Matthew 21
21
1ကိုယ်တော်ယေရှုန တပဲ့တော်တေဟ ဂျေရုဆလင်မြို့အနီးကော် ရောက်တဲ့အခါ ဆံလွင်တောင်ခေရှိ ဗက်ဖာဂေမြို့ကော် ရောက်လာလေဟယ်။ ဟဲင်းနေရာမှာ ကိုယ်တော်ယေရှုဟ တပဲ့တော်နှေယောက်ကော် ရှေ့ဟနေကြိုတင်ဆွားစေမောက် 2"ရှေ့ဟရွာကော် ဆွားကြပါ။ ဟဲင်းနေရာကော် ရောက်ဟာန တခါတည်း ကြိုးချည်ဟားတဲ့ မြည်းမa တစ်ကောင်န မြည်းဆငယ်တစ်ကောင်ကော် တွေ့လိမ့်မဲင်။ ဆူ့တော့ကော် ကြိုးဖ္လေပေးမောက် ငါ့နားကော် ယူလာခဲ့ပါ။ 3တစ်ယောက်ယောက်ဟ မေးလောက်ရှိခါ ဟဲင်းလူကော် 'ကိုယ်တော်ဟ ဟဲင်းမြည်းကော် လိုအပ်တော်မူလောက်ပါ' လောက် ပြောလိုက်လောက်ရှိခါ ဟဲင်းလူဟ သင်တော့ကော် တခါတည်း ပေးလိမ့်မဲင်။ 4ဟဲင်းအကြောင်းအရာန ပတ်သက်မောက် အရိယာဆူတော်စင်ဟောကြားခဲ့တဲ့ 5'ဂျေရုဆလင်မြို့ဆားတော့ကော် ပြောလိုက်ပါ။ ကြည့်ကြပါ။ သင်တော့ရဲ့ ရှင်ဘုရင်ဟ နှိမ့်နှိမ့်ခ္လခ္လ န မြည်းငယ်ကော် စီးမောက် ကြွရောက်တော်လာဝေါက်' ဆိုတဲ့ စကားဟ ပ္လေ့စုံမှာဖြစ်ဟယ်" လောက် မိန့်တော်မူဟယ်။ 6ပြီးခါ တပဲ့တော်တေဟ ကိုယ်တော်ယေရှု မိန့်မှာတော်မူတဲ့အတိုင်း ဆောင်ရွက်ကြလေဟယ်။ 7ဆူ့တော့ဟ မြည်းမကူးန မြည်းငယ်ကော် ကိုယ်တော်နားကော် ယူဆောင်လာမောက် မြည်းငယ်ပေါ်မှာ ဝတ်ရုံတေခင်းပေးခါ ကိုယ်တော်ဟ ဟဲင်းမြည်းငယ်အပေါ်မှာ ထိုင်တော်မူလေဟယ်။ 8အကြီးကျယ်များတဲ့ လူထုပရိတ်ဆတ်တေဟလဲ ဆူ့တော့ရဲ့ဝတ်ရုံတေကော် လမ်းပေါ်မှာ ခင်းပေးကြမောက် တချို့ခါ ဆစ်ရွက်ဆစ်ခက်တေကော် လမ်းပေါ်မှာ ခင်းပေးကြလေဟယ်။ 9ကိုယ်တော်ရဲ့ရှေ့ဟနေဆွားတဲ့ လူထုပရိတ်ဆတ်တေန နောက်မှလိုက်တဲ့ လူထုပရိတ်ဆတ်တေဟ "ဒါဝိဒ်ရဲ့ဆားတော်ကော် ချီးမွမ်းပါဟယ်။ ဘုရားရှင်ရဲ့နံမေန ကြွလာတော်မူတဲ့ ကိုယ်တော်ဟ မင်္ဂလာရှိပေဟယ်။ ဘုရားရှင်ရဲ့ဂုဏ်ကျေးဇူးတော်တေကော် ချီးမွမ်းပါဟယ်" လောက် ကြွေးကြော်ကြလေဟယ်။ 10ကိုယ်တော်ယေရှု ဂျေရုဆလင်မြို့ကော် ရောက်တဲ့အခါ တစ်မြို့လုံးဟ ရုတ်ရုတ်သဲသဲဖြစ်မောက် "ဆူ့ဟ မဆူ့ဟား" လောက် မေးမြန်းကြလေဟယ်။ 11ဟဲင်းခါ လူထုပရိတ်ဆတ်တေဟ "ဆူဟ ဂါလိလဲပ္လေ၊ နာဇရက်မြို့ဟနေလာတဲ့ အရိယာဆူတော်စင် ယေရှုဖြစ်ဟယ်" လောက် ပ္လန်ဖ္လေကြလေဟယ်။ 12ကိုယ်တော်ယေရှုဟ ဗိမာန်တော်ကော် ဝင်ရောက်မောက် ဟဲင်းနေရာမှာ အရောင်းအဝယ်လုပ်နေကြဆမား အကုန်ဟုန်းတော့ကော် နှင်ထုတ်ခြင်း၊ ပိုက်ဆံလဲဆမားတေန ခိုးရောင်းဝယ်ဆမားတော့ရဲ့စားပွဲကော် မှောက်လှန်ပစ်ဟာတေ ပြုလုပ်လေဟယ်။ 13ကိုယ်တော်ဟ ဟဲင်းလူတေကော် "ငါရဲ့ဗိမာန်တော်ကော် ဝတ်ပြုဆုတောင်းဆမားတော့ရဲ့ အိမ်တော်လောက် ခေါ်ကြလယ်ဝ သင်တော့ဟ ဟဲင်းနေရာကော် သူခိုးတေရဲ့ ခိုးအောင်းရာနေရာဖြစ်အောင် လုပ်နေကြဟယ်" လောက် မိန့်တော်မူလေဟယ်။ 14မျက်မမြင်န ကိုယ်လက်အင်္ဂါချို့တဲ့ဆမားတေဟ ဗိမာန်တော်မှာရှိတဲ့ ကိုယ်တော်ယေရှုနားကော် လာရောက်ကြခါ ကိုယ်တော်ဟလဲ ဟဲင်းလူတေကော် ကုသပေးလေဟယ်။ 15ဂျူးပုရောဟိတ်အကြီးအကဲတေန ကျမ်းတတ်ဆရာတေဟ ဗိမာန်တော်အတွင်းမှာ ကိုယ်တော်ပြုတဲ့ အံ့ဖွယ်အမှုတေကော် မြင်ခဲ့ကြမောက် လူဆငယ်တေဟ "ဒါဝိဒ်ရဲ့ဆားတော်ကော် ချီးမွမ်းပါဟယ်" လောက် အော်ဟစ်တဲ့အဆံကော် ကြားတဲ့အခါ အကြီးကျယ် စိတ်ဆိုးကြလေဟယ်။ 16ဟဲင်းခါ ဆူ့တော့ဟ ကိုယ်တော်ကော် "လူဆငယ်တေ အော်ဟစ်ပြောနေဟာကော် ကြားကြလား" လောက် မေးခါ ကိုယ်တော်ဟလဲ "ကြားပါဟယ်။ 'ဘုရားရှင်ဟ လူဆငယ်တေန နို့စို့အရွယ် လူဆငယ်တေအတွက် ကျေးဇူးတော်ချီးမွမ်းစကားတေကော် ဆင်ပေးခဲ့ပြီးဝေါက်' ဆိုတဲ့ကျမ်းစာကော် သင်တော့ မဖတ်ဖူးကြဘူးလား" လောက် မိန့်တော်မူလေဟယ်။ 17ပြီးခါ ကိုယ်တော်ယေရှုဟ ဆူ့တော့နားဟနေထွက်ခွာမောက် ဗေသနိရွာကော် ဆွားမောက် ဟဲင်းနေရာမှာ ညအချိန်ကော် ကုန်ဆုံးစေဟယ်။ 18နောက်တစ်နေ့ မနက်စာစောစောမှာ ကိုယ်တော်ဟ ဂျေရုဆလင်မြို့ကော် ပ္လန်ကြွလာခါ လမ်းတပိုင်းမှာ ဆာလောင်တော်မူလေဟယ်။ 19ပြီးခါ ကိုယ်တော်ဟ လမ်းဖေးမှာရှိတဲ့ သဖန်းပင် တစ်ပင်ကော် မြင်တော်မူတဲ့အခါ ဟဲင်းအပင်ရှိနေရာကော် ကြွတော်မူခါ အရွက်တေမှလွဲမောက် ဖယ်အရာမှ မရှိဘဲညောင်း ဟဲင်းအပင်ကော် "ခုကစမောက် ဖယ်အခါမှ အဆီးထပ်မဆီးပါစေနဲ့" လောက် မိန့်တော်မူပြီးခါ ဟဲင်းအပင်ဟ တခါတည်း ခြောက်ဟားလေဟယ်။ 20တပဲ့တော်တေဟ ဟဲင်းအကြောင်းအရာကော် မြင်တဲ့အခါ အံ့ဩမောက် "သဖန်းပင်ဟ တခါတည်း ဖယ်လဲညိုးခြောက်ဟား" လောက် ဆိုကြလေဟယ်။ 21ဟဲင်းခါ ကိုယ်တော်ဟ ဆူ့တော့ကော် "သင်တော့ကော် ငါအမှန်တိုင်းပြောမဲင်။ သင်တော့ဟ ယုံကြည်မှုရှိမောက် သံသယကင်းမဲ့ကြခါ ငါဟ အဲသဖန်းပင်ကော် လုပ်သလဲ သင်တော့လဲ လုပ်နိုင်ကြရုံသာမက အဲတောင်ကော် 'ရွေ့ဟားမောက် ပင်လယ်ထဲကော် က္လစေ' လောက်ပြောခါ ဟဲင်းအတိုင်းဖြစ်မှာ ဖြစ်ဟယ်။ 22သင်တော့ဖယ်အရာကော်မဆို ယုံကြည်မှုရှိရှိန ဆုတောင်းခါ ဟဲင်းအရာကော် ရရှိမှာပဲ ဖြစ်ဟယ်" လောက် မိန့်တော်မူလေဟယ်။ 23ကိုယ်တော်ယေရှုဟ ဗိမာန်တော်ကော် ဝင်မောက် ဟောပြောသွန်သင်နေချိန်မှာ ဂျူးပုရောဟိတ်အကြီးအကဲတေန ဂျူးလူမျိုးအကြီးအကဲတေဟ ကိုယ်တော်နားကော် ရောက်လာကြမောက် "သင်ဟ အဲအရာတေကော် မဆူ့ရဲ့အခွင့်အာဏာနလုပ်နေဟား။ ဟဲင်းအခွင့်အာဏာကော် မဆူ့ဟ သင့်ကော် ပေးဟား" လောက် မေးမြန်းကြဟယ်။ 24ကိုယ်တော်ယေရှုဟလဲ "သင်တော့ ငါမေးတဲ့မေးခွန်းကော် ဖြေနိုင်ခါ အဲအရာတော့ကော် မဆူ့ရဲ့အခွင့်အာဏာန လုပ်နေဟားဆိုဟာကော် သင်တော့ကော် ငါပြောပြမဲင်။ 25ယောဟန်ကော် ရေနှစ်မင်္ဂလာပေးဖော့ အခွင့်အာဏာကော် ရွှေမြို့တော်ဟ ပေးဟာလား။ လူတစ်ယောက်ယောက်ဟပေးဟာလား" လောက် မေးမြန်းတော်မူဟယ်။ ဟဲင်းခါ ဆူ့တော့အချင်းချင်း ဆွေးနွေးမောက် "ငါတော့ရွှေမြို့တော်ဟပေးဟာလောက်ဆိုခါ ကိုယ်တော်ဟ ငါတော့ကော် စာလောက်ယောဟန်ကော် မယုံကြည်ကြဟားလောက် မေးလိမ့်မဲင်။ 26မဟုတ်ဘဲလောက် လူတစ်ယောက်ယောက်ဟ ပေးဟာလောက်ဖ္လေခါလဲ လူတေဟ ယောဟန်ကော် အရိယာဆူတော်စင် ဖြစ်ဟာလောက် ယုံကြည်ကြညောင်း ဟဲင်းလူတေဟ ငါတော့ကော် တစ်ခုခုလုပ်မဲင်ကော် ကြောက်ရပါဟယ်" လောက် ဆိုကြဟယ်။ 27ပြီးခါ ဆူ့တော့ဟ ကိုယ်တော့်ကော် "ကျွန်ုပ်မဆိပါဘူး" လောက် ပ္လန်လည်လျှောက်တင်ခါ ကိုယ်တော်ဟလဲ "ဟဲင်းလဲဆိုခါ ငါဟလဲ မဆူ့ရဲ့အခွင့်အာဏာန ဟဲင်းအရာတေကော် လုပ်နေဟားဆိုဟာကော် သင်တော့ကော် ပြောပြမှာ မဟုတ်ဘူး" လောက် ပ္လန်လည်မိန့်ကြားလေဟယ်။ 28ကိုယ်တော်ယေရှုဟ "သင်တော့ ဖယ်လဲထင်ကြဟား။ လူတစ်ယောက်မှာ ဆားနှေယောက်ရှိလောက် ဆူဟ ဆားအကူးနားကော်ဆွားမောက် 'ငါ့ဆား၊ စပျစ်ခြံကော် ခုနေ့ဆွားမောက် အလုပ်လုပ်ပါ' လောက် ပြောလေဟယ်။ 29ဟဲင်းဆားဟ 'အကျွန်ုပ်မဆွားချင်ဘူး' လောက် ပ္လန်လည်ဖ္လေပြီးတဲ့အခါမှာ စိတ်ပြောင်းဟားညောင်း စပျစ်ခြံကော် ဆွားလေဟယ်။ 30ပြီးခါ ဖခင်ဟ ဆားငယ်နားကော် ဆွားမောက် ဟဲင်းနည်းအတိုင်းပြောခါ ဆားငယ်ဟ 'ဟုတ်ကဲ့ပါ အဖေ၊ ကျွန်ုပ်ဆွားလိုက်ပါမဲင်' လောက် ပ္လန်ဖြေလယ်ဝ မဆွားဘဲ နေလေဟယ်။ 31ဟဲင်းဆားနှေယောက်မှာ မဆူ့ဟ ဖခင်ရဲ့အလိုကော် လုပ်တဲ့လူဖြစ်ဟား" လောက် ကိုယ်တော်ယေရှုဟ မေးတော်မူတဲ့အခါ ဆူ့တော့ဟ "ပထမဆားဖြစ်ပါဟယ်" လောက်လျှောက်တင်ခါ ကိုယ်တော်ဟလဲ "သင်တော့ကော် ငါအမှန်တိုင်းပြောရခါ အခွန်ကောက်ခံဆမားတေန ပြည့်တန်ဆာတေဟ ဘုရားရှင်ရဲ့ ဆာဆနာတော်အတွင်းကော် သင်တော့ထက် အရင်ဝင်ရောက်ကြရမှာပဲဖြစ်ဟယ်။ 32စာလောက်ဟားဆိုခါ ရေနှစ်မင်္ဂလာဆရာယောဟန်ဟ သင်တော့နားကော် လာမောက် လမ်းမှန်ကော် ပြသခဲ့လယ်ဝ သင်တော့ဟ ဆူ့ကော် မယုံကြည်ကြဘူး။ ဟဲင်းပေမဲ့ အခွန်ကောက်ခံဆမားတေန ပြည့်တန်ဆာတော့ခါ ဆူ့ကော် ယုံကြည်ကြဟယ်။ သင်တော့ဟ ဟဲင်းအရာတေကော် မြင်လယ်ဝ ဆူ့ကော် ယုံကြည်မောက် သင်တော့ရဲ့အပြစ်ဒုစရိုက်အတွက် နောင်တသံဝေဂရဟာတေ မရှိကြဘူး။ 33နောက်ထပ်ပုံဥပမာတစ်ခုကော် နားထောင်ကြပါ။ ခြံပိုင်ရှင်တစ်ယောက်ဟ စပျစ်ပင်တေစိုက်ပြီးခါ ခြံစည်းရိုးခတ်မောက် ခြံထဲမှာ စပျစ်ရည်ပြုလုပ်ဖော့ ကျင်းကော် တူးမောက် မျှော်စင်ကော် ဆောက်လေဟယ်။ ပြီးခါ ဟဲင်းခြံကော် ခြံငှားဆမားတော့ကော် ငှားရမ်းမောက် တခြားတိုင်းပ္လေကော် ခရီးထွက်ခဲ့လေဟယ်။ 34စပျစ်ဆီးတေ ရိတ်ဆိမ်းချိန်ကော် ရောက်တဲ့အခါ ပိုင်ရှင်ဟ ဆူ့ရဲ့ဝေစုကော် ရယူဖော့ ဆူ့ရဲ့အစေခံတေကော် ခြံအငှားဆမားတေနားကော် စေလွှတ်လေဟယ်။ 35ဟဲင်းပေမဲ့ ဟဲင်းခြံငှားဆမားတေဟ ပိုင်ရှင်ရဲ့အစေခံတချို့ကော် ရိုက်နှက်မောက် တချို့ကော် ဆတ်ပြီးခါ တချို့ကော်ခါ ခဲနပေါက်ကြဟယ်။ 36အဲခါ ပိုင်ရှင်ဟ အရင်ဟထက် ပိုမောက်များတဲ့ တခြားအစေခံတော့ကော် စေလွှတ်လိုက်လယ်ဝ ခြံငှားဆမားတေဟ အဲအစေခံတေကော် အရင်အတိုင်းပဲ လုပ်ကြဟယ်။ 37နောက်ဆုံးမှာ ခြံပိုင်ရှင်ဟ ဆူ့ရဲ့ဆားကော် စေလွှတ်မောက် 