Yoano 18
18
1Yesu habahwile kwakula yino myanda, bayile na bana-be-ba-bukishi, babukile kela ka Kedelona, kubadi efuba batwelele mwanka na bana-be-ba-bukishi. 2Biabia Yudasa namu, winyi bamusokwele, badi mwiukye kiakia kihindji: mwanda Yesu badi ende kwanka misusa na misusa na banabe-ba-bukishi. 3Henyihaha Yudasa habatambwile kibumbo (kia balume) na bamwanafita kwi batshiite bakata na Bafadiseo babafikile kwanka na matala na mienhye na bia ngoshi. 4Binyibiabia, Yesu habeukile myanda yoso ayikyebe kumufikila, bayile, akebehusha’shi, A nanyi anukimbi? 5Abamwalulwile’shi, Yesu a ku Nasaleta, Yesu bebambile’shi, Nami uno. Yudasa bamusokwele, badi mwimane n’abo namu. 6Biabia habebalungwile’shi, nami uno, tabaluka binfutanfuta, babahona hashi. 7Henyihaha, E bebehwishe dimonyi’shi, A! nanyi anukimbi? Abo, abambile’shi, Nyi ng’Yesu a ku Nasaleta. 8Yesu bebalulwile’shi, a tanenwambashi, Nami uno, binyibiabia su anunkimbi, lekai bano, bēude. 9Ha mwanda wa kukumbashwa mwanda we wa bakwile’shi: ku baba babompele nkimushimishe sunga ngumune. 10Henyihaha Shimona Petelo badi na luhete, belusumwene, belutahile mpika a tshiite mukata, amutshib’etwe die dibalume. Eshina dia mpika dibadi bu Makusa. 11Binyibiabia Yesu bambile Petelo, eshi: Alusha luhete lwobe mu kihusula: kitomeno kibampele Yaiya, tanyikitomo’mi su? 12Henyihaha kibumbu, na bamwinampala, na bamwanafita ba Bena Yudea abakwete Yesu, abamwanyine. 13Abayile n’E kwibedi kwi Anasa; mwanda e badi muko a Kaifasa, n’e badi tshiite mwakwidi mukata mu akia kihwa. 14Kaifasa n’e winyi, bahele Bena Yudea binangu’shi, mbiwandjikile muntu’mune afwile bantu.
15Shimona Petelo balondele Yesu, na mungi mwan’abukishi: winyi mwan’a bukishi badi mwiukibwe kwi tshiite mwakwidi mukata, abatwelele mu luhoho lwa tshiite mwakwidi mukata na Yesu. 16Anka Petelo badi mwimane ku kibelo hasha. Henyihaha yawa mungi mwan’a-bukishi badi mwiukibwe kwi tshiite mwakwidi mukata, batukile bakwile kwi songwakashi badi alama ku kibelo, biabia batwelele na Petelo. 17Biabia wi nyi songwakashi badi alama ku kibelo, bakwile kwi Petelo’ shi: Obe namu we mukwabo n’abo a bana-ba-bukishi ba uno muntu su? E bamwambile’shi: Ayoyo. 18Bahika na bamwanafita abadi bemane kwanka abahu kukwatshisha kalo ka makala, mwanda kubadi mashika, abadi abōto, na Petelo badi mwimane n’abo, oto namu.
19Binyibiabia tshiite mwakwidi mukata baihwishe Yesu mwanda wa bana be-ba-bukishi, na lulambukisho lwe.
