लुकस 1
1
येसुस ही पत्त नू लुकस थियोफिलससिन टुड़दस
1अना महोदय थियोफिलस#१:१ थियोफिलस अबड़ा उल्ला नू कोहाँ आलसिन आदर नन्जका लेखा लुकस इसन थियोफिलस बाचस की आदर नन्जका रअदस।, बग्गे आलर नम्हय मझही नू येसुस ही जिन्गी नू पुरा मन्जका कत्था गुट्ठी ही पत्त नू लिखचका रअनर।
2इबड़ा कत्था गुट्ठी ओरेतिम इरका आलर अउर धर्मेस ही दव कत्थन तिंगू आलर एमन तिंगका रअनर। 3औंगे एन हूँ इबड़ा कत्था गुट्ठी ओरेतिम मेन्जकन-ख़ुजकन की निंगा गे तरकुटी ती लिखआ गे एंगा गे दव लग्गिया। 4अक्कू निंगन ई पत्त नू तिंगका कत्था गुट्ठी कय बग्गे मानिम हिके, बआ की निन अख़आ नेकआ।
बप्तिस्मा चिऊ युहन्नास ही कुन्दुरना ही मुन्द तेंगना
5यहुदिया प्रदेस ता बेलस हेरोदस ही परिया नू जकरिया नामे मन्जका ओरोत यहुदी नैगस रहचस। आस अबिया बअना यहुदी नैगर ही गोहड़ा ता आलस रहचस। आस ही आली ही नामे एलिसिबा रहचा अउर आद हारुन#१:५ हारुन हारुनस हुरमी ती पहिल ता यहुदी जाती ता यहुदी नैगस रहचस। यहुदी नैगस ही बनस ता रहचा।#१ इतिहास २४:१० 6आर दोनो गोड़ेर धर्मेस ही अगू नू धर्मी रहचर, अउर आर धर्मेउर्बस ही हुरमी पेसका अउर नियम गुट्ठी नू निर्दोस मना की एका लगियर। 7लेकिन आर गे ख़द्दख़र्रा मला रहचर, एन्देरगेका एलिसिबा बँझली रहचा, अउर आर दोनो गोड़ेर पच्चियर केरका रहचर।
8ओन्द उल्ला जकरियास तंग्हय गोहड़ा ता परिया लेखा धर्मेस ही एड़पा नू नैग ही नलख नना लगियस। 9ख़ने यहुदी नैगर ही चाल लेखा चिट्ठा सज्जर, ख़ने धर्मेउर्बस ही एड़पा नू धुप दगना चिट्ठा जकरियास ही नामे नू उरख़ा। औंगे आस धर्मेउर्बस ही एड़पा नू धुप दगआ गे केरस। 10अउर धुप दगना बेड़ा नू आलर ही गोहड़ा बाहरी गोहरारआ लगिया। 11ख़ने आहबाकिम जकरियास हेद्दे धर्मेउर्बस ही मेर्ख़ादुतस धुप दगना बेदी ही तिना पक्खे इज्जका एथरस। 12मेर्ख़ादुतसिन इरियस की जकरियास अकबकरस अउर इल्चियस केरस। 13लेकिन मेर्ख़ादुतस आसिन बाचस, “अना जकरिया, निन अमा एल्चा, धर्मेस निंग्हय गोहरारनन मेन्जका रअदस। निंग्हय आली एलिसिबा ओन्टा ख़द्दसिन जन्मओ, अउर निन आस ही नामे युहन्ना पिन्जके। 14आ बेड़ा निन खोब रिझिरओय अउर खुसमारओय, अउर बग्गे आलर आस ही कुन्दुरका ती रिझरओर। 15एन्देरगेका आस धर्मेउर्बस ही एरना नू कोहाँ आल मनोस। आस अंगुर मध अउर दोसरा एकअम मध हूँ मलम ओनोस, अउर आस तंगियो ही भरिदेह तिम आस नेम्हा बोलतस ती निन्दरका#१:१५ नेम्हा बोलतस ती निन्दरका नेम्हा बोलतस ती निन्दरका रओस बअना नेम्हा बोलतस ती निन्दरका बअना कत्था नेम्हा बोलतस ही अगुवाई लेखा धर्मेस ही मने नू एकना हिके। रओस। 16अउर आस इस्राएली जाती ता बग्गे आलरिन आर ही धर्मेउर्बस तरा किरतओस। 17अउर आस बोलता अउर सवंग नू एलियास लेखा मना की उर्बास ही अगू नू बरओस की तम्बस ही अउर तंगदा बगर ही मझही नू मेल-जोल ओन्दरओस अउर पेसकन मला मिनू आलर ही बुद्धी नू ले ओन्दरओस। एन्नेकी आस उर्बास ही खतरी आस ही आलरिन सपड़ओस।”
18ताब जकरियास मेर्ख़ादुतसिन मेन्जस, “एन इदिन एकसे अख़ओन का इद मनो? इगे का एन पच्चकन केरकन अउर एंग्हय आली हूँ पच्चिया किरकी र' ई।”
