Mâki 8
8
Zîsɛ è núu wála náaŋ ŋáa-kɔ̀ŋ
(Maafîu 15:32-39)
1Ɣele tɔnɔ da kpɔŋ kɛ́tɛ e ŋɔ́nɔ ŋ̀á tɛ̀ ma Zîsɛ kɔlɛ. Dí lɛ̀ɛ naa díkɔnɔ̃ŋ é kpɛ́ɛ. Sɛŋ da fé kɛ́ ní díyêei a gɛ́ɛ dí m̀ii. Nya ƃe è ŋɔpôlu-ƃelai tòli é m̀o dîa, ǹyɛɛi, 2“Gbɔŋ malôŋ káa ŋ́gɛ̂i, kpɛ́ni fêi, da gɛ́ ḿbôlu a ɣele kûu saaƃa, mii-sɛŋ fé naa a gɛ́ɛ dí m̀ii. 3À kɛ̀ ŋà burii lɛ̀ɛ dîa ŋá dítɛɛ dípɔ naa, da pâi foâi berei ma, kpɛ́ni fêi, díta-ní dí síɣe kwaa kôyaa ma.” 4Ŋɔpôlu-ƃelai dí m̀arê kɛ̀, dîyɛɛi, “Núu a pɔ̂ri mii-sɛŋ sɔlɔ ƃôi ǹûai ŋí mɛni ma vɛ̃ɛ-kpâlaŋ ŋí su?” 5È dímarê kɛ̀, ǹyɛɛ dîai, “Kpólo-kpala ɣɛɛlu ƃé káyêei?” Dí mò ma, “Lɔ́ɔlu mɛi feerɛ.” 6Nya ƃe è gbɔŋ kɛ̀ dí see ǹɔii ma é gbólo-kpala lɔ́ɔlu mɛi feerɛi síɣe, é sɛɣɛ-fei tɛɛ Ɣâla pɔ́, é díɣale-ɣale é dɛɛ ŋɔpôlu-ƃelai pɔ́ a gɛ́ɛ dí dɛɛ ǹûai pɔ́ dí m̀ii. Nya ƃe dí dɛ̀ɛ ǹûai pɔ́. 7Nyɛ̃ɛ loŋ-kuro è kɛ̀ díyêei máŋ. Zîsɛ è zòŋ díyêei é lûwa láa dîa, é m̀ó ŋɔpôlu-ƃelai dîa a gɛ́ɛ dí dítɛɛ ǹûai pɔ́. 8Ǹûai dí m̀ii dí pela, bɛnɛi nyíi e kùla bôlui, dí ŋ̀á tɛ̀ ma. E kɛ̀ a kpɔ̂lɔ lɔ́ɔlu mɛi feerɛ láa fɛ́ɛ. 9Mii-ƃela dí kɛ̀ a núu wála náaŋ. 10Nya ƃe è dílɛ̀ɛ naa dí lí, é píli géleŋ su da ŋɔpôlu-ƃelai a maa félaa, dí lí Daamanuta kpiniŋ su.
Faresii-ŋai dí ŋɛi-kɛ-maa kɔ̀ri
(Maafîu 16:1-4)
11Faresii-ŋai dí pà dí pɛ́lɛ sia toôi Zîsɛ lá. Dí kɛ̀ Ɣâla-taa ŋɛi-kɛ-maa kɔ́rîi Zîsɛ yêei a gɛ́ɛ dí zu-kɔɔ̂ŋ. 12Nya ƃe è Ǹɛ̃wo tòo a zu kôyaa, é dímarê kɛ́, ǹyɛɛ dîai, “Lé mɛni ƃé ŋ̀éniɛi ŋí su-ƃelai da ŋɛi-kɛ-maa kɔ́rîi lai? Tɔ̃yâ ma, ŋá m̀ó kâa, fé pâi wɔ́lɔ ŋɛi-kɛ-maa da kélee tɛɛ̂i ŋ̀éniɛi ŋí su-ƃelai pɔ́.”
13Zîsɛ è kùla ŋɔ́nɔ díkɔlɛ, é píli géleŋ su é lí ǹyái pôlu.
