Yoano 21
21
1Kunyima kwa bino bintu Yesu besokwele dimonyi kwi bana: ba bukishi kwishiba dia Tyibileasa; ako namu nyi kubesokwele. 2Kubebungīle hamune Shimona Petelo, na Tomase baudikilwe bu Didyimuse, na Natanaele a ku Kana mu Ngadilea, na bana balume ba Sebede, na bangi babidi ba bana be ba bukishi. 3Shimona Petelo bebambile’shi, nende mu kuloba mwita wa mema. Abo bamwamba’shi: Atwe namu atwende n’obe. (Biabia) babayile, abayikile mbwato’ kahindji nāka; bwabwa bufuku tambakwate kintu. 4Anka hakubatokyela namashika, Yesu baimene ku bukunkula bwa mema; anka bana ba bukishi tambamushingule’shi ng’Yesu. 5Henyihaha Yesu bebambile’shi: Anwe bana, a mwi na biakudia su? Abamwalulwile’shi: ooo, 6E bebalungwile’shi: elai bukondja ku luhese lubalume lwa bwāto, biabia anukamono. Binyibiabia abēle, anka hanka abakutshilwe bia kwibwabula ha mwanda wa bungi bwa mwita wa mema. 7Biabia winyi mwan’a bukishi badi mufulwe kifulo na Yesu, bakwile kwi Petelo’shi: Nyi Nfumwetu. Biabia Shimona Petelo, hakuhusha’shi: Nyi Nfumwetu, bekumbidishe mutwelo we wa buhībwe (mwanda badi muswa) bwe betubīle mema. 8Anka bangi bana-ba-bukishi abafikile mu kāto, mwanda tabadi kula na mahia, nyi nkuhwandjikisha bu kihimo kia makumi mwanda a mètres, bakwete kukaka bukondja bwi mwita wa mema. 9Henyihaha habafikile ku mahia, abamwene kālo ka makala kwanka, na mwita na mukate hanka. 10Yesu bebambile’shi: Tushai umo mwita wa ’mema kuno wanubakwata. 11Shimona Petelo bakamine, (ku mulomo wa bwāto,) bakakīle bukondja ku kiese, būle ndaa na mīta ya mema yikata, bu lukama na makumi atano na yisatu, sunga yibadi bungi bwi biabia tangisane bukondja. 12Yesu bebambile’shi: Fwai, nudie, Takubadi, sunga ngumune a bana ba bukishi badi n’eshimba dia kumwihusha’shi: A n’Obe’nyi? Mwanda wa kwiuka’shi, E nyi Nfumu. 13Biabia Yesu bafikile, bātshile mukate, bebatambikile, na mwita wa ’mema hamune. 14Uno nyi mususa wa kasatu ubesokwele Yesu kwi bana be ba bukishi, kumongo kwa kusanguka kwe mu lufu.
15Binyibiabia habahwile kudia, Yesu bakwile kwi Shimona Petelo, mwan’a Yonasa’shi: We n’ami kifulo kikile yino su? Bamwalulwile’shi, Uolo Mwanana, weuku’shi, ami nyi n’obe kifulo. Bamwambile’shi: Disha bana bande ba mikoko. 16Bamwihwishe dimo mususa wa kabidi’shi: Shimona, mwan’a Yonasa, we n’ami kifulo su? Bamwalulwile’shi: Uolo Mwanana, weuku’shi, nyi n’obe kifulo. (Yesu) bamwambile’shi: Disha mikoko yande. 17(Yesu) bamwihwishe dia kasatu’shi; Shimona mwan’a Yonasa, we n’ami kifulo? Biabia Petelo bafitshile mwishimba niwanda bamwihwishe mususa wa kasatu’shi: We n’ami kifulo su? E bamwambile’shi: A Mwanana, weuku bintu bioso; weuku’ shi; ami nyi n’obe kifulo. Yesu bamwambile’shi: Disha mikoko yande. 18Binyibinyi binyibinyi, nakulungula’shi: Hobodi ki songwalume, bodi wefwadika obe na mwinyi, botambukile koso kubokyebele, anka hokekala mununu, okōia maboko’be, mungi akakufwadika, akakutwala ko shīokyebe. 19Bakwile bino, mwanda wa kuhatula kihaso kia lufu kiakatumbish’Efile Mukulu n’akio. Habahwile kwakula bino, bamulungwile’shi; Ndonde’mi. 20Henyihaha Petelo bealulwile, bamwene mwan’a bukishi a Yesu abadi n’e kifulo, kwete kulonda kunyima, winyi badi ’ēma ha kiadi kie habadi ku bidibwa, bamwihwishe namu’shi: A Mwanana, yawa akyekukufumbula nanyi? 21Petelo hakumumona, bakwile kwi Yesu’shi: A Mwanana, a uno namu akekala naminyi? 22Yesu bamwambile’shi: Su nankyebe’shi, ayishe mpaa na hankafiki, a ngobe mwanda su? obe ndonde’mi. 23Henyihaha kino kishima kibahalakene munkatshi mwa bakwabo’shi, uno mwan’a bukishi ta kafu’nyi; anka Yesu tabamwambile’shi: Ta kafu, ooo, anka’shi: Su nankyebe ayishe mpaana hankafiki, a ngobe mwanda su? 24Uno nyi winyi mwan’a bukishi a temuna bu kamonyi ka su? binobintu, e nyi bafundjile bino bintu; n’atwe atwiuku’shi, mitemu ye nyi ngia binyibinyi. 25Kwi bingi bintu bi bungi bibakitshine Yesu, abio, su bibafundjilwe bioso, ami nahwandjikisha’shi, hanohansenga hoso ta habadia kumona ha kutula mikanda yoso yibakyebelwe kukafunda. Amena.
Atualmente selecionado:
Yoano 21: NTLK52
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 1952 Alliance Biblique de la République Démocratique du Congo