20Yesu bamwalu lwile’shi: natubwilanga ba-hano-ha-nsenga mwanda wande, mafuku oso nalambukisha mu kitumbwilo, na mu ntempelo, mu badi Bena Yudea bekongyele; na mu bufiefi nkimwakule sunga mpahela. 21Ankinyi kionyihwisha? banda kwihusha’bo abampushishe yinakwile kwabadi, tala’bo abeuku yinakwile. 22Habakwile biabia, umune abamwanafita badi mwimane hehi, bakuhile Yesu luhi, tambashi: Bōlulwila tshiite mwakwidi mukata biabia? 23Yesu bamwalulwile’shi: Su nadi nakula mwanda ubi, hatulau, anka su bibuwa, bonkuhila kinyi? 24Henyihaha Anasa bamutumine muanyibwe kwi Kaifasa tshiite mwakwidi mukata. 25Shimona Petelo badi mwimane ’oto kalo. Binyibiabia babamwihwishe’shi: Obe namu we mungi a mu bana-be-ba-bukishi su? E batune, bakwile’shi: ooo, nki’abo. 26Umune a bafubi a tshiite mwakwidi mukata, badi mukwabo na winyi abatshibile’twe kwi Petelo; bakwile’shi: Tanakumwene n’E mwifuba? 27Henyihaha Petelo batune dimo, biabia kahindji naka etombole dibasamine.
28Henyihaha abakatukile na Yesu kwi Kaifasa bayile n’E kwibalasa kwa nfumu, ku nshibo ya kitshibilo kia myanda; kubadi na mashik’ese bwē; anka’bo bana bene tambatwele mu nshibo ya kitshibilo, tala bakashūla kishila; su anka abakadī kidibwa kia Kukila kia Yeowa.
29Biabia Pilato batukile kwabadi, tebambashi: A nwi n’E kimu kinyi? 30Abamwalulwile’ shi: Su tabadi musodi a myanda, biabia tatubadia kumutula kodi. 31Binyibiabia Pilato bebalungwile’shi: Muatei numutshibile kimu mwiyile mukanda-wa-milangilo yenu. Biaibia Bena Yudea abamulungwile’shi: Kiakia nkishila’twe kwiha muntu. 32Eshi, misambo ya Yesu yikumbashwe yibakwile, yia kuhatula lwinyi lufu lwe lwa kafu. 33Binyibiabia Pilato batwele mwibalasa dia kitshibilo kia myanda dimo, betanyine Yesu, bamwihwishe’shi: Obe we nfumu a baYudea su? 34Y’esu bamwalulwile’shi: N’obe na mwinyi esamba’nyi, mbantu abakulungula bianka? 35Pilato bamwalulwile’shi: Ami nyi Mwina Yudea su? Nyi mwilo wobe na batshiite bakwidi bakata nyi babakufisha mu masa’nde: we mukite kinyi? 36Yesu bamwalulwile’shi: Bufumu bwande tabwa hano-ha-nsenga, ooo: su bufumu bwande bubadi bwa hano-ha-nsenga, henyihaha bafubi bande abadi a kundwila’ashi, tala nankafishwa kwi Bena Yudea: anka binobino bufumu bwande tamba kuno kwinyi. 37Binyibiabia Pilato bamulungwile’shi: A biosobi we nfumu su? Yesu bamwalulwile’shi: Wokula wa binyibinyi nyi nfumu. Natandjilwe ha uno mwanda, nafikile hano-hansenga namu ha uno mwanda, eshi, nkakule bu kamonyi ka bia binyibinyi. Ese a bia binyibinyi ahushā Eyi diande. 38Pilato bamulungwile’shi: Bia binyibinyi nkinyi? Biabia habakwile wawa mwanda, batukile dimo, ’ende kwi Bena Yudea, akebalungula’shi: Nkimumumone na mwanda (sunga ngumune). 39Anka’nwe nwi na kihikwa kienu, kia nyinuhoswelā muntu’mune ha Kukila kwa Y’eowa: binyibiabia anukyebe nyinuhoswele Nfumu a Bena Yudea, su? 40Henyihaha boso abanyishishe mayi abo, eshi: Tanuno, ooo anka Balabasa. Biabia winyi Balabasa badi munyananyi.
Atualmente selecionado:
Yoano 18: NTLK52
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 1952 Alliance Biblique de la République Démocratique du Congo