JENESIS 18
18
Ka jingkular ban ai khun shynrang ïa u Abraham
1U Trai u la mihpaw ha u Abraham harud ki dieng kyntang jong u Mamre. Katba u Abraham u dang shong ha ka jingkhang ka ïingjaiñ jong u ha ka por ba dang shit kyr-ang mynsngi, u la khmied bad u la ïohi lai ngut ki rangbah kiba ïeng hangta. 2#Heb. 13:2Tang mar shu ïohi ïa ki, u mareh ban leit ïashem ïa ki. Da kaba u nguh ngon haduh khyndew, u ong, 3“Ko rangbah, sngewbha wat ïaid lait na ka ïing jong nga khlem da wan rung; nga don hangne ban shakri ïa phi. 4Shah ngan wanrah khyndiat ka um ba phin ïoh sait ïa ki kjat jong phi; phi lah ban shong jahthait ha trai jong une u dieng. 5Ngan wanrah ruh khyndiat ka jingbam; kan ai bor ïa phi katba phi nang bteng ïa ka jingïaid lynti jong phi. Phi la pyndonburom ïa nga haba phi wan rung ha ïing jong nga, kumta shah ngan shakri ïa phi.”
Ki jubab, “Khublei shibun; ngi pdiang sngewbha ïa kata.”
6Te u Abraham u leit rung kyrkieh sha la ka ïingjaiñ bad u ong ha ka Sarah, “Kloi kloi, shim shi byrni u 'purew uba ni, khleh bad sa shet kpu.” 7Nangta u mareh sha ka kynhun jingri, u shim uwei u khun masi uba dang lung bad uba dap doh, bad u ai ha u shakri, uba pynstet ban leit shet. 8U shim katto katne ka malai, ka dud, bad ka doh, bad u buh ïa kita ki jingbam ha khmat jong kita ki rangbah. Hangta ha trai u dieng u la pynbiang ïa ki da lade hi, bad ki la ïabam.
9Nangta ki ïakylli ïa u, “Ha-ei ka Sarah ka tnga jong me?”
U jubab, “Ka don hapoh ka ïingjaiñ.”
10 #
Rom. 9:9
Uwei na ki u ong, “Ngan sa wan biang sha me hadien khyndai bnai, bad ka Sarah ka tnga jong me kan sa ïoh khun shynrang.”
Ka Sarah kaba ïeng hadien jong u ha ka jingkhang ka ïingjaiñ, ka pynshahshkor. 11U Abraham bad ka Sarah ki la tymmen bha, bad ka Sarah ruh ka la palat ïa ka por ban dang ïoh khun. 12#1 Pet. 3:6Kumta ka Sarah ka rkhie sammut marwei, bad ka ong, “Mynta ba nga la tymmen bad ngam donbor shuh, ngan dang lah mo ban ïoh ïa ka jingsngewbha? Nalor kata, u tnga jong nga ruh u la tymmen.”
13Kumta U Trai u ong ha u Abraham, “Balei ka Sarah ka rkhie bad ong, ‘Hato ngan dang ïoh khun shisha haba nga la tymmen?’ 14#Luk. 1:37Hato don kaei kaei kaba eh ïa U Trai? Kumba nga la ong, ngan sa wan biang hadien khyndai bnai, bad ka Sarah kan sa ïoh khun shynrang.”
15Namar ba ka Sarah ka la sheptieng, ka la len ïa kata. Ka da ong, “Ngam shym rkhie.” U phai ktien, “Ho-oid, pha la leh kumta, pha la rkhie.”
U Abraham u ïasaid na ka bynta ka Sodom
16Te kita ki briew ki ïamihnoh nangta, bad ki leit sha ka jaka na kaba ki lah ban ïohi ïa ka Sodom; bad u Abraham u leit on lynti ïa ki. 17Bad U Trai u ong ha lade, “Ngan nym buhrieh na u Abraham ïa kaei kaba ngan sa leh. 18Ki khun ki ksiew jong u kin long ka jaitbynriew kaba khraw bad kaba donbor, bad da u ngan kyrkhu ïa ki jaitbynriew baroh. 19Nga la jied ïa u khnang ba un hukum ïa la ki khun shynrang bad ïa ki khun ki ksiew jong u ba kin kohnguh ïa nga bad ban leh ïa kata kaba dei bad kaba hok. Lada ki leh kumta, ngan leh lut ïa kata kaba nga la kular ha u.”
20Te U Trai u ong ha u Abraham, “Ki don ki jingkynnoh pyrshah kiba jur ïa ka Sodom bad ka Gomorrah, bad ka pop jong ki ka long kaba khraw katta katta. 21Ngan da leit hiar ban shem la kita ki jingkynnoh ïa kiba nga la ïohsngew ki long ne em kiba shisha.”
22Te kita ki ar ngut ki rangbah ki la mihnoh nangta, bad ki la nang leit shaphang Sodom; hynrei U Trai u dang don bad u Abraham. 23U Abraham u wan hajan U Trai, bad u kylli, “Hato men shu pynjot noh ïa kiba hok ruh ryngkat bad ki bymman? 24Lada ki don sanphew ngut kiba hok ha kata ka nongbah, hato men pynjot noh ïa ka nongbah baroh kawei? Men ym pyllait ïa ka ba ki sanphew ngut kin lait im? 25Da shisha men ym pynïap ïa kiba hok ryngkat bad ki bymman. Kata ka bym lah ban long. Mem lah ban leh kumta. Lada me leh kumta, kiba hok kin shah pynshitom ryngkat bad ki bymman. Kata ka bym lah ban long. U nongbishar jong ka pyrthei baroh u dei ban lehhok.”
26U Trai u jubab, “Lada nga shem sanphew ngut kiba hok ha Sodom, ngan pyllait ïa kata ka nongbah baroh kawei na ka bynta jong ki.”
27U Abraham u kren biang, “To map, ko Trai ïa ka jingshlur bieit jong nga ban kren ha me. Nga long tang u briew bad ngam don hok ban ong ei ei. 28Hynrei, lehse don sawphew san ngut ha ka jaka sanphew ngut kiba hok. Hato men pynjot noh ïa ka nongbah baroh kawei namar ba duna san ngut?”
U Trai u ong, “Ngan ym pynjot noh ïa ka lada nga shem sawphew san ngut kiba hok.”
29U Abraham u kren biang, “Lehse yn don pat tang sawphew ngut?”
U ruh u jubab, “Ngan ym pynjot ïa ka lada don sawphew ngut.”
30U Abraham u ong, “A Trai, wat bitar ba ngan kren biang. Kumno lada don tang laiphew ngut?”
U ong, “Ngan ym leh ei ei ïa ka lada nga shem laiphew ngut hangta.”
31U Abraham u ong, “To map ko Trai ïa ka jingshlur bieit jong nga ban kren ha me. Tharai don tang arphew ngut hangta?”
U jubab, “Ngan ym pynjot ïa ka nongbah lada nga shem arphew ngut.”
32U Abraham u ong, “Sngewbha wat bitar, A Trai, bad ngan kren biang sa tang shisien. Kumno lada don tang shiphew ngut hangta?”
U jubab, “Ngan ym pynjot ïa ka lada don shiphew ngut.” 33Hadien ba u la dep ïakren bad u Abraham, U Trai u la leit noh, bad u Abraham u leit phai sha la ïing.
Markert nå:
JENESIS 18: KHACLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Khasi CL Bible
Copyright © Bible Society of India, 2016.
Used by permission. All rights reserved worldwide.