19ख़ने मेर्ख़ादुतस आसिन बाचस, “एन गबरिएल हिकदन, एन धर्मेस ही अगू नू इज्जकम रअदन। एन निंग्हय गने कच्छनखरआ गे अउर निंगन ई दवसमाचार मेन्तआ गे तइरका रअदन।#दानि'एलस ८:१६; ९:२१ 20लेकिन निन गा एंग्हय कत्थन मला पत्ताचकय, औंगे ई कत्था मला मन्ना गुटी निन बौका रओय, अउर कच्छनखरआ पोल्लोय। एंग्हय बाचका कत्था तंग्हय बेड़ा नू मनो।”
21ख़ने आलर बाहरी जकरियास ही असरा एःरा लगियर, अउर आस धर्मेस ही एड़पा नू एन्ने गहड़ी एन्देरगे नना लगदस बआ की छक्केम मन्जर। 22आस बाहरी उरख़स, लेकिन आर गने कच्छनखरअम पोल्लस। ख़ने आर अख़चर केरर का आस धर्मेस ही एड़पा नू देखार#१:२२ देखार देखार ओन्टा सपना लेखा हिके, एकदन बग्गे आलर मला एरनर। लेकिन धर्मेस लेका तंग्हय आलरिन इदिन एःरा गे संगरा नन्दस। इरका रअदस। आस आरिन इसारा नना हेल्लरस, ख़ने आस बौका मन्जकम रहचस।
23एकाबिरी जकरियास धर्मेस ही एड़पा नू सेवा नन्ना बेड़ा मुन्जरा, ख़ने आस तंग्हय एड़पा किर्रियस। 24जोक्क बेड़ा ख़ोख़ा आस ही आली एलिसिबा भरिदेह मन्जा, अउर पाँच महिना गुटी नुख़रा की एड़पा नुम रहचा, अउर आद बाचा, 25“अक्कू धर्मेउर्बस आलर मझही नू एंग्हय लज्जेन मेटाबआ गे एंग्हय मइयाँ एन्ने सोग्गे नन्जका रअदस।”
येसुस ही कुन्दुरना ही मुन्द तेंगना
26ख़ने एलिसिबा ही भरिदेह मन्जका छव महिना नू धर्मेस गबरिएल मेर्ख़ादुतसिन गालिल प्रदेस ता नासरत नामे मन्जका सहर नू ओन्टा डिन्डा पेल्लो हेद्दे तइयस। 27दाउद बेलस ही बनस नू कुन्दुरका योसेफ नामे मन्जका आलस गने अदी ही छेका मन्जकी रहचा। आ डिन्डा पेल्लो ही नामे मरियम रहचा। 28मेर्ख़ादुतस अदी ही हेद्दे बरचस की बाचस, “एन निंगान गोड़ लग्गदन! निन खोब अनुगरह ख़क्खकी रअदी अउर धर्मेउर्बस निंग्हय गने रअदस।”
29लेकिन मरियम ई कत्थन मेन्जा की अकबकरा अउर इदी ही मने एन्दरा हिके बाचा की आद सोचआ हेल्लरा। 30ख़ने मेर्ख़ादुतस अदिन बाचस, “मरियम अमय एल्चय, एन्देरगेका निन धर्मेस ती सोग्गे ख़क्खकी रअदी। 31अक्कू एरय, निन भरिदेह मनोय अउर निन ओन्टा कुक्को ख़द्दसिन जन्मओय, अउर निन आस ही नामे येसू पिन्जके। 32आस हुरमी ती कोहाँ मनोस, अउर हुरमी ती कोहाँ धर्मेस ही तंग्दस बातारओस, अउर यहोवा धर्मेस आस ही पुरखा दाउदस लेखा आसिन राजी नन्ना अधिकार चिओस। 33आस याकुबस ही बनस मइयाँ सगरो राजी ननोस, अउर आस ही राजी इकला हूँ मला मुन्जरओ।”#२ सामु'एलस ७:१२, १३, १६; यसायाहस ९:७
34मरियम मेर्ख़ादुतसिन बाचा, “एन्ने एकसे मनो? एन्देरगेका एन गा डिन्डम रअदन।”
35ख़ने मेर्ख़ादुतस अदिन बिड़दाचस की बाचस, “नेम्हा बोलतस निंग्हय मइयाँ बरओस, अउर हुरमी ती कोहाँ धर्मेस ही सवंग निंग्हय मइयाँ एख़ ननो। औंगे ने कुन्दुरओस, आस नेम्हा मनोस, अउर आस धर्मेस ही तंग्दस बातारओस। 36एरय, निंग्हय पाहिनी एलिसिबा हूँ पच्चका बेड़ा नू ओन्टा कुक्को ख़द्दसिन जन्माआ बिद्दकी र' ई। आलर अदिन बँझली बाचका रहचर, लेकिन आद भरिदेह मन्जका छव महिना मन्जा किरकी र' ई। 37एन्देरगेका धर्मेस तो इन्दरिइम हूँ नना ओंगोस।”#सिरजन १८:१४
