنیأنٚ دورون مجلٚسٚ سرجأکش بینیشینٚد، و کنیسه‌یأنٚ دورون بِیترین جأجیگأیَ بٚدأرٚد، 7و کوچه و بأزأرٚ دٚوأرٚستنٚ موقع، مردوم اَشأنٚ دٚس بٚسینه بئیسٚد و اوشأنَ "اوستأد" دؤخأنٚد. 8ولی شومأن اَجور لقبأنَ مردومٚ جَا قوبیل نوکونید، چونکی شومأن ایتأ اوستأد دأرید و همه‌یٚ شومأن کس‌کسٚ اَمرأ ایتأیید و برأریدی. 9اَطویی، هیکسَ زیمینٚ سٚر "پئر" نوأگفتٚنید، چون شومأن ایتأ "آسمأنی پئر" دأریدی کی خودا ایسه. 10و ولأنید کسی شٚمٚره "اوستأد" دؤخأنه، چون ایتأ اوستأد دأریدی کی مسیح ایسه.
11«هرچی ویشتر البأقیأنَ خیدمت بوکونید، پیله‌تر بیدی، چون پیله کس بوستن، خیدمت کودنٚ میأن نٚهأ. 12چونکی هرکی حقٚ سعی بٚزٚنه خؤرَه پیله کس نیشأن بٚدأ، کوچیکَ به، ولی کسی کی خؤرَه فروتن چأکونه، سٚربولند به.
13«وای بحألٚ شومأن، ای دینٚ عألیمأن و فریسیأن! چندر ریأکأریدی! نه وئألیدی البأقیأن آسمأنٚ ملکوتٚ بودورون بٚشٚد و نه خودتأن بودورون شیدی.
14«وای شٚمٚره اَی دین عألیمأن و ریأکأرٚ فریسیأن! شومأن وختی شیمی دوعأیأنَ دٚرأزه دیهیدی و دین دأشتٚنٚ رِه تظاهر کونید، تومأمٚ شیمی هوش و حواس اَنٚ کی چوطو ویوه زنأکأنٚ مأل و مینألٚ صائاب بیبید. هنٚ وأسی شیمی موجأزأت خٚیلی سینگینٚ به.#23:14 آیه‌یٚ ۱۴ بعضی قدیمی دٚس نیویسٚ بینیویشته‌یأنٚ میأن نأمؤ. 15وای به شیمی حأل اَی دین عألیمأن و فریسیأن! شومأن همه جأیَ وأموجیدی کی اینفرَ بیأفید کی شیمی شأگرد بٚبه؛ و وختی موفق بوبوستید، اونَ خودتأنٚ جَا دو برأبر بدتر جهندمٚ سیزأوأر چأکونیدی.
16«وای به شیمی حأل کی کوریدی و دٚسٚ‌چو گیریدی! چونکی گیدی: "عأیب نأرِه کی اینفر معبدٚ سٚر قسم بوخوره چون تأنه خو قسمَ بٚشکٚنه؛ ولی اینفر کی طلأیی ظرفأنَ کی معبدٚ دورون نٚهأ، قسم بوخوره وأستی حتمن اونَ وفأ بوکونه." 17اَی جأهیلأن! اَی کورأن! کویتأ موهیمتره، طلأ یا معبد کی طلأیَ تقدیس کونه؟
18«اَطویم گیدی: "مذبحٚ رو قسم خوردنَ شأ ایشکنئن، ولی مذبحٚ سٚرٚ پیشکشَ رو قسم خوردٚنَ وأستی حتمن وفأ کودن." 19اَی کورٚ اَحمٚقأن! کویتأ موهیمتره، پیشکشی‌یی کی مذبحٚ رو نٚهأ یا خودٚ مذبح کی پیشکشی‌یَ تقدیس کونه؟ 20وختی مذبح رو قسم خوریدی، اَطویی خودٚ مذبحٚ سٚر و هر چی کی اونٚ رو نٚهأیَ قسم خوریدی؛ 21و وختی معبدٚ سٚر قسم خوریدی، اَطویی خودٚ خأنه سٚر و خودایی کی او خأنه دورون ایسأ سٚر قسم خوریدی؛ 22و وختی آسمأنٚ سٚر قسم خوریدی، اَطویی خودا تختٚ سٚر و خودٚ خودا کی تختٚ رو نیشته سٚر قسم خوریدی.