'ငါရဲ့ဆားကော်တော့ ဆူ့တော့ဆေချာပေါက် လေးစားကြမှာပဲ' လောက် တွေးနေဟယ်။ 38ဟဲင်းပေမဲ့ ခြံအငှားဆမားတေဟ ပိုင်ရှင်ရဲ့ဆားလာနေဟာကော် မြင်ခါ ဆူ့တော့အချင်းချင်း "အဲလူဟ အမွေဆက်ခံမဲ့လူ ဖြစ်ဟယ်။ လာကြ၊ ဆူ့ကော်ဆတ်မောက် ဆူ့ရဲ့အမွေကော် ရယူကြမဲင်' လောက် ပြောပြီးခါ 39ဆူ့ကော် ဖမ်းမောက် စပျစ်ခြံအပြင်ကော် ဆွဲခေါ်ပြီးခါ ဆတ်ပစ်ကြလေဟယ်။ 40ဟဲင်းကြောင့် စပျစ်ခြံပိုင်ရှင်ပ္လန်လာတဲ့အခါ ဟဲင်းခြံငှားဆမားတေကော် ဖယ်လဲလုပ်မဟား" လောက် မေးတော်မူဟယ်။ 41ဆူ့တော့ဟ "ပိုင်ရှင်ဟ ဆေချာပေါက် ဟဲင်းယုတ်မာတဲ့လူတေကော် အဆုံးစီရင်လိမ့်မဲင်။ ပြီးခါ စပျစ်ခြံကော် ရိတ်ဆိမ်းချိန်ရောက်ခါ ဆူ့ရဲ့ဝေစုကော် ပေးမဲ့ တခြားခြံငှားဆမားတေကော် ငှားရမ်းပါလိမ့်မဲင်" လောက် ပ္လန်လည် လျှောက်တင်ကြလေဟယ်။ 42ပြီးခါ ကိုယ်တော်ယေရှုဟလဲ "'တိုက်ဆောက်ဆမားတေဟ အရေးမပါဘူးလောက်ထင်မောက် ပစ်ပယ်ဟားတဲ့ ကျောက်ဟ အရေးပါဆုံးထောင့်ချုပ်ကျောက် ဖြစ်လာဟယ်။ ဟဲင်းအံ့ဖွယ်အမှုတေကော် ဘုရားရှင်ဟ ဖန်ဆင်းတော်မူဟယ်' ဆိုတဲ့ကျမ်းစာကော် သင်တော့မဖတ်ဖူးကြဘူးလား။ 43ဟဲင်းကြောင့် သင်တော့ကော် ငါပြောမဲင်၊ သင်တော့နားဟနေ ဘုရားရှင်ရဲ့ဆာဆနာတော်ကော် ဆိမ်းယူမောက် ကောင်းမွန်တဲ့အဆီးအပွင့်တေ ပြုလုပ်နိုင်ဆမားနားကော် အပ်နှင်းတော်မူမှာဖြစ်ဟယ်။ 44ကျောက်ပေါ် ကော် က္လတဲ့လူမဆူ့ညင်းညင်း အပိုင်းပိုင်းက္လိုးဟားမှာဖြစ်မောက် ဟဲင်းကျောက်ဟ တစ်ယောက်ယောက်အပေါ်ကော် က္လခါလဲ ဟဲင်းလူဟ ညက်ညက်က္လေဟားမှာ ဖြစ်ဟယ်" လောက် မိန့်တော်မူလေဟယ်။ 45ဂျူးပုရောဟိတ်အကြီးအကဲတေန ဖာရိရှဲတေဟ ကိုယ်တော်ရဲ့ပုံဥပမာကော် ကြားခါ ဆူ့တော့အကြောင်း မိန့်တော်မူဟာကော် ဆိကြညောင်း 46ကိုယ်တော်ကော် ဖမ်းဆီးဖော့ ကြိုးစားကြလယ်ဝ လူထုပရိတ်ဆတ်တေဟ ကိုယ်တော်ကော် အရိယာဆူတော်စင် တစ်ပါးအဖြစ် မှတ်ယူကြညောင်း ဆူ့တော့ဟ လူတေကော် ကြောက်ကြဟယ်။
Obecnie wybrane:
Matthew 21: INT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the Intha NT is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.