38ख़ने मरियम बाचा, “एन धर्मेस ही दासी हिकदन, निंग्हय बाचका कत्था लेखा एंगा गे मना नेकअन।” ताब मेर्ख़ादुतस अदी गुस्ते चले केरस।
मरियम एलिसिबान भेट नना काली
39जोक्क उल्ला ख़ोख़ा मरियम तुरतेम सपड़ारा अउर चाँड़ेम परता तरा यहुदिया प्रदेस ता ओन्टा पद्दा नू केरा, 40अउर आद जकरियास ही एड़पा नू केरा की एलिसिबान गोड़ लग्गिया। 41एकाबिरी एलिसिबा मरियम ही गोड़ लगनन मेन्जा, ताब अदी ही कोख नू मन्जका ख़द्दस उदकारस। अउर एलिसिबा नेम्हा बोलतस ती निन्दिया केरा, 42अउर एलिसिबा जोरसे चिच्चियारनुम बाचा, “निन मुक्कर नू हुरमिन्ती बग्गे धैन ही रअदी, अउर निंग्हय कोख ता ख़द्दस हूँ धैन मनोस। 43एंग्हय मइयाँ एकसे एन्ने सोग्गे मन्जा का एंग्हय उर्बास ही तंगियो एंग्हय गुसन बरचा। 44एकाबिरी एन निंग्हय गोड़ लगनन मेन्जकन, आ बिरिम एंग्हय कोख नू मन्जका ख़द्दस रिझ ती उदकारस। 45आद धैन ही र' ई, ने धर्मेउर्बस अदिन बाचका कत्था पुरा मनो बाचा की पत्ताचा।”
मरियम धर्मेस ही ओहमा ननी
46ख़ने मरियम बाचा,#१ सामु'एलस २:१-१०
“एंग्हय जिया धर्मेउर्बस ही ओहमा ननी,
47अउर एंग्हय बोलता एंग्हय बछाबउस धर्मेस नू रिझरिई।
48एन्देरगेका आस एंग्हय लेखा ख़ाड़रका दासिन हूँ सोग्गे नन्जका रअदस।#१ सामु'एलस १:११
एःरा, अक्कू ती हुरमी पिढ़ी एंगान धैन बओर।
49एन्देरगेका सवंगिया धर्मेस एंग्हय खतरी कोहाँ नलख नन्जका रअदस।
आस ही नामे नेम्हा र' ई।
50ने आस ती एल्चनर,
आर ही मइयाँ आस पिढ़ी ती पिढ़ी गुटी सोग्गे नन्दस।
51आस तंग्हय सवंगिया ख़ेक्खा ती कोहाँ नलख नन्जका रअदस।
तम्हय जिया नू घमन्ड ननू आलरिन आस छितिर-बितिर नन्जका रअदस।
52आस राजी ननू आलरिन आर ही बेलगदी ती हटबाचका रअदस,#अय्युबस ५:११; १२:१९
अउर आस किता आलरिन मइयाँ उठबाचका रअदस।
53आस किड़ा रउरिन दव चिज गुट्ठी ती उड़ताचका रअदस,
अउर उरुब आलरिन निदी ख़ेक्खा तइका रअदस।
54आस तंग्हय सोग्गेन सुरता नन्जस की,
तंग्हय दास इस्राएलसिन संगरा नन्जका रअदस।
55नम्हय पुरखरिन बाचका लेखअम, आस अबराहामस अउर आस ही ख़द्दरिन#सिरजन १७:७
दया नना गे इकला हूँ मला अम्बियस।”
56मरियम अदी गने लगभग तिन महिना गुटी रहचा की तंग्हय एड़पा किर्रिया।
बप्तिस्मा चिऊ युहन्नास ही कुन्दुरना
57एलिसिबा ही ख़द्दमाख़ो मन्ना बेड़ा अड़सिया, ख़ने आद ओन्टा कुक्को ख़द्दसिन जन्माचा। 58धर्मेउर्बस अदी ही मइयाँ कोहाँ सोग्गे एदका रअदस बअनन मेन्जर की अदी ही परोसियर अउर पाहियर अदी गने रिझरर।
59अउर आठ उल्ला नू ख़द्दसिन खतना नना गे आर ख़ोडरर। अउर अबड़र ख़द्दस गे तम्बस ही नामे लेखा जकरिया पिन्जा गे बिद्दियर।#लेविर १२:३ 60लेकिन ख़द्दस ही तंगियो बाचा, “मला! इस ही नामे युहन्ना पिन्जा पड़ारओ।”
61ख़ने अबड़र अदिन बाचर, “निंग्हय पाहियर नू तो एन्ने नामे मन्जका ने हूँ मल्लर।” 62ताब अबड़र ख़द्दस ही तम्बासिन इसारा नन्जर की मेन्जर, “निन आस ही नामे एन्दरा पिन्जा बेद्ददय?”
