JENESIS 43
43
Ki hynmen shynrang jong u Joseph ki wan sha ka Ri Ijipt lem bad u Benjamin
1Kata ka 'nemsniew ha Kanaan ka la nang jur nang jur, 2bad haba ki ba-ha-ïing ha-sem jong u Jakob ki la ïabam lut ïa u kew ba la thied na Ijipt, u Jakob u la ong ha la ki khun, “Khie leit biang bad thied jingbam biang ïa ngi khyndiat.”
3Hynrei u Judah u ong ha u, “Uta u briew u la maham tyngeh ïa ngi ba ngin ym lah shuh ban ïakynduh ïa u lymda u para jong ngi u don ryngkat lem bad ngi. 4Lada phi kloi ban phah ïa u para jong ngi bad ngi, ngin leit thied bam ïa phi. 5Hynrei lada phim treh ban phah ïa u, ngin ym leit, namar uta u briew u la ong ha ngi ba ngin ym lah shuh ban ïakynduh ïa u lymda u para jong ngi u don ryngkat lem bad ngi.”
6U Jakob u ong, “Balei keiñ phi pynjynjar sat ïa nga katne katne ba phi da ïathuh ha uta u briew ba phi don sa uwei u para?”
7Ki jubab, “Uta u briew u ïai kylli bniah shaphang jong ngi bad shaphang ki ba-ha-ïing ha-sem jong ngi, u da ong, ‘I pa jong phi i dang im ne em? Phi dang don para shynrang shuh?’ Ngi hap ban jubab ïa kita ki jingkylli. Kumno ngi lah ban tip ba un ong ïa ngi ban wan ïalam ïa u para jong ngi?”
8U Judah u ong ha la u kpa, “Phah ïa u para bad nga, bad ngin ïamihnoh kumne kumne. Te yn ym don uwei ruh na ngi u ban ïapthngan. 9Ngan bahkhlieh da la ka jingim, bad ngan kitkhlieh na ka bynta jong u. Lada ngam wan ïalam pat ïa u sha phi bad buh ïa u ha khmat jong phi, ieh ngan kit pop ma nga shi rta. 10Lada ngim shym la pyntud katne katne, ngin jin da la wan phai kylla ar sien.”
11U Jakob u ong ha ki, “Lada kumta te, to leit rah ïa ki jingmih kiba kynsai tam jong kane ka ri ha ki byrni jong phi kum ka jingai sngewbha ïa uta u lat: khyndiat ka jingiwbih, khyndiat ka ngap, ki musli musla, ka mirr, ki jait soh-ot, bad ki almond. 12Rah pisa ar shah bad phi, namar phin hap rah biang ïa kito ki pisa ïa kiba la buh pat ha khlieh ki byrni jong phi. Ka lah ban long tang ka jingbakla. 13Ïalam ruh ïa la u para, bad ïawan phai mar mar. 14To U Blei Badonbor Baroh un pynlong ïa uta u briew ba un isynei ïa phi, khnang ba un pynphai sha phi ïa u hynmen u para jong phi, bad ïa u Benjamin de. Ïa nga shimet te, lada nga dei ban duh ïa la ki khun, ieh ngan mat duh ïa ki.”
15Kumta kita shi para ki shim ïa kita ki jingai sngewbha, ki rah pisa sa ar shah, bad ki leit noh sha Ijipt ryngkat bad u Benjamin. Hangta ki la leit ïakynduh ïa u Joseph. 16Haba u Joseph u ïohi ïa u Benjamin lem bad ki, u ong ha u shakri uba peit ïa ka ïing jong u, “Khie ïalam ïa kine ki briew sha ïing jong nga. Kin sa ïabam ryngkat bad nga ha ka por shiteng sngi; kumta pynïap uwei na ki jingri bad shet ïa u.” 17Uta u shakri u leh kumba la hukum ïa u, bad u leit ïalam ïa kita shi para sha ka ïing u Joseph.
