Yoane 16
16
1Isoonga lanu ongoma mbo botaoka botema wale wa toloi, 2eoka batosokol’ino nda bisɔngɔmɛlɔ la mbile eyaka nde ani oyatool’ino, inde kotanga nde mbo asokuwela Mungu. 3Bekelaka nde ongoma eoka batiluwe ango ko Sango ango Imi. 4Nde isotakambes’ino njasɔ-bi mbo akayeke mbile ya yao, ino boenyeleke mbo Imi nd’aongaka lanu ongoma. 5Itiaongaka nde lanu nda yao la liakoli eoka yayalaka lanu, nde kwani isoinwa end’Inde oyatomaka’mi la angwɛnɛ angɔmɔi wanu oyatofela’mi mbo— ¿Ɔtɔkɛ to anima? 6Nde ko l’eoka mbo isokambes’ino njasɔ-bi, ikɛnɛnɛ sisotumesa betema yanu.
7Kongo ko isoonga lanu wewe mbo bolau end’ino mbo isokweke eoka eyambo itisokwe, ani Boongeli#Boongeli angoko Bosungi. atiayeke end’ino; nde yɛkɛndɛkɛ limɔ yetomaka nde Inde end’ino. 8Akayek’Inde, atotombola eba wenda loasɔ loa batwanelo la liengani la loasɔ loa likomyi imɔ; 9loasɔ loa batwanelo mbo batialendeloko’mi; 10loasɔ loa liengani mbo isɔkɛ ende Sango la oitɔɛnɛ imɔ Imi; 11loasɔ loa likomyi mbo bokakalesi wa wenda-bo asofomo se.
12Yende la njasɔ wike yoonga lanu, nde boitokɔkɔlɔ ndokaka yao kwani, 13nde akayeke Inde, ako Bolimo wa wewe, atotol’ino oso nda mboka ya wewe bototi; eoka aitoonga l’isosha shande angɛnɛ nde yao ebikokek’Inde, ko yao ebitoongaka’Inde la atotaluwes’ino yao ebikayeke kɔni. 14Atotalia’mi tala, eoka atɔɔsɔ eyami limɔ atoluwes’ino ko yao. 15Bitotina ebisɛli nde Sango, yende eyami, eokao yongiki mbo asɔɔsɔ eyami atoluwes’ino ko yao.
16Ko mbile sinyo, limɔ oitɔɛnɛ’mi, mbile yasi sinyo limɔ wɛnɛkɛ nde Imi liasi. 17Eokao bamɔi ba baeki bande lofelana mbo— Iye to eyetoonga Inde lasu mbo Mbile sinyo la oitɔɛnɛ’mi, limɔ mbile yasi sinyo la wɛnɛkɛ nde Imi liasi? la imɔ mbo Isɔkɛ ende Sango, ende to iye? 18Iyo loonga imɔ mbo— ¿Iye eyetoong’Inde, mbo Mbile sinyo? Totiluwe litina elisoong’Inde.
19Aluwaka to Yesu mbo balɛmbɛkɛ̈ ndofelak’Inde, limɔ Inde loonga lau mbo— ¿Osofelakana loasɔ loa lioi eliongiki’mi mbo Mbile sinyo la oitɔɛnɛ’mi, limɔ mbile sinyo la wɛnɛkɛ nde Imi liasi? 20Wewe, wewe itoonga lanu mbo otoleela la ngandi la ndeli ani eba wenda batoomakala. Ino bowaka nde l’ikɛnɛnɛ sifi, kongo ko ikɛnɛnɛ shanu sikindolomoko limɛngɔ fuu. 21Botomali nda iyelo atookaka ikɛnɛnɛ sifi, eoka mbile yande esoengana, kongo ko asoot’inde wana, atienyel’imɔ iyelo eoka ya linɛngina mbo boto asoya okenge. 22Lanu imɔ eoka kwani wende l’ikɛnɛnɛ sifi, nde yɛnɛkɛ ino liasi, limɔ betema yanu beomakaleke la angwɛnɛ boto angɔmɔi wosokoel’ino limɛngɔ lianu.
23Limɔ nda lise lina otiafeleke nde Imi loasɔ ango lɔmwito nde wewe wewe itoonga lanu mbo boömba Sango yeka, Inde kofaef’ino nda lina liami. 24Konda kwani okömbi yeka nda lina liami, ömbaka, limɔ ino kɔɔlɔ mbo limɛngɔ lianu liɔlwɛkɛ hɔlɔɔ.
25Isokambes’ino njasɔ-bi ko la bembila nda mboka nde mbile etoya eyetokambesa’mi ino njasɔ ya Sango ko fololo, angoonga imɔ lanu la bembila. 26Nda lise lina boombaka nda lina liami nde itionge lanu mbo yesombokolaka Sango loasɔ loanu, 27eoka Sango, Inde angɛnɛ asami nd’ino eoka ino nd’asamaka’mi la ino nd’asoimela mbo Imi yasokwaka ko ende Sango. 28Yasokwaka ende Sango la yayaka nda wenda-bo; itosokwa nda wenda la itɔkɛ ende Sango liasi.
29Baeki bande loonga mbo— Tɛnɛngɔ, kwani otoonga nde fololo, oitoonga imɔ nda bembila. 30Kwani tosoluwa mbo oluwi nde bitotina, boto ati ango la boeno wofelak’Aɛ felo, ko ongoma tosoimela mbo wasokwaka ende Mungu. 31Yesu lomutola lau mbo— Wimela nde kwani, 32tɛnɛ, mbile eyaka nde, esoya oko kwani eyekamelesomoko lanu boto la boto eyande la bomachaka Imi ko ikɛndi nde Imi iti ikɛndi, eoka Sango ale nde lami. 33Isokambes’ino njasɔ-bi mbo ino bɔɔlɛkɛ lilatemi ko lami, nde nda wenda-bo bɔɔlɛkɛ to bemusi, nde sambokolaka betema yanu eoka Imi nd’asolonga wenda.
Atualmente selecionado:
Yoane 16: NTKE58
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Le Nouveau Testament in Kele (Lokele) © British and Foreign Bible Society, 1958, 2019.