लुकस 2
2
येसुस ही कुन्दुरना
(मत्तिस १:१८-२५)
1अबड़ा उल्ला नू रोम ता कोहाँ बेलस अगस्टसस तंग्हय हुरमी राजी ही होरमा आलर ही जनगनना नना गे हुकुम चिच्चस।#२:१ जनगनना रोम ता कोहाँ बेलस होरमा आलर बटी तिरआ नेकआ बआकी जनगनना ननतारा। 2कुरेनियासस सिरिया छेत्र ता राज्यपाल रहचस ख़ने आ बेड़ा जनगनना नना पहिल बेर रहचा। 3ख़ने होरमा आलर नामे दरता नना गे तम्हय-तम्हय सहर नू केरर।
4औंगे योसेफस गालिल प्रदेस ता नासरत सहर ती यहुदिया प्रदेस ता बैतुलम सहर नू केरस, आद बेल दाउदस ही सहर रहचा। योसेफस असन केरस, एन्देरगेका आस दाउदस ही बनस ता रहचस। 5आस मरियमन नामे दरता नना गे सँगेम होच्चस की केरस एन्देरगेका मरियम गने आस ही छेका मन्जकी रहचा। मरियम आ बेड़ा भरिदेह रहचा। 6अउर एकाबिरी आर बैतुलम नू रहचर ख़ने मरियम ही ख़द्द मन्ना बेड़ा अड़सिया। 7आद तंग्हय कोहाँ तंग्दसिन जनम चिच्चा अउर आसिन लेदरा नू पुज्जया अउर गोहालिनता नाइद नू उइया, एन्देरगेका आर गे रअना एड़पा अड्डा असन मला रहचा।
मेढ़हो ख़ापुर अउर मेर्ख़ादुतर
8आ माख़ा बैतुलम सहर हेद्देम परती नू मेढ़हो मेन्तुउर रहचर। अबड़र माख़ा बिरी तंग्हय मेढ़हो जेरन ख़ापा लक्का रहचर। 9धर्मेउर्बस ही ओरोत मेर्ख़ादुतस अबड़र हेद्दे एथरस, अउर धर्मेस ही बिल्ली अबड़र ही चौगुड़ती बिल्चिया, ख़ने अबड़र बग्गेम इल्चियर। 10लेकिन मेर्ख़ादुतस आरिन बाचस, “अमा एल्चा, एन्देरगेका एःरा, एन निमरिन कोहाँ खुसमारना दवसमाचार मेन्तओन, आद होरमा आलर गे मनो। 11इन्ना दाउद बेलस ही सहर नू निम्हय बछाबउस कुन्दुरका रअदस, आसिम ख्रिस्त उर्बास हिकदस। 12निमा गे इदी ही एन्ने चिन्हा मनो: निम ख़द्दसिन लेदरा नू पोजोरका अउर गोहालिनता नाइद नू किदरका ख़क्खोर।”
13ख़ने अनचोखएम और बग्गे मेर्ख़ादुतर असन एथरर ख़ने धर्मेस ही ओहमा नन्तेम एन्ने डन्डी पाड़ा हेल्लरर,
14“हुरमी ती मइयाँ मेर्ख़ा नू रऊ धर्मेस ही महबा मनन नेकआ, अउर ख़ेख़ेल नू आ आलर मझही नू नेख़ाय ती आस खुसमारदस,
अबड़ा होरमर गे सान्ती मना नेकआ।”
15एकाबिरी मेर्ख़ादुतर अबड़र गुस्ते ती किर्रियर की मेर्ख़ा नू केरर, ख़ने ख़ापुर ताम-ताम कच्छनखरआ हेल्लरर, “बरा नाम बैतुलम गुटी कालोत, अउर एन्देर मन्जकी र' ई अउर अदी ही पत्त नू मेर्ख़ादुतस ती धर्मेउर्बस नमा गे तिंगका रअदस, अदिन एरोत।”
16ख़ने अबड़र हब्बर-हब्बर केरर की मरियम अउर योसेफसिन अउर ख़द्दसिन नाइद नू किदरका ख़खियर। 17ख़ने इदिन इरियर की आ ख़द्दस ही पत्त नू अबड़रिन तिंगका कत्था अबड़र चौगुड़ती तिंगियर चिच्चर। 18ख़ने आ कत्था गुट्ठी मिनुर होरमा आलर छक्केम मन्जर। 19लेकिन मरियम ई हुरमी कत्थन सुरता नन्तेम अउर तंग्हय जिया नुम उइया। 20एकान्ने अबड़रिन बाचका रहचस अन्नेम हुरमी कत्था मेन्जका अउर इरका खतरी, धर्मेस ही बग्गेम महबा अउर ओहमा नन्तेम ख़ापुर किर्रियर।