18Haba la ïalam ïa ki sha ka ïing, ki la sheptieng bad ki la ïa-pyrkhat, “La ïalam ïa ngi shane imat namar kito ki pisa ba la pynphai ha ki byrni jong ngi ha ka sien kaba nyngkong. Kin sa kynrup kynsan ïa ngi, kin shim noh ïa ki kada jong ngi, bad kin pynlong ïa ngi ki mraw jong u.” 19Kumta ha ka jingkhang jong kata ka ïing, ki ong ha uta u shakri rangbah, 20“Kynrad ngi la wan shane shisien ban thied jingbam. 21Haba ngi la poi ha ka jaka ban sahmiet, ngi plied ïa la ki byrni, bad uwei pa uwei na ngi u lap ïa la ki pisa ha la ka jong ka jong ka byrni — ki pisa ki biang thik. Ngi la wanrah biang ïa ki sha phi. 22Ngi la wanrah ruh kham bun ki pisa ban thied jingbam shuh. Ngim tip satia mano ba la buh biang ïa ki pisa jong ngi ha ki byrni jong ngi.”
23Uta u shakri u ong, “Wat khuslai. Wat sheptieng ruh. Dei U Blei jong phi, U Blei jong u kpa jong phi, uba la thep ïa ki pisa ha ki byrni jong phi na ka bynta jong phi. Nga la ïohpdiang ïa ka dor ba phi la siew.” Nangta u wan ïalam ïa u Simeon sha ki.
24Uta u shakri u ïalam ïa kita shi para shapoh ka ïing. U ai um ïa ki ba kin sait ïa la ki kjat, bad u ai bam ïa ki kada jong ki. 25Ki pynkhreh ïa kita ki jingai sngewbha ban ai ha u Joseph ynda u wan ha ka por shiteng sngi, namar la ïathuh ha ki ba ki dei ban ïabam ryngkat bad u. 26Ynda u Joseph u la wan sha ïing, ki leit rah sha u hapoh ïing ïa kita ki jingai sngewbha, bad ki nguh ngon ha khmat jong u. 27U la kylli shaphang ka jingkoit jingkhiah jong ki bad u ong, “Phi la ïathuh ha nga shaphang i pa jong phi, iba la tymmen — i long kumno? I dang im, bad i shait i khlaiñ bha?”
28Ki la jubab, “I pa jong ngi, u shakri barit jong phi, i dang im bad i shait i khlaiñ.” Bad ki la dem khohsiew bad nguh ngon ha khmat jong u.
29Haba u Joseph u ïohi ïa u Benjamin u para jong u, u ong, “Une seh u para khatduh jong phi, uta uba phi la ïathuh ha nga? U Blei un kyrkhu ïa phi, khun.” 30Nangta u Joseph u mihnoh kynsan namar ka dohnud jong u ka shlei da ka jingsngewieit ïa la u para. Namar ba um lah kun shuh, u leit sha la ka kamra, bad u la ïam. 31Ynda u la dep bta khmat, u wan mih biang; nangta da kaba pynjai jai ïa lade, u hukum ban sam ïa ka jingbam. 32Ïa u Joseph la ai ha kawei ka miej, bad ïa ki hynmen jong u ha kawei pat. Ki nong Ijipt kiba ïabam hangta ruh ki shong kyrpang, namar ki kheiñ poh ban ïashong bam ryngkat bad ki Hebru. 33Kumta kita shi para ki ïashong ha khmat jong u, ha ka miej marpyrshah ïa u Joseph kat kum ka rta jong ki naduh uba nyngkong haduh uba khatduh. Haba ki ïohi kumno ki ïashong bam, ki shu ïa-peit lyngngoh para ma ki. 34La sam jingbam ïa ki na ka miej u Joseph, bad ïa u Benjamin la sam san shah ban ïa uno uno na ki. Kumta keiñ ki la ïabam ïadih bad leh sngewbha bad u Joseph.
Markert nå:
JENESIS 43: KHACLBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Khasi CL Bible
Copyright © Bible Society of India, 2016.
Used by permission. All rights reserved worldwide.