JOHANA 7
7
Isua a unauten an ring lo
1Chumi zawhah chuan Isuan Galili ram a fang a; Juda-ten amah thah an tum avângin Judai ram chu a fang duh lo va ni.
2Juda-te Bâwkte Kût#7:2 Thlalêra an awm lai hriat rengna kût, chhâwlbûkah an awm ṭhîn. chu a hnai tawh a. #Lev. 23:34; Deut. 16:13,16. 3Isua unaute chuan a hnênah, “He hmun hi chhuahsan la, Judai ramah kal rawh, i zirtîrten i thiltih hi an hmuh theih nân. 4Tu man hmingthan duh siin a rûkin thil an ti ngai lo. Hêng thil hi i tih rau rau chuan khawvêl hmuhah intârlang rawh,” an ti a. 5A unaute pawh chuan amah an ring si lo.
6Isuan an hnênah, “Ka hun a la thleng lo, nangni hun erawh chu eng lai pawhin a thleng reng a ni. #Mt. 26:28; Jn. 2:4; 7:30. 7Khawvêlin a haw thei lo che u, kei erawh chu mi hua a ni, an thiltihte a ṭha lo tih ka hriattîr ṭhîn avângin. #Jn. 15:18-21. 8Kûtah chuan han kal rawh u. Kei chu tûnah chuan, Kûtah hian ka han kal rih#7:8 Mss ṭhenkhatah, ‘Ka kal dâwn lo,’ tih a ni. lo vang; ka hun a la thlen loh avângin,” a ti a.
9Chutiang chuan a sawi a, Galili ramah chuan a awm ta zêl a.
Isua Bâwkte kûtah
10A unaute Kût hmang tûra an chhoh tâk hnu chuan ani pawh chu langsâr lovin, a rûkin a han chho ve a. 11Juda-ten Kût lai chuan amah an zawng a, “Khawiah nge a awm?” an ti a. 12Mipui chuan a chungchâng thu an sawi sup sup a. Ṭhenkhatin, “Mi ṭha a ni,” an ti a, a ṭhenin, “Ni lo ve, mipui a hruai sual zâwk a ni,” an ti a. 13Juda-te an hlauh avângin a lang erawh chuan tu man a chungchâng an sawi lo. #Jn. 19:38; 20:19.
14Kût vânglai tak chuan Isua tempulah a chho va, a zirtîr ta a. 15Juda-te chuan, “He mi hian zir si lovin engtin nge lehkha a thiam?” an ti a, mak an ti hle a.
16Isuan anni chu a chhâng a, “Ka thu zirtîr hi keima zirtîrna a ni lo va, mi tîrtu zirtîrna a ni zâwk. 17Tu pawh Pathian duhzâwng tih duh chuan, ka thu zirtîr hi Pathian hnên ata nge keima phuahchawp tih an hre mai ang. 18Mahni phuahchawp thu sawitu chuan mahni ropuina a zawng a ni. Mahni tîrtu ropuina zawngtu erawh chu a rinawm a, amahah dik lohna rêng rêng a awm lo. 19Mosian, Dân chu a pe lo che u em ni? Nimahsela, in zînga tu mahin Dân chu in zâwm si lo. Engati nge mi thah in tum?” a ti a.
20Mipui chuan an chhâng a, “Ramhuai i zâwl a nih hi; tuin nge thah tum che?” an ti a. #Mt. 11:18; Mk. 3:22; Jn. 8:48; 10:20. 21Isuan anni chu a chhâng a, “Thil pakhat ka ti a, in za-in mak in ti a. 22Mosian serh tan thu a pêk che u avângin (Mosia tihchhuah a ni lo va, in thlahtute tihchhuah a nih zâwk kha,) sabat ni pawhin serh in tan ṭhîn.#Gen. 17:10; 21:4; Lev. 12:3. 23Mosia Dân bawhchhiat loh nân sabat ni pawha serh tan a nih chuan, engah nge sabat nia mi ka tihdam tâk avânga ka chunga in thinur bîk? #Jn. 5:9. 24Pâwn lam lan dân ngawt enin thu peih mai suh u; a nih dân dik tak enin rêl zâwk rawh u,” a ti a. #Isa. 11:3; Zak. 7:9.
He mi hi Krista em ni?
25Jerusalem-a mi ṭhenkhatte chuan, “He mi hi thah an tum chu a ni lâwm ni? 26En teh u, vântlâng hriatin thu a sawi a, tu mahin an kalh si lo. Hotute hian amah hi Krista chu ni ngeiin an hre ta tihna em ni ang? 27He mi hi khawia mi nge a nih kan hre si a; Krista chu a lo kal hun chuan khawia mi nge a nih tu man an hre dâwn si lo,” an ti a. #Jn. 6:42; 7:41; 9:29.
