متا 8
8
ایتأ جوذأمی شفأ گیفتن
1عیسا جٚه تپّه جؤر بیجیر اَمؤندوبو کی، خٚیلیأن اونی دونبألسر رأ دکفتٚده. 2ایوأر کی ایتأ جوذأمی مردأی اونَ نیزدیکَ بو و اونی ورجأ زانو بٚزِه و بوگفته: «اَی آقأ، اگه بٚخأیی، تأنی مٚرَه شفأ بٚدی، پأکَ کونی.»
3عیسا خو دٚسٚ رأستَ گیفتٚه اونی سٚر بٚنأ و بٚفرمأسته: «پس چی کی خأیم؛ شفأ بیگیر!» هو وخت، اونی جوذأم جٚه بین بوشؤ!
4بأزین عیسا اونَ بٚفرمأسته: «تی حواس بمأنه هیکسٚ اَمرأ اَ ایتفأق گبَ نٚوأزئن؛ بلکی کأهینٚ ورجأ بوشؤ کی تٚرَه موعاینه بوکونه، و او پیشکشی‌یَ کی موسا شفأ بیأفته جوذأمیأنٚ رِه تعیین بوکوده، تی اَمرأ ببر کی همه کسٚ رِه ثأبیت بٚبه کی شفأ بیأفتی.»
رومی افسرٚ ایمأن
5وختی عیسا بوشؤ کفرناحومٚ شهر، ایتأ رومی افسر اونی ورجأ بأمؤ و مینّت خأهیشٚ اَمرأ اونَ بوگفته: 6«آقأ جأن، می جوأنٚ خیدمتکأر فٚلجَ بو، خو جأ دورون خوفته، دردٚ جَا پیچ وأپیچ خوره».
7عیسا اونَ بوگفته: «من اَیٚم اونَ شفأ دٚهٚم.»
8ولی او افسر جوأبٚ رِه عرض بوکود: «آقأ جأن، من لیأقت نأرٚم کی می خأنٚه بأیی. جٚه هأیَه فقد ایچی بوگو کی می خیدمتکأر شفأ یأفٚه. 9من اَنَ دأنٚم، چونکی خودم می بوجؤر دٚسأنٚ جَا فرمأن گیرم، و خودمم می دٚسٚ جیر سروأز دأرم. کأفیه اینفرَ بٚگم "بوشو"، شِه، اویتأیَ بٚگم "بیأ"، اَیِه؛ یا اگه می اَمر‌برَ بٚگم "فٚلأن کأرٚ بوکون"، انجأم دِهه.»
10عیسا اَ گبأنٚ ایشتأوٚستٚنٚ اَمرأ، قأقَ بوسته! بأزین وأگردسته اوشأنی ور کی اونی دونبأل اَمؤندوبود، بوگفته: «آمین شٚمٚره گم کی اَجور ایمأن حتّا ایسرأییلٚ دورونم نیدِم. 11اَنَ شٚمٚره بٚگم کی خٚیلیأن جٚه دونیأ همه جأ، جٚه شرق و غرب اَیٚده، ایبرأهیم و ایسحأق و یعقوبٚ اَمرأ، آسمأنٚ ملکوتٚ میهمأنی دورون نیشینٚده؛ 12ولی خٚیلی جٚه یوهودیأن، کی ملکوت اوشأنٚ رِه آمأده بو، بیرون تأریکی دورون تأوٚدأ بٚده، اَ جأیی کی اونی دورون گریه نٚهأ و دندأن دندأنٚ سٚر سأبٚده.»
13بأزین وأگردسته رومی افسرَ بوگفته: «وأگرد بٚخأنه. تی ایمأنٚ موطأبٚق انجأم بوبوسته.» اونی جوأنٚ خیدمتکأر هو دٚقّه دورون شفأ بیأفته بو!
جوروأجورٚ مریضأنَ شفأ دئن
14وختی کی عیسا فأرٚسٚه پطرسٚ خأنه، بیدِه کی اونی زن مأر تب بوکوده و جیگأ دورون خوفته. 15ولی وختی عیسا اونی دٚسَ لمس بوکوده، اونی تب بئیسأ. بأزین اون ویریشت و عیسا جَا پذیرأیی کودنٚ موشغولَ بوسته.
16غروب دٚمٚ رِه، مردوم، ایتأ عألمه آزأریأنَ بأوٚردٚد عیسا ورجأ، اون فقد ای کلمه گفتن اَمرأ، پٚلیدٚ روحأنَ اوشأنی وجودٚ جَا بیرونَ کوده و مریضأنَ همّه شفأ بٚدأ. 17اَطویی، خودا کلامٚ کی اشعیای نبی بوگفته بو، انجأم بوبوسته کی بوگفته بو: «اون اَمی ضعفأنَ اوسأده و اَمی مٚرٚضأنَ حمل بوکوده.»#۸:۱۷اشعیا ۴:۵۳
عیسا جَا پیروی کودنٚ قدر و قیمت
18وختی عیسا بیدِه ایتأ پیله جِمئیت اونی ورجأ جمَ بوستأندٚرد، خو شأگردأنَ بٚفرمأسته: «بیشیم دریأچه او طرف.»