Faresii-ŋai díkpolo tɛ́-sɛŋ da Ɛɛlɔ
(Maafîu 16:5-12)
14Bôlu-ƃelai dí nìa a gɛ́ɛ dí lí a mii-sãa támaa. Kpólo-kpala tɔnɔ nɔ́ ƃé kɛ̀ díyêei géleŋ su. 15È dília-woo ƃò, ǹyɛɛi, “Ka m̀ɛni. Ka kámɛi káa a Faresii-ŋai da Ɛɛlɔ ní díkpolo tɛ́-sɛŋ.”
16Dí lòno é pîlaŋ ma díkîe-ní loai, dîyɛɛi, “A m̀ôi tí, kpɛ́ni fêi, kpólo-kpala fé kúyêei.” 17Zîsɛ è m̀ɛnii kɔ̂lɔŋ dí kɛ̀ m̀ôi. È dímarê kɛ̀, ǹyɛɛ dîai, “Lé mɛni ƃé ka m̀ôi é pîlaŋ kpólo-kpala fé káyêei mɛni mai? M̀ɛnii ŋá m̀oi káfe nîi ŋ̀á káa ní ma kpaa máŋ ka táre zu? Kákili ŋá tɛiɣɛɛi? 18Káŋɛi káa kâa káfa kwaa kâa? Wóli káa kâa káfa mɛni mɛ̂ni? Mɛni fa máŋ lɛ̀ɛ kákili ŋá? 19Gbólo-kpala lɔ́ɔlui su-ɣále-ɣaleɛɛ ḿî ǹúu wála lɔ́ɔlui mɛni mai, bɛnɛi lɛ̀ɛi è kɛ̀ a kpɔ̂lɔ láa fɛ́ɛ ɣɛɛlu?” Dîyɛɛ ma, “Puu kao feerɛ.” 20È ŋɔ́nɔ dímarê kɛ̀ ǹyɛɛ dîai, “Gbólo-kpala lɔ́ɔlu mɛi feerɛi ŋá dɛ̀ɛ núu wála náaŋ (4,000) pɔ́i, bɛnɛi lɛ̀ɛi è kɛ̀ a kpɔ̂lɔ láa fɛ̂ɛ ɣɛɛlu?” Dí ŋ̀óo su tòo dîyɛɛ mai, “Lɔ́ɔlu mɛi feerɛ.” 21Ǹyɛɛ dîai, “Káfe nîi táre ní m̀ɛnii ŋí su?”
Zîsɛ e ŋɛi-pu-nuu ƃàlo Bɛsaida
22Nya ƃe dí sèri Bɛsaida. Núu da-ni dí pà bɔ́ a ŋɛi-pu naloŋ tɔnɔ, dí Zîsɛ kpera fé a gɛ́ɛ e ǹyée pɛ́lɛ mà. 23Zîsɛ è ŋɛi-pu naloŋ sòŋ a ǹyée, é kúla la daai su. È ǹá-ya pù naloŋ ŋɛ́i, é ǹyée pɛ́lɛ ma, é m̀arê kɛ́ ǹyɛɛ ma, “Ya sɛŋ da kâai?” 24Ǹalôŋ è ŋ̀ɛi mu sìɣe é zu too, ǹyɛɛ mai, “Ŋa nûa kâai, kɛ́lɛ, díkaa nɔ yɛ̂ɛ wúru-ŋa ƃé siâi.” 25Zîsɛ è ŋɔ́nɔ ǹyée pɛ̀lɛ ǹalôŋ ŋɛ́i ma, ǹalôŋ e kwaa káa a ǹɛ́lɛɛ, gɛ́ sãa kàa dímaa ponoɔɔ. 26Nya ƃe è dɛ̀ɛ bɔ́-taâi, ǹyɛɛ mai, “Ífe lì pôlu máŋ daai tí su.”