ख़द्दस ही नामे येसू पिंजियर
21ख़द्दस ही कुन्दुरका आठौ उल्ला नू योसेफस अउर मरियम धर्मेस ही व्यवस्था लेखा ख़द्दस ही खतना नन्जर की आस ही नामे येसू पिन्जियर। मरियम भरिदेह मन्ना ती अगू मेर्ख़ादुतस अदिन ख़द्दस ही नामे येसू पिन्जके बाचका रहचस।#लेविर १२:३; लुकस १:३१
धर्मेस ही एड़पा नू बोलो येसुसिन सोपना
22मोसास ही व्यवस्था लेखा अबड़र सुध मन्ना बेड़ा मन्जका ख़ोख़ा योसेफस अउर मरियम बोलो येसुसिन धर्मेउर्बस हेद्दे सोपआ गे#२:२२ येसुसिन धर्मेउर्बस हेद्दे सोपआ गे अगर यहुदी आली एकअम ख़द्दसिन जनम चिई होले, आद चालिस उल्ला ख़ोख़ा लेका धर्मेस ही एड़पा नू कोरआ पबआ लगिया अउर ख़ोख़ा नू मोसास ही व्यवस्था लेखा दाँड़े अरगआ गे कला पबआ लगिया। यरुसलेम ता धर्मेस ही एड़पा नू ओन्दरर। 23धर्मेउर्बस ही व्यवस्था नू एन्ने लिखरकी र' ई, “ओरे नू कुन्दुरका हुरमी कोहाँ ख़द्दस तो धर्मेउर्बस ही खतरी नेम्हा उइया पड़ारओ।”#उरख़ाकाना १३:२, १२ 24अउर धर्मेउर्बस ही व्यवस्था नू लिखरका लेखा “पड़की ही ओन्द जोःड़ा मला होले पेरवा ही ओन्द जोःड़ा”#लेविर १२:६-८ अबड़र दाँड़े अरगतआ गे ओन्दरर।
25आ बेड़ा यरुसलेम नू सिमियोन नामे मन्जका ओरोत आलस रहचस। अउर आस धर्मी अउर धर्मेस ही भक्ती ननू आलस रहचस। आस इस्राएलरिन बछाबऊ आलस ही आसे एःरा लगियस अउर नेम्हा बोलतस आस गने रहचस। 26“धर्मेउर्बस ही ख्रिस्तसिन मला एरना गुटी निन मला खेए” बाचस की आस गे नेम्हा बोलतस पहिलेतिम बाचका रहचस। 27अउर आस, नेम्हा बोलतस ही अगुवाई तरतू धर्मेस ही एड़पा नू बरचस। एकाबिरी तंग्यो तम्बर ख़द्द येसुसिन व्यवस्था लेखा विधी नना गे धर्मेस ही एड़पा नू ओन्दरर। 28ख़ने आस ख़द्दसिन तंग्हय कोइछा नू होच्चस अउर धर्मेसिन धन्यवाद चिच्चस की बाचस,
29“अना धर्मेउर्बायो, निन निंग्हय दाससिन
निंग्हय आनका कत्था लेखा, अक्कू एंगा सान्ती ती बिदा चिआ।
30एन्देरगेका एंग्हय ख़न्न निंग्हय बछाबउसिन इरकी र' ई,
31निन आसिन होरमा आलर ही अगू सपड़ाचका रअदय,
32इस नन-यहुदिर गे डहरे एदआ गे
अउर निंग्हय इस्राएली आलर गे महबा ही खतरी बिल्ली हिकदस।”#यसायाहस ४२:६; ४९:६; ५२:१०
33येसुस ही तंगियो तम्बर आस ही बाचका कत्थन मेन्जर की छक्केम मन्जर। 34अदिही ख़ोख़ा सिमियोनस अबड़र गे आसिस चिच्चस, अउर आस ही तंगियो मरियमन बाचस, “एरय, धर्मेस ई ख़द्दसिन इस्राएल नू बग्गे आलरिन आस ती नास नना गे अउर बग्गे आलरिन बछाबआ गे चज्जियस। अउर इस धर्मेस ती ओन्टा चेताबअना ही चिन्हा रअदस, लेकिन बग्गे आलर इसिन हिंड़ओर। 35औंगे बग्गे जिया ही सोच गुट्ठी बिल्ली नू एथरोओ। अउर टडरी ती उम्पना लेखा निंग्हय अपना जिया हूँ बग्गेम नुजओ।”
