Эге дөс 14
14
Аврамның Лотту камгалап алганы
1Дараазында болуушкун сеннаар черниң хааны Амрафелдиң, элласар черниң хааны Ариохтуң, элам черниң хааны Кедорлаомерниң, гоим черниң хааны Тидалдың үезинде болган. 2Олар Содомнуң хааны Берага удур, Гоморраның хааны Биршиге удур, Адманың хааны Шинавка удур, Цевоимниң хааны Шемеверге удур база Беланың (азы Сигорнуң) хаанынга удур дайын кылып үнүпкеннер. 3Ол беш хаан шупту Сиддим шынаазынга (Дус далайның чоогунга) каттыжып алганнар#Иис. 10:5. 4Олар Кедорлаомер хаанның дарлалының адаанга он ийи чыл болганнар, а он үш дугаар чылында удурланып үнгеннер. 5-6Он дөрт дугаар чылында Кедорлаомер болгаш ооң-биле кады өске хааннар келгеш, Аштерот-Карнаимде рефа чонну, Гамда зуз чонну, Шаве-Кириатаимде эмим чонну база Сеир дагларындан кургаг ховулуг Эл-Фаранга чедир чурттаан хоррей чонну чылча шаап каапканнар#Ы. х. к. 2:10-12. 7Оон ээп келгеш, олар Мишпат деп черде суг бажынга (ол черни Кадес деп база адаар#Сан. 13:27) амалик чоннуң бүгү чуртун хоозурадып, Хацацон-Фамарда#2 Чыл. 20:3 чурттап турар амор чонну база чылча шаап кааннар.
8Ынчан Содомнуң, Гоморраның, Адманың, Цевоимниң#Ы. х. к. 29:23 база Беланың (азы Сигорнуң) хааннары демги дөрт хаанга уткуштур үнүп келгеш, олар-биле Сиддим шынаазынга тулчуп эгелээннер. 9Эламның хааны Кедорлаомер, Гоимниң хааны Тидал, Сеннаарның хааны Амрафел, Элласарның хааны Ариох – дөрт хаан беш хаанга удур тулушканнар. 10Сиддим шынаазында малгаштыг оңгарлар кончуг хөй турган чүве-дир. Содомнуң болгаш Гоморраның хааннары дезип бар чыткаш, ынаар дүшкүлей берген, а арткан улузу дагларже дезе бергеннер. 11Тиилекчилер Содом биле Гоморраның эт-хөреңгизин, бүгү курлавырын олчалап алгаш, чоруй барганнар. 12Олар Аврамның Содомга чурттап турган дуңмазы Лотту эт-хөреңгизи-биле катай тудуп аппарганнар.
13Аврам ол үеде Мамре деп амор кижиге хамааржыр дуб ыяштыг черге чурттап турган. (Мамре болгаш ооң дуңмалары Эшкол биле Анер Аврамның талалакчылары турган.) Тулчуушкунга дириг арткан бир кижи Аврамга келгеш, чүү болганын дыңнадыпкан. 14Дуңмазы Лот туттурган деп дыңнап кааш, Аврам бодунуң аалынга төрүттүнген бүзүрелдиг кулдарын – 318 кижини чыггаш, сүргүнче үнүпкен. Ол дайзыннарын Дан хоорайга#Башт. 18:29 чедир истеп-сүрген. 15Аңгы-аңгы кезектерге үстүп алгаш, дүне бодунуң улузу-биле халдааш, дайзыннарны чылча шаап каан. Оон оларны Дамаск хоорайның соңгу чүгүнде Хова деп черге чедир истеп-сүрген. 16Аврам ынчалдыр дайзыннарның чаалап алган бүгү олчазын: дуңмазы Лотту, ооң эт-хөреңгизин, туттурган херээженнерни база өске-даа улусту катап эгидип эккелген.
Мелхиседектиң Аврамны алгап-йөрээгени
17Аврам Кедорлаомерни болгаш ооң эвилелчи хааннарын тиилээш, чанып олурда, аңаа уткуштур Шаве шынаазынга Содомнуң хааны үнүп келген. (Амгы үеде ол шынааны Хааннар шынаазы деп адап турар.)#2 Хаан. 18:18 18Ынчан өске хаан – Салим хоорайның#Ыд. ыр. 75:3 хааны Мелхиседек Аврамга хлеб биле арага үндүрүп эккелген. Ол Дээди Өрүкү Бурганның бараалгакчызы турган. 19Аврамны алгап-йөрээгеш, ол мынча дээн: «Дээрниң болгаш черниң Чагырыкчызы Дээди Өрүкү Бурган Аврамга ачы-буян хайырлазын! 20Дайзыннарыңны тиилээринге сеңээ дузалашкан Дээди Өрүкү Бурганга алдар!» Аврам ынчан олча-ажыының оннуң бир кезиин Мелхиседекке берипкен#Э. д. 28:22; Лев. 27:30; Евр. 7:1-2.
21Оон Содомнуң хааны Аврамга: «Мээң улузумну эгидип бергеш, олча-ажыыңны бодуңга арттырып ал» – дээн.
22Аврам: «Дээрниң болгаш черниң Чагырыкчызы Дээрги-Бурган-Чаяакчының мурнундан силерге даңгыраглаайн, 23силерниң эт-хөреңгиңерден дыргак каразы дег-даа чүве албас мен. Ооң соонда „Аврамны мен байыдып кагдым“ дээриңерни күзевес мен. 24Чүгле мээң улузумнуң аъш-чем курлавырларының орнун меңээ эгидип берип көрүңер. Ол ышкаш мээң-биле кады дайылдажып чораан Анер, Эшкол база Мамре олар боттарының үлүүн алгылап алзыннар» – деп харыылаан.
Atualmente selecionado:
Эге дөс 14: TUV
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Институт перевода Библии, Москва, 2011