Pitɛ è ǹɛ ǹúui Zîsɛ káa lai
(Maafîu 16:13-20; Lûu 9:18-21)
27Zîsɛ da ŋɔpôlu-ƃelai dí lì ŋɔ́nɔ Sɛsɛria Felepâ taa-ŋai su. È dímarê kɛ̀ berei su, ǹyɛɛ dîai, “Ǹûai dîyɛɛ ŋ́gaa a gbɛ̂ɛ?” 28Dí mò m̀a dîyɛɛi, “Nûa da m̀o a gɛ́ɛ íkaa a Batâi-kɛ-nuui Zɔ̂ŋ. Kɛ́lɛ, da-ni da mò, Ilaiza. Gbéli-ŋai da mò a gɛ́ɛ íkaa a Ɣâla ŋɔlóno-kɛ-nuui dɔnɔ.” 29È dímarê kɛ̀ ŋɔ́nɔ, ǹyɛɛi, “Káaŋ kâa ŋ́gaa a gbɛ̂ɛ?” Pitɛ e zu tòo, ǹyɛɛ mai, “M̀asâya ƃa yá.” 30Zîsɛ è dília-woo ƃò ǹyɛɛ dîai, “Káfe m̀o núu da ma.”
Zîsɛ è ŋɔmɔ̃́lɛi da ŋɔsaai maa mɛni ƃò naa tuɛ
(Maafîu 16:21-28; Lûu 9:22-27)
31Nya ƃe Zîsɛ è pɛ̀lɛ ǹɛ̂i ŋɔpôlu-ƃelai dîa a gɛ́ɛ fɛ̂ɛ nɔ́ Núu-kpune Ǹóŋ é mɔ̃lɛ mɛni támaa su, fɛ̂ɛ nɔ́ ǹúu-pɔlɔ-ŋai da zâla láa soŋ-ƃela kpaya-kpayai da Dɔ̂ŋ lɛ́-ƃelai dí dípôlu tɔɔ ma. Gbɛɛ ŋái da pâi baâi, ɣele kûu saaƃa pôlu ma é m̀u siɣe saa yêei. 32È nyíŋi ƃò dîa a zu ponoɔɔ. Nya ƃe Pitɛ é lì la, é pɛ́lɛ lônoi ma. 33Kɛ́lɛ, Zîsɛ è tìnaŋ è ŋɔpôlu-ƃelai káa, ǹyɛɛ Pitɛ ma, “Sêtɔŋ, siɣe ŋ́gɔlɛ, kpɛ́ni fêi, Ɣâla ŋɔmɛni fé íkili ŋá, fɛ̂ɛ núu-kpune ŋɔmɛni.”
34È gbɔŋ tòli da ŋɔpôlu-ƃelai, é m̀o dîa ǹyɛɛi, “À kɛ̀ núu da a ŋ̀wɛ̂lii é pîlaŋ ḿbôlu, tɔɔ maa nuui é gíli kúla gbîŋ kponôi, é ŋɔsaa-wuruii síɣe é pîlaŋ ḿbôlu. 35Ǹúui a ŋ̀wɛ̂lii é ŋɔfúlu-laai lâai kɛ̂i, a pâi ǹánîi, kɛ́lɛ ǹúui a ŋɔfúlu-laai làŋ ḿaa mɛni ma da Duŋ Lɛ́lɛɛi, a pâi zɔlɔ ƃôi. 36Lé ƃé núu a pɔ̂ri gulâi ŋɔfúlu-laai láŋɔɔ su a gɛ́ɛ é ŋ̀éniɛi kélee kɛ́ a bɔ́ɔi? 37Lé ƃé núu a pɔ̂ri dɛɛ̂i a gɛ́ɛ é ŋɔfúlu-laai sɔlɔ ƃó pôlu? 38À kɛ̀ núu da à ŋùmɛ é pîlaŋ ḿâ da ŋáwooi, ŋ̀ulu-wulu kɛ́ɛi da zɔnyɔ̂ŋ ɣéniɛi ŋí su, gɛ̀ ní, ŋ̀elei núu-kpune Ǹóŋ à pà lai, da Ŋ̀âla-taa kela maa waa-ŋai, Ǹâŋ ŋɔfólo-laai kɛ́ ƃò bôlui, a pâi ŋumɛ̂i é pîlaŋ ǹúui tí ma.”
Atualmente selecionado:
Mâki 8: KWB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão