1 Musa 12
12
Idilo Dèbata si Abram
1 #
Ul. 7:2-3; Heb. 11:8 Nina Jahowa mo taba si Abram, “Tadingken mo kutamu, dekket kadè-kadèmu bak bages bapamu, nai laus mo ko mi nagerri sinaing Kutuduhken bamu. 2Kuberèken pè bamu pinempar nterrem kalohon, janah gabè bangsa mbelgah ngo kalak i. Kupasu-pasu pè ko janah kubaing gerarmu termurmur, asa gabè pasu-pasu ko.
3 #
Gal. 3:8
Kupasu-pasu ngo kalak simemasu-masu ko
janah kenna sumpahenKu ngo kalak simenumpahi ko.
Janah kumernaken kono
gabè Kupasu-pasu ngo karina bangsa i tanoh èn.”
4-5Merumur pitupuluh lima tahun ngo si Abram tikan lompat i Haran nai, bagè nidokken Jahowa mbangsa. Berkat mo si Abram rebbak dekket sinibagesna si Sara laus mi tanoh Kanaan, bak si Lot anak anggina i, bagi ma iembah ngo karina hartana dekket naposona silot dapetsa i Haran.
Soh kessa kalak i mi tanoh Kanaan, 6iagahi si Abram mo tanoh i soh mi kayu keramat i More, imo bekkas memèlè i Sikhem. (Tikala i, iiani kalak Kanaan dèng ngo tanoh i.) 7#Ul. 7:5; Gal. 3:16 Nai ipacidah Jahowa mo dirina taba si Abram janah nina mo, “En mo nagerri sinaing berènkenKu mi pemparenmu.” Nai ipajek si Abram mo i sidi sada langgaten bai Jahowa sienggo pacidahken dirina tabasa. 8Kessa i, iterrusken mo perdalanenna mi selatan mi bekkas meruruk-uruk kan kebincaren kuta Betel dekket kuta Ai; Betel kan kesunduten janah Ai kan kebincaren. I sidi pè ipajek ngo langgaten memèlè Jahowa. 9Nai iterrusken ngo perdalanenna i bekkas sisada nai mi bekkas sada nola, menuju mi selatan tanoh Kanaan.
Si Abram i Mesir
10Tapi masa mo lèhè mbellen i tanoh Kanaan, gabè makin ndaohna mo laus si Abram mi selatan imo mi tanoh Mesir janah merian i sidi soh salpun lèhè mbellen i. 11Tikan naing ilausi perbalengen, janah naing soh mi tanoh Mesir, nina mo taba si Sara sinibagesna i, “Ukum kono, mberru ngo. 12Mula idah kalak Mesir kono, dokenken kalak idi ngo sinibagesku ngo kono, nai ibunuh mo aku, tapi ukum kono ipegelluh ngo. 13#1 Ms. 20:2, 26:7 Jadi sellohen mo dokken turangku ngo kono, asa kumernaken kono, gabè ibelli kalak i aku nggelluh, janah mendè ibaing bangku.” 14Tuhu mo, kessa ilausi si Abram perbalengen janah soh mi tanoh Mesir, idah kalak Mesir i mo mberru kalohon si Sara i. 15Dèba ipas naposo raja i simengidahsa, ibagahken mo taba raja kinimberru daberru i; kernai, iarahken mo ia mi istana raja. 16Kumernaken si Sara i, gabè mendè mo ibaing raja i taba si Abram janah iberèken mo bana hamba, bagi ma biri-biri bak kambing, lembu, kalodè dekket unta.
17Tapi kumerna ialengi raja i si Sara, gabè mersakit mpiah mo raja i ibaing Jahowa bagi dekket kalak silot i istana pè. 18Nai idilo raja i mo si Abram janah ikuso mo ia, “Kadè ibaing ko bangku? Kasa oda ibagahken kono sinibagesmu ngo keppèken ia? 19Kasa idokken kono turangmu ia, janah ibelli kono ia kubaing gabè sinibagesku? En ia sinibagesmi; arahken mo ia janah laus mo kènè.” 20Idokken raja i mo taba naposona, asa itaruhken kalak i ia karuar i Mesir nai rebbak dekket sinibagesna bak karina silot bana.
Markert nå:
1 Musa 12: LAIBTD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)