Matayo 5
5
Bokoja boYesu a Mono
1Yana anɛ Yesu bimumu bibato, awea a mokina mono. Adaka yo oho, bacingami bande badoa ai yo. 2Iyo adipoa monɔkɔ na abakoja na bikenge bi.
3Bojongoa ai bato baya basatitejaka a milema, mojɔ bo Bokumu boDiko bodi oko ai bo.
4Bojongoa ai bato baya bayeaka edɛye, mojɔ bo bâgɔmbɔ.
5Bojongoa ai bato baya badi na milema miyɛmbu, mojɔ bo bâsangoa ngondo.
6Bojongoa ai bato baya badi na nja na posa ebodongo, mojɔ bo bâgola.
7Bojongoa ai bato bamonganji, mojɔ bo bâsɔ monganji.
8Bojongoa ai bato baya badi na milema misɛnɔke, mojɔ bo bânɛ Njambe.
9Bojongoa ai bato bamasiili, mojɔ bo bâbeama bana baNjarabe.
10Bojongoa ai bato baya badingoaka a mojɔ mobodongo, mojɔ bo Bokumu boDiko bodi oko ai bo.
11Bojongoa ai no, bakalolea no, bakadingoja no, na bakalongɔ no na bibaeli bibe bibokosea a mojɔ mombi. 12Sepani, dani na enanga, mojɔ bo ndese enu edi enɛnɛ oho Diko. Badingoja batɔndɔi baehele koko boa.
13Ino odini mukwa mongondo. Mukwa ko mokabeha, modi bobɔngɔ koko na ye? Mobwaniti nongo na ekina elomu. Mobwani oko na bodumba pɛ, bo bato bamodalakake na bibota. 14Ino odini bohu bongondo. Ngando yena edi a diko dimono etabombama nongo. 15Bato te bayojake paka bo baebombe cina jiteni. Baebakeaka a mesa bo bato basusu baya badi a ndako badi bonɛ bohu. 16Oko boa, kinani eyoi enu eyoe a boso bobato. Baka’nɛ bikɔmɛli binu bipele, badi bokumeja Sangwa’nu yona odi oho Diko.
17T’olɛeni oko bo mbi nadoi bo nadimojae Mibeko na mikanda mibatɔndɔi. Nadoiti bo namidimojae; nadoi oko bo namingamejae. 18Mbi natɔndɔkɔ no bo, Nongo busa bokagwa, na ngondo ekagwa, pɛpɛ nongo litɔnɔ limɔci isa mosɔnɔ momɔci mo. Mibeko modi bokputoa; midi bongama kanga misusu mɛnɛ. 19A mojɔ momina, moto akambɛjɛ mokina mobeko, nongo mobeko mokɛkɛlɛkɛ mɛnɛ, na akakoja bato boa, moto omina adi boda moto osuka mɛnɛ a Bokumu boDiko. Moto na moto ko yona okojaka bato bo bamisume, na amisumaka yo mɛnɛ, yo adi boda na ekumu enɛnɛ a Bokumu boDiko. 20Mojɔ bo, mbi natɔndɔkɔ no bo, Bodongo bonu bomiti nɔ bodongo bobasɔni na BaPalusi, otakweani nongo a Bokumu boDiko.
Mojɔ moBowa
21Ino o’kani bo batata basɔ mobeko bo,
T’owoe oko moto.
na bo,
Moto akawa adi bosamba.
22Mbi ko natɔndɔkɔ no bo, Moto akakɛnjɔ na mwangwa’nde abwani bosamba. Moto akatangola mwangwa’nde abwani bosamba a likita libasuku. Na moto akalolea mwangwa’nde bo, Wɛ egegele; abwani oko na mosa moGehena. 23Oko boa, okadoa a litumbu, na okasalɛjɛ bo mwangwao adi na wɛ mokina mojɔ, 24kina epeeli ewɛ a boso bohtumbu; peta kɛ a bosieja mojɔ na mwangwao, osa ko ohule a bopa epeeli ewɛ. 25Sieja mojɔ na soki ewɛ, nongo yana adi no a njea eesambi. Omiti kɔ boa, soki ewe adi bopa wɛ a mɔmɔ majuji, na juji adi bopa we a mɔmɔ mapolisi, na ôkwea a blɔkɔ. 26Mbi natɔndɔkɔ wɛ na soti bo, Omiti pa likonja kanga lisusu menɛ, otamana nongo.