63अउर जकरियास ओन्टा सिलेट नेचस अउर “आस ही नामे युहन्ना हिके” बाचस की लिखचस चिच्चस। इदिन इरियर की होरमर छक्केम मन्जर। 64आ बिरिम जकरियास ही बई खुल्लरा अउर बोली फुटारा अउर आस धर्मेस ही ओहमा नना हेल्लरस। 65अउर अबड़र ही हुरमी परोसियर नू इल्चका कोरचा केरा। अउर ई हुरमी कत्था गुट्ठी यहुदिया प्रदेस ता परता छेत्र ता गोट्टे पद्दा नू बिड़रा। 66अउर ई कत्था मिनू होरमा आलर तम्हय जिया नुम बाचर, “ई ख़द्दस परदोस होले ख़ोख़ा नू एकान्ने मनोस होत्एन?” एन्देरगेका धर्मेउर्बस ही सवंग आस मइयाँ रहचा।
जकरियास ही ओहमा डन्डी
67आस ही तम्बस जकरियास नेम्हा बोलतस ती निन्दियस की मुन्द तेंगा हेल्लरस,
68“इस्राएल ता धर्मेउर्बस, धर्मेस ही ओहमा मना नेकआ।
एन्देरगेका आस तंग्हय आलर ही संगरा नना गे बरचका रअदस, अउर आरिन बछाबचका रअदस।
69आस तंग्हय दास दाउदस ही बनस ती
नमा गे ओरोत सवंगिया बछाबउसिन चिच्चका रअदस।
70एकन्ने का आस ढेर पहलेम तंग्हय नेम्हा अगमजानिर ती बाचका रहचस,
71औंगे नाम नम्हय मुदैर ती
अउर नमारिन हिंड़उर होरमर ही ख़ेक्खा ती बछाबओस।
72आस नम्हय पुरखरिन सोग्गे एदआ गे,
अउर तंग्हय नेम्हा गच्छरकन सोचअरकी,
73-74नम्हय पुरखा अबराहामस गने किरिया मोक्खस की,
अउर नमन नम्हय बैरिर ती बछाबआ गे,
75अउर नाम बेगर इल्चका ती आस ही अगू नेम्हा
अउर धर्मी मनोत की जिन्गी भर आस ही सेवा नना ओंगोत।
76अना ख़द्दयो, निन हुरमी ती कोहाँ धर्मेस ही अगमजानी बारओय,#मलाकिस ३:१
एन्देरगेका निन उर्बास ही डहरेन
सपड़आ गे आस ही अगू-अगू कालोय।
77निन आस ही आलर गे तम्हय पाप छेमा ती
बछरनन ख़क्खोय बआ की सिखाबओय।
78नम्हय धर्मेस सोग्गे अउर नरमिया मन्जका करने।
आस ही बच्छरना ही बिल्ली#१:७८ बच्छरना ही बिल्लीबच्छरना ही बिल्ली इद बरऊ ख्रिस्तसिन इदई! मेर्ख़ा ती नम्हय हेद्दे तइय्योस
79ख़ने उख़ा नू अउर खेअना ही एलचना नू रउर गे बिल्ली चिओस,
अउर नम्हय ख़ेड्ड सान्ती ही डहरे तरा एकतारओ।”#यसायाहस ९:२
80ख़ने आ ख़द्दस परदनुम अउर बोलता नू बड़ियर मन्नुम केरस। अउर आस इस्राएल नू खुला रुप नू मला एथरना गुटी फिटकी अड्डा नुम रहचस।
Obecnie wybrane:
लुकस 1: KRUX
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2024 (Active), Mother Tongue Translators Society and Wycliffe Bible Translators, Inc. All rights reserved.