MARK 13
13
Achineki Kutsavenikeu Jisu no pi
(Mt 24.1-2; Lk 21.5-6)
1Jisu no achineki lono ipe chekelo pa khopemi gholo lakhino pa vilo pi, “Kutsuchekeu, julo atu jukivi eno aki shipuakeqo jukivino aghileke!” 2Jisu no khochile, “Noye aki kuloghi hipaqo juani kesha? Hile atu lakhimu lakhi shou bepekile move nani hipaqo kumtsu tuleqhive nani.”
Shiluksa ngo Shikighime
(Mt 24.3-14; Lk 21.7-19)
3Jisu ye oliv tolo iqa puzu aghungulo achineki kudau juakelo, Pitor ngo Jems eno Johan eno Andrew ishi likhi akelono pa vilo iniju. 4“Hiye kughono tishiveni cheni keno nivilo pitsulo, hipaqo thwokha shikupuni kelo kiuno amchipu shi nani kya?”
5Jisu no panoqo vilo “Jukuto alo; eno khuu pelomu nongu shikughuzuve pekevilo. 6Timi kutomono ije lono ighi puzu, ‘Niye Mesiya ke’ ipi nani eno panonguno timi kutomo shikughuzuve nani. 7Kughou nonguno aghushi aniepikeu sutsa chiluni keno amlo susushi kevilo, Hipaqo shini putsake, tishimu aghuloki shekha ye tomphie. 8Ashiayeh lakhino ashiayeh lakhi sasu aghu shi nani, akukaqha lakhino akukaqha lakhi hale ighi nani. Aqha atsu-tsulo ayeghi itha nani, eno puqumiye keu anani. Hiye apunukusu huthu akeu paphike.
9“Ikemu nonguye nongu likhi nongu shelo jukutoluve masae. Kughengu timino nongu kughaluve nani eno kughakilo nongu sawu nani. Sinagog lo nongu ghaqhi nani eno nonguye ayehkipemi ngo kukami zulo ije pichekeu ghenguno sawo qhi nani, tiye panongu zulo alokiviputsa pilupeniye ke. 10Lokivipu sutsa paghi timi kumtsu vilo asheshu paghi masa nani. 11Kughou timino nongu kughasawo atsakughani keno, nonguye kiu pini kela pi azuu no amlo thoghu-thoghuyi kevilo; ikemu tipa tuqhudo lono kiu pesu nongu tsuni keno ti pilo, kughengu nonguno kiu tsa pini keno tipaqoye Aghungu Kimthe launo ighi nani. #Mt 10.17-20; Lk 12.11-12 12Athikuzuuno athikuzu kughape pithive penike tsuve nani, apuh no pa nu titoi shivepe nani, eno anuliqono apu aza mujochile nani eno apu azaqo pithive nani. 13Nonguno ije pechekeu ghenguno timi kumtsuno nongu mithi nani. Ikemu timi khunono ashekha kutolo kutu-ukulu shinikeno Alhou no tipaqo xalu nani. #Mt 10.22
Akuighupu Kutsakungo
(Mt 24.5-28; Lk 21.20-24)
14“Ikemu kughou akuighupu kutsakungokeu huno pano ngomokepu alo puthugho aghikeu nonguno ithuluni keno (phiakeuno vethaluvelo), tile khunoqono Judia lo anikeno naghutolo pokalulo. “ #Dane 9.27; 11.31; 12.11 15Timi khuuno aki kutsuqalo ani keno ado puwoghi aki aqhou iqi ke vilo momu kiuala ikhisuwu nikehu pa ki sholokuu ilokepu kumoe. 16Timi khuu no alulo huani keno pa ku-uphi luniaye pa kilo idewo kepu kumoe. #Lk 17.31 17Tipa tsalaqolo totimi anga mishi cheghi keqo eno totimi anga sacheghikeqo ghenguno ahakusapue! 18Susutsala lono hipaqo shipemoni keghenguno Alhou vilo inikhu alo. 19Kughengu tipaqo tsalalo akijikusapu chekeu huye Alhou no inahuu ayeghi lhoke lono ishi kutolo tikithipu shimphi, momu hikithipu itaghi shimo nani. #Dane 12.1; Piye 7.14 20Ampeu no tipaqo tsala kihi kughukhovetsuae, pano tishimoke aye, timi khuumu puxumlave nani. Ikemu pano pukhavekeqo, pano kisheluvekemi ghenguno atsalaqo kihi kughukhovetsuae. 21“Tile khunoala nongu vilo, ‘Julo, Mesiya hile ani,’ momu ‘Julo, paye tile anie!’ ipi aye, tipau pulu kevilo. 22Kughengu kichileu Mesiya ngo kichileu tungkupmi ipeghi nani. Eno tokulupu shiaye Alhou no pukhavekemi ghi sakughuzu sawuni kehu panonguno amchipu ngo akumzapu shipiye nani. 23Ike kutokupuyi khealo! Hi thwokha kumtsu shimphi lono ino nongu vilo pive ani.”