23«وای به شیمی حأل اَی دین عألیمأن و ریأکأرٚ فریسیأن! شومأن حتّا شیمی باغچه نعناع و شیوید و زیره رِه ده یک پیشکش کونید، ولی شریعتٚ موهیمتره حوکمأن کی عیدألت و رحمت و امأنٚت ایسه، محل نٚنیدی. شومأن وأستی ده یکَ فأدید، ولی موهیمه حوکمأنٚم جٚه خأطرَ ندید. 24اَی کی کوریدی و دٚسٚ چو گیریدی، شوکوزٚ صافی سولأخٚ جَا رٚدَ کونید ولی شوتورَ فٚوٚریدی!
25«وای به شیمی حأل اَی دین عألیمأن و ریأکأرٚ فریسیأن! چون شومأن کأسه بوشقابٚ بیرونَ، اَندر تیمیزَ کونید کی پرکاله به، ولی اوشأنٚ دورون طمع و نأپرهیزی جَا پوره. 26ای کورٚ فریسیأن، اوّل کأسه بوشقابٚ دورونَ تیمیزٚ کونید کی اوشأنٚ بیرونم پأکَ بِه.
27«وای به شیمی حأل اَی دین عألیمأن و ریأکأرٚ فریسیأن! شومأن سیفیدٚ بوسته قبرأنَ مأنیدی کی اوشأنی ظأهیر قشنگه ولی اوشأنٚ دورون کثأفت و موردأل خأشأنٚ جَا پوره. 28شومأن حقٚ سعی زنیدی شیمی ظأهیرَ دیندأر نیشأن بدید، ولی شیمی او موقدسٚ عبأ جیر، دیلأنی دأرید پور جٚه ریأ و گونأ.
29«وای به شیمی حأل اَی دین عألیمأن و ریأکأرٚ فریسیأن! شومأن پیغمبرأنٚ رِه بوقعَه چأکونید و موقدسأنٚ قبرٚ چأکون وأکون کونیدی 30و گیدی: " اگه اَمأن اَمی پیله بأبأیأنٚ جَا ایسأبیم، پیغمبرأنٚ کوشتٚنٚ دورون اوشأنی اَمرأ همدٚس نوبوستیم."
31«ولی اَ گبٚ جَا، شیمی زٚوأنٚ اَمرأ گیدی کی پیغمبرأنٚ قأتیلأنٚ زأکأنیدی. 32شومأن اوشأنی رأ مأله جَا پیروی کونیدی؛ شومأن نأجورٚ کأرأنٚ دورون، اوشأنٚ جَا پیش دکفتید. 33ای خوش خط و خألٚ لنتی‌یأن! چوطو تأنیدی جهندمٚ موجأزأتٚ جَا جیویزید؟
34«من، پیغمبرأن و حکیمٚ مردأکأن و عألیمأنی‌یٚ شیمی ور اوسه کونم، و شومأن بعضیتأنَ دأر زٚنید و بعضیتأنَ شیمی کنیسه‌یأنٚ دورون شلأقٚ جیر گیریدی، اَ شهر او شهر آوأرَ کونید. 35پس او بی‌گونأ آدمأنٚ خون کی زیمینٚ سٚر فووُسته دأره، شیمی گردنه، جٚه معصومٚ هأبیلٚ خون بیگیفته تأ زکریأ، برخیا پٚسر کی اونَ معبدٚ دورون، محرأبٚ جیگأ و مذبحٚ بین، بوکوشتید. 36رأس‌رأسِی شٚمٚره گم کی اَ نسل همه‌یٚ اوشأنی تأوأنَ دِهه.
عیسا اورشلیمٚ ویرأنَ بوستنَ پیشگویی کونه
37«اَی اورشلیم، اَی اورشلیم، اَی شهری کی پیغمبرأنٚ قاتٚلی و خودا اوسه کوده‌یأنَ سنگسأر کونی! چن وأر خأستیم تی زأکأنَ جمَ کونم هوطو کی کولوشکٚن خو کیشکأيأنَ خو بألٚ جیر گیره، ولی تو نخأستی. 38پس اَسه تی خأنه ویرأن مأنه. 39چون شٚمٚره گم کی دِه مٚرَه نیدینیدی تأ هو زمأت کی بیگید" مووأرٚکه اونی کی خوداوندٚ نأمٚ اَمرأ اَیِه."»
Nu geselecteerd:
متا 23: GLK_NT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 Transform Iran