GÉNESIS 13
13
Abrahamhuan, Lothuan shicanyarishcamanda
1Abramga, paipaj huarmindi, Egiptomanda llujshishpaca, tucui imata charishcatapash apashpami, Neguev pambacunaman vichai rirca. Shinallata, Lotpashmi paihuan rijurca. 2Chai punllacunaca Abramga, animalcunatapash, culquitapash, curitapash, ashtacatami charirca. 3Abramga, Neguev pambacunamandaca asha asha rishpami, Bet-el shuti puebloman chayagrirca. Paica, Bet-el shuti pueblohuan, Hai shuti pueblocunahuan chaupipi, paipaj carpa tiyajushca pushtumanllatami tigrarca. 4Abramca, altarta punda rurashca pushtumanllata tigrashpami, Mandaj Diosta chaipi jatunyachijurca.
5Abramhuan purijuj Lotpashmi, llamacunata, huagracunata, causana carpacunatapash charirca. 6Paicuna ishcandi chaipillata causangapaca alpaca ña na pactarcachu. Paicunapaj ashtaca animalcuna tiyashcamandami, chai alpapillata causaitaca na ushanajurca. 7Chaimandami, Abrambaj animalcunata michijcunahuan, Lotpaj animalcunata michijcunahuan fiñanajurca. Chai llactapica, cananeocuna, ferezeocunapashmi causanajurca. 8Shinamandami Abramga, Lot runataca cashna nirca: “Ñucanchi ishcandica ayllupurami canchi. Chaimandami na fiñanajuna canchi. Shinallata, ñuca michijcunahuan, cambaj michijcunahuambash na fiñanajunachu. 9¿Nachu cai tucui alpacunataca canllata ricujungui? Cunanmandaca, shican causangapa rilla ninimi. Can lluquiman rijpica, ñucaca aliman rishallami. Can aliman rijpica, ñucaca lluquiman rishami” nircami.
10Shina nijpi Lot vichai ricushpaca, Jordán yacu rijuj manñapi tiyaj, tucui pugru pambacunatami ricurca. Tucuilla chai pambacunaca, Mandaj Dios churashca huertashna, Zoar shuti pueblo chimbapurapi tiyaj Egipto llactashna, yacu jicharijuj pambacunami carca. Chai pambacunaca, Mandaj Dios, Sodoma shuti, Gomorra shuti pueblocunata nara tucuchijpimi chashna juyailla carca. 11Shina cajpimi Lotca, Jordán yacu rijuj manñapi tiyaj, tucuilla pugru pambacunata, paipaj cachun agllarca. Chashnami Lotca, ishcandimanda shican causangapa, indi llujshimujman rirca. 12Abramga, Canaán llactapimi carpacunata shayachishpa causajurca. Lotca, pugru pambacunapi tiyaj pueblocunapi causajushpami, paipaj carpacunataca, Sodoma pueblocaman shayachirca. 13Ashtahuangarin, Sodoma pueblopi causajcunaca na ali gentecuna cashpa, juchatalla ruranajushpami, Mandaj Diostaca ninanda fiñachinajurca.
14Mandaj Diosca, Lot rishca jipami, Abramdaca cashna nirca: “Cunan, can maipi shayajungui, chai pushtumandaca, jahuamambash, uramambash, indi llujshimujmambash, indi huashajunmambash vichai ricui ninimi. 15Can ricujungui, chai tucui alpataca, cambash, cambaj mirai huahuacunapash, tucui causaipi, chaipi causanajuchunmi carasha. 16Canmanda miraicunataca, ñutu alpatashnami mirachisha. Ñutu alpata maijambash yupai ushashpaca, cambaj miraicunatapash yupai ushangallami. 17Caimanda rishpa chai llactataca, largomambash, anchomambash purishpa ricugri. Chai llactataca, canmanmi carasha” nircami.
18Shina nijpimi Abramga, paipaj carpa huasicunata apashpa, encina shuti quirucuna shayanajuj, Mamre shuti runapaj pambapi causaj shamurca. Chai pambaca, Hebrón puebloman chayanapimi carca. Chaipimi, Mandaj Diosman altarta rurarca.
Markert nå:
GÉNESIS 13: QVI16
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.