Gɔwɔ tɔɔi 20
20
Abrahamə da Abimelɛkə
1Abrahamə ə həɠə Negɛvə lɔi hu, ə li ə hee Kadɛsə taa da Surə taa di lɔwai. Yili pulu nwɔ̨nɔ̨, ə li Gerarə daai. 2Abrahamə ə kɛ Sara mąą mɛ̨nį ɓa: «Mą́ą́hala ka tii.» Kɛlaa Gerarə tɔɔmun Abimelɛkə ə Sara həɠə. 3Kɛlaa, kpinįi, Yálá ə gbɔwɔ lɛ Abimelɛkə ɓa hįį pələ, yɛ mą: «Nɛ̨ɛ̨nui ŋɛ̨i ə́ ɉəɠə, hilɛ kaa mą, ya wala nɛɛ laa, ə́ kaa pai haai mąą mɛ̨nį ɓa.»
4Abimelɛkə hvo ni kɛ laa li a nɛ̨ɛ̨nui tii, ə Yálá woo ŋąąpənə, yɛ mą: «Nwɔ́ mɛ̨nį Ną́mu, ɲą́ą́ kwa nwɔ́ lɔi hu nuą hɔn və kuɔ mɛ̨nį ŋɛ̨i hu, akɛtii ə́ kaa pai ku nwun na pilii yili mąą mɛ̨nį ɓa? 5Abrahamə kpinį kpɔ ɓə kɛ mą́ą́: ‹Mą́ą́hala ɓaa nɛ̨ɛ̨nui ŋɛ̨i.› Nɛ̨ɛ̨nu yaa kpɛli yɛ diɛ: ‹Níɛ li.› Və́ kɛ ɉəɠə li a kiliŋąhiɛ ɲɔ̨nwɔ̨ɔ̨.»
6Ɉiin tɔ̨nɔ̨i tii hu, Yálá ə Abimelɛkə woo ŋąąpənə, yɛ mą: «Ɲą́ą́ gbɛli ŋą́ gɔlɔn gɛ́ diɛ, hvo kɛ ɉəɠə li a kiliŋąhiɛ ɲɔ̨nwɔ̨ɔ̨. Ɲą́ą́ ɓə hvaa mą, gɛ́ hvo lɛɠɛ nɛ̨ɛ̨nui tii ɓa, ə gɛ, hvo pa kɛ a hɔn mąą mun ɲɛ̨́i ɓa. Mɛ̨nį gɛ və́ hvaa la mą hvo laa la, yaa li. 7Yii hu kɛa, nɛ̨ɛ̨nui ŋɛ̨i tɛɛ ɉilɛ pɔ. Nɛ̨ɛ̨nui ŋɛ̨i ɉilɛ kaa a gwə́i mɛ̨nį hu kulɔ mun, gaa pai ə́ mąą mɛ̨nį laa həlii mą́ą́, ə gɛ, hvo pa haa. Kɛlaa, akɛ ya wala dɛɛ nąmu pɔ, ka ə́ yee pɔ nuą kəlee ka káá pai haai.»
8Yələwala pɔ, Abimelɛkə ə muhəɠə, ə nwɔ nwun nąmįną kpɛa kpɛai təli, ə mɛ̨nį tii hukulɔ diɛ. Nuą kəlee di ɲɔw. 9Abimelɛkə ə Abrahamə təli, ə mąąnikɛ, yɛ mą: «Túwɔ́ ləi ɓə ŋɛ̨i ə́ mo a kuɔi? Lə mɛ̨nį ɓə ŋį́ gɛ a yɛ́ a ɲɔ̨nwɔ̨ɔ̨, yaai ə́ kɛ bɔ, ə́ ɲą́ą́ kwa nwɔ́ lɔi hu nuą kəlee, ku kɛ a mɛ̨nį ɲɔ̨n gɛnɛ̨ kɛ nuą? Pələi tii ə́ gɛ la a ɲą́ą́, nu hva túwɔ́ tii. 10Gbɛɛ ɓə kɛ yɛ́ gɛ tii?»
11Abrahamə ə nwoo ŋąąpənə, yɛ mą: «Ə kɛ gwə́i ɓɛ nɔi nuą di hva ɲɔw Yálá ɓa, gɛ́ diɛ: ‹Gbəli hu, di kaa pai báái, nɛ̨́ą mąą mɛ̨nį ɓa.› 12Gwa mo kpɔ hɔlɔ a tɛ̨ą, mą́ą́ hala ka tii, mąąhɔlɔɓo, kwa yaa ku nąn gaa tɔ̨nɔ̨, ku lee hvo tɔ̨nɔ̨, mɛ̨nį gɛ gɛ́ ɉəɠə a nɛ̨́ą yaa li. 13Ɓɛlɔwai Yálá ə gúlɔ la ną́n ɲəi bɛlɛ́n, ə vílɛn lɔi mɛ̨i, Nąąlɔwai, ŋį́ kɛ nɛ̨́ą ɓa: ‹Ɓɛi lɔpee gwa li laa, kɛ diɛ gáá a ə́ mąąhulɔnu.›»
14Nąąlɔwai, Abimelɛkə ə ɓɛlaaɠaa, ɓoluɠaa da nįŋɛ̨ɠaa, ə mą kɛ luwɔ hinąą da nɛ̨ą həɠə, ə di tɛɛ Abrahamə pɔ, ə bɛlɛ Abrahamə nɛ̨ą Sara ma. 15Yɛ Abrahamə ɓa: «Nwɔ́ lɔi ŋɛ̨i kəlee ka ŋɛ̨i, ɓɛi ya kɛ yɛ ə́ hee laa, hee laa.»
16Yili pulu, Abimelɛkə yɛ Sara ɓa: «Ə́ kaa gaai, gáá wali kwələ waa tɔ̨nɔ̨ tɛɛi ə́ mąąhulɔnu pɔ, yili ɓə a nɛ ə́ wɔ nuąi diɛ, yɛ diɛ, mɛ̨nį ŋɛ̨i, ə́ hɔn və ɉu.»
17Abrahamə ə Yálá hvɛli Abimelɛkə mąą mɛ̨nį ɓa, Yálá ə kɔ́lɔi pɔ̨nɔ̨ tɛɛ Abimelɛkə pɔ, da nɛ̨ą ə mą kɛ da nwɔ luwɔ nɛaɠaai, gəlee kwəi ə nwun, diɛ lon gaa kɛa. 18Mąąhɔlɔɓo, Yai-Laa ə Abimelɛkə nɛ̨ą kɛ a kpomąnɛ̨ą da ɲəi bɛlɛ́n nɛ̨ąąɠaa kəlee, Abrahamə nɛ̨ą Sara mąą mɛ̨nį ɓa.
Atualmente selecionado:
Gɔwɔ tɔɔi 20: BKPG
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão