JENESIS 42
42
Ki hynmen shynrang jong u Joseph ki sha Ijipt ban thied kew
1Haba u Jakob u la tip ba don kew ha Ijipt, u ong ha la ki khun shynrang, “Balei phim ïaleh ei ei? 2#Ki Kam. 7:12Nga ïohsngew ba don kew ha Ijipt; khie leit thied kew nangta, ba ngin ym ïapthngan.” 3Kumta kita ki shiphew ngut ki hynmen shynrang ar kmie jong u Joseph ki la ïaleit sha Ijipt ban thied kew, 4hynrei u Jakob um shym phah ïa u Benjamin, u para trai jong u Joseph ba un leit lem bad ki, namar u sheptieng ïoh jia ei ei ïa u.
5Kumta kita ki khun shynrang jong u Jakob lem bad kiwei pat ruh ki la ïawan ban thied kew, namar ba la don ka 'nemsniew ha ri Kanaan. 6U Joseph kum u lat jong ka ri Ijipt u die kew ha ki briew kiba wan na kylleng ka pyrthei. Kumta ki hynmen shynrang jong u Joseph ki la ïawan bad nguh ngon ha khmat jong u, ki da pyndem la ki khmat sha khyndew. 7Haba u Joseph u la ïohi ïa la ki hynmen, bad u la ithuh ïa ki, hynrei u leh kum bym ithuh ïa ki, bad u kren khor ïa ki, “Phi kiba na-ei?”
“Ngi ïawan na ka ri Kanaan, ban thied jingbam,” ki jubab.
8Wat la u Joseph u la ithuh ïa la ki hynmen, ki pat kim shym la ithuh ïa u. 9#Jen. 37:5-10U la kynmaw ïa ki jingphohsniew ba u la phohsniew shaphang jong ki, bad u ong, “Phi dei ki nongsyntiat; phi ïawan ban khmih ha-ei ka ri jong ngi ka shong tlot.”
10“Em, kynrad,” ki jubab. “Ngi la ïawan kum ki mraw jong phi ban thied jingbam. 11Ngi baroh ngi ïalong shi para. Kynrad, ngim dei ki nongsyntiat, ngi dei ki briew ba shida.”
12U Joseph u ong ha ki, “Em! Phi la ïawan ban khmih ha-ei kane ka ri ka shong tlot.”
13Ki ong, “Kynrad, baroh ngi ïadon khat-ar ngut shi para, ki khun jong ujuh u briew ha ka ri Kanaan. Uwei u para u la ïap, bad uba khatduh u don mynta bad i pa.”
14“Ka long thik kumba nga la ong, phi dei ki nongsyntiat,” u Joseph u jubab. 15“Yn tynjuh ïa phi kumne: Nga smai ha ka kyrteng u syiem ba phin ym ïoh mihnoh na kane ka jaka lymda u para khatduh jong phi u wan shane. 16Uwei na phi un leit bad un wan ïalam ïa u. Ïa kiba sah na phi pat yn buh hapoh ka jingap phira tad haduh ba yn da lah ban pynshisha ïa kaei kaba phi ong. Lym kumta, katba u syiem u im, phi dei ki nongsyntiat.” 17Kumta u buh lang ïa ki ha byndi haduh lai sngi.
18Ha ka sngi kaba lai, u Joseph u ong ha ki, “Nga long u briew uba sheptieng Blei, kumta ngan pyllait im ïa phi ha kane ka kyndon: 19Ban pynshisha ba phi long ki briew kiba hok, uwei na phi un sah ha ka ïingbyndi ha kaba la set ïa phi, kiwei pat ki lah ban leit kit ïa u kew uba phi la thied sha ki ba-ha-ïing ha-sem jong phi kiba shahthngan. 20Nangta phi dei ban wan ïalam ïa u para khatduh jong phi sha nga. Kane kan pynshisha ba phi kren hok, bad ngan ym pynïap ïa phi.”
21Ki te ki ïakohnguh ban leh kumta, bad ki ïa-ong para ma ki, “Ho-oid, mynta ngi shah jynjar namar kaei kaba ngi la leh ïa la u jong u para. Ngi la ïohi haduh katno u khuslai mynba u kyrpad ba ngin ïarap ïa u, bad ngim shym la shahshkor. Dei namar kata ba ngi shah jynjar kumne mynta.”
22 #
Jen. 37:21,22 U Reuben u ong ha ki, “Ngam shym la ong ïa phi ban ym ktah kti ïa u para, hynrei phim shym shahshkor. Kumta ngi hap shahshitom kylla mynta namar kata ka jingïap jong u.” 23Kim shym tip ba u Joseph u sngewthuh aïu ki ong, namar ki ïakren bad u da ka jingïarap u nongbatai ktien. 24U Joseph u iehnoh ïa ki bad u sdang ban ïam. Haba u la lah ban kren biang, u la wan pat, u shim ïa u Simeon bad u phah teh ïa u ha khmat jong ki.
Ki hynmen shynrang jong u Joseph ki leit phai sha Kanaan
25U Joseph u la hukum ban pyndap ïa ki byrni jong ki hynmen shynrang jong u da u kew, bad ban thep biang ïa ki pisa jong uwei pa uwei ha ka byrni jong u, bad ban ai jingbam de ba kin ïoh bam ha lynti. Ïa kane la leh. 26Kita shi para ki la pynkit ïa u kew ba ki la thied ha ki kada jong ki, bad ki ïamihnoh nangta. 27Ha ka jaka ba ki ïasah miet, uwei na ki u plied ïa la ka byrni ban ai bam ïa ka kada jong u, bad u lap ïa ka pisa jong u ha khlieh eh ka byrni. 28“La pynphai pat ïa ki pisa jong nga,” u la khot ïa la ki hynmen shynrang. “Kane hangne ha ka byrni jong nga!” Mar kumta ki rit mynsiem ria, bad da kaba sheptieng ki ïakylli para ma ki, “Kaei keiñ kane kaba U Blei u la leh ïa ngi?”
29Ynda ki la wan poi ha u Jakob u kpa jong ki ha ka ri Kanaan, ki ïathuh lut ha u ïa kaba la jia ha ki baroh: 30“U lat jong ka ri Ijipt u la kren khor ïa ngi, bad u la kynnoh ba ngi syntiat ïa kata ka ri. 31‘Ngim dei ki nongsyntiat,’ ngi la jubab, ‘Ngi dei kiba shida. 32Ngi don khat-ar ngut shi para, ki khun jong ujuh u kpa. Uwei u para u la ïap, bad uba khatduh u dang don ha Kanaan bad i pa.’ 33Uta u briew u jubab, ‘Da kumne ngan tip ba phim dei ki riewshukor, uwei na phi un sah bad nga; ieh kiwei pat kin leit kit kew sha la ki ba-ha-ïing kiba shahthngan, bad kin leit noh. 34Wan ïalam ruh ïa u para khatduh jong phi sha nga. Da kumta ngan tip ba phim dei ki nongsyntiat, hynrei ki briew kiba hok; ngan ai pat ha phi ïa u hynmen u para jong phi, bad phi lah ban sah hangne bad khaïi ruh.’ ”
35Katba ki dang pynthylli ïa la ki byrni, uwei pa uwei u lap ïa la ka pla pisa ha ka byrni jong u; bad haba ki la ïohi ïa ka pisa, ma ki bad u kpa jong ki u Jakob ki la ïasheptieng. 36U kpa jong ki u ong ha ki, “Phi kwah ba ngan duh lut ïa la ki jong ki khun? U Joseph um don shuh, u Simeon ruh um don, bad mynta pat phi kwah ban shim noh sa ïa u Benjamin. Dei ma nga keiñ uba shah jynjar!”
37U Reuben u ong ha la u kpa, “Lada ngam wan ïalam biang sha phi ïa u Benjamin, phi lah ban pynïap ïa ki khun shynrang jong nga baroh ar ngut. Buh ïa u ha ka jingsumar jong nga, bad ngan wan ïalam biang ïa u.”
38Hynrei u Jakob u ong, “U khun jong nga um lah ban leit ryngkat bad phi; u hynmen jong u, u la ïap, bad u sah sa tang marwei. Kaei kaei ka lah ban ngat ha u ha lynti. Nga dei u briew uba la tymmen, bad ka jingsngewsih kaba phin pynjia ha nga kan sa pynïap ïa nga.”
Markert nå:
JENESIS 42: KHACLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Khasi CL Bible
Copyright © Bible Society of India, 2016.
Used by permission. All rights reserved worldwide.