Yoane 14
14
Yesu ni nzira yʼerĩhĩka uku Tata
1Sĩmũhanga-hangaye emitima yenyũ; mwĩkĩrĩraye Nyamuhanga, nage mũnyĩkĩrĩraye. 2Omo nyũmba ya Tata muli byumba bingi byʼerĩĩkalamo. Ngayakokotaya aho wenyũ, kumbe si kwenene, kumbe nabiribabwira. 3Kandi namayakokotya aho wenyũ, nasyaswasa, nʼeribatwala ewage; neryo imwatoka eribya aho nyiri. 4Kandi mũnasĩ enzira yʼeriya eyo ngaya. 5Toma mwamubwira ati, Mukama, Sĩtwasĩ eyo ukaya, twasyaminya enzira yo tuti kwehĩ? 6Yesu mwamubwira ati, Ĩngye indi nzira, ĩngye indi mwatsi wʼekwenene, ĩngye indi ngebe; sihali mundu ũkahĩka uku Tata ate kwĩngye. 7Kumbe mwabya mũnyasĩ, nga mwabiriminya Tata wage nibya. Nʼerĩtsũka lino mũmwasĩ, kandi mwabirimulolako.
8Fĩlĩpo mwamubwira ati, Mukama, ũtũkangaye Tata, ekyo kyasyatutolera. 9Yesu mwamubwira ati, Nabiribya nenyũ omugulu ungaha, nĩkwa sulitanyiminya kwehĩ Fĩlĩpo? Oyo wamanyilangira iniabirilangira Tata. Busana nakĩ ũkabũga uti, Ũtũkangaye Tata kwehĩ? 10Fĩlĩpo, sũlĩkĩrĩraya ko nyimatikene na Tata, na Tata kwʼamatikene ũkwʼĩngye kwehĩ? Ebĩnywa ngababwira sĩndĩbũgabyo omwʼiyihana lyage. Nĩkwa Tata oyumatikene nage akakola emĩbĩrĩ yiwe. 11Mũnyĩkĩrĩraye ko nyimatikene na Tata, na Tata amatikene ũkwʼĩngye. Kutse mwĩkĩrĩraye busana nʼemĩbĩrĩ ĩyoyene. 12Kwenene, kwenene ngababwira, oyũkanyĩkĩrĩraya, emĩbĩrĩ eyo ngakola, asyakolayo nibya; kandi asyakola emĩbĩrĩ eyĩrengĩre eyĩ, kusangwa ngaya uku Tata. 13Kandi nasyakola obuli mwatsi ogo mwasyabũlya omo lĩna lyage, Tata apipawe umu Mugala. 14Emyatsi yosĩ mũkabũlaya omo lĩna lyage, nasyakolayo.
Endagane yʼOmũlĩmũ Abũyĩrĩre
15Mwamanyanza, mwasyakenga ebihano byage. 16Kandi nasyabũlya Tata, naye asyabaha ogundi Mũwatĩkya, Omũlĩmũ wʼomwatsi wʼekwenene iniabya haguma nenyũ kera na kera. 17Ekihugo sikiritoka erĩmũkokya, kusangwa sikyemulolako, kutse erimuminya. Nĩkwa ĩnywe mũmwasĩ, kusangwa ĩkere nenyũ, kandi amatikene nenyũ.
18Sindiendĩsyabasĩga nga ngũbĩ; nasyaswasa ũkwʼĩnywe. 19Enyũma wʼakatambĩ kake ekihugo sikyendisyaswanyilolako, nĩkwa ĩnywe mwasyanyilolako; kusangwa nyiriho, nenyũ mwasyabyaho nibya. 20Oko kiro ekyo mwasyaminya ko nyimatikene uku Tata wage, nenyũ mumatikene ũkwʼĩngye nage nyimatikene ũkwʼĩnywe. 21Oyuwite ebihano byage, nʼerikengabyo, yo yukanyanza; kandi Tata wage asyanza oyukanyanza; nage nasyamwanza, nasyayĩkangya ukwʼiye. 22Yũda, oyute Ĩskarĩota, mwamũbũlya ati, Mukama, byamabya biti kwehĩ? uti, wasyayĩkangya ũkwʼĩtwe, ũteyĩkangaya oko kihugo kwehĩ? 23Yesu mwamũsũbĩrya ati, Omundu amanyanza asyakenga ekĩnywa kyage. Kandi Tata wage asyamwanza netu twasyamũhĩkako, ĩtwakokotya obwĩkalo bwetu haguma naye. 24Oyũtanyanzĩre sialikenga ebĩnywa byage. Kandi ekĩnywa ekyo mũkowa si kyage, nĩkwa ni kya Tata oyo wanyituma.
25Nabiribabwira emyatsi eyĩ omugulu nyikine haguma nenyũ. 26Nĩkwa Omũwatĩkya, Omũlĩmũ Abũyĩrĩre, oyo Tata asyatuma omo lĩna lyage, iye akandisyabakangĩrĩrya emyatsi yosĩ, kandi asyabĩbũkya emyatsi yosĩ eyo nababwira.
27Obuholo ngabasĩgĩra, ngabaha Obuholo bwage. Ngabahabo, butsira ngʼekihugo ko kikaha. Sĩmũhangahangaye emitima yenyũ, kandi simubahe. 28Momowa ngababwira nyiti, Ngagenda, kandi nasyaswasa ũkwʼĩnywe. Kumbe mulwe mũnyanzĩre, nga mwabiritsema, kusangwa ngaya uku Tata; kusangwa andengĩre. 29Lino nabiribabwira ebĩ bite byahĩka, neryo omugulu byasyahĩka, imwatoka erĩkĩrĩrya. 30Sindiendĩsyabũga nenyũ kandi bingi, kusangwa omũtabalĩ wʼekihugo akahĩka, kandi siawite ehamũlĩ ũkwʼĩngye. 31Ngoko Tata anyihana, ko ngakola nyitya, ekihugo kitoke eriminya ko nyanzĩre Tata.
Atualmente selecionado:
Yoane 14: KB80
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible in Kinandi © Bible Society of the Democratic Republic of Congo, and Bible Society of Uganda, 1980.