Эге дөс 19
19
Содомчуларның бужар үүлгедиглери
1Кежээликтей Бурганның ийи төлээзи Содом хоорайга чедип келген. Лот ол үеде хоорайже кирер улуг хаалга аксынга олурган. Лот оларны көрүп кааш, уткуй туруп келген. Черге чедир мөгейгеш, 2Лот мынча дээн: «Дээргилерим! Кулуңар мээң бажыңымче кирип көрүңерем, будуңар чуп, дыштанып хонуп алыңарам, эртен орукче үнүптер силер»#Иов 31:32.
Олары: «Чок, бис даштыгаа хонар бис» – дээннер.
3Лот дилеп туруп бээрге, олар ооң бажыңынга чедип келгеннер. Лот дой белеткээш, далган хааргаш, Бурганның төлээлерин хүндүлеп чемгерген. 4Олар удуп чыдып четтикпээнде-ле, Содом хоорайның бүгү эр чурттакчылары, улуг-аныяа чок, Лоттуң бажыңын бүзээлеп келгеннер. 5Лотту кыйгырып алгаш: «Сээң бажыңыңга хонар дээш келген улус кайыл? Оларны үндүрүп бер, бис оларны күштеп, дора көрээли» – деп турганнар#Башт. 19:22-24.
6Лот боду үнүп келгеш, эжиин хаап каан. 7Ол мынча дээн: «Ха-дуңма, багай чүве кылбайн көрүңер. 8Мээң эр кижи дегбээн ийи уруум бар. Силерге мен аалчыларымның орнунга уругларымны үндүрүп берейн. Олар-биле чүнү күзей-дир силер, ону кылыңар. Чүгле келген улуска дегбейн көрүңер, чүге дээрге олар мээң бажыңымда келген болгай, оларны камгалаары – мээң хүлээлгем-дир».
9Содомчулар: «Ыңай тур сен! Өске черден келген хиреңде, хамык чүвени сен шиитпирлээр сен бе? Сени олардан артык таптыг аажылаптар бис!» – дээннер. Ынча дээш, олар Лотту иткилеп, эжиин үрээр дей бергеннер. 10Ынчан Бурганның төлээлери Лотту бажыңче киир тыртып алгаш, эжиин дээктеп алганнар. 11Оон Бурганның төлээлери бажың эжиинде чыглып келген улустуң карактарын, улуг-аныяа дивейн, согурартыпканнар#4 Хаан. 6:18. Ынчангаш олар канчаар-даа кызыткаш, бажыңче кирер эжикти тыппааннар.
12Бурганның төлээлери Лотка мынча дээннер: «Бо хоорайда чоок кижилериңден кымнар барыл? Оолдарың, кыстарың, күдээлериң – кым-даа бар болза, моон үндүрүп аппар. 13Бо хоорайны бис узуткап кааптар бис, чүге дээрге ооң чурттакчыларының бужар үүлгедиглери Дээрги-Чаяакчыга билдингир апарган. Дээрги-Чаяакчы бисти бо хоорайны узуткап кагзын дээш чоруткан чүве».
14Лот бодунуң уругларының душтуктарынга баргаш: «Дүрген моон чоруптуңар, чүге дээрге Дээрги-Чаяакчы бо хоорайны ам узуткаар деп турар-дыр» – дээн. Ынчалза-даа душтук оолдар ону баштактанып турар деп бодааннар.
Содом биле Гоморраны узуткааны
15Даң хаяазы дээп келгенде, Бурганның төлээлери Лотту далаштырып: «Сээң-биле кады турар кадайыңны болгаш ийи урууңну эдертип алгаш, дүрген чорувут. Оон башка бо хоорайның чурттакчыларының буруулуг үүлгедиглериниң ужун сен база өлүп каар сен» – дээннер. 16Ынчалза-даа Лот чоруурунче далашпайн турган. Лотту Дээрги-Чаяакчы кээргээр деп билир болгаш, Бурганның төлээлери ону, ооң кадайын база уругларын чедип алгаш, хоорайдан албадап үндүрүп кааннар. 17Хоорайдан үндүрүп кааш, Бурганның төлээзи Лотка: «Дүрген камгалан! Хая көрүнме, бо Төгерик шынаага черле доктаавайн, дагже үне бер, оон башка өлгениң ол» – дээн.
18Лот мынча деп дилээн: «Чок, дээргим! 19Чалчаң менче ээ көрнүп, энерелдиг бооп, мээң амы-тынымны камгалап турдуң. Ынчалза-даа мен дагга четпейн чорумда, мени ол айыыл-халап тегерип келгеш, өлүрүп каарындан коргар-дыр мен. 20Көр даан, дуу хоорайжыгаш чоок-тур, бичии-дир. Мен ол аргажок бичии хоорайжыгашче чорупкаш, оон хоргадаар чер тып алыйн, мен аңаа дириг артар боор мен».
21Бурганның төлээзи: «Ындыг-дыр. Сээң ол күзелиңни база боттандырайн. Айтып турарың хоорайжыгашты узуткавайн, арттырып каар мен. 22Дүрген ынаар маңнап чорувут. Сен аңаа четпээн шааңда, мен ажыл-херээмни эгелевес мен» – деп чугаалаан. (Ынчангаш ол хоорайны Сигор#19:22 Еврей дылда «Сигор» деп ат «бичии, аргажок» деп сөске дөмейлешкек (19:20 көр). деп адаар.) 23Хүн үнүп, чер кырын чырыда бергенде, Лот Сигор хоорайга чедип келген.
24Дээрги-Чаяакчы Содом биле Гоморраже дээрлерден оттуг күгүрнү чаъс дег дүжүрүпкен#Иов 18:15; Ыд. ыр. 10:6; Иез. 20:16; 38:22; Лк. 17:29. 25Ол хоорайларны, бүгү Төгерик шынааны, ооң бүгү чурттакчыларын база ол чер кырында бүгү ногаан үнүштерни узуткап каапкан. 26(А Лоттуң кадайы хая көрнүпкеш, дус көжээ бооп хуула берген.)
27Авраам эртен эрте тургаш, Дээрги-Чаяакчыга ужуражып турган черинге чеде берген. 28Ол Содом болгаш Гоморраже углай көөрге, бүгү Төгерик шынааның чер кыры өртең-хуюк, ону суугудан үнген дег ыш-бус бүргей алы берген болган. 29Төгерик шынаада Лоттуң чурттап турганы хоорайларны узуткап тура, Бурган Авраамның дугайын бодап келгеш, ооң дуңмазын өлүмден чайладып аппарган.
Моав болгаш аммон чоннарның тывылганы
30Лот Сигорга чурттаарындан корткаш, ийи уруу-биле кады дагларже чоруй барган. Олар куйга турумчуп алганнар. 31Уругларының улуу дуңмазынга мынча дээн: «Бистиң ачавыс кырып бар чыдар-дыр. Бистиң-биле кады чурттаар ужурлуг оон өске эр кижи бо чер кырында чок-тур. 32Ачавыска эзиртир арагадан ижиртип алгаш, ооң-биле эр-херээжен чоруктан кылыр болган-дыр бис. Ам канчаар, бодувустуң ачавыстан-даа болза, ажы-төлдүг болур бис». 33Ачазынга ол дүне эзиртир арага ижиртип алганнар. Улуг уруу чедип келгеш, ооң-биле удуп чыдып алган, а ачазы чүү болуп турарын – уруунуң ооң-биле чыдып алганын-даа, туруп чоруй барганын-даа – медереп билир харык чок болган. 34Эртенинде ол дуңмазынга мынча дээн: «Эрткен дүне ачам-биле мен удудум. Бо дүне база аңаа арагадан эзиртир ижиртип аалы. Сен келгеш, ооң-биле удуп чыдып аар сен. Ам канчаар, бодувустуң ачавыстан-даа болза, ажы-төлдүг болур бис». 35Ол дүне база ачазынга араганы эзиртир ижиртип алганнар. Бичии уруу чедип келгеш, ооң-биле удуп чыдып алган. Ачазы чүнү-даа билбес болган: уруунуң кажан кээп чыдып алганын-даа, кажан туруп чоруй барганын-даа.
36Шак ынчалдыр Лоттуң ийи уруу боттарының-на ачазындан иштелип алганнар. 37Улуг уруу оол божуп алгаш, ону Моав#19:37 Еврей дылда «Моав» деп ат «ададан» деп сөске дөмейлешкек. деп адап алган. Ол амгы моав чоннуң эгезин салган кижи болур. 38Бичии уруу база оол божуп алгаш, Бен-Амми#19:38 «Бен-Амми» деп ат «төрелимниң оглу» дээн уткалыг. деп адап алган. Ол амгы аммон чоннуң эгезин салган кижи болур.
Atualmente selecionado:
Эге дөс 19: TUV
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Институт перевода Библии, Москва, 2011