Génesis 15
15
Ndo Dio ndachro ixin ruchjee Abram naa chjan
1Are juexin batho kain jiꞌi, Ndo Dio nichjee Ndo Abram xraa ngathe naa kuthachrin. Ko ndachro Ndo:
—Xraonꞌa, Abram. Jaꞌan thi thjengijna jaꞌa, ko jaꞌan anto tsjé ruchjaꞌa.
2Abram batheꞌe ko ndachro:
—Nchana ko Ndo Diuna, ¿keꞌe nchao ruchjana?, ixin jaꞌan xruꞌin chjan chunda, ko Eliezer, thi juixin Damasco ko ncheꞌe xra ngajin na, yaa thi tasithueꞌe kain thi richunda.
3Kai ndachro Abram:
—Suixin, xruꞌin chjan chjana, mexinxin naa ni nchexrana guan nthiꞌi nchiania, sithueꞌe kain thi richunda jaꞌan.
4Ko Ndo Dio batheꞌe Ndo:
—Xaꞌan thi sithueꞌe kain thi richunda jaꞌa, ko jeꞌa xii jiꞌi.
5Ko bikao Ndo nduja ko ndachro Ndo:
—Tsjeꞌe ngajni ko thekin kunutse, ja̱ nchao tsekin ba. ¡Jañaa tsjexin chujni sachrjeninxin jaꞌa!
6Abram chunthia ngain Ndo Dio, mexinxin bikon Ndo ixin jeꞌe jian ixin chunthia ngain Ndo. 7Ko Ndo Dio kai ndache Ndo:
—Jaꞌan thi Ndo Diua. Jaꞌan bantsjexin Ur, rajnee ni caldeo, ixin ruchjaꞌa nunthe ndathjo.
8Ko Abram batheꞌe:
—Nchana ko Diuna, ¿kexreen nunanxin ixin jaꞌan sithuena nunthe yaa?
9Kuthimejan Ndo Dio ndache:
—Sikuꞌna naa kuxinthaa kunaꞌa, naa kuthentsa, naa kuleko kudaꞌa ko kanio ba ruchunda ba nii nano, kai sikuꞌna naa kuthoon ko naa kuxentha.
10Ko Abram guen kain kuxiigo teꞌi ko bikao ba ngain Ndo Dio, ko kunchjenga ba ko binthechunthe choo thi ngusinenxin kunchjenga ba, aro kunthua kunchjengaꞌa ba. 11Ko kuexiꞌin xrathe kunthachrjen ixin rujine ba kuxiigo digeꞌen teꞌi, aro Abram binchexraon ba. 12Ko are ukuexiꞌin kunthi̱e, Abram ndatse kuthachrin ko tabejua, are bisiandajin naa thi anto naxin xeꞌe ko anto xraon. 13Kuthimejan ndachro Ndo Dio:
—Rugunda tsunuꞌa ixin chujni sachrjeninxin jaꞌa sinthe na̱ ngain naa nunthe jeꞌa nuntheꞌe na̱. Ko nthiꞌa sinchencheꞌe na̱ na̱ xra, xraa chujni dikuchji, ko tangi sinchegatho na̱ na̱ noo renkia nano. 14Aro jaꞌan sinthaꞌa jie̱ ngain nunthe yaa, ko chujni sachrjeninxin jaꞌa tsjé ruchunda na̱ are sachrjexin na̱ nthiꞌa. 15Ko jaꞌa, are ujunchjan chrjuin tsunuꞌa ngathe ansean, ko are seꞌen ruxrabaa ngain chujnia. 16Ko are satho thi noo renkia nano, chujni sachrjeninxin jaꞌa rukjan na̱ ngain nunthe jiꞌi, ko ni amorreo are mee icha jianꞌa sincheꞌe na̱ ko itsixinaꞌa ko sinthaꞌa jie̱ ngain na̱.
17Ko are undakunaxin xeꞌe, Abram bikon naa thja jitja nchin, ko naa nthaa jiyaa xruꞌi ko dathugee xruꞌi ngayee kuxiigo kunchjenga. 18Ko ngain nchaꞌon maꞌo Ndo Dio kjuauthexin Ndo Abram ixin ndachro Ndo:
—Chujni sachrjeninxin jaꞌa sithuꞌe na̱ nunthe jiꞌi, ko tsexinxin nunthe ngain nda jithinga diꞌin Nilo jii ngain Egipto ko sekaxin nunthe ngain nda jithinga diꞌin Éufrates, 19thi nunthe jai te ni ceneo, ni cenezeo, ni cadmoneo, 20ni heteo, ni ferezeo, ni refaíta, 21ni amorreo, ni cananeo, ni gergeseo ko ni jebuseo.
Atualmente selecionado:
Génesis 15: plsNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2017, Wycliffe Bible Translators, Inc. All rights reserved.