متا 24
24
آخرٚ زمأتأنٚ
1وختی کی عیسا معبدٚ جَا شؤئؤندوبو بیرون، اونی شأگردأن بأمؤده، بٚخأستٚد اونَ ببرد معبدٚ سأختمأنأنٚ دِئنٚ رِه. 2ولی عیسا اوشأنَ بوگفته: «اَ سأختمأنأنَ دینیدی؟ رأس‌رأسِی شٚمٚره گم کی سنگ سنگٚ سٚر نٚمأنه، بلکی همه فوگوردأن دگردأن بٚدأ.»
3چن سأعت بعد، وختی اون زیتون کوه دأمنه دورون نیشته بو، اونی شأگردأن بأمؤده، اونی جَا وأورسئده: «اَمٚرَه بوگو اَ ایتفأقأن چی زمأتی دکفه؟ تی اَمؤن و دونیأ آخر #24:3 یا «اَ زمأتٚ آخر»نیشأنه چیسه؟»
4عیسا اَشأنٚ بوگفته: «بٚپّأئید کسی شٚمٚره گومرأ نوکونه. 5چونکی خٚیلیأن می نأم اَمرأ اَیٚده، گده، "من مسیحم" و خٚیلیأنَ گومرأ کونٚده. 6جنگأنٚ خٚوٚر جٚه دؤر و نیزدیک شیمی گوش فأرٚسِه. ولی پریشأنَ نیبید چون جنگأن ایتفأق دکفیدی، ولی اَ زودیأن دونیأ تومأنَ نیبه. 7قومأن و کیشورأن کس‌کسَ جنگٚ رِه دؤخأنده، و دونیأ جأجیگأیأنٚ دورون، قحطی و زیمین لرزه پیش اَیِه. 8ولی اَشأن تأزه زأستٚنٚ دردٚ شورو بوستنه.
9«بأزین شٚمٚره تسلیم کونٚده کی شکنجه بیبید، و شٚمٚره کوشٚده. تومأمٚ دونیأ آدمأن می نأمٚ وأسی شیمی جَا نیفرت گیرده. 10خٚیلیأن خوشأنی ایمأنٚ جَا وأگردٚد و کس‌کسَ تسلیم کونٚده و کس‌کسٚ جَا نیفرت اوسأنٚده 11خٚیلیأن ویریزٚد، خوشأنَ نبی دؤخأنده و خٚیلیأنَ گومرأ کونٚده. 12گونأ اَندر پٚخشَ به کی خٚیلیأن محبتٚ جَا سردَ بٚده. 13ولی هرکی تأ آخر، زحمتأنَ تحمول بوکونه، نیجأت یأفه.
14«آخرپٚسی وختی اینجیل خورومٚ خٚوٚر تومأمٚ دونیأ آدمأنٚ گوش فأرٚسِه و همه اونی جَا وأخٚوٚرَ بوستٚد، بأزین دونیأ تومأنَ به.
15«پس وختی "ویرأنگرٚ مکروهَ" #24:15 دانیالٚ ۲۷:۹، ۳۱:۱۱و ۱۱:۱۲فأندٚرید بیدینید کی موقدسٚ جیگأ دورون بٚپأ بدأشته بوبوسته (اونی کی خأنِه توجه بوکونه) 16بأزین اوشأنی کی یوهودیه دورون ایسأده، او دؤرٚوٚر تپه‌یأنٚ ور فرأر بوکوند، 17و اوشأنی کی پوشتٚ بأمٚ جؤر ایسأده، فرأر موقع حتّا نٚشٚد خأنه دورون کی ایچی اوسأنٚد؛ 18و هطویی اوشأنی کی کیشأورزی زیمینٚ دورون ایسأده، لیوأس اوسأدٚنٚ رِه وأنگردٚد بٚخأنه.
19«وای بحألٚ او زنأکأنی کی او زمأتٚ دورون شکم بٚدأرٚد یا شیرخوره زأی بٚدأرٚد. 20دوعأ بوکونید کی شیمی فرأر کودن زمستأنٚ دورون یا شَبّأتٚ روجٚ دورون کی شهر دروأزه‌یأن دٚوٚستِیه، نٚبه. 21چون او روجأنٚ دورون مردوم چنأن موصیبتی رِه گریفتأر بٚده کی دونیأ سرگیفتنٚ زمأت تأ اَسه ایتفأق دنکفته و هیوختٚم دنکفِه.
22«رأس‌رأسِی، اگه او سختٚ روجأن کوتأ نوبوسته بی، هیچ اینسأنی جأن بٚدر نبردی؛ ولی خودا اینتخأب بوکوده‌یأنٚ خأطرٚ وأسی، او روجأن کوتأ وأبِه.
23«او روجأنٚ دورون اگه کسی شٚمٚره بٚگه، "بیدین، مسیح اَیَه ایسأ!" یا "بیدین، اویَه ایسأ!" بأوٚر نوکونید. 24چون جٚه اَجور مسیحیأن و دورُغی پیغمبرأن خٚیلی اَیٚده و حتّا عجیب و غریبٚ موجیزه‌یأنٚم انجأم دٚهٚده، جوری کی اگه بوبوستی بی حتّا خودا اینتخأب بوکوده‌یأنم جٚه رأ بٚدٚرَ کودیدی. 25بیدینید، من اَشأنَ جٚه پیش شٚمٚره بوگفتم.