19هو دٚقّه، ایتأ جٚه یوهودٚ دینٚ عألیمأن بأمؤ اونی ورجأ و بوگفته: «اوستأد، هر جأ بیشی، تی جَا ایطأعت کونم.»
20ولی عیسا اونَ بوگفته: «شألأن خوشأنٚ رِه لأنه دأرٚده و پرنده‌یأنم، فک؛ ولی اینسأنٚ پٚسر#۸:۲۰«اینسأنٚ پٚسر» لقبی ایسه کی عیسا خؤرَه بٚکأر بٚره. جأیی نأرِه کی حتّا خو سٚرَ اونٚ رو بٚنه.»
21ایتأ ده شأگردأن اونَ بوگفته: «آقأ جأن، وئأل اوّل وأگردم بٚخأنه و می پئرٚ بیگیلَ کونم.»
22ولی عیسا اونَ بوگفته: «می دونبأل بیأ، و وئأل بٚمٚرده‌یأن، خوشأنی موردٚه‌یأنَ بیگیلَ کونٚد.»
دریأ توفأنٚ آرأمَ کودن
23بأزین عیسا لوتکأیَ سوأرَ بوسته و شأگردأنم اونی دونبأل بوشؤده. 24ایوأر کی دریأچه دورون ایتأ پیله توفأن رأ دکفت، جوری کی پور بأقی نوبو لوتکأ غرقَ به. ولی عیسا خوفته بو. 25شأگردأن اونَ نیزدیکَ بوستٚد و بیدأرَ کودٚد، ایجگره اَمرأ بوگفتد: «اوستأد، اَمی دأد فأرٚس؛ پور بأقی نییٚه غرقَ بیم!»
26عیسا جوأب بٚدأ:«اَی کم ایمأنأن! چٚره اَطو وأشٚت بوکودیدی؟» بأزین ویریشت و بأد و دریأ کوئلأنَ نهیب بٚزِه، و همه چی آرأمَ بوست.
27شأگردأن کی قأقَ بوسته بود، کس‌کسَ بوگفتٚده: «اَن دِه چجور آدمی ایسه کی حتّا بأد و دریأ کؤلم اونی جَا فرمأن بٚرٚده!»
دوتأ دیو بٚزِه مردأکٚ شفأ
28وختی عیسا دریأچه او طرف، جَدَریأنٚ شرأ فأرٚسٚه، دوتأ آزأری مردأی بأمؤیید اونی جولو. او دوتأ، قبرستأنی دورون زٚندیگی کودید و اَنقذر خشٚن و وأشی بود کی هیکس جورأت نأشتی او سأمأنٚ رأ دٚوأره. 29اوشأن ایجگره بٚکشِئده: «اَی خودا پٚسر، اَمی اَمرأ چیکأر دأری؟ بأمؤیی کی پیشتر جٚه او زمأت کی خودا تعیین بوکوده، اَمٚرَه عذأب بٚدی؟»
30جٚه او رأ، ایپچه اوشتٚر ایتأ خوکٚ گلّه چٚرٚستٚندوبو. 31بأزین او پٚلیدٚ روحأن عیسایَ خأهیشٚ اَمرأ بوگفتد: «اگه خأیی اَمٚرَه بیرونَ کونی، اَمٚرَه اوسه کون او خوکأنٚ گلّه دورون.»
32عیسا اوشأنَ بوگفته: «خٚیله خُب، بیشید.» پٚلیدٚ روحأن او دوتأ مٚردأکٚ وجودٚ جَا بیرون بأمؤده و بوشؤد او خوکأنٚ دورون. ایوأرکی تومأمٚ گلّه، تپّه سٚرأجیری رأ دریأچه دورون دکفتٚده و خٚفَه بوستٚد. 33خوکبأنأن تأخت بٚزِده و فرأر بوکودٚد، بوشؤده شهر و همه کسٚ رِه بوگفتد کی او دوتأ آزأری رِه چی ایتفأق دکفته. 34هنٚ وأسی، تومأمٚ شهرٚ اَهألیأن بیرون فووُستٚد کی عیسایٚ بیدینٚد، و وختی اونَ بیدِده. اونی جَا خأهیش مینّت بوکودٚد کی جٚه اویَه بشه و اوشأنَ بٚخوشأنٚ حأل وأبٚده.
Nu geselecteerd:
متا 8: GLK_NT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 Transform Iran