Timi Nu Ighinikeu
(Mt 24.29-31; Lk 21.25-28)
24Tipaqo tsalalo, ti akijuksa thiu, tsukinheno zumoyive nani, aqhino akuvu yemove nani, #Isa 13.10; Ezek 32.7; Joyil 2.10,31; 3.15; Piye 6.12 25ayepuqono atsutsu lono ikiqive nani, eno atsutsulo thwokha tshukumughupe akeu kumto sukini nani. #Isa 34.4; Joyil 2.10; Piye 6.13 26Tileno Timi Nuno khungkusu lono akuka kije eno ajukuvu lono chekeu timiqono ithulu nani. #Dane 7.13; Piye 1.7 27Pano tileno kungumi ayeghiqha cheku ahu-u, apeu, kipelau eno kulolau kutolo puwuno Alhou no pukhaluvekemi ayeghi shekha lono ashekha kutolo hekutsu saghi nani.
Khughuthibo launo Shikalu
(Mt 24.32-35; Lk 21.29-33)
28“Ithikepushi akeu lakhi khughuthibo pelo nongu shika pelo. Kughou tipau lokaqono akumu ishe ipeghi puzu tipau nikaqo mini nikeno, mutsutsala kupunuva kepi nonguno ithi cheni. 29Titoi, kughou hipaqo thwokha shikeu nonguno ithuluni keno adoye kupunuva, tiye kupunu kuchou shiveakepi nonguno ithivelo. 30Kuchouno ino nongu vilo pini, hipau tiqhelimi thimphi lono hipaqo thwokha shikupu nani. 31Atsutsu eno ayeghiye hauve nani, ikemu itsaye hauvemoe.
Atuqhudo hu Khunomu mtha
(Mt 24.36-44)
32“Ikemu tipa tsala momu tipa tuqhudoye kughono ighini keno khunomu mthae, kungugha lo kungumi mu mtha, Anu ghi mthae, ikemu Apu likhino ithi ani. #Mt 24.36 33Kutokupuyi khealo, kughengu kiu ghuloki lono ighi nani keno nonguye mthae. 34Hiye timi lakhino aki qhiveno izuwuveniye akelo toike. Pa qemi pelo pututa shelo pututa kumla jukutsupe eno ahukikha kheu vilo jukutokhealo pi ahza tsukeu paphi. #Lk 12.36-38 35Tishiaye jukuto khealo kughengu aki mipeu kughono ighi nani keno nonguye mthae, avelauno shi aghiluvi momu zubumta lono shi aghiluvi momu tsukutho launo shi aghiluvi momu inaqheno shi aghiluvike, 36Pano zuleno ighikelo noye zuaghi mokepu shimasa! 37Ino nongu vilo kiu piani keno kutami kumtsu vilo ghi pi ani, jukuto khe alo!”
Markert nå:
MARK 13: SUMIBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.