28Isuan chutia Tempula a zirtîr lai chuan aw ring takin, “Kei mi hria a, khawia mi nge ka nih pawh in hria e. Nimahsela, mahni thu-a lo kal ka ni lo. Mi tîrtu erawh chu mi dik tak a ni, ani chu in hre lo. 29Kei chuan ka hria, mi tîr a, a hnên aṭanga lo kal ka nih avângin,” a ti a. 30Tichuan, man an tum a, nimahsela, a hun a la thlen loh avângin tu man an khawih lo. #Jn. 7:44; 8:20; 10:39; Mk. 12:12. 31Mipui zînga mi tam takin amah an ring a, “Krista a lo kal hunah he mi tih aia tam zâwk chhinchhiahna thil mak a rawn ti dâwn chuang em ni?” an ti a.
Isua man tûrin vêngtute an tîr
32Farisai-te chuan a chungchâng mipuiin an sawi rûk sup sup chu an hria a, puithiam lalte leh Farisai-te chuan Isua man tûrin vêngtute an tîr ta a. 33Tichuan, Isuan, “Rei lo tê in hnênah ka la awm rih ang a, chumi hnu chuan mi tîrtu hnênah ka kal ang. 34Nangnin mi zawng ang a, mi hmu lo vang, ka awmna tûrah chuan in kal thei dâwn si lo va,” a ti a. 35Juda-te chuan, “Khawiah nge maw kal a tuma, kan hmuh theih dâwn loh chu le? Grik-ho zînga Juda awm darhte hnêna kala, Grik-hote zirtîr a tum em ni ang le? #Jak. 1:1; 1 Pet. 1:1. 36‘Mi zawng ang a, mi hmu lo vang, ka awmna tûrah chuan in kal thei dâwn si lo va,’ a tih te hi eng tihna nge ni ang?” an inti hlawm a.
Tui nung luite
37Kût ni hnuhnûng ber, ni ropui berah chuan Isua a ding a, aw ring takin a au va, “Tuihâl apiang chu ka hnênah lo kal sela,#7:37 ‘mi ring chuan in rawh se,’ tih theih. in rawh se. #Lev. 23:36. 38Lehkha Thu-in a sawi angin, tu pawh kei mi ring chu a kawchhûng aṭangin tui nung luite a lo chhuak ang,” a ti a. #Isa. 44:3; 55:1—58:11; Ezek. 47:1; Zak. 14:8.
39Chu chu amah ringtuten Thlarau an la chan tûr thu a sawina a ni; Isua chawimawia a la awm rih loh avângin Thlarau chu pêk a la ni rih lo va ni.
Mipui zînga inṭhenna
40Mipui zînga ṭhenkhatin chûng thute chu an hriat chuan, “He mi hi zâwlnei chu a ni ngei mai,” an ti a. 41Mi dangin, “Krista chu a ni,” an ti a. Ṭhenkhat erawh chuan, “Krista chu Galili ram aṭangin a lo kal ang maw? 42‘Krista chu Davida thlah, Davida awmna khua Bethlehem-a lo piang tûr a ni,’ Lehkha Thu-in a ti a ni lâwm ni?” an ti a. #2 Samu. 7:12; Mik. 5:2. 43Tichuan, amah avângin mipui zîngah inṭhenna a lo awm ta a. 44An zînga ṭhenkhatin amah man an duh a; nimahsela, tu man an khawih lo. #Jn. 7:30; 10:39.
Juda hotute rin lohna
45Vêngtu sipaite chu puithiam lalte leh Farisai-te hnênah chuan an kîr leh a, anni chuan, “Engati nge in rawn hruai loh?” an lo ti a. 46Vêngtu sipaite chuan an chhâng a, “He mi sawi ang hian tu man thu an la sawi ngai lo,” an ti a. 47Farisai-te chuan an chhâng a, “Nangni pawh a lo bum ve che u elo? 48Hotute leh Farisai-te zînga pakhat mahin amah an ring lo tih in hre na nge? 49Hêng mipui Dân hre loho hi ânchhe dawng an ni e,” an ti a. 50An zînga pakhat, Nikodema, Isua hnêna kal tawh khân, an hnênah, #Jn. 3:1,2; 19:39. 51“Kan Dân ang chuan mi a thiamthu sawitîra, eng nge a tih hriat chian hma chuan thiam loh chantîr mai loh tûr a ni lâwm ni?” a ti a.#Deut. 17:6. 52Ani chu an chhâng a, “Nang pawh Galili mi i ni ve elo maw? Lehkha Thu ngun takin chhiar la, Galili ram aṭangin zâwlnei an chhuak ngai lo tih i hre mai ang,” an ti a.
Hmeichhe uire lai man
53Tichuan, mi tin mahni inah an haw ta ṭheuh va.
Markert nå:
JOHANA 7: MIZCLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
