Matayo 22
22
Mondɛ moLihonje Lilihango
1Yesu abakoja koko namindɛ. 2Abala bo, Bokumu boDiko bodi o kumu omɔci yona okalea libonje lilihango limwana’nde momi, 3Aloma bakɔmɛli bande a ndɔsɔ ebato baya bama yo bea a lihango. Ibo ko balona bodoa. 4Aloma koko bakɔmɛli batongo. Abala na bu bo, Jebejani bato babea mbi bo nasɛlingoi libonje lilihango. Nawoi ngɔmbɔ na bingbende bimbi bimuta. Leka losusu lobwani. Doani a libonje lilihango. 5Bato bamina ko baihokea nongo bwɛnji, na bakɛ, okina a gbie ende, na otongo a elomu ende ebwasa, 6Bakina batongo bapea bakɔmɛli bande, babasamboja, na babawa. 7Kumu agbilimwana kɛnjɔ. Aloma basoda bande a bowa bawoi bamina, na batumba ngando ebu. 8Abala koko na bakɔmɛli bande bo, Libonje lilihango libwani, Bato ko babea mbi babɔngiti. 9Oko boa, toma kɛni a mɛlɛ manjea, na beani bato basusu bâtana no oho bo badoe a libonje lilihango. 10Bakɔmɛli bamina bamana, bakɛ a macilinga, na batitaneja bato basusu batana bo oho, na babe na bapele pongono, Ndako elibonje eluma na bato botɔ. 11Yana akwea kumu a bonja bato, anɛ momi omɔci yona oidaka na molilo molibonje lilihango. 12Abala na nde bo, Moninga, okwei jɔno, pɛ bopeta lwa molilo molihango mojɔ moye? Moto omina aidipoa nongo monɔkɔ. 13Kumu abala na bakɔmɛli bande bo, Mokandani mɔmɔ na mako, na modumbani sokolu a modidi, a esika êda bio na bokpɛkpɛnɛ bomino. 14Mojɔ bo, bato banɛnɛ babeamaka, baya bahɔmɔkɔ ko badi oko baleka pɛ.
Lihɔjɔ liBaPalusi
15Ngɔngɔ jimina, BaPalusi bakɛ na badumba ndungu bo badumbe Yesu na poloso a mojɔ moebaeli ende. 16Bamolomea bakina bacingami babu, na bakina bato baElode, a bohɔjɔ Yesu bo, Mokoja, iso bojebaka bo we odi moto osoti. Okojaka njea eNjambe na soti mɛnɛ. Otabangaka nongo moto, mojɔ bo ekumu emoto edi eka engasa a miso mawɛ. 17Oko boa, cingea so mojɔ mu; wɛ olɛkɛ bo? Ebɔngi bo bopute tako ai Kaisala, isa ebɔngiti? 18Yesu ko acingea ndungu ebu ebe, na abala bo, Ino bakosei, odingeakani mbi mojɔ moye? 19Anejani mbi ekenge elikonja liputaka no na tako, Bamopeja flanka, 20na yo abahɔjɔ bo, Elimo ye na mosɔnɔ mu monda? 21Bamosɔmbeja bo, Oko moKaisala. Iyo abala na bu bo, Kabani ai Kaisala libondo liKaisala, ai Njambe ko, libondo liNjambe. 22Yana aka bo ekenge emina bakamoa oko bokamoa; bamokina boa na bayana.
Lihɔjɔ liBaSadoki
23BaSadoki badoa koko ai yo a busa bomina. Ibo te bajimake bo bato badi bongɔ a bogwa, 24Bahɔjɔ Yesu bo, Mokoja, Mose abala bo moto akagwa, pɛ bokina bana, mwangwa’nde adi bosɔ mwali onde bo abote na nde bana a mojɔ momwa’nango. 25Oko boa so bodaka na bato bami sambo a ngando esu, bana banange emɔci. Yona oboso aso mwali, na agwa, pɛ bobota nongo bana. Mbakeli onde adika na mwali onde. 26Iyo ko agwa koko boa, na yona obasato pongono, na bo basusu sambo. 27Suka mɛnɛ, mwali agwa pongono. 28Oko boa, bagwake bakangɔ, mwali omina adi boda mwali onda? Mojɔ bo, ibo basusu sambo bamosɔ. 29Yesu abasɔmbeja bo, Odini na libunga, mojɔ bo otacingeakani Misɔnɔ na ngulu eNjambe. 30Bagwake bakangɔ, batasɔ nongo bali, na batahanga bali ta meki. Bâda o babwɛnji baNjambe. 31Ino olangakinini ekenge ebala Njambe na nu a mojɔ mo bongɔ bobagwake? Iyo abala bo,
32Mbi nadi Njambe oAbalayama, Njambe oIsaka, na Njambe oYakobo. Njambe aditi Njambe obagwake. Adi oko Njambe obato baya badi mɔ.
33Bato baemumu baka ekenge emina, na bakamoa a mojɔ mobokoja bonde.
Lihɔjɔ liBaPalusi
34Iyana aka BaPalusi bo Yesu ama gbokeja BaSadoki, ibo batitana ai yo; 35na okina obu, mokoja oMibeko, amomeka na lihɔjɔ bo, 36Mokoja, mobeko mua modi boso bomibeko misusu mitongo modi bo? 37Yesu amosɔmbeja bo, Toma pala Kumu Njambe owɛ na molema mowɛ mosusu, na mwembo mowɛ mosusu, na bolɛ bowɛ bosusu. 38Mobeko moboso, mobeko mua monɔi misusu mitongo oko mobeko momina. 39Mobeko momibae modi koko boa, Toma pala motuteano mowɛ o asapalaka wɛ mɛnɛ. 40Alibeko misusu, na misɔnɔ misusu mibatɔndɔi, micingi oko na mibeko mi mibae.
Lihɔjɔ liYesu
41Adaka BaPalusi baboli boa, Yesu abahɔjɔ lihɔjɔ pongono. 42Abala bo, Ino olɛkɛni bo a mojɔ moMasiya? Adi Mwana onda? Ibo bɛ bo, Mwana oDawidi. 43Yesu abala na bu bo, Oko boa, yana adaka Dawidi a Mwembo, yo amobea Kumu mojɔ moye? Iyo abala bo,
44Kumu abali na Kumu ombi bo,
Da ya a ebɔ embi ebami,
Oko a ehole êdumba mbi soki jiwɛ a cina jibibota biwɛ.
45Isa Dawidi amobeaka Kumu, adi boda koko Mwana onde o bo? 46Ibo basusu bahogoga bogo, pɛ bomosɔmbeja nongo ekenge. Donga oko a busa bomina, badaka na bɔ a bomohɔjɔ koko mahɔjɔ.
Atualmente selecionado:
Matayo 22: NTNG61
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Alliance Biblique de la R. D. Congo