متا ۱۰
۱۰
عیسا دوأزده‌تأ شأگرد
1 بأزون عیسا خو دوأزده‌تأ شأگردَ دؤخأده خو ورجأ و اَشأنَ ایقتدأر فأدأ کی پٚلیدٚ روحأنَ بیرونَ کونٚد و همه جور نأخوشی و مرضٚ شفأ بٚدٚد. 2 او دوأزده‌تأ روسولٚ نأمأن اَشأنٚده: شمعون (کی اونَ پطرس دؤخأدیدی) و آندریاس (پطرسٚ برأر)؛ یعقوب (زِبِدی پٚسر) و یوحنا (یعقوبٚ برأر) 3 فیلیپُس، بَرتولما، توما، متا (او معروفٚ بأج فأگیر)، یعقوب (حلفی پٚسر)، تادایوس، 4 شمعون (کی فدأییأنٚ حیزبٚ شین بو) و یوهودأ اِسخریوطی (اونی کی آخرپٚسی عیسا‌یَ خیأنٚت بوکود).
حواریونٚ مأموریت
5 عیسا اَ دوأزده‌تأ روسولَ اَ فرمأنٚ اَمرأ، اوسه کوده مأموریت و اَشأنَ بٚفرمأسته: «اوشأنی کی یوهودی نییٚد و سأمریأنٚ ورجأ نیشید، 6 بلکی فقد بیشید ایسرأییلٚ قومٚ ورجأ کی خودا اَویرَ بوسته گوسوٚندأن ایسد. 7 بیشید و اَشأنٚ رِه موعیظه بوکونید کی آسمأنٚ پأدیشأیی فأرٚسئندٚره. 8 نأخوشأنَ شفأ بدید، بٚمٚرده‌یأنَ زٚنده کونید، جوذأمیأنَ شفأ بدید، و پٚلیدٚ روحأنَ مردومٚ جأنٚ جَا بیرونَ کونید. موفت فأگیفتید، موفتم فأدید. 9 شیمی کمرقِئیشٚ جیبأنٚ میأن، طلأ یا نوقره یا مِسٚ سکه‌یأنٚ نٚنید، 10 حتّا بوغچه و پأافزأر و ایضأفه رخت و دٚس‌چو هم اونسأنید. وئألید مردوم شیمی جَا پذیرأیی بوکونٚد، چونکی کأرگر حق دأره خو موزدَ فأگیره. 11 هر وخت ایتأ دیهأت یا شهرٚ دورون شیدی، ایتأ لأیٚقٚ آدمَ بیأفید و تأ شیمی شؤئؤن زمأت، اونٚ خأنه دورون بئیسید. 12 او وخت کی ایتأ خأنه دورون شیدی، اونٚ رِه خیر و برکت بٚخأیید. 13 اگه موشخص بٚبه او خأنه لأیٚق ایسه، او خیر و برکت کی اونٚ رِه بٚخأستید، اونٚ رو مأنِه. اگه لأیٚق نٚبه، او برکت شٚمٚره وأگرده. 14 اگه ایتأ خأنه یا شهرٚ آدمأن شٚمٚره ولأشتٚده بیشید بودورون، و یا شیمی گبأنَ گوش نٚدأده، اویَه گرد و خأکٚ، شؤئؤن موقع، شیمی پأیأنٚ جَا بٚتکأنید. 15 رأس‌رأسِی شٚمٚره گم کی دأوری روجٚ میأن، سدوم و غَمورَه وضع کی خرأبٚ شهرأن ایسٚد، اَ شهرٚ وضع جَا خٚیلی بِیتره.»
16 «من شٚمٚره گوسوٚندأنٚ مأنستَن، اوسه کونم گورگأنٚ میأن. پس لأنتی مأنستَن، حواس جم و کوتٚرٚ مأنستَن، آرأم بیبید. 17 ولی شیمی حواس بمأنه، چونکی مردوم شٚمٚره گیرده، دأدگأیَ ایسپأرده، و کنیسه‌یأنٚ دورون شلأق زٚنده. 18 هطؤیه، می وأسی شٚمٚره موحأکمه کودنٚ رِه، وألیأن و پأدیشأیأنٚ ورجأ بٚرٚده. ولی اَن ایتأ فورصت بِه کی می دروأره، اوشأنٚ رِه و اوشأنی کی یوهودی نییٚده رِه شهأدت بٚدید.»
19 «او وخت کی شٚمٚره گیرده، نیگرأن نوأبوستٚنید کی چوطؤ جوأب بدید یا چی بیگید، چونکی بِیترین کلمه‌یأن بِیترین زمأتٚ دورون شٚمٚره فأدأ به. 20 چونکی اَن شومأن نیئیدی کی گب زنیدی، بلکی شیمی آسمأنی پئرٚ روح ایسه کی شیمی زٚوأنٚ اَمرأ گب زٚنِه.
21 «برأر، خو برأرَ و پئر خو زأکَ، مرگٚ دٚس ایسپأره. زأکأن خوشأنٚ پئر و مأرٚ ضد ویریزٚده، بأعیث بٚده اوشأن بوکوشته بٚبٚد. 22 تومأمٚ مردوم، می وأسی شیمی جَا بیزأرَ بٚده. ولی هرکی تأ آخرسرِ، زحمتأنَ تحمول بوکونه، نیجأت یأفه.
