JENESIS 19
19
Ka jingbymman jong ka Sodom
1Haba kita ki ar ngut ki angel ki la poi ha Sodom ha ka por janmiet, u Lot u dang shong ha ka khyrdop jong ka nongbah. Haba u tang shu ïohi ïa ki, u ïeng joit ban leit ïashem ïa ki. 2U dem ngon ha khmat jong ki, bad u ong, “Ko rangbah, nga don hangne ban shakri ïa phi. Sngewbha wan sha ïing jong nga. Phi lah ban sait ïa la ki kjat, bad ban sahmiet ruh. Lashai phi lah ban khie dang step, bad bteng ïa la ka jingleit.”
Hynrei ki jubab, “Em, ngin sahmiet hangne ha ka jaka bakylluid jong ka nongbah.”
3U ïai kyrpad jur ïa ki, bad khatduh ki la leit ryngkat bad u sha ka ïing jong u. U Lot u la hukum ïa la ki shakri ban shet kpu bad ban pynkhreh ïa ka bam kaba bang na ka bynta kine kiba shah khot sngewbha. Haba la dep khreh, ki la ïabam ruh.
4Ha shuwa ba ki nongshahkhot sngewbha kin leit thiah noh, ki shynrang jong ka Sodom ki la kerkut ïa ka ïing. Baroh ki shynrang jong kata ka nongbah, bad samla bad tymmen, ki la ïadon hangta. 5#Nbshr. 19:22-24Ki pyrta ïa u Lot bad kylli ïa u, “Hangno kito ki rangbah kiba wan sah bad me ha kane ka miet? Pynmih ïa ki shabar!” Ki shynrang jong ka Sodom ki kwah ban ïathiah shongkha bad ki.
6U Lot u mih shabar, u da khang tdam ïa ka jingkhang. 7U ong ïa ki, “Paralok, nga kyrpad ïa phi, wat leh ïa kaba kum kane ka kam kaba sniew! 8Khmih shane, nga don ar ngut ki khun kynthei kiba dang sotti. Shah ngan wallam ïa ki sha phi, bad phi lah ban leh ïa ki katba phi mon. Hynrei wat leh ei ei ïa kine ki rangbah; ki dei kiba nga la khot sngewbha sha ka ïing jong nga, bad nga dei ban ïada ïa ki.”
9Hynrei ki ong, “Kynriah sharud, me u nongwei shi sngi! Me dei uei ba men batai ïa ngi kaei ba ngi dei ban leh? Kynriah sharud, ïoh ba ngin pynshitom ïa me kham palat ban ïa ki.” Ki khynñiat shadien ïa u Lot bad ki tur sha khmat ban pynpait ïa ka jingkhang. 10Hynrei kita ki ar ngut ki rangbah kiba don hapoh ki la mih shabar, ki la ring ïa u Lot shapoh ïing, bad ki khang ïa ka jingkhang. 11#2 Syiem. 6:18Nangta ki la shoh pynmatlah ïa kita ki shynrang baroh kiba don habar khnang ba kin ym shem ïa ka jingkhang.
U Lot u mihnoh na Sodom
12Kita ki ar ngut ki rangbah ki ong ha u Lot, “Lada me dang don shuh kino kino hangne — ki khun shynrang, ki khun kynthei, ki pyrsa kurim shynrang, ne kino kino ki ba-ha-ïing ha-sem kiba shong basah ha kane ka nongbah — ïalam noh ïa ki na kane ka jaka, namar ngin sa pynjot ïa kane ka jaka. 13U Trai u la ïohsngew ïa ka jingkynnoh pyrshah kaba jur ïa kine ki briew bad u la phah ba ngin pynjot thiaw ïa ka Sodom.”
14Nangta u Lot u la leit sha ki rangbah kiba la ïatehktien bad ki khun kynthei jong u, bad u ong, “To pynkloi bad mihnoh nangne; naba U Trai un sa pynjot thiaw ïa kane ka jaka.” Hynrei ki pyrkhat ba u shu kren biria.
15Dang step phyrngab, kita ki angel ki la pynkyrkieh ïa u Lot. “Pynkloi!” ki ong. “Ïalam ïa la ka tnga bad ïa ki ar ngut ki khun kynthei jong me bad phet noh, ba men ym duh la ka jingim haba yn pynjot ïa kane ka nongbah.” 16#2 Pet. 2:7U Lot u leh tud pynban. Hynrei U Trai u la leh-isynei ïa u; kumta kita ki rangbah ki shim ïa u, ïa ka tnga jong u, bad ïa ki ar ngut ki khun kynthei jong u na ka kti bad ki la ïalam noh ïa ki shabar kata ka nongbah. 17Uwei na kita ki angel u ong, “Phet ïap noh! Wat kyrtiang dien bad wat sangeh ha ka them. Phet ïap sha ki lum, ba phin ym shah pynïap.”