Mojɔ moBɔɔli
27Ojebakani mobeko bo,
T’ongɛe oko bɔɔli.
28Mbi ko natɔndɔkɔ no bo, Moto akanja mwali na posa, asi angi na nde bɔɔli a molema monde. 29Diso diwɛ diebɔ ebami dikasakeja wɛ, ihwa na dumba diso dimina. Enɔi na bopele bo enama ewɛ emɔci egwɛ, bo mokuku mowɛ mosusu motadumbama a Gehena. 30Ebo ewɛ ebami ekasakeja wɛ, lena na dumba ebo emina. Enɔi na bopele bo enama ewɛ emɔci egwɛ, bo mokuku mowɛ mosusu motadumbama a Gehena. 31Babala koko bo, Moto akalona mwali onde, adi bomopa mokanda mobobɔtɔnɔ. 32Mbi ko natɔndɔkɔ no bo, Moto na moto yona oyanejaka mwali onde, na editi na cina ebɔɔli, akɔkɔ mwali omina moto obɔɔli. Na moto yona osɔkɔ mwali omina angɛkɛ na nde bɔɔli.
Mojɔ moBɛli
33Ino o’kani koko bo batata basɔ mobeko bo,
T’obɛle oko bɛli na bokosea. Kɔ mojɔ mobɛli we ai Njambe.
34Mbi ko natɔndɔkɔ no bo otabɛlɛni nongo bɛli, isa eDiko, mojɔ bo didi mongbɛlɛngɔ moNjambe; 35isa bɛli engondo, mojɔ bo edi ebakei ebibota biNjambe; isa bɛli eYelusalema, mojɔ bo edi ngando ekumu monɛnɛ. 36T’obɛle oko bɛli emolo mowɛ, mojɔ bo oditi na ngulu a bopueja isa a bohindeja moswe momɔci. 37Kinani ebaeli enu edae isa Ee, ee! isa Pɛpɛ, pɛpɛ! Ekina ebaeli etongo edi oko ebe.
Mojɔ moLikundu
38Ino o’kani bo babala bo,
Diso dibukana na diso; dino dîbukana na dino.
39Mbi ko natɔndɔkɔ no bo otaswianani na moto mobe. Moto aka’la wɛ epapata a mobanga momɔci, moneja mobanga motongo pongono. 40Moto akabea we a esambi a mojɔ mosimisi ewɛ, kina atombe kasaka ewɛ pongono. 41Moto akapea wɛ bo omopakae kilometa emɔci, mopaka kilometa jibae. 42Moto aka’nga wɛ eka, mopa; t’obulɛe oko moto yona opalaka boboa njabo ai wɛ.
Mojɔ moEpaeli
43Ino ’kani bo babala bo,
Toma pala motuteano mowe, na toma lona soki ewɛ.
44Mbi ko natɔndɔkɔ no bo, Toma palani soki jinu. Toma’ngɔɔnoni Njambe a mojɔ mobato baya banɔngejaka no. 45Oko boa ôdani bana baSangwa’nu yona odi oho Diko. Mojɔ bo yo ahojaka busa ai bato babe na bato bapele. Alomaka mbua a mojɔ mobato bapele na bato babe pongono. 46Isa opalakani oko bato baya bapalaka no, obwanitini bosɔ ndese a mojɔ momina. Baputeja batako baditi koko na ekɔmɛli emina pongono? 47Okabɛjɛni oko bina’nu pɛ, bato batongo baditi koko na ekɔmɛli emina? Nongo bapakano bakɔkɔ boa pongono. 48Ino ko, toma dani babɔngɔke mɛnɛ, mojɔ bo Sangwa’nu yona odi a Diko adi kanga mobɔngɔke mɛnɛ.
Atualmente selecionado:
Matayo 5: NTNG61
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Alliance Biblique de la R. D. Congo