متا ۳
۳
یوحنا کی تعمید دِهه ظوهور کودن
1 هو روجأنٚ دورون، یوحنا کی تعمید دٚئی ظوهور بوکوده. اون یوهودیه بیأبأنٚ میأن مردومٚ رِه موعیظه کودی و گفتی: 2 «شیمی گونأیأنٚ جَا توبه بوکونید، چونکی آسمأنٚ پأدیشأیی فأرٚسئندٚره.» 3 اون هونی ایسه کی اشعیای نبی اونی جَا بوگفته بو: «اون هو صدایی ایسه کی بیأبأنٚ دورون ایجگره زٚنِه: خوداوندٚ اَمؤنٚ رِه رأیٚ آمأده کونید! جأده‌یَ اونی وأسی هموأرَ کونید!»#۳:۳ اِشعیا ۳:۴۰ (یونأنی بینیویشته).
4 یوحنا لیوأس شوتورٚ پشمٚ جَا، اونی کمر قِئش چرمٚ جَا، و اونی غذأ صأرأ ملخ و عسل بو. 5 مردوم اورشلیمٚ جَا و جٚه یوهودیه سرتأسر و تومأمٚ اُردنٚ درّه رأ، بیأبأنٚ میأن اونی ورجأ شؤئید. 6 اوشأن خوشأنی گونأیأن ایعترأف کودید، اُردنٚ روخأنٚ دورون اونی جَا تعمید گیفتید.
7 ولی او وخت کی بیدِه کی ایتأ پیله جِمئیت جٚه فریسیأن و صدوقیأن اونی ورجأ اَیٚده کی تعمید بیگیرٚد، اوشأنَ بوگفته:
«ای اَفعی زأکأن، کی شٚمٚره وأخٚوٚرَ کوده خودا غضبٚ جَا کی پیش دٚرٚه جیویزید؟ 8 شیمی کردکأرٚ اَمرأ وأ نیشأن بدید کی رأس‌رأسِی توبه بوکودید. 9 اَ خیألم شیمی کله جَا بیرونَ کونید، چونکی شیمی پیله‌بابا ایبرأهیمه خودا غضبٚ جَا جیویزیدی، چونکی اَ بیأبأنٚ سنگأنٚ اَمرأ خودا تأنه ایبرأهیمٚ رِه زأی چأکونه! 10 اَسه تیشه، درختأنٚ ریشه سٚر بٚنأ بوبوسته. هرتأ درخت کی خورومٚ بأر نأوٚره، وأوِه به، آتشٚ دورون تأوٚدأ به. 11 من اوشأنی کی خوشأنی گونأیأنٚ جَا توبه کونٚده، آبٚ اَمرأ تعمید دٚهٚم، ولی اینفر ده اَیِه کی خٚیلی اونی موقأم مرتبه می جَا بوجؤرتره، اَندر کی من لیأقت نأرٚم اونی پأاَفزأرَ اونی پأ ورجأ بنم. اون شٚمٚره روح‌القدس و آتشٚ اَمرأ تعمید دِهه. 12 اون خو دوخألٚه چو اَمرأ آمأده ایسأ، کولوشَ گندمٚ جَا سیوأ وأکونِه. بأزون خو خرمن جیگأیَ پأکَ کونه، تیلنبأرٚ دورون گندمَ جمَ کونه، ولی کولوشَ ایتأ آتشٚ دورون سوجأنه کی هیوخت خأموشَ نیبه.»
عیسا تعمید گیفتن یوحنا دٚس
13 هو زمأتٚ میأن، عیسا جلیل جَا رأ دکفت اُردنٚ ور کی هویه یوحنا جَا تعمید بیگیره. 14 ولی یوحنا سعی بوکود اونی مأنع بٚبه، و بوگفت: «اَن منم کی وأستی تی جَا تعمید بیگیرم. تو چٚره اَیی می ورجأ؟»
15 ولی عیسا بوگفت: «اَ کأر لأزیم ایسه کی انجأم بٚبه، چونکی وأستی هرچی کی خودا ایرأدٚیه انجأم بٚدیم.» بأزین یوحنا قوبیل بوکود کی اونَ تعمید بٚده.
16 تعمیدٚ پٚسی، هو موقع کی عیسا آبٚ جَا بیرون اَمؤندوبو، آسمأن وأزَ بو و یوحنا روح‌القدسَ بیدِه کی ایتأ کوتٚرٚ مأنستَن بیجیر بأمؤ و عیسا رو قرأر بیگیفت. 17 هو موقع آسمأنٚ جَا ایتأ صدا فأرٚسٚه کی: «اَن می جأنٚ دیلٚ پٚسره، کی اونی جَا خوشألم.»
Obecnie wybrane:
متا ۳: GLK_NT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2024 Transform Iran