متا 7
7
دیگرأنَ قیضأوت کودن
1«دیگرأنَ قیضأوت نوکونید، کی شٚمٚره قیضأوت نوکونٚد. 2چونکی هر جور دیگرأنَ قیضأوت بوکونید و اوشأنٚ رِه رأی بدید، هوطویی شٚمٚره قیضأوت به و هو میلاکٚ اَمرأ کی دیگرأنٚ قیضأوت کونید، شٚمٚره‌یٚم قیضأوت به. 3چٚره سوبیلَ تی برأرٚ چومٚ دورون دینی، ولی روبارخألَ تی چومٚ دورون نیدینی؟ 4چوطو جورأت کونی تی برأرَ بیگی: "وئأل سوبیلَ، تی چومٚ جَا بیرون بأوٚرٚم"، ولی خودتٚ چوم دورون روبارخأل دأری؟ 5اَی ریأکأر، اوّل روبارخألَ تی چومٚ جَا بیرون بأوٚر، بأزین تأنی بِیتر بیدینی و تأنی سوبیلَ تی برأرٚ چومٚ جَا بیرون بأوری.
6«اونچی کی موقدسه، سٚکأنَ فأندید، و شیمی مولواریدأنَ خوکأنٚ ور تأنوٚدید، چونکی اوشأن مولواریدأنَ لقد دٚمٚج کونٚده و وأگردٚده، شٚمٚره فوتورکٚده.
وأموجید کی بیأفید
7«بٚخأیید کی شٚمٚره فأدأ بٚبه، وأموجید کی بیأفید؛ بوکوبید کی در شیمی رو وأزَ به. 8چونکی هرکی بٚخأیٚه، بٚدٚس اَوٚره، و هر کی وأموجه، یأفٚه، و هرکی بوکوبٚه، در اونی رو وأزَ بِه. 9شومأن کویتأ اگه اونی زأی اونی جَا نأن بٚخأیٚه، اونَ سنگ فأده؟ 10یا اگه مائی بٚخأیٚه، اونَ لأنتی فأده؟ 11بأزین کی شومأن، گونأکأرٚ آدمأن، دأنید کی وأستی خورومٚ چیزأن شیمی زأکأنَ فأدید، چندر ویشتر شیمی آسمأنی پئر اوشأنی رِه کی اونی جَا بخأیٚد، خورومٚ چیزأن بخشه. 12پس مردومٚ اَمرأ هوطو رفتأر بوکونید کی خأییدی شیمی اَمرأ رفتأر بوکونٚد. اَن اصلٚ تورأت و پیغمبرأنٚ کیتأبأنه.
همیشٚکی زٚندیگی رأیَ بٚدٚس اَوٚردٚن
13«فقد او بأریکه دٚرٚ جَا دٚوأرٚستنٚ اَمرأ تأنید خودا ملکوتَ بٚدٚس بأوٚرید. رأیی کی هلأکَ بوستنٚ ور شِه خٚیلی پت و پأنه و پیله دروأزه دأره و خٚیلیأن ایسأیید کی اونَ اینتخأب کونٚده. 14ولی او دٚر کی همیشٚکی زٚندیگی رو وأزَ بِه، خٚیلی تنگه و اونی رأیٚم بأریک، و فقد ایتأ پیچه آدمأن اونی دورون رأ یأفده.
دأر و اونی مِیوه
15«شیمی حواس دورُغی پیغمبرأنَ بمأنه، اوشأن آرأمٚ گوسوٚندٚ لیوأسٚ دورون شیمی ور اَیٚده، ولی رأس‌رأسِی درنده گُرگٚدٚه. 16اوشأنَ تأنیدی اوشأنی مِیوه جَا بٚشنأسید، ینی اوشأنی کردکأرأنٚ جَا. آیا انگورَ شأ تٚمٚشٚ جَا یا اَنجیلَ وأشٚ جَا چِئن؟ 17خورومٚ دأر، خورومٚ مِیوه دِهه و نأجورٚ دأر، نأجورٚ مِیوه. 18خورومٚ دأر نتأنِه نأجورٚ مِیوه بأوٚره؛ نأجورٚ دأرم نتأنِه خورومٚ مِیوه بأوٚره. 19پس هرتأ دأر کی نأجورٚ مِیوه اَوٚره، وأوِه بِه، تأوٚدأ بٚده آتش دورونی. 20پس چی؟ هوطو کی دأرَ اونی مِیوه جَا شنأسٚده، شومأنم تأنیدی مردومَ اوشأنی کردکأرأنٚ جَا بٚشنأسید.
مسیحٚ رأس‌رأسِی شأگردأن
21«گومأن نوکونید هر کی مٚرَه "خوداوندا! خوداوندا!"دؤخأنه، آسمأنٚ ملکوتٚ دورون شِه. فقد اوشأنی بودورون شٚده کی می آسمأنی پئرٚ ایرأده‌یَ خوشأنی کردکأرأنٚ میأن انجأم دٚهٚده. 22دأوری روجٚ رِه، خٚیلیأن مٚرَه گده: "خوداوندا! خوداوندا! اَمأن تی نأمٚ اَمرأ نوبوّت بوکودیم و تی پیغأمَ مردومَ فأرٚسأنِییم، تی نأمٚ اَمرأ، دیوأنَ بیرونَ کودیم، و تی نأمٚ اَمرأ خٚیلی موجیزه انجأم بٚدأییم." 23ولی من بی‌رودروأسی جوأب دٚهٚم: "هیوخت شٚمٚره نٚشنأختیم. می جَا دورَ بید، اَی بدهکأرأن."»
قأیمٚ پأکأر
24«هرکی می آموجه‌یأنَ بشتأوه و اوشأنَ انجأم بٚده، عأقیلٚ آدمه. اون هو کسی‌یَ مأنه کی خو خأنٚه‌یَ ایتأ قأیم صخره رو چأکوده. 25هرچی وأرٚش بٚوأرٚست و سیل بأمؤ، و بأد و توفأن او خأنٚه رو بأمؤ، فوئونگوردٚستٚه، چونکی صخره رو چأکوده بوبوسته بو. 26ولی هرکی می آموجه‌یأنَ بشتأوه و اوشأنٚ جَا ایطأعت نوکونٚه، بی‌عقله. اون هو کسی‌یَ مأنه کی خو خأنٚه‌یَ فورشٚ سٚر چأکوده. 27وختی وأرٚش و سیل و بأد و توفأن اونی خأنٚه رو بأمؤ، ایجور فوگوردٚسته کی جٚه اون هیچی نمأنسته.»
28وختی عیسا اَ گبأنَ تومأنَ کود، مردوم اونی آموجه‌یأنَ جَا قأقَ بوستٚد، 29چونکی قوّت و ایقتدأرٚ اَمرأ اوشأنَ آمؤختأندوبو، نه یوهودٚ دینٚ عألیمأنٚ مأنستَن.
Nu geselecteerd:
متا 7: GLK_NT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 Transform Iran