THILSIAM THU 11
11
Babel Insâng Thu
1Zia hun a hin, khawvel ah pau chi khat bep leh thumal kibang mat ahi.
2Mihingte chu sualam gam in a kipêm pek ua, Shinar phâijawl a hung tung tau ah, zia tak ah chun um mun a khual tau a.
3Chun, a hung kiho ua, “Kisau in, cheklei siam hitiu in, pha tak in hâl tâk hitiu,” a tiu a. Tichun, suang thasâng in cheklei leh a châlmatna ding thingnâi thasâng ah thauvomman a hun nei tau a.
4Amau chun, “Kisau in, khawpi siam hitiu; chuleh, In sâng vân supha hial ah sâng in bawl hitiu in, I min uh thansak hitiu; achutiloleh, lei chung zosia ah hin thejak in hung um kha tawl hitiu,” a tiu a.
5Tichun, mihingte khawpi leh Insâng bawlte entha dingin Lalpa chu a chia suk tai.
6 Lalpa chun, “Ngai tiam un, mite hi chi khat leh pau khat bep a hiu ah, zia thil hi a bawl pan tau hilam; tu’hin vang a nop nop uh bawl leule a bawl maw ding uh pakhat cha le umlo ahi hilam!
7Hung unla, vachia suk hitiu in, a kihotua theilona ding un a pau uh va sukdanglam piak hitiu,” a tia.
8Chutichun, Lalpa’n amau haw chu zia tak ah kipat chun lei chung zosia’n a thejak ta’n; tichun, a khawpi bawl lai uh chu a haisan tau hi.
9Ziaziakchun, a min in Babel#Zia chu, buaina, ti’na ahi a sau ah; Lalpa’n zia tak ah chun mi zosia pau a la sukdanglam tâk ziakin: zia kipat chun Lalpa’n amau chu lei chung zosia’n a thejak ta ahi.
Shem Suante Chanchin
10Ziate hi Shem suante chu a hiu a: Shem chu kum za khat mi ahi ah, tui lêt nung kum ni ahi in chapa Arpaksad a hing a;
11Arpaksad a hin zaw nung in Shem chu kum za nga a dam nalai ah; chapa leh chanu dang dang le a nei nalai hi.
12Arpaksad chun kum sawmthum leh nga a ti’n in chapa Shelah a hun hing a;
13Shelah a nei zaw nung in Arpaksad kum za li leh thum a dam nalai ah, chapa leh chanu dang dang le a nei nalai hi.
14Shelah chun kum sawmthum a tin in chapa Eber a hun hing a;
15Eber a nei zaw nung in Shelah chu kum za li leh thum a dam nalai ah, chapa leh chanu dang dang le a nei nalai hi.
16Eber chun kum sawmthum leh li a tin in chapa Peleg a hun nei in;
17Peleg a nei zaw nung in Eber chu kum za li leh sawmthum a dam nalai ah, chapa leh chanu dang dang le a nei nalai hi.
18Peleg chun kum sawmthum a tin in chapa Reu a hun nei in;
19Reu a nei zaw nung in Peleg chu kum za ni leh kua a dam nalai ah, chapa leh chanu dang dang le a nei nalai hi.
20Reu chun kum sawmthum leh ni a tin in chapa Serug a hun nei in;
21Serug a nei zaw nung in Reu chu kum za ni leh sagi a dam nalai ah, chapa leh chanu dang dang le a nei nalai hi.
22Serug chun kum sawmthum a tin in chapa Nahor a hun nei in;
23Nahor a nei zaw nung in Serug chu kum za ni a dam nalai ah, chapa leh chanu dang dang le a nei nalai hi.
24Nahor chun kum sawmni leh kua a tin in chapa Terah a hun nei in;
25Terah a nei zaw nung in Nahor chu kum za khat sawm leh kua a dam nalai ah, chapa leh chanu dang dang le a nei nalai hi.
26Terah chun kum sawmsagi a tin in chapa Abram, Nahor leh Haran te hi a hun hing hi.
Terah Suante Chanchin
27Ziate hi Terah suante chu a hiu ah: Terah chun chapa Abram, Nahor leh Harante hi a nei ah: Haran in chapa Lot a nei hi.
28Haran chu a pianna, Kaldai gam ah Ur khua a um lai un, a pa Terah thi masang in a la thi tai.
29Chuleh, Abram tawh Nahor chun ji a nei gêl tau ah: Abram ji min chu Sarai ahi’n; Nahor ji min chu Haran chanu Milkah ahi.
30Tu’hin, Sarai chu a chîng in, cha him him a nei puai.
31Terah in a chapa Abram tawh a tupa Lot, Haran chapa tawh a monu Sarai, a chapa Abram ji tawh a pui in, Kanaan gam ah kipêm dingin Kaldai gam ah Ur khua chu a hun pawtsan tau a: Himaleh, Haran khua a hung tun un, zia tak ah chun um mun a khualden tau a.
32Terah dam sung chu kum za ni leh kum nga ahi’n; tichun, Haran ah chun Terah a thi tai.
Atualmente selecionado:
THILSIAM THU 11: VAIPBSI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.