26«پس اگه بأیٚد و شٚمٚره بٚگد کی مسیح بیأبأنٚ دورون دووأره ظوهور بوکوده، اوشأنٚ گبأنَ محل نوکونید؛ و اگه بٚگد اَمی ورجأ جیگأ بوخورده، بأوٚر نوکونید. 27چون هوطویی کی گؤرخأنه ایتأ لحظه دورون جٚه شرق تأ غربَ روشنٚ کونه، اینسأنٚ پٚسرٚ اَمؤنٚم هطویی به. 28هر جأ کی لأشه بمأنه، لاشخورأن اویَه جمَ بٚدأ!
مسیحٚ وأگردٚستن آخرٚ زمأتٚ دورون
29«دفأتن، او موصیبٚتأنٚ پٚسی، خورشید تأریکَ به، مأه دِه هیذره سو نٚزنه. ستأره‌یأن فٚوٚده و نیرویأنی کی زیمینَ خو جَا سٚر دأرٚده، بٚپٚرکٚش دکفده.
30«و آخرپٚسی اینسأنٚ پٚسرٚ اَمؤن، آسمأنٚ دورون ظأهیرَ به. بأزین مردوم دونیأ دورون اَ سٚر تأ او سٚر عزأ گیرده و اینسأنٚ پٚسرَ دینٚده کی آسمأنٚ اَبرأنٚ رو، پیله شوکو و قودرتٚ اَمرأ اَمؤن دٚرٚه. 31اون خو فٚرشتٚه‌یأنَ شیپورٚ بولندٚ صدا اَمرأ اوسه کونه کی خو اینتخأب بوکوده‌یأنَ، زیمین و آسمأنٚ کنأر گوشٚه جَا جمَ کونٚد.
32«اَسه اَنجیل دأرٚ جَا درس بیگیرید. هر وخت اونی خألأنٚ سٚر زٚپّه زٚنِه و ولگ اَوٚره، فأمیدی تاوستأن فأرٚسِئن دٚرٚه. 33هطویم وختی تومأمٚ اَ نیشأنه‌یأنَ بیدینید، بدأنید کی کأرٚ تومأنَ بوستن، فأرٚسِئن دٚرٚه.
34«رأس‌رأسِی شٚمٚره گم کی تأ اَ چیزأن ایتفأق دنکفه، اَ نسل جٚه بین نیشه.
35«آسمأن و زیمین جٚه بین شٚده، ولی می کلام هیوخت جٚه بین نیشه. 36ولی هیکس نأنِه کو روج و چی سأعتی دونیأ تومأنَ به، حتّا فٚرٚشته‌یأنم نأنٚده، خودا پٚسرم اونی جَا خٚوٚر نأرِه. فقد می پئر خودا اونَ دأنه. 37اینسأنٚ پٚسرٚ اَمؤنٚ وخت نوحٚ روجأنٚ مأنستَن به. 38قبلٚ توفأنٚ روجأن، پیشتر جٚه اَنکی نوح بشه کشتی دورون، مردوم عیش و نوش و میهمأنی و عروسی اَمرأ موشغول بود. 39او زمأت هیکس بأوٚر نوکودی کی رأس‌رأسِی توفأن اَیِه، ولی بیلأخره توفأن بأمؤ و اوشأنَ همّه خو اَمرأ ببرد. اینسأنٚ پٚسرٚ اَمؤنٚم هطو بِه. 40بأزون او دوتأ مردأکٚ جَا کی کیشأورزی زیمین سٚر کس‌کسٚ اَمرأ کأر کودن دٚرٚد، ایتأیَ بٚرٚده و اویتأ مأنه؛ 41دو تأ زنأی کی کس‌کسٚ ورجأ گندم سأبٚستٚن رِه موشغولٚد، ایتأیَ بٚرٚده و اویتأ مأنه. 42پس شومأنم آمأده بیبید چون نأنیدی شیمی خوداوند کو روجٚ رِه دووأره وأگرده.
43«اگه صأب خأنه بٚدأنستی بی کی چی زمأتی دوزد اَیِه، بیدأر ایسأیی و ولأشتی دوزد بشه اونی خأنه دورون. 44پس شومأنم آمأده بیبید، چونکی اینسأنٚ پٚسر او زمأت وأگرده کی کمتر اونی رأفأ ایسأییدی.
45«او وفادأر و دأنأ غولأم کسی ایسه کی اونی اربأب بتأنه اونَ خو خأنه البأقی غولأمأنٚ سرپرست چأکونه کی اوشأنی غذأیَ بموقع فأدَه. 46خوشبحألٚ اَجور غولأم کی وختی اونی اربأب وأگرده، اونَ خو وظیفه انجأم دئنٚ سٚر بیدینه. 47یقین بٚدأرید کی تومأمٚ خو مأل و مینألٚ سرپرستی‌یَ اونَ ایسپأره.
48«ولی اگه او غولأم شرور بٚبه و خو اَمرأ گومأن بوکونه کی "می اربأب هه زودیأنٚ رِه وأنگرده،" 49و خو همکأرأنَ اَذِت آزأر بوکونه و شرأب خورأن اَمرأ عیأشی رِه موشغول بٚبه، 50بأزون او روجٚ دورون کی رأفأ نئیسأ، اونی اربأب وأگرده 51و اونَ سینگینٚ موجأزأت کونه، ریأکأرأنٚ سرنیویشت گریفتأر کونه و تأوٚده او جیگأ کی گریه و نأله و گأز گأزَ سأبٚستٚن نٚهأ.
Nu geselecteerd:
متا 24: GLK_NT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 Transform Iran