18Hynrei u Lot u jubab, “Em, sngewbha wat pynbor ba ngin leh kumta. 19Phi la lehsbun shikatdei eh bad phi la pyllait im ïa nga. Hynrei ki lum ki jngai palat ïa nga; ka jingjynjar kan lap ïa nga, bad nga lah ban ïap noh shuwa ban poi shata. 20Phi ïohi ïa katai ka nongrit? Katai te ka kham jan. Shah ngan leit shata — phi ïohi ïa ka ba ka long tang ka nongrit — bad ngan ïohlait im.”
21U jubab, “Kata ruh ka biang hi. Ngan nym pynjot ïa kata ka nongrit. 22Pynkloi! mareh! ngan ym lah ban leh ei ei tad haduh ba men da poi hangta.”
Namar ba u Lot u khot ïa ka kaba rit, ïa kata ka nongrit la ai kyrteng ka Soar.
Ka jingpynjot ïa ka Sodom bad ka Gomorrah
23Hamar ba mih ka sngi, u Lot u la poi ha Soar. 24#Mat. 10:15; 11:23,24; Luk. 10:12; 17:29; 2 Pet. 2:6; Jud. 1:7Mar kumta hi, U Trai u pynhap ïa u kyndok ding ha ki nongbah Sodom bad Gomorrah, 25bad u la pynjot thiaw ïa ki bad ïa kata ka them baroh kawei lem bad ïa ki briew baroh hangta, bad ïa kiei kiei baroh kiba mih ha ka khyndew. 26#Luk. 17:32Hynrei ka tnga u Lot ka la phai dien bad ka la kylla long u païa mluh.
27Dang step phyrngab ha ka sngi kaba bud, u Abraham u leit bran bran sha kata ka jaka ha kaba u la ïeng ha khmat U Trai. 28U khmih shaphang Sodom bad Gomorrah, bad ïa kata ka them baroh kawei bad u la ïohi ïa ka tdem kaba mih na khyndew, kum ka tdem na ka lawar ding kaba heh bha. 29Hynrei haba U Blei u la pynjot ïa ki nongbah jong kata ka them ha kaba u Lot u shong shnong, u la buh jingkynmaw ïa u Abraham, bad u la ailad ïa u Lot ban lait im.
Ka thymmei jong ki Moab bad ki Ammon
30Namar ba u Lot u sheptieng ban sah ha Soar, ma u lem bad ki ar ngut ki khun kynthei jong u ki la kynriah sha ki lum, bad ki ïashong ïasah ha kawei ka krem. 31Ka khun nyngkong ka ong ha la ka para, “I pa jong ngi i la tymmen, bad ym don shynrang ha ka pyrthei baroh kawei ki ban shongkurim ïa ngi ba ngin ïoh khun ïoh kti. 32Ale ngin ïapyndih buaid ïa i pa bad ngin ïathiah lang bad i, khnang ba ngin ïoh khun ïoh kti na i.” 33Ha kata ka miet ki la ai waiñ ïa la u kpa, bad kata ka khun nyngkong ka la ïathiah shongkha bad u. Hynrei u la buaid shaba palat kat haduh ba um tip ei ei shaphang kata.
34Ha ka sngi kaba bud kata ka khun nyngkong ka ong ha la ka para, “Hynne mynmiet nga la ïathiah bad i pa; mynta to ngin pynbuaid biang ïa i ha kane ka miet ruh, bad phi sa leit thiah lang bad i. Te ma ngi baroh ar ngut ngin ïoh khun mar iwei na la u kpa.” 35Kumta ki la pyndih buaid ïa la u kpa ha kata ka miet ruh, bad kata ka khun kaba ar ka leit ïathiah shongkha bad u. Ha kane ka kynti ruh u la buaid shaba palat kat haduh ba um tip ei ei shaphang kata. 36Kumta keiñ, baroh ar ngut ki khun kynthei jong u Lot ki la punkhun na u kpa la jong. 37Ka khun nyngkong ka la kha khun shynrang ïa uba ka jer kyrteng u Moab. U la long u kpa tymmen jong ki Moab haduh kine ki sngi. 38Ka khun kaba ar ruh ka la kha khun shynrang ïa uba ka jer kyrteng u Ben-ammi. U la long u kpa tymmen jong ki Ammon haduh kane ka sngi.
Markert nå:
JENESIS 19: KHACLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Khasi CL Bible
Copyright © Bible Society of India, 2016.
Used by permission. All rights reserved worldwide.