36-37धर्मेस ही एड़पा नू हन्ना बअना ओन्टा पच्चो अगमजानी रहचा। आद आसेर बनस ता फनुएलस ही तंगदा रहचा। बेन्जा मन्जका सात बछर ख़ोख़ा आद बेवा मन्जकी रहचा, अउर आद ८४ बछर ही मन्जकी रहचा। आद धर्मेस ही एड़पन मला अम्बा लगिया, उबसना अउर गोहरारना गने उल्लामाख़ा आद धर्मेस ही सेवा नना लगिया। 38आहबाकी आद बरचा की धर्मेसिन धन्यवाद चिच्चा अउर यरुसलेम ही बछरना ही आसे इरू होरमारिन ख़द्दस ही पत्त नू बाचा।
नासरत नू किर्रियर
39ख़ने योसेफस अउर मरियम धर्मेउर्बस ही व्यवस्था लेखा हुरमी नलखन मुन्जियर, की गालिल प्रदेस ता तम्हय सहर नासरत नू किर्रियर। 40ख़द्द येसुस परदनुम अउर बरियो मन्तेम अउर बुद्धी नू बढ़रनुम केरस। अउर धर्मेस ही अनुगरह आसी मइयाँ रहचा।
धर्मेस ही एड़पा नू ख़द्द येसुस
41येसुस ही तंगियो तम्बर हरेक बछर कट्टना पबनी नू यरुसलेम काला लगियर।#उरख़ाकाना १२:१-२७; व्यवस्था १६:१-८ 42एकाबारी येसुस १२ बछर#२:४२ १२ बछर यहुदिर गे लेल्ले ख़द्दस १२ बछर ही मना लगियस, ताब आस ख़द्द मला मना लगियस। आसिन जोख़र नू गिन्ती नना लगियर। ही रहचस, ख़ने आर पबनी ही रितिरिवाज लेखा यरुसलेम नू केरर। 43पबनी ही उल्ला मुन्जरा ख़ने आर एड़पा किर्रा हेल्लरर। येसुस यरुसलेम नुम रही केरस। लेकिन इदिन तो तंगियो तम्बर मला अख़चर। 44आर सोचआ लगियर का येसुस तंग्हय संगेर गने रअदस। आर ओन्द उल्ला ही डहरे इक्का रहचर। आर आसिन तम्हय पाहियर नू अउर तम्हय संगेर नू बेद्दा हेल्लरर। 45लेकिन येसुस मला ख़क्खरस, ख़ने आर बिद्दनुम-बिद्दनुम यरुसलेम किर्रियर। 46तिन उल्ला ख़ोख़ा आर आसिन धर्मेस ही एड़पा नू मोसास ही व्यवस्था सिखाबउर ही मझही नू उक्कियस की आर ही कत्थन मेन्ना अउर आरिन प्रस्न मेन्ना ख़क्खियर। 47मिनू गुट्ठी होरमर आसी ही बुझुरना सवंग अउर आसी ही उत्तर चिअना ती छक्केम मन्जर। 48येसुस ही तंगियो तम्बर आसिन इरयर की छक्केम मन्जर। अउर आस ही तंगियो आसिन बाचा, “ए बेटा, निन एम्हय गने एन्दरगे एन्ने नन्जकय? एःरा, निम्बस अउर एन हयरान मन्जकम की निंगन बेद्दा लक्कम।”
49येसुस आरिन बाचस, “निम एंगन एन्दरगे बेद्दालक्कर? एन्दरा निम मला अख़दर एंगा एम्बस ही एड़पा नू रअना र' ई?” 50लेकिन आस ही बाचका कत्थन मरियम अउर योसेफस बुझरआम पोल्लर।
51ताब येसुस तंगियो तम्बर गने नासरत केरस। आस आर ही पेसका नू रहचस। आस ही तंगियो ई हुरमी कत्थन तंग्हय जिया नू उइया। 52ख़ने येसुस लुर नू, देह नू अउर धर्मेस अउर आलर ही अनुगरह नू बढ़रनुम केरस।#१ सामु'एलस २:२६; नेतकत्था ३:४
Obecnie wybrane:
लुकस 2: KRUX
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2024 (Active), Mother Tongue Translators Society and Wycliffe Bible Translators, Inc. All rights reserved.