GENESIS 15
15
Abram sinah Pathian Thudântuk
1Chu nûn chun, Abram nih langhnâk a muh le, LALPA nih a sawnh mi a theih, “Abram, ṭih rîlmâl lah, vânduainâk ah mi ka nan hum lai le, lâwmman rokual tak ka nan pêk lai,” a ti.
2Abram nih a sâng le, “Chungnungchem LALPA, fa ka nei lêm lo mi, zei lâwmman ṭha me na ka pêk awt? Kei rotingtu chu Damaska khua mi Eliazer cho asi. 3Fa na ka pêk lo ruangah chun, ka to-aw mi pakhat hi ka neih tingtu ding asi ko,” a ti.
4Churawhchun, LALPA nih a sinah thu a sim nawlh mi chu a theih le, “Hi na to-aw Eliazer nih na ro â ting ding asi lo, nangmah fa ngelchel nih na ro chu â ting lai,” a ti. 5LALPA nih lênglei ah a suakpi le, a sinah, “Vân lei khi zauh le, ârfi tla khi rêl nik, khi zat khin na thlâk tla chu tam tak an um lai,” a ti.
6Abram nih LALPA a rinhsanh, churuang chun LALPA nih a lawmh le, a thinlung a tawng.
7Churawhchun, LALPA nih a sinah, “Kei LALPA, Babulon ram ah mi Kaldai tla umnâk Ur khua thawk hen hi ram hi nangmah tâ ah a nan pêk ding hen a nan suakpitu chu kasi,” a ti.
8Sikhawmsele, Abram nih chun, “Chungnungchem LALPA, ka tâ asi ding mi zeitin ka theih kho lai?” a ti.
9LALPA nih a sâng le, “Chaw pakhat, kêl pakhat, dawrâ chal pakhat, kum thum mi hep leh vaṭhu pakhat leh lâilêng pakhat hawng ka put,” a ti.
10Abram nih ran tla chu Pathian sinah a put le, a lâi ah a tan na le, anmah tan zâwn chiauah tlar nih hen a siah na le, vâ lam chu a tan na lo. 11Ruaklâwmmu tla chu sa ruak tla lakah an hawng ṭum le, Abram nih a dâwi na.
12Nî a hawng tlâ rawh chun, Abram chu a it thlit le, a lakah thil ṭihnungkâi leh lâukâi tak a hawng um. 13LALPA nih a sinah, “Na thlâk tla chu mi ram ah an um lai le, chunah chun sal an si lai le, kum zali nehsawh hen an um lai. 14Sikhawmsele, anmah nehsawhtu phun chu ka rêp na lai le, mi ram mi an hawng suak tikah chun neihnâk rokual tak an suakpi lai. 15Nang chu tar khên hen na dam lai le, thlangam tak hen na thi lai le, an vûi lai. 16San li an si lânlo chu hinah na thlâk tla an hawng kîr nawlh lai loh, Amor tla chu rêp leh nar an si khonâk ding an sual thlo lânlo chu,” a ti.
17Nî chu a tlâ le, a hawng mûi rawh, mei bêl lakah meikhû leh meifâr alh chu lâkkhatko ah a hawng lang le, sa vo chan mi karah anna zî lemang. 18Chun, chunah chun LALPA nih Abram sinah thudân a tuk rawh. Hi hâwi hen a ti; “Hi ram hi Aigupta ramri thawk hen Eufretis Tipi tiang na thlâk tla ka pêk rawh. 19Chubang chu hi tla hi an si: Kenit, Keniz tla, Kadmon tla, 20Hit mi, Periz mi, Rephaim, 21Amor mi, Kanaan mi, Girgasit mi leh Jebus mi ram tla an si.
Atualmente selecionado:
GENESIS 15: BCLBV
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bawm Common Language Bible © Bangladesh Bible Society, 2004. All rights reserved.