Bikitshino 4
4
1Habadi abākula kwi bantu, batshiite-bakwidi na kimankinda kia mu ntempelo, na Basadusea abafikile kwabadi. 2Abadi na kinfwa ha mwanda abadi abalambukisha bantu, na kwibalungula’shi: Mwi Yesu mwi lusangukilo lwa bafwe ku lufu. 3Abebakwete, abebatudile mu nshibo ya mashika, mpaa na habubatokyele; mwanda nguba tabadi hehi kuhona. 4Anka bebungi b’aba abahushishe mwanda w’Efile Mukulu abakuminyine: bungi bwa bana-balume bubadi bu binunu bitano.
5Bitabibakitshine h’efuku dia maloba, batontshi babo, na bakulu, na bafundji-ba-mikanda, 6na Anasa tshiite-mwakwidi mukata, na Kaifasa, na Yoano, na Alekasanda, na boso ba ku kifuko kia tshiite-mwakwidi mukata abadi bekoñene mu Yelusalema. 7Hābebatūle munkatshi, abebehwishe’shi: Anubakitshi kino na bukome kinyi, su mwishina di’anyi? 8Binyibiabia Petelo, muule nda na Kikudi-E-Selelee bebalungwile’shi: Anwe batonsthi ba bantu, na bakulu ba Isalele: 9Lelo uno su’twe behushibwe ha mwanda wibuwa ubakitshinwe kwi muntu mulemane’shi, ebahashibwa na minyi; 10Nwiukye uno anwe boso, na bantu boso ba Isalele’shi, nyi mwishina dia Yesu Kidisitu a ku Nasaleta anubabambile ku mutshi uhingishene, winyi ababushishe kw’Efile Mukulu ku lufu, nyi anka kwadi e uno muntu mwimane ku mpala kwenu na bukome. 11E nyi’bwe dibabendelwe n’anwe bebaki, dinyi nyi dibekala mutwe w’ehaka. 12Sunga mu dingi tamwi kihandjilo, ooo; mwanda tamwi dingi eshina mushi mwiilu dibahebwa munkatshi mwa bantu diatukahandjila.
13Binyibiabia habamwene eshimba di hoo dia Petelo na Yoano, na hakushingula’shi, mbahatamine, tabeuku mikanda, abakanyine, abebashingulwile’shi, abadi na Yesu. 14Na hakumona muntu badi muhashibwe mwimane n’abo, abakutshilwe bia kwakula. 15Anka habebalungwile kwishesha ku kimu, abesambile munkatshi mwabo, abo bana bene’shi: 16Atukitshi bi kunyi kwi bano bantu? Mwanda binyibinyi kilengyeleshi ki moo kibakitshinwe kwabadi kibamwekyelwe kwi boso ababombela mu Yelusalema; n’atwe tatwiuku kwikituna. 17Anka tunyishe kwibadimuna’shi, balekye kwakula dimonyi mu dino eshina sunga kwi muntu umune, tala wakahalakana munkatshi mwa bantu. 18Biabia abebetanyine, abebakamikidile’shi: Tanukumanga kwakula, sunga kulambukisha mwishina dia Yesu. 19Anka Petelona Yoano bebālulwile’shi: Nusangule su nkikile buwa ku mpalakw’Efile Mukulu kwinwifwaken’anwe su Efile Mukulu. 20Mwanda tatwiuku kwakula yingi, anka yaya yiatubamwene na kwihusha. 21Binyibiabia habebadimwine dimonyi abebahoswele ha mwanda wa bantu, mwanda tabamone bia kwibamwesha malwa; mwanda bantuboso abadi abatumbisha Efile Mukulu ha mwanda w’akia kibakitshinwe. 22Winyi muntu habadi mukitshibwe kino kitundwilo kia kuhashibwa, tabadi mukishe bihwa makumi ananka.
23Na hakwangudibwa, abayile ku kibumbu kiabo, abebalubwidile yoso yabebalungwile kwi batshiite bakwidi bakata na bakulu. 24N’abo habahushishe biabia, abanyishishe mayi abo n’eshimba dimune kw’Efile Mukulu’shi: A Mwanana, obe Efile Mukulu bahangile eilu na nsenga na kalunga ka mema, na bioso bi mwanka, 25Obe bōkwile mukanwa mwa mufubi obe Dafidi’shi:
A Badjentaila abafune na nsunga,
Na bantu abele binangu bia myanda ya bisumanga na minyi?
26Bafumu ba hanohansenga abebwēle,
Na batontshi abekongyele Yehowa na Kidisitu e kumudila lukuku.
27Mbinyibinyi mu kino kibalo Heloda na Ponteuse Pilato, na Bena Isalele abekoñene hamune na Badjentaila kubwela na mwan’obe Yesu muhatulwe-a-kishila winyi, ōbe oboshingile mwimu wa bufumu. 28Mu kukita yoso yibasangwile eyasa diobe na binangu biobe kwibedi’shi: yikitshibwe. 29Binobino, obe, Yehowa tala kulaa kwabo, banda kwituha atwe, bafubi bobe mwa kwakwila mwanda wobe na mashimba a nyingye. 30Mu kōla eyasa diobe dia kuhasha bantu na bitundwilo na bia kukanya bikitshibwe mwishina dia mwan’obe muhatulwe-a-kishila Yesu. 31Henyihaha habādi abatekye Efile Mukula, amwa mwābadi bakumbene hamune mubasushile, boso bwabo abadi baule ndā na Kikudi-E-Sele-lee, abakwile mwanda w’Efile Mukulu na kunyinga kushī na moo.
32Kibumbu ki’ aba abadi bakumine kibadi na mashimba amune, na muwa wabo umune: takubadi sunga ngumune amba’shi: Yino mono ngiande anka’mi na mwinyi, ooo; yibadi yabo abo boso. 33Biabia batumibwa abadi na bukome bukata bwa kulungula mwanda wa lusangukilo lwa Nfumwetu Yesu; na bumuntu bwimoo bubadi habadi boso. 34Munkatshi mwabo takubadi sung’umune balobeshe bintu; mwanda wa baba abadi basha nsenga, su basha mashibo, abebihene, abafwishishe miulo ya bintu biabahanyine. 35Abeyitule ku ngwa ya batumibwa; abeyiabene muntu ye muntu ye mulombene muntu na lukalo lwe, muntu na lukalo lwe.
36Na Yosefe, baudikilwe kwi batumibwa bu Banabasa, (kuhatula nyi nkwambashi, Mwan’a Kisengyelo) mwina Lewi, a ku nsenga ya Saihulusa. 37Ha kwikala n’efuba, bedihene, bafwishishe mono, beyitudile ku ngwa ya batumibwa.
Atualmente selecionado:
Bikitshino 4: NTLK52
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 1952 Alliance Biblique de la République Démocratique du Congo