23 «هر وخت شٚمٚره ایتأ شهرٚ دورون آزأر فأرٚسأنِده، جیویزیدی بیشید ایتأ شهر دِه. رأس‌رأسِی شٚمٚره گم پیشتر جٚه اَنکی بتأنید تومأمٚ ایسرأییلٚ شهرأن بیشید، اینسأنٚ پٚسر#۱۰:۲۳ «اینسأنٚ پٚسر» لقبی ایسه کی عیسا خؤرَه بٚکأر بٚره. اَیِه. 24 شأگرد خو اوستأدٚ جَا و غولأم خو اربأبٚ جَا پیله‌تر نییٚه. 25 شأگردٚ رِه وٚسته کی خو اوستأدٚ مأنستَن و غولأمم خو اربأبٚ مأنستَن بٚبه. اگه مٚرَه کی خأنه پیله‌ترم، بِعِلزبول نأم بٚنأده، می خأنوأرٚ آدم نفرأنَ چی نأجورٚ نأمأنٚ اَمرأ دؤخأنده.»
کی جَا وأستی ترسِئن
26«ولی جٚه اوشأن کی شٚمٚره تهدید کونٚده نوأترسِئنید، چونکی او زمأت فأرٚسِه کی هر چی جیگأ بٚدأ نٚهأ، آشیکأرَ بِه و همٚتأن جٚه اونچی کی قأیمٚ بوسته نٚهأ، وأخٚوٚرَ بٚده.
27 «اَ گبأنی کی اَسه ظولومأتٚ دورون شٚمٚره گم، اوشأنٚ روشنٚ روجٚ میأن بیگید. هر چی کی شیمی گوشٚ دورون گم، پوشتٚ بأمأنٚ جؤر موعیظه بوکونید کی همٚتأن بشتأوٚد!
28 «نوأترسِئنید اوشأنٚ جَا کی فقد تأنٚده شیمی جأنَ بوکوشٚد، ولی نٚتأنٚد شیمی روحٚ آسیب فأرٚسأنٚد. فقد خودا جَا بٚترسید کی تأنه هم شیمی جأن و هم شیمی روحَ جهندمٚ دورون هلأکَ کونه. 29 دوتأ چی‌چی‌نی پول چندر ایسه؟ ایتأ سیأ پول #۱۰:۲۹«سیأ پول» یونأنی وأژه ترجومه «اَسَریون» بِه.ولی حتّا ایتأ چی‌چی‌نی‌یم بی‌اَنکی شیمی پئر وأخٚوٚرَ به بیجیر نٚکفه. 30 شیمی همٚتأ دأنه خألٚ مویَم بیشمأرده بوبوسته. 31 پس نیگرأن نیبید، چونکی شومأن هیزأرتأ چی‌چی‌نی جَایٚم ویشتر اَرزیدی.
32 «هر کی مردومٚ ورجَا می نأمَ خو زٚوأنٚ اَمرأ ایعترأف بوکونه، منم اونی نأمَ می آسمأنی پئرٚ ورجأ ایعترأف کونم. 33 ولی هرکی مٚرَه مردوم ورجأ اینکأر بوکونه، منم می آسمأنی پئرٚ ورجأ اونَ اینکأر کونم.
34 «گومأن نوکونید بأمؤم کی زیمینٚ سٚر صولح بأوٚرٚم! نأمؤم کی صولح بأوٚرٚم، بلکی شٚمشیر بأوٚرٚم. 35 من بأمؤم کی "پٚسرَ خو پئرٚ جأن، دوخترَ خو مأرٚ جأن، عروسَ خو مردٚمأرٚ جأن تأوٚدم. 36 طوری کی اینفرٚ خأنه دورون همٚتأن، اونی دوشمن بٚده."#۱۰:۳۶میکاه ۷:۶.
37 «اگه شیمی پئر یا مأرَ می جَا ویشتر دوس بٚدأرید، لأیٚق نیئید کی می جَا پیروی بوکونید؛ و اگه شیمی پٚسر یا دوخترَ می جَا ویشتر دوس بٚدأرید، لأیٚق نیئید کی می جَا پیروی بوکونید. 38 هر کی نٚخأیه خو صلیبَ اوسأنه و می دونبألسر بأیِه، لأیٚق نییٚه کی میشین بٚبه. 39 هر کی خأیه خو جأنَ قأیم بٚدأرٚه، اونَ جٚه دٚس دِهه، ولی هرکی خو جأنَ می وأسی جٚه دٚس بٚده، اونَ یأفه.
40 «هر کی شٚمٚره قوبیل بوکونٚه، مٚرَه قوبیل بوکوده؛ و هر کی مٚرَه قوبیل بوکونٚه، اونی کی مٚرَه اوسه کوده‌یَ قوبیل بوکوده. 41 هر کی ایتأ پیغمبرَ اوسِه کوده جٚه خودا ور، قوبیل بوکونٚه، خودشٚم ایتأ پیغمبرٚ پأدأشَ فأگیره، و هر کی ایتأ دوروستکأرٚ آدمٚ اونی دورستکأری وأسی قوبیل بوکونٚه، ایتأ پأدأش اونی پأدأشٚ مأنستَن یأفه. 42 و اگه اینفر ایتأ جٚه می کوجه‌دأنه‌‌ترین پیروأنَ، اَنٚ وأسی کی می شأگرده، ایتأ لیوأن خونکٚ آب فأدٚه، رأس‌رأسِی شٚمٚره گم کی بی‌پأدأش نٚمأنِه.»
Obecnie wybrane:
متا ۱۰: GLK_NT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2024 Transform Iran