Эге дөс 11
11
Вавилон суургазы
1Ол үеде бүгү черниң кырынга чаңгыс дыл, ооң чаңгыс хевири турган.
2Чөөн чүк углай көшкеш, кижилер Сеннаар деп черде оргулааш#Э. д. 10:10; Дан. 3:1 тып алгаш, аңаа турумчуп алганнар. 3Олар: «Дойдан тууйбуларны кылгаш, отка өрттедип алыылыңар» – деп сүмелешкеннер. Даш орнунга тууйбуларны, оларны быжыктыр тудуштурарынга малгашты ажыглааннар. 4«Хоорайдан тудуп алыылыңар, бедии дээрге чедип турар суургадан база. Чырык черге ис чок тарай бербези-биле, бис адывысты ынчаар алдаржыдып аар бис» – дээннер.
5Кижилерниң тудуп турар хоорайын база суургазын көөр дээш, Дээрги-Чаяакчы черже дүжүп келген. 6Ынчан Дээрги-Чаяакчы мынча дээн: «Шупту чаңгыс дылдыг, чаңгыс аай чон-дур. Бо дээрге оларның ажыл-херектериниң чүгле эгези-дир. Олар чүнү кылыр деп бодап алырыл, ооң шуптузун ыяап-ла чедип алырлар-дыр. 7Бо дораан черже дүшкеш, бот-боттарын билчип шыдавас кылдыр оларның дылдарын холуп кааптаалы». 8Дээрги-Чаяакчы оон оларны бүгү черниң кырынга тарадыпкан#Ы. х. к. 32:8; ынчалдыр олар хоорай тударын ара соксап кааннар. 9Ынчангаш ол хоорайга Вавилон деп атты тывыскан, чүге дээрге Дээрги-Чаяакчы аңаа черниң чурттакчыларының чугаа-домаан холуп каапкан#11:9 Еврей дылда «Вавилон» деп ат «холуп каар» (валал) деп сөске дөмейлешкек. , оон кижилерни чер кырынга тараткан.
Симниң үре-салгалы
10Симниң үре-салгалының дугайында чугаа бо-дур. Суг халавының соонда ийи чыл эрткенде, Сим 100 харлыг турда, ооң оглу Арфаксад төрүттүнген. 11Арфаксад төрүттүнген соонда, Сим 500 чыл иштинде чурттаарга, ооң өске-даа оолдары, уруглары төрүттүнген.
12Арфаксад 35 харлыг турда, ооң оглу Сала төрүттүнген. 13Сала төрүттүнген соонда, Арфаксад 403 чыл иштинде чурттаарга, ооң өске-даа оолдары, уруглары төрүттүнген.
14Сала 30 харлыг турда, ооң оглу Евер төрүттүнген. 15Евер төрүттүнген соонда, Сала 403 чыл иштинде чурттаарга, ооң өске-даа оолдары, уруглары төрүттүнген.
16Евер 34 харлыг турда, ооң оглу Фалек төрүттүнген. 17Фалек төрүттүнген соонда, Евер 430 чыл иштинде чурттаарга, ооң өске-даа оолдары, уруглары төрүттүнген.
18Фалек 30 харлыг турда, ооң оглу Рагав төрүттүнген. 19Рагав төрүттүнген соонда, Фалек 209 чыл иштинде чурттаарга, ооң өске-даа оолдары, уруглары төрүттүнген.
20Рагав 32 харлыг турда, ооң оглу Серух төрүттүнген. 21Серух төрүттүнген соонда, Рагав 207 чыл иштинде чурттаарга, ооң өске-даа оолдары, уруглары төрүттүнген.
22Серух 30 харлыг турда, ооң оглу Нахор төрүттүнген. 23Нахор төрүттүнген соонда, Серух 200 чыл иштинде чурттаарга, ооң өске-даа оолдары, уруглары төрүттүнген.
24Нахор 29 харлыг турда, ооң оглу Фарра төрүттүнген. 25Фарра төрүттүнген соонда, Нахор 119 чыл иштинде чурттаарга, ооң өске-даа оолдары, уруглары төрүттүнген.
26Фарра 70 харлыг турда, ооң Аврам, Нахор база Аран деп оолдары төрүттүнген.
Фарраның үре-салгалы
27Фарраның үре-салгалының дугайында чугаа бо-дур.
Фаррадан Аврам, Нахор база Аран төрүттүнген. Арандан Лот деп оол төрүттүнген. 28Аран бодунуң ачазы Фарра дириг турда-ла, төрээн черинге, халдей чурттуң Ур деп хоорайынга чок болган. 29Аврам биле Нахор кадайлар ап алганнар; Аврамның кадайының ады Сара; а Нахорнуң кадайының ады – Милка. Ол Аранның уруу турган. (Милка Иска деп кыс дуңмалыг турган.) 30А Сара ажы-төл төрүүр салым чок болган чүве-дир. 31Фарра оглу Аврамны, кенни Сараны, Аран деп оглунуң оглу Лотту эдертип алгаш, халдей чурттуң Ур хоорайындан ханаан черже баар дээш чорупкан, ынчалза-даа Харран хоорайга четкеш, олар аңаа турумчуп алганнар. 32Харранга чурттап тургаш, Фарра 205 харлыында өлүп калган.
Atualmente selecionado:
Эге дөс 11: TUV
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Институт перевода Библии, Москва, 2011